Byambo Bikwabo bya mu Mutanchi wa Kupwila kwa Bwikalo ne Mwingilo
APRIL 1-7
Bya Buneme Biji mu Mambo a Lesa | 1 KOLINDA 7-9
“Bukatanda ne Buzhike ke Bupe”
Ingijishainga Bulongo Bukatanda Nangwa Buzhike Bwenu
3 Muntu wabula kutwela mu masongola wikala na kimye kyabaya ne bwana bwa bene kukila yewa uji mu masongola. (1 Ko. 7:32-35) Ano onse mashuko akonsha kumulengela kwingila pakatampe mu mwingilo wanji, kumwesha butemwe bwanji ku bavula ne kufwenya kwipi ne Yehoba. Onkao mambo, bena Kilishitu bavula banemeka bingi mfweto iji mu kwikala katanda nangwa muzhike kabiji bafuukulapo ‘kutambula’ kino kya bupe ne kwikala nakyo pa kimye kimo. Bakwabo nabo patanshi kechi bafuukwilepo kwikala bakatanda nangwa bazhike ne, pano bino na mambo a kupimpulwa kwa bwikalo bwabo, balombele ne kulangulukapo kabiji ne kutana kuba’mba na mambo a bukwasho bwa Yehoba nabo bakonsheshe kutekanya. Mu jino jishinda, baikejile monka mwayijile bwikalo bwabo kwakubula kusongola nangwa kusongolwa.—1 Ko. 7:37, 38.
Bishinka Bikatampe Kufuma mu Makalata Anembejilwe Bena Kolinda
7:33, 34—Ñanyi bintu “bya pano pa ntanda” byatapo muchima awa wasongola nangwa kusongolwa? Paulo waambilenga pa bintu bya mu bwikalo bya pa juba pa juba byo atapo muchima mwina Kilishitu uji mu masongola. Abino byavwangamo kajo, bya kuvwala ne nzubo, bino kechi bintu bya pano pa ntanda byatama byafwainwa kuchinuzhuka mwina Kilishitu ne.—1 Yoa. 2:15-17.
w96 10/15 12-13 jifu. 14
Bukatanda ne Buzhike Bulengela Kwingijila Lesa kwa Kubula Kutabankana
14 Mwina Kilishitu muzhike nangwa katanda ufuukulapo kubula kusongola nangwa kusongolwa na mambo a kulondela bisakasaka muchima wanji aye mwine kechi “wakizhamo kuba bulongo” kukila bena Kilishitu basongola nangwa kusongolwa ne. Mambo aye wafuukulapo kwikala katanda nangwa muzhike kechi “na mambo a Bufumu” ne, bino na mambo a bya kusakasaka byanji mwine. (Mateo 19:12) Mwanamulume nangwa mwanamukazhi wabula kusongola nangwa kusongolwa wafwainwa ‘kuta muchima ku bintu bya Nkambo,’ pa kuba’mba “atokeshe Nkambo ku muchima,” ne “kutesha muchima ku kwingijila Nkambo kwa kubula bya kumutabakanya.” Kino kilumbulula kwingijila Yehoba ne Kilishitu Yesu kwa kubula kutabankana. Kuba bino ko kwakonsha kulengela bena Kililshitu bazhike ne bakatanga “kukizhamo kuba bulongo” kukila bena Kilishitu baji mu masongola.
lvs 251
Byambo byo Balumbulula
Bimye bimo, bena Kilishitu bamo bafuukulapo kwikana nangwa kya kuba kechi paji mambo a bulalelale ne. (1 Kolinda 7:11) Bishinka biji panshipo byakonsha kulengela mwina Kilishitu kufuukulapo kwabana na mwinakwanji.
• Kubula kukwasha kisemi kyanji: Inge mwanamulume keabule kumwena kisemi kyanji kya kuba kisemi kyanji kechi kiji na bya kuja nangwa mali ne.—1 Timoti 5:8.
• Umvwe washinta bingi: Kubika bumi bwa mwinakwanji mu kizumba.—Ngalatiya 5:19-21.
