LUFUNJISHO 7
Kwamba Bishinka
Luka 1:3
BYO MWAFWAINWA KUBA: Ambai pa bishinka byakonsha kukwasha bantu kushiinwa’mba byo mubena kwamba bya kine.
BYA KUBA:
Ingijishai bishinka bya kine. Byambo byenu byafwainwa kwimena pa Mambo a Lesa, kabiji inge kyakonsheka, mwafwainwa kwibitanga mu Baibolo. Umvwe mubena kwamba pa bya sayansi, masawakya a pa mwela nangwa pa bishinkatu bikwabo, mwafwainwa kumona kuba’mba byo mubena kwamba bya kine.
Lumbululai bulongo bishinka byo mwataana. Lumbululai binembelo monka mwayila bukine bwa mu Baibolo ne byaamba mabuku a “kalume wa kishinka kabiji wa maana.” (Mat. 24:45) Inge mwaingijisha byambo biji mu mabuku anemba bantu, byambai byonka byo bebinemba.
Kwashai bantu kulanguluka pa bishinka. Inge mwatanga kinembelo nangwa byambo byafuma mu buku, ipuzhai mepuzho nangwa ingijishai bimwesho pa kuba’mba mukwashe bantu kumvwisha kyo mubena kwambapo.