Mambo Ka O Twafwainwa Kunemekela Buntangi?

1, 2. (a) Lutangijilo lwa bañanyi lo twafwainwa kunemeka? (b) Ñanyi mepuzho o tusakwisambapo mu kino kitango?

BYO MWAJINGA banyike, kampe bansemi benu bemwambijilepo kuba bintu bimo byo mwabujilenga kukeba kuba. Kutemwa bansemi kwimulengejile kuba byo bemubujile. Nangwa byonkabyo, kechi kimye kyonse kyo mwaubanga byo bemubuulanga ne.

² Twayukishatu bulongo kuba’mba Shetu, aye Yehoba witutemwa bingi. Wituta muchima kabiji witupa byonse byo tukeba mu bwikalo bwetu. Witupa mizhilo itutangijila mu bwikalo kabiji kimye kimo wingijisha ne bantu kwitutangijila. Twafwainwa kunemeka buntangi bwa Yehoba. (Byambo bya Maana 24:21) Mambo ka kimye kimo o kitukatezha kunemeka buntangi? Mambo ka Yehoba o akebela’mba tulondelenga mizhilo yo etupa? Kabiji tumwesha byepi’mba tunemeka buntangi bwanji?—Monai Byambo byo Balumbulula 9.

MAMBO KA O KYAKATEZHA?

3, 4. Bantu baikele byepi bandengamambo? Mambo ka o kitukatezha kimye kimo kukookela bitubuula bantu?

³ Javula bantu kibakatazha bingi kukookela buntangi. Ne luno byo byo kiji kufumatu kimye mwanamulume ne mwanamukazhi mutanshi Adama ne Evwa kyo balengele mambo. Nangwa kya kuba bajinga balumbuluka, basatukijile Lesa. Kufumatu kimye kyo balengele mambo, baana bo basemenenga baswaine bundengamambo bwabo. Bumbulwa kulumbuluka bo bwitulengela kubula kulondela buntangi bwa Yehoba ne bwa bantu. Kya bubiji ke kya kuba’mba Yehoba wingijisha bantu bandengamambo kwitutangijila.—Ntendekelo 2:15-17; 3:1-7; Salamo 51:5; Loma 5:12.

⁴ Na mambo a bundengamambo kyapela bingi bantu kwikala na kyubilo kya kwitota. Kyubilo kya kwitota kitulengela kubula kulondela buntangi. Kala mu Isalela, Yehoba wasajile Mosesa kutangijila bantu banji. Kola waingijile Yehoba pa myaka yavula watendekele kwitota, kino kyubilo kyamulengejile kubula kunemeka Mosesa. Nangwa Mosesa watangijilanga bantu ba Lesa, bino wipelwile bingi. Kabiji Lesa waambile pe aye amba wajinga kimote kukila bantu bonse bajinga pano pa ntanda pa kyo kya kimye. Bino Kola kechi wanemekele buntangi bwa kwa Mosesa ne. Kabiji walengejile ne bantu bavula kutendeka kusatukila buntangi bwa kwa Mosesa. Ki ka kyamwekejile Kola ne bantu basatukile? Bebepayile. (Kubala 12:3; 16:1-3, 31-35) Mu Baibolo muji mashimikila avula aamba pa bantu bajinga na bwitote kabiji kino kitufunjisha’mba kwitota mufuma bintu byatama bingi.—2 Byambo bya Moba 26:16-21; monai Byambo byo Balumbulula 10.

5. Bamfumu bamo baingijishe byepi bulume bwabo kutama?

⁵ Kampe ne anweba mwakyumvwapo bino byambo bya kuba’mba, “Bulume bulengela kuba bintu byatama.” Kufumatu ne kala, bantangi kechi bengijisha bulume bwabo bulongo ne. (Tangai Musapwishi 8:9.) Kimye Saulo kyo bamusajile kwi Yehoba kwikala mfumu wa bena Isalela, wajinga muntu wawama kabiji wipelwile bingi. Nangwa byonkabyo, watendekele kwikala na kichima ne kwitota; kabiji wamanyikile Davida muntu wa kishinka. (1 Samwela 9:20, 21; 10:20-22; 18:7-11) Mu kuya kwa moba, Davida waikele mfumu wawama wa bena Isalela kukila bamfumu bonse bajingako kala. Bino nangwa byonkabyo, Davida naye waingijishe bulume bwanji kutama pa kimye kimo. Walaajile ne Batesheba wajinga muka Uliya, kabiji wakebelenga kufya mambo anji byo atumine Uliya kuya ku nkondo kuba’mba bakamwipaye.—2 Samwela 11:1-17.