• Umvwe wamona’mba bulunda bwanji ne Yehoba buji mu kizumba: Ko kuba’mba mwanamulume nangwa mwanamukazhi ubena kukanya mukwabo kuba’mba aleke kwingijila Yehoba.—Byubilo 5:29.
w00 7/15 31 jifu. 2
Mwakonsha Kwikala na Byubilo Byawama mu ino Ntanda Yatama
Banyike kechi bafwainwa kupupumina kutwela mu masongola na mambotu a kilaka kya kwilaala ne. Bantu babiji babena kutwela mu masongola bachipa luchipo. Onkao mambo, pa kuba’mba balame luno luchipo bafwainwa kukoma mu maana. (Ntendekelo 2:24) Kyanema bingi kupembelela ‘kupitaila pa jifumbi ja bwanyike’ kimye kilaka kya kwilaala po kibaya bingi, mambo kusongola nangwa kusongolwa saka ukijitu mwanyike kwakonsha kulengela kubula kufuukulapo bulongo. (1 Kolinda 7:36) Kabiji kyakonsha kwikala bumbulwamaana inge mwanamulume nangwa mwanamukazhi wafikilamo kusongola nangwa kusongolwa walenga mambo a bulalelale na mambo a kuba’mba kechi wakitaana wa kutwela nanji mu masongola ne!
APRIL 8-14
BYA BUNEME BIJI MU MAMBO A LESA | 1 KOLINDA 10-13
“Yehoba wa Kishinka”
Mepuzho Afuma ku Batanga
Mutumwa Paulo wanembele’mba Yehoba “kechi ukemuleka’mba mwesekwe lweseko lwakila pa bulume bwenu ne.” (1 Ko. 10:13) Nanchi kino kyalumbulula’mba Yehoba umwena jimo meseko o twakonsha kuchinchika ne kwitusajila o tukapitamo nyi?
▪ Akimonai byakonsha kuba muntu inge kealanguluke bino. Mulongo umo, wajinga na mwana wamulume wiipayile, washikishe’mba: ‘Nanchi ko kuba’mba Yehoba wamwenejile jimo amba amiwa ne mwinakwami twakonsha kuchinchika inge mwanetu wiipaya nyi?’ Nanchi kujipo bishinka byafwainwa kwitulengela kulanguluka’mba Yehoba ulengela bintu kwitumwekela mu jino jishinda nyi?
Inge twapitulukamo bulongo mu byambo byanembele Paulo pa 1 Kolinda 10:13, kyo tutaanapo ke kino: Kafwapo kishinka kya mu Binembelo kyafwainwa kwitulengela kulanguluka’mba Yehoba umwena jimo meseko o twakonsha kuchinchika ne kwitusajila meseko o tukapitamo ne. Twayai twisambe pa bishinka bina bitulengela kwamba bino.
Kitanshi, Yehoba wapa bantu luusa lwa kwifuukwila bintu. Ukeba’mba twisajilenga bintu byo tukeba kuba mu bwikalo bwetu. (Mpitu. 30:19, 20; Yosh. 24:15) Inge twasalapo kuba byawama, twakonsha kulomba Yehoba kwitutangijila. (Maana 16:9) Bino inge twasalapo jishinda jatama, tukemwena makatazho akafumamo mu byo twasalapo. (Nga. 6:7) Umvwe Yehoba witusajilanga meseko o twakonsha kupitamo, ko kuba’mba ubena kwitwangata luusa lwetu lwa kwifuukwila bintu.
Kya bubiji, Yehoba kechi witufya pa kuba’mba tubule kupita mu makatazho eya na mambo a “bimye ne bintu bya kubula kuketekela” ne. (Sapwi. 9:11) Bintu byatama byakonsha kwitumwekela kwa kubula kuketekela, kampe na mambo a kuba twajinga pa mpunzha yatama. Yesu waambilepo pa bantu 18 bafwile na mambo a kuba kyamba kibaponejile ne kwibepaya, kabiji waambile’mba Lesa kechi ye walengejile luno lufu ne. (Luka 13:1-5) Nanchi twakonsha kwamba’mba Lesa usajila jimo bantu bakapuluka ne bakafwa mu bya malwa bya kubula kuketekela bikamweka kulutwe nyi? Ine.
