Europe

Baana ba Sukulu Baishile pa Nzubo ya Bufumu

Iness uji mu guledi 4 mu kyalo kya Finland, byo aumvwine kuba’mba mu kalasi bakesamba pa Bakamonyi ba kwa Yehoba pa kufunda pa bya bupopweshi, ponkapo wafukwilepo kwibambila kuba’mba bakaye na kumona biji Nzubo ya Bufumu. Baana ba sukulu ne mufunjishi batemenwe bingi uno mulanguluko.

Mulungu walondejilepo, baana ba sukulu 38 bayile na makinga ku Nzubo ya Bufumu palepele bingi. Mufunjishi kata ne bafunjishi babiji nabo bayile. Pa Nzubo ya Bafumu batainepo balongo babiji ne banyenga basatu. Byo bajilenga kajo, bano baana ba sukulu batendekele kwipuzha pa Nzubo ya Bufumu ne pa Bakamonyi amba: “Nanchi kupwila kwikela pano kwikala byepi?” Nga akya kibamba kikwabo kya ka? Baambilenga pa kibamba kya mabuku. Mambo ka ‘mu 6 o babena kutwezhezhamo 10’ pa kibumba?” Mambo kinembelo ya mwaka kyajinga Mateo 6:​10.

Uno sukulu wajinga na mukwekele wa kukanya banyike kuba kanwa. Onkao mambo, balongo batambishe vidyo muji tubantu to balenga wa kuba’mba Kupuma wa Kanwa kwa Kubula Kutaya Makofi (Beat a Bully Without Using Your Fists) pa jw.org. Bebatambishe ne bintu bikwabo pa Keyala wetu ne kwibajizhizha nyimbo ya Bufumu. Baikelepo jiola jimo.

Mufunjishi kata ne bafunjishi bakwabo ne baana ba sukulu baumvwine bingi bulongo. Mufunjishi kata wa watemenwe bingi biji pa Keyala wetu, kabiji walangulukile kuba’mba byakonsha kuwama bingi pa kufunjisha baana ba sukulu pa bya bupopweshi. Waumvwine bingi bulongo byo bamubujile kuba’mba ne baana ba sukulu bakwabo inge bakeba bakonsha kwiya na kumona Nzubo ya Bufumu. Kino kyalengejile mufunjishi wa kalasi mukwabo kwisamba na Bakamonyi pa juba jalondejilepo ne kwibepuzha inge bakonsha kuya na kumona Nzubo ya Bufumu.

Wataine kya Buneme ku Kyala

Ba Cristina bekala mu Romania, kechi bayilepo ku sukulu ne kabiji kechi bayukile kunemba ne kutanga ne. Bayanjile bingi kabiji batolaulanga bikopo ne mabotolo a pulasitiki ku kyala. Juba jimo bamwene kintu kibakebwile, wajinga buku waamba pa bya mu Baibolo wajinga na bipikichala byawama bya bantu baji na lusekelo. Balangulukile’mba: ‘Bantu bekala bibye kwafwainwa kuji ko batanwa pano pa ntanda.’ Ba Cristina bakebele kuyuka byajinga mu uno buku, onkao mambo baambijilepo umo kwibatangila uno buku. Byo baumvwine kuba’mba ubena kwamba pa bya bupopweshi, baumvwine bingi ku muchima kutama na mambo a kuba’mba bantu bataya ku kyala buku muji Byambo bya Lesa. Ba Cristina batwajijile kuya na kutolaula mabuloshuwa, matalakiti ne magazini. Amo ajingatu atuntulu, akwabo beatabawile. Bafunjile kutanga pa kuba’mba bayuke biji mu ano mabuku.

Mu kuya kwa moba, ba Cristina besambile na Bakamonyi, kabiji batendekele ne kufunda Baibolo. Ba Cristina baumvwine bingi bulongo byo bayukile kuba’mba Yehoba wibakoka kupichila mu mabuku alengulwile bantu. Batanwa ku kupwila kabiji bomvwa bingi bulongo pa byo bafunda. Kwitambwila magazini ne mabuku ne mabuloshuwa kwibaletela bingi lusekelo. Pano luno kechi baya na kukeba mabuku ku kyala ne. Kwambatu kine, ba Cristina bataine kya buneme ku kyala.

Kufunjila Baibolo “Mungye”

Pa juba pa juba lukelo ba Margret bayanga na kupitañana na kabwa wabo mu mungye mu Germany. Baambile’mba: “Nesambanga na bantu bapitanga. Inge bamweka kukasuluka, natendekanga kwisamba nabo pa bintu bya mu Baibolo.”

Juba jimo ba Margret bataine mwanamukazhi uji na myaka kukila pa 70 wayilenga na kabwa wanji. Ba Margret batendekele kwisamba na uno mwanamukazhi. Uno mwanamukazhi waumvwine bingi bulongo pa byo besambile kabiji wibabujile ba Margret amba ulomba kwi Lesa kabiji utanga Baibolo pa juba pa juba. Kufumatu pa jonka ja juba, bamonañananga jonse kabiji besambanga pa bya mu Baibolo. Juba jimo uno mwanamukazhi waipwizhe ba Margret amba: “Mambo ka o mwayukila byavula bya mu Baibolo?” Ba Margret bamubujile’mba ne Kamonyi wa kwa Yehoba.