ENE MAMBO O TUNEMEKELA BUNTANGI BWA YEHOBA

6, 7. (a) Kutemwa Yehoba kwitulengela kuba ka? (b) Mambo ka o kyanemena kukookela nangwa kya kuba kechi kyapela kuba bino ne?

⁶ Kutemwa Yehoba ko kwitulengela kukookela buntangi bwanji. Na mambo a kuba’mba twatemwa Yehoba kukila bintu byonse, tukebesha bingi kumutokesha ku muchima. (Tangai Byambo bya Maana 27:11; Mako 12:29, 30.) Kufumatu kimye Adama ne Evwa kyo basatukile mu bujimi bwa Edena, Satana walengejile bantu bavula kuzhinauka buntangi bwa Yehoba. Diabola ukeba’mba tulangulukenga’mba Yehoba kechi uji na luusa lwa kwitubuula bya kuba ne. Bino twayukishatu bulongo kuba’mba buno ke bubela. Tuswa byaamba Baibolo amba: “Anweba Yehoba Lesa wetu, mwafwainwa kutambula lukumo ne buneme ne bulume, mambo yenu mwalengele bintu byonse.”—Lumwekesho 4:11.

⁷ Byo mwajinga banyike, kampe bemufunjishe’mba mwafwainwa kukookelanga bansemi benu nangwa kya kuba kimukatazhanga kuba bino. Popamotu ne atweba, byo tuji bakalume ba Yehoba kimye kimo kyakonsha kwitukatazha kukookela Lesa. Kutemwa Yehoba ne kukeba kumunemeka ko kwafwainwa kwitulengela kumukookelanga. Twafwainwa kuba byaubile Yesu. Wakookelanga Yehoba nangwa kya kuba kimye kimo kyakatazhanga kuba bino. O ene mambo o aambijile kwi Shanji amba. “Kyaswa muchima wenu kyubiwe kechi kyami ne.”—Luka 22:42; monai Byambo byo Balumbulula 11.

8. Mu ñanyi mashinda Yehoba mo etutangijila? (Monai ka kitenguluzha ka kuba’mba “Tambwilainga Lujimuno.”)

⁸ Lelo jino, Yehoba witutangijila mu mashinda apusana pusana. Witupa Baibolo ne bakulumpe mu kipwilo. Tumwesha’mba tunemeka buntangi bwa Yehoba umvwe ketunemeke bantu bo atongola kwitutangijila. Umvwe ketukane bukwasho bwabo kijitu nobe tubena kukana Yehoba. Bena Isalela byo batendekele kunyinyita Mosesa, Yehoba kyamukolele bingi ku muchima, mambo kyajingatu nobe babena kunyinyita aye.—Kubala 14:26, 27; monai Byambo byo Balumbulula 12.

9. Butemwe bwitulengela byepi kulondela buntangi bwa Yehoba?

⁹ Inge twanemeka buntangi, tumwesha’mba twatemwa balongo ne banyenga. Akifwanyikizhai bino. Inge kwamweka bya malwa, jibumba ja kavoto kakwasha bantu baponenwa na bya malwa bengijila pamo pa kuba’mba bakwashe bantu. Pa kuba’mba bano bantu bengile bulongo, kwafwainwa kwikala ubena kwibatangijila kabiji bonse bafwainwa kulondela byo babena kwibabuula. Pano kyakonsha kwikala byepi inge umo wakana kulondela lutangijilo ne kutendeka kwiubila bintu mwine? Nangwa kya kuba uji na bishinka byamulengela, kuba bino kwakonsha kuletela bakwabo lukatazho. Kabiji kimo kimye bakwabo bakonsha ne kwikozha. Kyo kimotu ne atweba, inge ketubule kulondela lutangijilo lwa Yehoba ne bibena kwitubuula bantu bo abena kwingijisha mufuma bintu byatama. Bino, inge twakookela Yehoba, tumwesha’mba twatemwa balongo ne banyenga ne kuba’mba twanemeka lunengezho lwa Yehoba.—1 Kolinda 12:14, 25, 26.

10, 11. Tusa kwisamba pa ka?

¹⁰ Byonse bitubuula Yehoba kuba bitukwasha bingi mu bwikalo bwetu. Inge ketunemeke buntangi mu kisemi, mu kipwilo ne babinemanga ba mu kafulumende mufuma bintu byawama.—Mpitulukilo ya mu Mizhilo 5:16; Loma 13:4; Efisesa 6:2, 3; Bahebelu 13:17.

¹¹ Kuyuka ene mambo Yehoba o akebela amba tunemekenga bantu kwakonsha kwitukwasha kuba bino. Pano twayai twisambe pa mashinda asatu mo twafwainwa kumwesha’mba tunemeka buntangi.