Kya busatu, twafwainwa kwifuukwilapo atweba bene kwikala ba kishinka nangwa ne. Vulukai kuba’mba Satana wamba’mba aba bonse bengijila Yehoba kechi bakonsha kutwajijila kwikala ba kishinka kwi Yehoba inge bapita mu meseko ne. (Yoba 1:9-11; 2:4; Lum. 12:10) Inge Yehoba wabula kwituswisha kupita mu makatazho amo o amona’mba kechi twakonsha kuchinchika ne, nanchi kino kechi kyakonsha kumwesha’mba byaambile Satana bya kine nenyi?
Kya buna, Yehoba kechi wikalatu na kumwena jimo bintu byonsetu biketumwekela ne. Bantu bamba’mba Lesa umwena jimo byonse bikamweka kulutwe, o ene mambo o balangulukila’mba witusajila meseko o tukapitamo. Bino Baibolo kechi byo byo aamba ne. Ibyo kuba’mba Lesa wakonsha kumona bintu bya kulutwe. (Isa. 46:10) Bino Baibolo umwesha kuba’mba ufuukulapo mwine byo akeba kumona pa bya kulutwe. (Nte. 18:20, 21; 22:12) Onkao mambo, nangwa kya kuba Lesa uji na bulume bwa kumona bya kulutwe, bino wituswisha kwifuukwila bintu. Kechi twakonsha kukumya pa kino ne, mambo Lesa wanemeka luusa lwetu lwa kwifuukwila bintu, kabiji kimye kyonse wingijisha bulume bwanji mu kwesakanya.—Mpitu. 32:4; 2 Ko. 3:17.
Onkao mambo, nanchi byambo byanembele Paulo bya kuba’mba, “Lesa . . . kechi ukemuleka’mba mwesekwe lweseko lwakila pa bulume bwenu ne,” byatala mwepi? Paulo waambilenga pa byuba Yehoba kimye kyo tubena kupita mu meseko, kechi byo oba saka tukyangye kupita mu meseko ne. Byambo bya kwa Paulo bitukwasha kushiinwa’mba nangwa tupite mu meseko a mutundu ka, Yehoba uketukwasha inge twamuketekela. (Sala. 55:22) Byambo bya kwa Paulo byaimena pa bishinka bibiji bya mu Binembelo.
Kitanshi, meseko o tupitamo ke meseko apitamo ne “bantu bakwabo.” Kino kyalumbulula’mba makatazho o tupitamo o apitamo bantu mu ino ntanda yatama. Inge twaketekela mwi Lesa, twakonsha kuchinchika ano meseko. (1 Pe. 5:8, 9) Saka akyangye kwamba byambo biji pa 1 Kolinda 10:13, Paulo waambile pa meseko apichilemo bena Isalela kimye kyo bajinga mu kiselebwa. (1 Ko. 10:6-11) Meseko apichilemo bena Isalela kechi akijile bulume bwabo bwa kuchinchika ne. Bimye bina, Paulo waambile’mba “bamo” balengele mambo. Kyatamineko kya kuba’mba bena Isalela bamo balengele mambo na mambo a kuba kechi baketekejile mwi Lesa ne.
Kya bubiji, “Lesa wa kishinka.” Mashimikila a mu Baibolo aamba pe Lesa byo akwashishe bantu banji amwesha’mba aye umwesha butemwe bubula kwaluka ku “boba bamutemwa kabiji balama mikambizho yanji.” (Mpitu. 7:9) Kabiji amwesha kuba’mba Lesa ulama milaye yanji kimye kyonse. (Yosh. 23:14) Na mambo a kuba Lesa wa kishinka, bonse bamutemwa ne kumukookela bakonsha kuketekela’mba inge kebapite mu meseko, aye ukalama ino milaye yanji ibiji: (1) Kechi ukaswisha lweseko kutwajijila kukila pa bulume bwabo bwa kuchinchika ne, kabiji (2) ‘ukebamwena jishinda’ ja kuchinchikilamo.
