LUFUNJISHO 1

Ntendekelo Yawama

Byubilo 17:22

BYO MWAFWAINWA KUBA: Ntendekelo yenu yafwainwa kuzakula bantu michima ne kwibakwasha kuta muchima ku kyo mubena kwambapo.

Zakulai bantu michima. Ingijishai bwipuzho, bintu byapichilemo bantu bamo mu bwikalo, sawakya wa bibena kumweka nangwa byambotu bikwabo byakonsha kuzakula michima ya bantu.

Pa kuba’mba musale bulongo byambo bya kutendekelapo, mwafwainwa kulangulukila jimo pa bibena kupitamo bantu ne pa bintu byakonsha kuzakula michima yabo.
Kwashai bantu kuyuka kyo mubena kwambapo. Byambo byenu bya kutendekelapo byafwainwa kukwasha bantu kuyuka mutwe ye mubena kwambapo ne ene mambo o anemena.
Lumbululai buneme bwa mutwe ye mubena kwambapo. Lumbululai byambo kwesakana na bibena kupitamo bantu. Bafwainwa kumona buneme bwa kwingijisha byo mubena kwambapo mu bwikalo bwabo.

Kimye kyo mubena kunengezha jashi, ishikishai’mba, ‘Ñanyi makatazho abena kupitamo balongo ne banyenga mu kipwilo?’ Inge mwayuka byo babena kupitamo, kikemukwasha kwamba kwesekana na bintu byo babena kupitamo.