Byambo Bikwabo bya mu Mutanchi wa Kupwila kwa Bwikalo ne Mwingilo
NOVEMBER 4-10
BYA BUNEME BIJI MU MAMBO A LESA | 1 YOANO 1-5
“Kange Mutemwenga Pano Pa Ntanda Nangwa Bintu bya Pano pa Ntanda Ne”
Londelainga Mwaubijile Yesu
13 Bamo bakonsha kulanguluka’mba kechi byonse bya panopantanda byatama ne. Nangwa kya kuba kino kya kine, kyapela bingi ntanda ne bintu byayo bikebulañana kwitufumya ku kwingijila Yehoba. Kabiji kafwako kiji kyonse mu ntanda kyakonsha kwitufwenya kwipi ne Lesa ne. Ko kuba’mba, inge twatemwa bintu bya ntanda, nangwatu bintu byakonsha kubula kwikala byatama abyo bine, tukasendulwa kufuma mu lwitabilo. (1 Timoti 6:9, 10) Kunungapo, bintu byavula mu ntanda byatama bingi kabiji byakonsha kwitongola. Inge tutamba mafilimu, ma pologalamu a pa televizhonyi amwesha bumbanzhi, kutemwa bya ku mubiji, nangwa bulalelale, bino bintu byakonsha kwikala ke bimweke nobe byawamatu, bino palutwe byakonsha kwikala ke lweseko kwi atweba. Umvwe satwendañana na bantu batesha muchima ku kwikala bulongo mu bwikalo bwabo nangwa kubaubatu bintu bya busulu, bino bintu byakonsha kutendeka kwikala ke byanemesha ne kwi atweba.—Mateo 6:24;1 Kolinda 15:33.
Mwafwainwa Kwikala Muntu Wa Mutundu Ka?
18 Kintu kikwabo kyakonsha kwitukwasha kukana “bintu bya pano pa ntanda” ke kutwajijila kulanguluka pa byambo bya kwa Yoano byanembelwe na lutangijilo lwa mupashi bya kuba’mba: “Pano pa ntanda pakapita ne bya kusakasaka bijipo, pakuba awa uba kyaswa muchima wa Lesa ukekala myaka ne myaka.” (1 Yoa. 2:17) Ntanda ya kwa Satana imweka nobe yawama kabiji ikatwajijila. Nangwa byonkabyo, juba jimo ino ntanda ikapwa. Ntanda ya kwa Satana kafwako kyo yakonsha kwitupa kikekala myaka ne myaka ne. Kuvuluka kino kishinka kuketukwasha kubula kufwa mu bitewa bya kwa Diabola.
Kukeba Bishinka Bikwabo Byanema
Bya Kuvululako bya Yehoba byo Byakishinka
14 Mu Binembelo bya Kingiliki bya Bwina Kilishitu muji bya kwituvululako byavula bingi bya kwitukwasha kwitemwa atwe bene na bene. Yesu waambile’mba mukambizho mukatampe wa bubiji ke wa “kutemwa mukwenu byonka byo witemwa obe mwine.” (Mat. 22:39) Kabiji mutumwa Yakoba nkasanji Yesu watelele butemwe amba “muzhilo wa mfumu.” (Yako. 2:8) Mutumwa Yoano wanembele’mba: “Anweba batemwe bami, kechi mbena kwimunembela mukambizho mupya ne, bino yenkawa mukambizho wa kala ye mwajinga nanji ku ntendekelo.” (1 Yoa. 2:7, 8) Yoano waambilenga pa ka byo aambile’mba “mukambizho wa kala”? Waambilenga pa mukambizho wa butemwe. Wajinga “wa kala” mambo Yesu wamupaine kala saka papita ne myaka yavula, ko kuba’mba ye wamupaine “ku ntendekelo.” Pano bino, wajinga ne “mupya” mambo batumwa bafwainwe kwikala na butemwe bwa kwipana, kikatakata pa kupita mu makatazho aishilenga kulutwe. Byo tuji baana ba bwanga ba kwa Kilishitu, nanchi kechi tusanta pa bya kwitujimunako bitukwasha kuchinuzhuka kwikala na muchima wa kwitemwatu obe mwine uji mu ino ntanda wakonsha kwitulengela kubula kutemwa bakwetu nenyi?