Inge bantu baketekela mwi Yehoba, aye wibamwena byepi jishinda ja kuchinchikilamo meseko? Inge Lesa mwine wakeba, wakonsha kufumyapo lolo lweseko. Bino vulukai byaambile Paulo, amba: “Aye [Yehoba] ukemumwena jishinda ja kuchinchikilamo.” Onkao mambo, javula ‘witumwena jishinda’ kupichila mu kwitupa bintu bya kwitukwasha kuchinchika meseko. Akimonai mashinda amo Yehoba mo akonsha kwitumwena jishinda ja kuchinchikilamo:
▪ “Witutekenesha mu meseko etu onse.” (2 Ko. 1:3, 4) Yehoba wakonsha kwitutekenesha ne kukookolosha michima yetu kupichila mu Mambo anji, mupashi wazhila, ne na kajo ka ku mupashi ketupa kalume wa kishinka.—Mat. 24:45; Yoa. 14:16, tubyambo twa munshi, Loma 15:4.
▪ Wakonsha kwitutangijila na mupashi wazhila. (Yoa. 14:26) Inge ketupite mu meseko, mupashi wazhila wakonsha kwituvululamo Binembelo ne mafunde a mu Baibolo pa kuba’mba tukonshe kufuukula bintu bulongo.
▪ Wakonsha kutuma bamalaika banji amba betukwashe.—Hebe. 1:14.
▪ Wakonsha kwingijisha bena Kilishitu bakwetu kwitutekenesha na byambo byabo ne bukwasho bwabo, pa kuba’mba ‘betukoseshe.’—Kolo. 4:11, tubyambo twa munshi.
Onkao mambo, nanchi byambo bya kwa Paulo byanembwa pa 1 Kolinda 10:13 byatala mwepi? Yehoba kechi usajila jimo meseko o twakonsha kupitamo ne. Bino inge ketupite mu meseko, twafwainwa kushiinwa’mba: Inge twaketekela mwi Yehoba, aye kechi ukaswisha meseko etu kutwajijila kukila pa bulume bwetu bwa kuchinchika ne; uketumwena jishinda ja kuchinchikilamo. Kino kitutekenesha bingi.
Mepuzho Afuma ku Batanga
Mambo ka Kinembelo kya 1 Kolinda 10:8 o kyaambila’mba bena Isalela 23,000 bo bafwile mu juba jimo na mambo a kuba bulalelale, bino Kubala 25:9 waamba’mba bajinga 24,000?
Kuji bishinka byavula byalengejile ano manambala kupusana byonka byo baamba mu bino byepelo. Kishinka kisakwitukwasha kumvwisha ke kya kuba’mba nambala iine ya bena Isalela bafwile yajinga pakachi ka 23,000 ne 24,000, kino kyo kilengela binembelo kwamba pa ano mambala onse abiji.
Langulukai pa kishinka kikwabo. Mutumwa Paulo waambile pa jishimikila ja bena Isalela bajinga mu Shitima kuba’mba lwajinga lujimuno ku bena Kilishitu ba mu Kolinda wa kala. Mu Muzhi wa Shitima mwaikalanga bantu bajinga na byubilo bincha bya bulalelale. Paulo wanembele’mba: “Kechi tubenga bulalelale byonka byo baubilenga bamo bulalelale ne, kya kuba bantu 23,000 bafwile mu juba jimo.” Mu kino kinembelo, Paulo waambiletu pa bantu Yehoba bo aipayile na mambo a kuba bulalelale. Paulo waambile’mba bajinga 23,000.—1 Kolinda 10:8.
Bino kinembelo kya Kubala kitango 25 kitubuula’mba “bena Isalela batendekele kupopwela Baela wa ku Peola, kabiji bukaji bwa Yehoba bwabuukijiile bena Isalela.” Kepo Yehoba akambizhe Mosesa kwipaya “bakulumpe ba bano bantu bonse.” Mosesa naye wabuujile bamitonyi kuba byonka byamukambizhe Lesa. Kabiji “mwalo wapwile” Finease byo aipayile mwina Isalela waletele mwanamukazhi mwina Mijanyi mu kampu.” Jino jishimikila japwa na byambo bya kuba’mba: “Bantu bafwile ku kino kinkunka, bajinga 24,000.”—Kubala 25:1-9.