KUNEMEKA BUNTANGI MU KISEMI

12. Mwanamulume wasongola wafwainwa kumwesha byepi amba wanemeka buntangi?

¹² Yehoba ye watendekeshe kisemi kabiji wapeele bonse ba mu kisemi mingilo. Yense mu kisemi inge wayuka mwingilo wamupa Yehoba, kisemi kikwatankana bingi. (1 Kolinda 14:33) Yehoba watongola mwanamulume kwikala mutwe wa kisemi. Kino kibena kulumbulula’mba Yehoba ukeba mwanamulume kulama bulongo kisemi kyanji ne kwikitangijila. Onkao mambo, mwanamulume inge ke abule kulama bulongo ba mu kisemi kyanji ukatotolola kwi Yehoba. Mwanamulume mwina Kilishitu wafwainwa kwikala na kifyele ne kumwesha butemwe kisemi kyanji byonkatu Yesu byo alamanga kipwilo. Inge mwanamulume ke obe bino, umwesha’mba wanemeka Yehoba.—Efisesa 5:23; monai Byambo byo Balumbulula 13.

13. Mwanamukazhi wasongolwa wakonsha kunemeka byepi buntangi?

¹³ Mwanamukazhi mwina Kilishitu wasongolwa naye uji na mwingilo wanema mu kisemi. Utundaika mwatawanji byo ebikako pa kuba’mba ekale mutwe wa kisemi wawama. Aye ne mwatawanji bengijila pamo pa kufunjisha baana. Jishinda jimo jo afunjishishamo baana banji ke kwikala na byubilo byawama. (Byambo bya Maana 1:8) Unemeka mwatawanji ne kulondela byo afuukula. Nangwatu inge kechi watemwa byafuukula mwatawanji ne, ubuula mwatawanji byo abena kulanguluka na mushingi. Inge mwanamukazhi mwina Kilishitu wasongolwa ku muntu wabula Kamonyi, upita mu makatazho avula bingi. Bino inge watwajijila kumwesha mwatawanji butemwe ne mushingi, kampe juba jimo uno mwanamulume wakonsha kukeba kufunda pe Yehoba ne kutendeka kumupopwela.—Tangai 1 Petelo 3:1.

14. Baana bakonsha kunemeka byepi buntangi?

¹⁴ Baana banema bingi kwi Yehoba, mwafwainwa kwibazhikijilanga ne kwibatangijila. Inge baana ke bakookele bansemi, balengela bansemi babo kwikala na lusekelo. Bamwesha ne kuba’mba banemeka Yehoba kabiji kino kimuletela bingi lusekelo. (Byambo bya Maana 10:1) Mu bisemi byavula, baana bebakomesha ku nsemi umo. Kino kyakonsha kulengela nsemi ne baana banji kwikala mu lukatazho. Bino inge baana ke bakookele ne kutundaika bainabo ne bashabo, bwikalo buwama bingi mu kisemi. Kishinka ke kya kuba’mba, kafwako kisemi kyalumbuluka ne. Bino bisemi byakonsha kwikala na lusekelo inge bonse ke balondele buntangi bwa Yehoba. Kuba bino kuletela Yehoba lukumo, Mulenga mwine watendekeshe bisemi.—Efisesa 3:14, 15.

KUNEMEKA BUNTANGI MU KIPWILO

15. Twakonsha kumwesha byepi amba twanemeka buntangi mu kipwilo?

¹⁵ Yehoba witutangijila kupichila mu kipwilo kya bena Kilishitu kabiji watongola Yesu kwikala mutwe wa kipwilo. (Kolose 1:18) Kabiji Yesu naye watongola “kalume wa kishinka kabiji wa maana” kukwasha bantu ba Lesa pano pa ntanda kupopwela Yehoba. (Mateo 24:45-47) Lelo jino, “kalume wa kishinka kabiji wa maana” jo Jibumba Jitangijila. Jibumba Jitangijila jitupa kajo ka ku mupashi pa kimye kyafwainwa pa kuba’mba twikale na lwitabilo lwakosa. Bakulumpe mu kipwilo, bankwasho ne bakalama ba myanzo batangijila bipwilo mwaya ntanda kabiji batambula mikambizho kufuma ku Jibumba Jitangijila. Bano bonse balongo baji na mwingilo wa kwitutangijila. Onkao mambo, inge ke tukookele bano balongo, ko kuba’mba tubena kukookela Yehoba.—Tangai 1 Tesalonika 5:12; Bahebelu 13:17; monai Byambo byo Balumbulula 14.