it-1 862 ji. 5
Kulekela Mambo
Kijitu bulongo kulombelako bakwetu nangwatu kipwilo kyonse kuba’mba Lesa ebalekeleko mambo. Mosesa naye byobyo aubile. Walombejileko kisaka kya bena Isalela pa bubi bo baubile kuba’mba bebalekeleko mambo, kabiji Yehoba waumvwine. (Ba 14:19, 20) Solomone naye pa kupana nzubo ya Lesa, walombele kuba’mba Yehoba akalekelengako mambo bantu banji inge balenga mambo ne kulapila kya kine. (1Mf 8:30, 33-40, 46-52) Ezela waimenejilengako Bayudea babwelele kufuma mu buzha wibalombejileko ne kusolola mambo abo. Lulombelo lo alombele kufuma panshi ya muchima lwalengejile bantu kupimpula byubilo byabo pa kuba’mba Yehoba ebalekeleko mambo abo. (Eze 9:13–10:4, 10-19, 44) Yakoba watundaikile muntu wakolwa ku mupashi kubuula bakulumpe mu kipwilo kumulombelako, kabiji “umvwe walenga mambo, Lesa ukamulekelako.” (Ya 5:14-16) Nangwa byonkabyo, “kuji mambo aleta lufu,” kulenga mambo mupashi wazhila, ko kuba’mba kulenga mambo kya nshiji kwakonsha kulengela muntu kubula kumulekelako mambo. Bena Kilishitu kechi bafwainwa kulombelangako bantu balenga mambo kya nshiji ne.—1Yo 5:16; Mat 12:31; Heb 10:26, 27; monai BUNDENGAMAMBO, I; MUPASHI
NOVEMBER 11-17
BYA BUNEME BIJI MU MAMBO A LESA | 2 YOANO 1–YUDA
“Twafwainwa Kwibikako pa Kuba’mba Tutwajijile Kwikala mu Bukine”
w04 10/1 ji. 14 mafu. 8-9
“Ikoseshainga mwi Nkambo”
8 Kechi twaluba bya bujimuku bya kwa Satana ne, mambo Binembelo byasolola mashinda anji. (2 Kolinda 2:11) Kwi Yoba muntu waoloka, Diabola wamuletejile malwa akatampe a mu bwikalo, lufu lwa batemwe, lupato mu kisemi, kumanama ku mubiji, ne byambo bya bubela byo bamunenenenga balunda nanji babubela. Yoba wapopomejilwe ne kwiumvwa amba Lesa wamusha. (Yoba 10:1, 2) Nangwa kya kuba ano moba Satana kechi wakonsha kuleta ano makatazho ne, bena Kilishitu babena kupita mu makatazho a yenka uno mutundu, kabiji Diabola wakonsha kwiengijisha kuba’mba ashukilwemo.
9 Bizumba bya ku mupashi bibavule bingi mu ano moba apelako. Tubena kwikala mu ntanda muji bintu bya ku mubiji bibena kunyanchijila bintu bya ku mupashi. Pa mwela ne mu mapepala a byambo mubena kwambiwa bya bulalelale amba yo nsulo ya lusekelo mu kifulo kya kuleta bulanda. Kabiji bantu bavula baikala “ba kutemwa bya lusangajiko, ne kutemwa Lesa ne.” (2 Timoti 3:1-5) Ndangulukilo ya uno mutundu yakonsha kwitulengela kutelengela ku mupashi umvwe twabula ‘kwibilwila na muchima yense abya byaitabilwa.’—Yuda 3.