Kyamweka nambala yo baamba mu Kubala yavwangilemo “bakulumpe ba bano bantu bonse” bo baipayile ku bamitonyi ne bo baipayile kwi Yehoba mwine. Kyamweka bakulumpe bo baipayile ku bamitonyi bajinga kiumbi kimo, kabiji bo balengela kibelengelo kya bantu bonse bo baipayile kufika ku 24,000. Kana kuba bulalelale, kwivwanga mu bijiilo bya kupopwela bankishi nangwa kuswisha bantu baubilenga byubilo byatama ko kwalengejile bakulumpe ba bantu bonse kwibapamo mambo, kechi twayuka ne. Bino kishinka ke kya kuba’mba “batendekele kupopwela Baela wa ku Peola.”
Shayuka wa Baibolo umo waambile’mba kyambo kya kuba’mba “batendekele,” kilumbulula “kwitemwa na muntu.” Bena Isalela bajinga kisaka kipaine kwi Yehoba, bino byo “batendekele kupopwela Baela wa ku Peola,” baonawine bulunda bwabo ne Lesa. Byo papichile myaka nobe 700, Yehoba waingijishe ngauzhi Hoseya kwamba pa bena Isalela amba: “Abo bayile kwi Baela wa ku Peola; bepaine abo bene ku nkishi wa bunya, kabiji baikele ba bunya nobe kyonkakya kintu kyo batemenwe.” (Hosea 9:10) Bonse baubanga bino, Yehoba wafwainwe kwibakambula. Kino kyo kyalengejile Mosesa kuvululamo bena Isalela amba: “Mwimwenejile byaubile Yehoba pa mambo a Baela wa ku Peola; Yehoba Lesa wenu waipayile banabalume bonse bajinga mwi anweba baongolokejile kwi Baela wa ku Peola.”—Mpitulukilo ya mu Mizhilo 4:3.
Mepuzho Afuma ku Batanga
Nanchi musapwishi wa mukazhi wa Bufumu wafwainwa kuvwala kintu ku mutwe inge ubena kutangijila lufunjisho lwa Baibolo saka paji musapwishi wa mulume nyi?
▪ Mu mutwe wa “Mepuzho Afuma ku Batanga” wanembelwe mu Kyamba kya Usopa kya Kibemba kya July 15, 2002, kyaambile’mba nyenga wafwainwa kuvwala kintu ku mutwe umvwe ubena kutangijila lufunjisho lwa Baibolo saka paji musapwishi wa mulume wabatizhiwa nangwa wabula kubatizhiwa. Kulangulukapo jikwabo pa uno mutwe kwamwesha’mba uno mukambizho wafwainwa kupimpulwako.
Umvwe musapwishi wa mulume wabatizhiwa waya na nyenga ku lufunjisho lwa Baibolo nyenga lo afunjisha jonse, nyenga wafwainwa kuvwala kintu ku mutwe. Umvwe wauba kino umwesha mushingi ku lunengezho lwa Yehoba lwa bumutwe mu kipwilo kya bena Kilishitu mambo ubena kwingila mwingilo wafwainwa kwingila mulongo. (1 Ko. 11:5, 6, 10) Nangwa wakonsha kwambila mulongo kutangijila lufunjisho inge mulongo wafikilamo kabiji wakonsha kuba bino.
Kabiji inge musapwishi wa mulume wabula kubatizhiwa kabiji wabula mwatawanji waya na nyenga ku lufunjisho lwa Baibolo nyenga lo afunjisha jonse, mwayila Binembelo nyenga kechi wafwainwa kuvwala kintu ku mutwe ne. Nangwa byonkabyo, jiwi ja mu muchima ja banyenga bamo jakonsha kwibambila kuvwala kintu ku mutwe nangwatu mu bimye bya uno mutundu.