Ba Margret javula bakebanga kuba’mba batatule kumufunjisha Baibolo uno mwanamukazhi, pano bino wakananga. Bino kechi bekilekele kwisamba nanji ne. Byo papichile bañondo bacheche, ba Margret baambijile uno mwanamukazhi jikwabo kuba’mba bamufunjishenga Baibolo. Pano uno mwanamukazhi popo ebabujile’mba ubena kukana mambo mwanamulume ye ekala nanji washikwa bingi Bakamonyi ba kwa Yehoba.

Juba jikwabo ba Margret byo bayile na kupitañana mu mungye basendele Baibolo ne buku wa Baibolo Ufunjisha. Byo bamwene awa mwanamukazhi, ba Margret baambile’mba: “Kechi mbena kukeba kuba’mba ne mufunjishenga Baibolo pa nzubo ne, pano mbena kukeba kuba’mba tufunjilenga Baibolo mungye.” Uno mwanamukazhi waswile kabiji waumvwine bingi bulongo kya kuba wajijile ne kujila. Uno mwanamukazhi uya na kufunda Baibolo “mungye” moba atanu na jimo mu mulungu. Kwesakanatu na byo bwakya jojo juba, ba Margret kimye kimo bafunjila mu sumbulenyi na tochi.

Wapukunya Mutwe

Nyenga Delphine mu Bulgaria wafunjishanga ba Irina Baibolo. Ba Irina batemenwe bingi byo bafunjilenga kabiji batendekele ne kuya jonse na kupwila. Bino bamwatawabo kechi bakebanga kuba’mba besambenga na Bakamonyi ne. Ba Delphine balekele kufunda kabiji kechi bajinga na jishinda ja kwisambilamo ne ba Irina byo bavilukijile pamo na kisemi ku muzhi mu Sweden ne. Bino bapainiya babiji ba Alexandra ba Rebecca basambakene ba Irina babujile kuyuka mulaka wa Swedish. Nyenga waingijishe buku wa Mambo Awama a ku Bantu ba Mikoka Yonse ne kwambila ba Irina kutanga kibaaba kya mu mulaka wa Bulgarian. Kepo na bukwasho bwa uno buku baambijile ba Irina inge bakeba kutambulanga mabuku mu mulaka wabo. Ba Irina bapukwinye mutwe na ngovu. Bano bano banyenga bayile mambo balangulukile’mba bakana.”

Ba Alexandra bavulukile ba Linda, banyenga ba ku Sweden bengijila mu Bulgaria baambile kuba’mba babena kwiya na kwibapempula mu milungu ya kulutwe. Balangulukile’mba ba Linda inge bakesambe pa bukine ne ba Irina mu mukala wabo, bakomvwa. Ba Linda byo bafikile bayile ne ba Alexandra na kumona ba Irina. Ba Irina babujile ba Linda amba balomba jonse bufuku kuba’mba Yehoba ebakwashe batwajijile kufunda Baibolo. Kimye kyonse basendanga buku wa Baibolo Ufunjisha wa mu mulaka wa Bulgarian. Bakebanga kumwesha Bakamonyi inge bebasambakana mu mukwakwa, pano bino kechi bamonañenepo na Bakamonyi ne. Ba Irina bajinga bingi na lusekelo byo batambwile mabuku a mu mulaka wabo wa Bulgarian!

Ba Linda baipwizhe ba Alexandra kyo balangulukijile kuba’mba ba Irina kechi bateleko muchima ne. Ba Alexandra baambile’mba ba Irina bapukunyinye ku mutwe kumwesha kuba’mba kechi babena kukeba ne. Ba Linda basekele ne kwibalumbulwila kuba’mba mu mulaka wa Bulgarian kupukunya mutwe ko kuswa, pa kuba kwinauna mutwe ko kukana. Onkao mambo, ba Irina batwajijila kufunda Baibolo mu mulaka wa Bulgarian, bakalekatu kufunda mu uno mulaka inge bakayuke mulaka wa Swedish. Pano bafunda byepi? Bafunda ne ba Delphine bonka bo bafundanga nabo kala kwingijisha vidyo.

Nsemi Wamulume uji na Byubilo Byawama

Jemima wikala ku Spain, wafunjile bukine byo ajingatu mwanyike. Bino byo afikizhe myaka ya kusemwa itanu na ibiji bwikalo bwanji bwaalukile. Ba inanji bafukwilepo kwikileka kwikala Kamonyi wa kwa Yehoba kabiji bakaine ne bashanji. Byo afikizhe myaka ya kusemwa jikumi na isatu, Jemima walekele kupwanañana na Bakamonyi kabiji wakananga byamukwashanga bashanji kuba’mba ekale na bulunda bwawama na Lesa.