Kukeba Bishinka Bikwabo Byanema
it-2 279
Bijiilo bya Butemwe
Baibolo kechi walumbulula abino bijiilo bya butemwe byo biji ne, kabiji kechi waambapo kimye kyo byaikalangako ne. (Yuda 12) Nkambo yetu aye Yesu Kilishitu nangwatu batumwa banji kechi bakambizhepo bantu kwikalanga na bino bijiilo ne. Kabiji kyamweka kechi wajinga mukambizho kuba’mba muntu yense wafwainwa kwikala na bino bijiilo ne. Bantu bamo bamba’mba abino byajinga bijiilo byaikalanga na bena Kilishitu banonshi ko baitangako ne bena Kilishitu bakwabo bayanji, ko kuba’mba bapwilanga pamo, baana bakishale, bafwilwa, banonshi ne bayanji na kwitobwela kajo kumwesha byo bakwatankana.
it-2 816
Jibwe Jikatampe
Kyambo kikwabo kya Kingiliki kya spi·lasʹ, kyamweka kyamba pa jibwe jikatampe jiji panshi ya mema. Yuda waingijishe bino byambo mu bukifwanyikizho pa kwamba pa banabalume bamo bajinga na byubilo byatama baishile mu kipwilo kya bena Kilishitu. Byonkatu mabwe akatampe afyama byo alengelanga bwato konaika inge bwipakamo, bano banabalume nabo babikile mu kizumba bantu bajinga mu kipwilo. Waambile pa bano banabalume amba: “Bano bantu baji nobe mabwe akatampe afyama mu mema, babena kuja nenu mu bijiilo byenu bya butemwe.”—Yuda 12.
“Watokeshe Lesa ku Muchima”
Ñanyi bungauzhi bwaawile Enoka? Waawile’mba: “Talai! Yehoba waishile na mabumba a bamalaika banji bazhila, na kwibachibila mambo ne kuzhachisha bonse babula kumwakamwa na mambo a byubilo byabo byatama byo baubilenga mu jishinda jibula kumwesha kwakamwa Lesa, ne na bintu byonse bya bumvu byo bamwambijilenga bandengamambo babula kwakamwa Lesa.” (Yuda 14, 15) Mu bino byepelo, Enoka waambilenga uba nobe Lesa wauba kala byaamba buno bungauzhi. Bungauzhi bwavula bwalondela yonka ino nembelo. Ene mambo o banembele bino ke a kuba’mba: Bangauzhi bashiinwe kuba’mba byo baambilenga kine bikamweka. O ene mambo, o baambilanga nobe byamweka kala.—Isaya 46:10.
“Watokeshe Lesa ku Muchima”
Lwitabilo lwa kwa Enoka lwakonsha kwitulengela kwishikisha kuba’mba, nanchi mmona ino ntanda byonka Lesa byo eimona nyi? Byambo bya luzhachisho byasapwijilenga Enoka byanema bingi ne mu ano moba byonkatu byo byajinga pa kyo kya kimye. Bungauzhi bwaawile Enoka bwafikile Yehoba byo aletele Muyulo waonawine bantu babulanga kwakamwa Lesa mu moba ajingako Nowa. Lesa byo aonawine bantu pa kyo kya kimye kimwesha lonaiko lukatampe luji kulutwe. (Mateo 24:38, 39; 2 Petelo 2:4-6) Byonkatu byo kyajinga mu oa moba, ne mu ano moba Lesa ukengijisha bamalaika konauna bantu babula kwakamwa Lesa. Atweba bonse twafwainwa kumvwina lujimuno lwaambile Enoka ne kubulako bakwetu. Ba mu kisemi ne balunda netu bakonsha kwitukana, kabiji twakonsha ne kumvwa mukose. Pano bino Yehoba kechi uketukana ne, byonkatu byo abujile kukana Enoka. Nangwatu mu ano moba kechi ulekelela bapopweshi banji bakishinka ne.