APRIL 22-28
BYA BUNEME BIJI MU MAMBO A LESA | 1 KOLINDA 14-16
“Lesa ‘Ukekala Bintu Byonse ku Bantu Bonse’”
w98 7/1 21 jifu. 10
“Lufu Bakeluzhiya”
10 Byambo bya kuba’mba “ku mpelo” bilumbulula ku mpelo ya Bukalama bwa Myaka Kiumbi bwa Kilishitu, kimye Yesu kyo akabwezha Bufumu kwi Lesa, aye Shanji. (Lumwekesho 20:4) Pa kikye kimye, Lesa ukoba byo akebelenga ko kuba’mba ‘kukonkanya pamo jibiji bintu byonse mwi Kilishitu.’ (Efisesa 1:9, 10) Nangwa byonkabyo, Kilishitu patanshi ukonauna “makafulumende ne luusa lonse ne bulume bonse” bilwisha Bumfumu bwa Lesa. Kino kyavwangamo bintu byavula, kechi kulwatu nkondo ya Amagedonyi ne. (Lumwekesho 16:16; 19:11-21) Paulo waamba’mba: “[Kilishitu] wafwainwa kwikala mfumu kufikatu ne kimye Lesa kyo akabika balwanyi bonse munshi ya maulu anji. Kabiji mulwanyi wapelako, ko kuba’mba lufu, bakeluzhiya.” (1 Kolinda 15:25, 26) Bundengamambo ne lufu byaletele Adama byonse bakebifumyapo. Kabiji Lesa ukasangula bonse baji mu “bilende.”—Yoa. 5:28.
Bufumu Bwafikizha Kyaswa Muchima wa Lesa Pano pa Ntanda
21 Ibyepi pa bifuma mu bundengamambo ne kukolwa, ko kuba’mba lufu? Uno ye “mulwanyi wapelako,” mulwanyi usenda bantu bambulwakulumbuluka. (1 Ko. 15:26) Nanchi Yehoba wakonsha kukankalwa kufumyapo uno mulwanyi ko kuba’mba lufu nyi? Monai byaambijile jimo Isaya amba: “Lesa ukamina lufu myaka ne myaka, kabiji Nkambo Mfumu Yehoba ukashiimuna mipolo ku meso a bantu bonse.” (Isa. 25:8) Nanchi mwakonsha kufwanyikizha kino kimye nyi? Kechi kukekala bijilo, bilende nangwa mipolo ya bulanda ne! Kupusanako na bino, kukekala mipolo ya lusekelo Yehoba byo akafikizha mulaye wanji wa kusangula bafwa! (Tangai Isaya 26:19.) Ne ku mpelo, byonse byaleta lufu bikekala ke kafwako.
Kukekala Mutende pa Myaka Kiumbi Kimo ne Myaka Yonsetu
17 Kimye ‘Lesa kyo akekala bintu byonse ku bantu bonse’ kikekala kimye kya lusekelo lukatampe lwa kukankalwa ne mwakwilulumbulwila. Nga kino kilumbulula ka? Akilangulukai pa kimye kya mu Edena ba Adama ne Evwa kyo bajinga balumbuluka, kabiji saka baji lubaji lwa kisemi kya Yehoba kya bilengwa byonse kya mutende kabiji kyakwatankana. Yehoba, aye Mfumu wa Bilengwa Byonse, walaminenga bilengwa byanji byonse, ko kuba’mba bamalaika ne bantu pamo. Besambanga nanji bene, kumupopwela kabiji wibapeshanga. Wajinga “bintu byonse ku bantu bonse.”
w12 9/1 9, kakitenguluzha
Nanchi Mutumwa Paulo Wakainyenga Banabakazhi Kwamba Nyi?
Mutumwa Paulo wanembele amba: “Banabakazhi bazhindame mu bipwilo.” (1 Kolinda 14:34) Bino byambo bilumbulula ka? Nanchi Paulo wibalengulwilenga nyi? Ine. Mambo kimye kimo Paulo waambile kuba’mba banabakazhi nabo bakonsha kufunjisha. (2 Timoti 1:5; Titusa 2:3-5) Mu nkalata yo anembejile bena Kilishitu mu Kolinda, Paulo waambijile banabalume ne banabakazhi bajinga na bya bupe bya kwamba ne bya kwaula bungauzhi kuba’mba bafwainwa “kuzhindama” inge mukwabo wa mu lwitabilo ubena kwamba. (1 Kolinda 14:26-30, 33) Kyamweka bena Kilishitu bamo babakazhi bajinga bingi na kizaku pa bukine bo bafunjile kya kuba bachibikizhanga ne ñambi ubena kwamba na kwipuzha mepuzho kwesakana na byajinga kisho mu oa moba. Pa kuba’mba kubulenga bimvulañanya pa kupwila, Paulo watundaikile banabakazhi “kwipuzha bamwatawabo ku mazubo.”—1 Kolinda 14:35.