16. Mambo ka o twafwainwa kwambila’mba bakulumpe mu kipwilo ne bankwasho bebatongola na mupashi wazhila?

¹⁶ Bakulumpe ne bankwasho mu kipwilo bakwasha balongo ne banyenga kwikala na lwitabilo lwakosa ne kukwatankana. Bano balongo nabo kechi balumbuluka ne. Pano bebatongola byepi? Bafwainwa kufikizha bikebewa bya mu Baibolo. (1 Timoti 3:1-7, 12; Titusa 1:5-9) Yehoba watangijile banembi ba Baibolo kulumbulula bikebewa bya mu binembelo pa kuba’mba bafikilemo. Kabiji bakulumpe mu kipwilo balomba mupashi wazhila wa Yehoba inge babena kutongola mulongo kwikala mukulumpe mu kipwilo nangwa nkwasho. Kino kimweshatu patoka kuba’mba Yehoba ne Yesu bo batangijila bipwilo. (Byubilo 20:28) Banabalume bo batongola ke bya bupe byafuma kwi Lesa.—Efisesa 4:8.

17. Nyenga wafwainwa kunemeka byepi buntangi?

¹⁷ Mu bipwilo bimo kechi muji bakulumpe nangwa bankwasho bafwainwa kwingila mingilo mu kipwilo ne. Inge kyaikala bino, balongo babatizhiwa bafwainwa kwingila ino mingilo. Bino inge kafwako balongo, nyenga wafwainwa kwingila mwingilo wafwainwa kwingila mulongo wabatizhiwa, bino wafwainwa kuvwala kitambala ku mutwe. (1 Kolinda 11:3-10) Kuba bino kumwesha’mba wanemeka buntangi bwa Yehoba mu kisemi ne mu kipwilo.—Monai Byambo byo Balumbulula 15.

KUNEMEKA BABINEMANGA BA MU KAFULUMENDE

18, 19. (a) Kinembelo kya Loma 13:1-7 kitukambizha kuba ka? (b) Tumwesha byepi amba twanemeka babinemanga ba mu Kafulumende?

¹⁸ Lelo jino, Yehoba waswisha makafulumende kulama. Onkao mambo, twafwainwa kwibanemekanga. Balama kyalo ne kutangijila bantu mu nyaunda ne kwibapa byo babena kukajilwa. Bena Kilishitu bakookela mukambizho uji pa Loma 13:1-7. (Tangai.) Tunemeka “bakulumpe balama kyalo” ne kukookela mizhilo ya kyalo mu nyaunda mo twikala. Tulondela ino mizhilo mu kisemi, mu bya busulu ne mu bintu byo tuji nabyo. Tupana misonko ne kuba bintu bimo kafulumende byo abena kukeba’mba tube. Pano twafwainwa kuba byepi inge kafulumende witukambizha kuba bintu byapusana na mizhilo ya Lesa? Mutumwa Petelo waambile’mba: “Lesa ye kalama ye twafwainwa kukookela kechi bantu ne.”—Byubilo 5:28, 29.

¹⁹ Inge tubena kwisamba na babinemanga ba mu kafulumende nabiji bamitonyi ne bakapokola, twafwainwa kwamba na mushingi. Banyike bena Kilishitu baya ku sukulu bafwainwa kunemeka bafunjishi babo ne bamingilotu bakwabo bengijila pa sukulu. Kabiji twafwainwa kunemeka bakulumpe ba nkito nangwa kya kuba bamo kechi bebanemeka ne. Inge ke tube bino, ko kuba’mba tubena kulondela mutumwa Paulo wanemekele babinemanga ba mu kafulumende nangwa kya kuba kimye kimo kyakatazhanga. (Byubilo 26:2, 25) Nangwa kya kuba bantu babena kwitumanyika, tutwajijila kwibanemeka.—Tangai Loma 12:17, 18; 1 Petelo 3:15.

20, 21. Ñanyi bintu byawama byakonsha kufumamo inge ketunemeke bakwetu?

²⁰ Lelo jino, bantu bavula kechi banemeka bakwabo ne. Bino bantu ba Yehoba kechi byo boba ne. Twibikako bingi kunemeka bantu bonse. Tulondela byaambile mutumwa Petelo amba: “Nemekainga bantu bonse.” (1 Petelo 2:17) Bantu bomvwa bingi bulongo inge twibanemeka. Yesu waambile’mba: “Kyeya kyenu kimweke ku bantu bonse, kuba’mba bamone mingilo yenu yawama ne kutumbijika Shenu wa mwiulu.”—Mateo 5:16.

²¹ Inge ke tukookele buntangi mu kisemi, mu kipwilo ne mu bintutu bikwabo, byubilo byetu byawama byakonsha kulengela bantu kukeba kufunda pe Yehoba. Kunemeka bantu kumwesha’mba twanemeka Yehoba. Kino kiletela Yehoba lusekelo kabiji kimwesha ne kuba’mba twamutemwa.