NOVEMBER 18-24
BYA BUNEME BIJI MU MAMBO A LESA | LUMWEKESHO 1-3
“Nayuka Mingilo Yobe”
w12 10/15 ji. 14 ji. 8
Byubilo Bya Mutundu Ka Byo Mumwesha?
8 Pa kuba’mba tuchinuzhuke uno mupashi, twafwainwa kuvulukanga kuba’mba Yesu bamulumbulula mu Baibolo amba “mu kuboko kwanji kwa kilujo mwajinga tubangabanga tutanu na tubiji.” Tuno “tubangabanga” twimenako bakalama bashingwa kuvwangako ne bakalama bonse ba mu bipwilo. Yesu wakonsha kutangijila “tubangabanga” tuji mu kuboko kwanji mu jishinda jo amona amba jafwainwa. (Lum. 1:16, 20) Onkao mambo, byo aji mutwe wa kipwilo kya bena Kilishitu, Yesu ye utangijila mabumba onse a bakulumpe. Umvwe umo wa mu jibumba ubena kukebewa kumololako, Yesu, aye uji na ‘meso aji nobe lubebe lwa mujilo’ ukamona kuba’mba kino kyaubiwa pa kimye kyafwainwa ne mu jishinda jo akebelamo. (Lum. 1:14) Pa kino kimye, twafwainwa kunemekanga boba batongolwa na mupashi wazhila, mambo Paulo wanembele amba: “Kokelainga ne kunekenena aba babena kwimutangijila, mambo abo babena kwimukenkentela myeo yenu kabiji baketotolwela pa mambo a kino; kuba amba bengilenga kino na lusekelo kechi na bulanda ne, mambo umvwe ke bengile kino na bulanda kechi mukamwenamo bintu byawama ne.”—Hebe. 13:17.
Yehoba Witulama Kuba’mba Tukapuluke
11 Mu kimwesho kyanembwa mu buku wa Lumwekesho bitango 2 ne 3, Yesu Kilishitu watumbijikwa waishile na kupempula bipwilo bitanu na bibiji bya mu Asha Maina. Kino kimwesho kimwesha’mba, Kilishitu kechi utajilatu palepa ne, bino umona byonse byubiwa. Mu bipwilo bimo, watongwele ne bantu bamo pa mazhina ne kwibasanchila nangwa kwibajimunako pa byo baubile. Kino kimwesha ka? Mu kino kimwesho, bipwilo bitanu na bibiji bimenako bena Kilishitu bashingilwe panyuma ya 1914, kabiji lujimuno lo ajimwineko bino bipwilo bitanu na bibiji lwavwangamo bipwilo byonse bya bantu ba Lesa biji pano pa ntanda lelo jino. Onkao mambo, kyayilamo kwamba’mba, Yehoba ubena kutangijila bantu banji kupichila mu Mwananji. Twakonsha kumwenamo byepi mu luno lutangijilo?
w01 2/1 ji. 14 jifu20
Endelainga Pamo na Jibumba ja Yehoba
20 Kwendela pamo na jibumba jibena kununguluka ja Yehoba kukebewa kuba’mba tuyuke mwingilo wa Yesu Kilishitu aye “mutwe wa kipwilo” ye apewa na Lesa. (Efisesa 5:22, 23) Kabiji kikwabo kya lusekelo, Isaya 55:4 witubula kuba’mba: “Umvwai, amiwa [Yehoba] namutongwele namba ekale kamonyi ku mitundu ya bantu ke ntangi wabo ne mukulumpe wabo.” Kya kine, Yesu Kilishitu wayuka bya kulama. Kabiji wayuka mikooko yanji ne byubilo byayo. Byo apikichilenga bipwilo bitanu na bibiji mu Asia Minor, waambilepo bintu bimo jitanu amba “Nayuka mingilo yobe.” (Lumwekesho 2:2, 19; 3:1, 8, 15) Kabiji Yesu wayuka byo tukajilwa, byonka byo ebiyuka Shanji, aye Yehoba. Yesu saka akyangye kufunjisha Lulombelo lwa Kumwenako waambile’mba: “Shenu wayukila jimo byo mwakajilwa, po mukyangye kumulomba.”—Mateo. 6:8-13.