it-1 1197-1198
Mubiji Ubula Kubola
Byonkatu Yesu byo ajinga kimye kyo bamusangwile, bashingwa nabo pa kusangulwa kechi bekalatu bilengwa bya mupashi biji na bumi bwa myaka ne myaka ne, bino bekala ne na mibiji ibula kufwa ne kubola. Na mambo a kutwajijila kwikala bakishinka kufikatu ne byo bafwa na mibiji ibola ya bantu, pa kwibasangula bebapa mibiji ya mupashi ibula kubola 1 Kolinda 15:42-54. Onkao mambo, kwikala na mubiji ubula kufwa kulumbulula kuba’mba bakekala myaka ne myaka kabiji kechi bakonsha kwibepaya ne. Kabiji byambo bya kuba’mba mubiji ubula kubola kyamweka bilumbulula mubiji Lesa ye ebapa ubula kubola, konaika nangwa konaunwa. Onkao mambo, kyamweka Lesa wibapa bulume bulengela mubiji kwilama aye mwine, kwa kubula kufumya bulume ku bintu bikwabo byonka biji bilengwa bya Lesa bikwabo biji na mibiji ya nyama ne mashi, ne biji na mibiji ya mupashi. Nangwa kya kuba baji na mibiji yalengwa mu jino jishinda, nabo kechi betolwela kwi Lesa ne, bino batwajijila kumukookela byonka byuba Kilishitu Yesu ye batongola kwikala mutwe wabo, utwajijila kukookela kyaswa muchima wa Shanji ne kulondela lutangijilo lwanji.—1Ko 15:23-28; kabiji monai kubula kufwa; mweo.
APRIL 29–MAY 5
BYA BUNEME BIJI MU MAMBO A LESA | 2 KOLINDA 1-3
“Yehoba ye ‘Lesa wa Lutekenesho Lonse’”
“Jijilainga Pamo na Boba Bajila”
4 Shetu uji na lusa lukatampe naye wayuka byo kyumvwanyika inge muntu wafwa, mambo kwajinga balunda nanji bafwile nabiji Abalahama, Izaka, Yakoba, Mosesa ne Mfumu Davida. (Bala. 12:6-8; Mat. 22:31, 32; Byu. 13:22) Mambo a Lesa etubuula’mba Yehoba ukebesha bingi kusangula bano balunda nanji. (Yoba 14:14, 15) Bakekala bingi na lusekelo ne butuntulu bwa mubiji bwawama. Kabiji vulukai kuba’mba Mwana Lesa ye atemwisha wafwile lufu lwatama bingi. (Maana 8:22, 30) Kyakatazha ne kufwanyikizha Yehoba byo kyamukolele ku muchima pa kumona Mwananji byo afwilenga.—Yoa. 5:20; 10:17.
“Jijilainga Pamo na Boba Bajila”
14 Kyakatazha bingi kuyuka byambo bya kwamba ku muntu uji bingi na bulanda. Nangwa byonkabyo, Baibolo waamba’mba “byambo bya muntu wa maana bibukañana.” (Maana 12:18) Bavula bataana byambo bya lutekenesho byo bakonsha kwambila muntu uji na bulanda mu buloshuwa wa Kizungu wa kuba’mba When Someone You Love Dies. Nangwa byonkabyo, kintu kyanema kyo mwafwainwa kuba ke ‘kujijila pamo na boba bajila.’ (Loma 12:15) Ba Gaby bafwishishe bamwatawabo baambile’mba: “Javula ñendatu na kujila. O ene mambo o kintekenesha inge bakwetu kebanjijishepo. Pa bimye bya uno mutundu, mmona kuba’mba kuji bakwetu bomvwa bulanda bo nji nabo.”
