Milaye ya Bufumu​—Kulenga Bintu Byonse Kwikala ke Bipya

MWAAPA apele mukatampe wapya ku kichi. Mwaumvwa wanunkila saka mukyangye kwijibika mu ntumbe. Mwaji kutendeka kala na kwingila, bino kechi mwakoka ne kabiji mu kikeba kwingila. Bainenu nabo baji kipikipi na ku kichi, babena kwingila saka besamba na ba mu kisemi kabiji ne balunda babena kwimukwashako kwapa. Babena kumwekatu bwanyike byonka byo mwibamonanga kala saka mukiji banyike. Kimukatazha kuswa kuba’mba mwibamwene saka bakota mu ntanda ya kala. Mwamwene byo banyaine na mambo a kikola ne kwibakwata ku kuboko byo bafwilenga. Kabiji byo mwajinga ku manda, mwajijile bingi. Bino, ke bomi pamo na bantu bakwabo bafwile kabiji baji na bumi bwawama.

Twayuka kuba’mba bimye bya uno mutundu bikafika. Twaketekela bino mambo milaye ya Lesa ifika. Mu kino kitango, tusakufunda pa milaye imo ya Bufumu byo ikafika mu kimye kya kulutwe, nkondo ya Amagedonyi saka ikyangye kutendeka. Tusakwisamba ne pa milaye imo yawama ya Bufumu ikafika panyuma ya Amagedonyi. Byo kikekalapo kintu kya lusekelo kumona Bufumu bwa Lesa ke bulame ntanda yonse ne kulenga bintu byonse ke bipya!