Kukeba Bishinka Bikwabo Byanema
Bufumu bwa Lesa Bwaonauna Balwanyi
10 Byambo byanema bya bunchibamambo. Balwanyi bonse ba Bufumu bwa Lesa bakemwena kintu kikatampe kikebalengela kujilakana. Yesu waambile’mba: “Kepo bakamona Mwana muntu saka eya mu makumbi na bulume bukatampe ne lukumo.” (Mako 13:26) Buno bulume bwa mwiulu bukamwesha amba Yesu waiya na kuchibila bantu mambo. Mu bonka buno bungauzhi bwaamba pa moba akupelako, Yesu waamba pa bintu bikwabo byaamba pa bunchibamambo bukobiwa pa kikye kimye. Tutana bishinka biji mu kishimpi kyaamba pa mikooko ne bambuzhi. (Tangai Mateo 25:31-33, 46) Bantu bakishinka batundaika Bufumu bwa Lesa bakebachibila mambo nobe “mikooko” kabiji ‘bakenuna mitwe yabo’ ne kuyuka amba ‘kupokololwa kwabo kuji pepi.’ (Luka 21:28) Bino balwanyi ba Bufumu bakebachibila mambo nobe “bambuzhi” kabiji ‘bakatama miteto’ pa kuyuka amba “bakafwa lufu lwa myaka.”—Mat. 24:30; Lum. 1:7.
Mambo a Yehoba o Omi Bishinka Bikatampe Kufuma mu Buku Mutanshi wa Lumwekesho—I
2:7—Nga “Paladisa ya Lesa” yo ika? Byo kiji kuba’mba bino byambo byaambiwenga ku bena Kilishitu bashingwa, ko kuba’mba paladisa yaambiwapo pano ke bwikalo bwa mwiulu, konka kuji Lesa mwine. Bashingwa bakishinka bakebapa jishuko ja kuja ku “kichi kya bumi.” Kechi bakafwa ne.—1 Ko. 15:53.
NOVEMBER 25–DECEMBER 1
BYA BUNEME BIJI MU MAMBO A LESA | LUMWEKESHO 4-6
“Baikala pa Bambili Bana”
wp17 Na. 3 ji. 4
Nanchi Mwayuka Bambili Bana Byo Bemenako Nyi?
Waikele pa mbili utoka wajinga ñanyi? Kintu kyakonsha kwitukwasha kumuyuka kiji mu buku wa Lumwekesho mu Baibolo, waikele pa uno mbili bamwita kuba’mba “Mambo a Lesa.” (Lumwekesho 19:11-13) Jino jizhina, ja kuba’mba Mambo, jimenako Yesu Kilishitu, mambo ye wambilako Lesa. (Yoano 1:1, 14) Kabiji utelwa ne kuba’mba, “Mfumu wa bamfumu kabiji Nkambo wa bankambo” kabiji bamulumbulula ne kuba’mba “wa Kishinka kabiji wa Kine.” (Lumwekesho 19:11-13) Jizhina ja kuba’mba Mambo jimenako Yesu Kilishitu mambo ye wambilako Lesa. (Yoano 1:1, 14) Kabiji Yesu Kilishitu utelwa ne kuba’mba “Mfumu wa bamfumu kabiji Nkambo wa bankambo” ne kuba’mba “wa Kishinka kabiji wa Kine.” (Lumwekesho 19:16) Kya kine, Yesu uji bingi na bulume, kyokyo aikela mfumu wa nkondo kabiji kechi wingijisha buno bulume bwanji mu jishinda jatama ne. Pano bino, kuji mepuzho avula bingi epuzha bantu.
wp17 Na. 3 ji. 4
Nanchi Mwayuka Bambili Bana Byo Bemenako Nyi?