Kukeba Bishinka Bikwabo Byanema
Mepuzho Afuma ku Batanga
Nga “kayukilo” ne “katetesho” katambwila bena Kilishitu bashingwa kufuma kwi Lesa ko ka ka?—2 Ko. 1:21, 22; tubyambo twa munshi.
▪ Kayukilo: Kwesanakana na buku umo, kyambo kya Kingiliki kyatuntulwa’mba “kayukilo” kiji pa 2 Kolinda 1:22 bekingijishanga mu bya mambo ne bya busulu,” pa kumwesha’mba “mwapanako mali ku nkongole, mwapanako mali atanshi nangwa’mba mwaswa lulayañano. Kuba bino ko kwamweshanga’mba mwaswa kupota kyokyo kintu nangwa kuswa lulayañano.” Kwesakana na byaamba kinembelo kya 2 Kolinda 5:1-5, bena Kilishitu bashingwa abo batambula kyo bebalaya nangwa’mba mfweto yabo yonse inge bavwala mubiji ubula kubola mwiulu. Kino kilambu kyavwangamo ne kwikala na bumi bwa kubula kufwa.—1 Ko. 15:48-54.
Mu Kingiliki kya mu ano moba, kyambo kipasha na kino bekingijisha ne pa kwamba pa kambalaminwe kamwesha’mba mwanamukazhi bamwipanguzha. Kino kyayilamo bingi pa kwamba pa bakekala musongwa wa kwa Kilishitu.—2 Ko. 11:2; Lum. 21:2, 9.
▪ Katetesho: Mu moba a kala, katetesho ko ko bafwachikangako pa kumwesha amba akyo kipe kyenu, pa kumwesha bukishinka nangwa’mba mwaswa lulayañano. Bashingwa bebabika “katetesho” ka kifwanyikizho na mupashi wazhila kamwesha’mba ke bantu ba Lesa. (Efi. 1:13, 14) Kano katetesho kechi kekala kakikupu ne, kanatu inge muntu watwajijila wakishinka saka aji pepi kufwa nangwa malwa akatampe saka akyangye kutendeka.—Efi. 4:30; Lum. 7:2-4.
w10 8/1 23
Nanchi Mwayuka Nyi?
Nanchi mutumwa Paulo waambilenga pa ka byo aambile’mba “tushindenga”?
▪ Paulo wanembele’mba: “Lesa . . . witutangijila kuba’mba tushindenga pamo na Kilishitu kabiji kupichila mu mwingilo ye twingila usolola bwema bwawama bwa kumuyuka mu mapunzha onse! Mambo atweba kwi Lesa tuji nobe bwema bununka bulongo bwa Kilishitu ku boba babena kupuluka ne ku boba babena konaika; ku babena konaika twi bwema bwa lufu butwala ku lufu, ku boba babena kupuluka, twi bwema bwa bumi butwala ku bumi. Nanchi ñanyi wafikilamo bulongo kwingila bino bintu.”—2 Kolinda 2:14-16.
Mutumwa Paulo waambilenga pa kusekelela kwaikalanga na bena Loma kwa kutakaika mukulumpe wa nzhita inge nzhita ya kyalo kyabo yashinda balwanyi. Pa kuno kusekelela, bintu byo basenda ku nkondo ne bantu bo bakwata buzha bebasendanga mu munongo, ne bañombe balume bakulambula saka babena kwibatwala kwa kwibalambwila, akwe bantu saka babena kutakaika mukulumpe wa nzhita ne bashilikale banji ne kwibembila nyimbo ku biombe bya bantu. Inge bapwisha kuno kusekelela, balambulanga bañombe ne kwipaya bantu bo bakwachile buzha ku nkondo.
Kwesakana na Baibolo wa The International Standard Bible Encyclopedia, byambo bya kuba’mba “bwema bununka bulongo bwa Kilishitu” byalumbulwilenga kwipaya bantu bamo kabiji bakwabo bebalekele kwikala na bumi, “kyamweka byafumine ku kino kisela kya bena Loma kya kusoka bya kufutumuna saka baya na kusekelela mu munongo. Kabiji bwema bununka bulongo bwafutumunanga bashinjile mu nkondo bwavululangamo bantu bo bakwachile ku nkondo pa bisakwibamwekela, ko kuba’mba kwibepaya.”