Jemima byo akomene, watwelele mu bipanyi bilwilako “luusa lwa bantu” ne bya bumulwila ntanda na mulanguluko wakukwasha bantu bo babula kunemeka. Mu kuya kwa moba, Jemima waikalangatu kwa kubula kwingila, kepo bashanji ba Domingo batendekele kwingila nanji nkito ya kupenta.

Juba jimo byo baingijilenga, ba Domingo baambijile Jemima kuba’mba bamufunjishenga Baibolo. Wakaine ne kwamba’mba, ukebabula inge akakebe. Ba Domingo batelekanga ku Baibolo ye batangila jimo ne magazini saka babena kupenta, pa kuba mwanabo watelekanga ku nyimbo yatama kwingijisha foni saka avwala bya mu matwi.

Mu November mu 2012, ba Domingo basongwele jikwabo kabiji bebechile ku Sukulu wa Baibolo wa Bena Kilishitu Baji mu Masongola. Jemima waumvwine bingi bulongo Bashanji byo bebechile kuya na kufunda Sukulu waimena pa Baibolo ne kusha byonse ne kwinengezha kuya konse ko bakonsheshe kwibatuma. Kino kyalengejile Jemima kumona bukine byo bwafika bashanji pa muchima, kabiji wakebeshe bingi kuyuka kyalengela.

Jemima walekele kuteleka ku nyimbo yatama ne kutendeka kuteleka ku maselechi awama a bashanji. Watendekele ne kwipuzha mepuzho. Juba jimo ba Domingo bashanji byo bajinga peulu pa ndandalashi, Jemima wibambijile’mba: “Mwavulukamo byo nemubujile kuba’mba inge nkakebe kufunda Baibolo, nkemubula nyi? Pano luno mbena kukeba kutendeka kufunda.”

Ba Domingo baumvwine bingi bulongo. Mu January mu 2013, batendekele kumufunjisha Baibolo jibiji mu mulungu. Sukulu ye bebechileko watendekele mu April, bino ba Domingo batwajijile kutangijila lufunjisho lwa Baibolo kwingijisha vidyo. Jemima wayile na kutanwako ku kupwila kwikalako panyuma ya kupwisha sukulu, kabiji wiyowele bingi mutanchi yense wa kuno kupwila. Jemima wabatizhiwe pa 14 December mu 2013.

Jemima waambile’mba: “Yehoba watenkenya bingi, kabiji nayuka kuba’mba kechi wandengulwile ne. Wampa byo nabujile kukonsha kutana mu ntanda, balunda ba kine. Bwanabwankazhi bwa ntanda yonse bundengela kumusanchila bingi Yehoba pa butemwe bwanji bukatampe.”

Kupana Mushingi Kwanema Bingi

Pa 30 March mu 2014, mulongo Vasilii wa mu kisemi kya Betele mu Russia waingila myaka yavula wasapwijilenga na kobatanchikapo mabuku kwipi na ofweshi wa musampi kimye motoka wa bakapokola kyo aishile. Kapokola walupukile mu motoka ne kwambila ba Vasilii mu mutende kuba’mba baleke byo babena kuba mambo bantu babena kwijizhanya pa mwingilo wabo. Mukwabo kapokola wakopelenga byo besambilenga. Ba Vasilii bamwene kuba’mba kyawama kukokela kapokola kukila kwipachika nanji pa luusa lo baji nalo. Bantu bavula baimene na kutamba bibena kumweka. Ba Vasilii bayile, byo papichile moba abiji, bakebele kumonañana na mukulumpe wa bakapokola. Bebaswishishe. Byo besambilenga nanji, ba Vasilii basanchijile mukulumpe wa bakapokola pa mingilo yo bengila mu nyaunda ne pa byo besambile nabo mu mutende saka papita ne moba asatu. Uno mukulumpe wa bakapokola waalukile ne kwambila mukulumpe wa kibiji amba: “Pa myaka 32 yonaingila mu bukapokola nkyangye kumvwapo muntu nangwa umo witusanchila pa uno mwingilo!” Byo besambilenga, bamulengejile uno mukulumpe wa bakapokola kumvwisha kuba’mba mwingilo wa kusapwila baswisha mu mizhilo. Mukulumpe wa bakapokola waipwizhe ba Vasilii ene mambo o babujile kumukaina kapokola wibakainyenga kusapwila nangwa kya kuba bayukile kuba’mba baji na luusa lwa kusapwila. Ba Vasilii bakumbwile’mba: “Nanemeka bingi bakapokola. Akilangulukaitu byo kyafwainwe kumweka ku bantu bonse bamwenengako inge kya kuba naambijile kapokola kuba’mba kechi wayuka byaamba mizhilo ne.” Mukulumpe wa bakapokola ne wakibiji wanji baumvwine bingi bulongo ne kubula ba Vasilii amba kechi bakebakatazhapo jibiji pa kusapwila na kyo batanchikapo mabuku ne.