Ñanyi kimye baji pa bambili kyo batendekele kwenda pa bambili? Yesu waikele pa mbili mutanshi kimye kyo bamupele munchinya. (Lumwekesho 6:2) Ñanyi kimye Yesu kyo aikele Mfumu mwiulu? Kechi kyajinga kimye kyo abweleletu mwiulu panyuma ya lufu lwanji ne. Baibolo waamba’mba kimye kya kupembelela kyatendekele kala. (Bahebelu 10:12, 13) Yesu wabuujile baana banji ba bwanga pakapwila kimye kya kupembelela ne kimye kyo akatendeka kulama mwiulu. Waambile’mba kimye kyo akatendeka kulama, bintu mu ntanda bikayangatu na kutaminako. Kukekala makondo, bipowe bya nzala ne myalo kuku ne kuku. (Mateo 24:3, 7; Luka 21:10, 11) Panyuma ya Nkondo Itanshi ya Ntanda Yonse mu 1914, bino biyukilo popo byatendekele kumweka. Ano o moba Baibolo o itongola’mba “moba a kupelako.”—2 Timoti 3:1-5.
wp17 Na. 3 ji. 5
Nanchi Mwayuka Bambili Bana Byo Bemenako Nyi?
Waikelepo wimenako makondo. Kabiji ye ubena kufumya mutende pano pa ntanda ponse. Mu 1914, mu ntanda mwabukile nkondo. Palondejile nkondo itanshi ya kibiji ya ntanda yonse yaonawine bintu byavula bingi. Kutendeka mu 1914, bantu bafwa na mambo a makondo bakila 100 milyonyi. Kabiji bavula balemene na mambo a nkondo ya bubiji.
wp17 Na.3 ji. 5
Nanchi Mwayuka Bambili Bana Byo Bemenako Nyi?
“Ponkapo namwene mbili ufiita, kabiji awa waikelepo wajinga na shikelu wa kupiminako mu kuboko kwanji. Kabiji naumvwine kyaumvwanyikilenga nobe jiwi mu bilengwa byumi bina saka kyamba’mba: ‘Kipimo kya kwachi kya wichi kipotwa ndenali umo ne bipimo bisatu bya kwachi bya mbaale nabyo bipotwa ndenali umo; kabiji kange onaune manyi a maolivi ne binyu ne.’”—Lumwekesho 6:5, 6.”
Uno waikele pa mbili wimenako kipowe. Kino kibena kumwesha kuba’mba kajo kakakepa bingi, malita 1.08 a wichi bakeapotanga na ndenali umo, ano o mali aingijilanga bantu juba jimo mu myaka ya kala. (Mateo 20:2) Kabiji ndenali umo mwakonsha kupotamo malita 3.24 a mbale, bantu banemekele bingi wichi kukila mbale. Pano bakonsheshe kujisha byepi kisemi kikatampe? Bantu kechi baikalanga na bya kuja byavula ne, kumwesha byo kyakatezhe pa kyo kya kimye kwikala na manyi maolivi ne binyu.
wp17 Na. 3 ji. 5
Nanchi Mwayuka Bambili Bana Byo Bemenako Nyi?
Mbili wa buna wimenako lufu, myalo ne bintutu bikwabo bileta lufu. Mwaka wa 1914 byo apwile, bantu bavula bafwile ku kikola kitelwa’mba, Spanish flu. Bantu nobe 500 milyonyi bajinga na kino kikola, ko kuba’mba, muntu umo pa bantu basatu bajingako pa kyokya kimye, umo wajinga na kino kikola.
Kikola kya Spanish flu kyo kyatendekejilepo. Bashayuka batana kuba’mba, bantu bavula bafwile ku kikola kya smallpox mu myaka kitota kya 20. Nangwatu luno bantu bavula babena kufwa na kikola kya AIDS, TB ne malelya nangwa kya kuba bantu babena kwibikako kulenga michi ya kupwisha bino bikola.
Bino bantu bakitwajijila na kufwa, bamo babena kufwa ku makondo, bipowe bya nzala nangwa na myalo. Kilende kyatwajijila na kumina bantu bavula
Kukeba Bishinka Bikwabo Byanema
re 76-77 jifu. 8
Jitanda ja Lukumo ja Yehoba ja Mwiulu
8 Yoano wayukile’mba bañanga bebatongolanga kwingila pa tente wa lusambakeno wa kala. Onkao mambo, kyamweka wakuminye bingi pa bintu byalondelapo byo amwene: “Kabiji ku jitanda kwazhokolokele matanda 24, ne pa ano matanda namwenepo bakulumpe 24 bavwajile bivwalo bitoka saka baikala kabiji ku mitwe yabo kwajinga minchinya ya ngolode.” (Lumwekesho 4:4) Ibyo, kechi wamwene bañanga ne, bino wamwene bakulumpe 24 baikele pa bipona bya bufumu kabiji bavwajile minchinya nobe bamfumu. Nga bano bakulumpe bo ñanyi? Abano ke bashingwa bafuma mu kipwilo kya bena Kilishitu, bo basangula ne kwibapa bifulo bya mwiulu bibalaya Yehoba. Twayuka byepi bino?
re 80 jifu. 19
Jitanda ja Lukumo ja Yehoba ja Mwiulu
19 Nga bino bilengwa bimenako ka? Kimwesho kyamwene ngauzhi mukwabo aye Ezikyo kyakonsha kwitukwasha kukumbula buno bwipuzho. Ezikyo wamwene Yehoba saka aikala pa kalaki mukatampe mwiulu, kwajinga bilengwa byumi bipashishe na byamwene Yoano mu kimwesho. (Ezikyo 1:5-11, 22-28) Palutwe kacheche, Ezikyo wamwene jikwabo uno kalaki wa jitanda kwajinga bilengwa byumi. Pano bino, pa kikye kimye, watongwele bino bilengwa byumi amba bakelubi. (Ezikyo 10:9-15) Bilengwa byumi bina byamwene Yoano mu kimwesho kampe bimenako bakelubi bavula ba Lesa, ko kuba’mba bilengwa biji pa bifulo bikatampe mu jibumba janji ja mwiulu. Yoano kechi wakuminye byo amwene bakelubi bajinga kwipi ne Yehoba ne, mambo mu tente wa lusambakeno wa kala, bakelubi babiji ba ngolode bebalengejile pa kizhiko kya jikwachi ja lulayañano jaimenangako jitanda ja Yehoba. Jiwi ja Yehoba jaumvwanyikilanga pakachi ka bano bakelubi pa kupana mikambizho ku kisaka kya bena Isalela.—Kulupuka 25:22; Salamo 80:1.
‘Talai, Aye Bokwe wa mu Mukoka wa Yuda’
5 Bokwe bamwambapo bingi pa mambo a kuchinchika. Mwakitalañanapo kala na bokwe mulume nyi? Umvwe ibyo, ko kuba’mba kampe bemuzhikijile ku luvimba wa paka mwikala yewo bokwe. Kyo kimotu, mwakonsha kumvwa moyo nangwa kya kuba bokwe bamushinkila mukachi. Umvwe mwakinkanya meso na uno nyama washinta, aye kechi wakonsha kwimunyema ne kwimuchina nangwa pachechetu ne. Baibolo waamba’mba, ‘Bokwe, ye yenka wakila banyama bonse mu kukosa ubula kubwelamo pa kumona kintu nangwa kimo kulutwe ne.’ (Byambo bya Mana 30:30) Kuchinchika kwa uno mutundu ko kwajingapo ne Kilishitu.
6 Twayai twisambe pe Yesu byo achinchikile nobe bokwe mu mashinda asatu: kwibulwila bukine, kutundaika bololoke, ne bya kuba na makatazho. Kabiji tusakumona’mba, atweba bonse twakonsha kulondela Yesu kwikala bachinchika kikale twakosa nangwa ne.