Izaka wajinga na myaka 40 kimye kyo asongwele Libeka. Wamutemenwe bingi Libeka. Mu kuya kwa moba, basemene baana babiji. Bano baana bajinga mapasa.

Mbuyu wajinga Isao, kabiji kapya wajinga Yakoba. Isao watemenwe bingi kukayila mungye, kabiji waikele kibinda. Bino Yakoba waikalanga pa nzubo kimye kyonse.

Mu oa moba, mwanamulume mubeji bamupanga mpunzha ikatampe ne mali avula inge bashanji bafwa. Ano mali ne mpunzha bebitelanga’mba buswanyi. Mubeji wa kwa Izaka wafwainwe ne kuswana milaye ya Yehoba yo alayile Abalahama. Isao kechi wateleko muchima ku ino milaye ne. Bino Yakoba wayukile’mba ino milaye yanema bingi.

Juba jimo, Isao wabwelele pa nzubo saka akooka mambo wafumine mungye na kwipaya nyama. Byo afikile, waumvwine bwema bwa kajo kawama katekelenga Yakoba. Isao waambile’mba: ‘Nafwa nzala. Mpepo kajo ko ubena kuteka!’ Yakoba waambile’mba: ‘Nsakwimupa, bino patanshi chipai kuba’mba amiwa yami nkaswana bintu byo mwafwainwa kuswana.’ Isao waambile’mba: ‘Bya buswanyi kafwako byo biji kwi amiwa ne. Nakupa byonsetu. Amiwa kyo mbena kukebatu ke kuja.’ Nanchi kyaubile Isao kyawamine nyi? Ine. Isao wapaine kintu kyanema bingi na mambotu a kukeba masuku achila a nkunde.

Izaka byo akotele, kimye kyafikile kya kuba’mba apeshe mwananji mubeji. Bino Libeka wakwashishe Yakoba kutambula mapesho, nangwa kya kuba ye wajinga mwanyike. Isao byo aumvwine’mba Yakoba yeye bapesha, wazhingijile kabiji wakebelenga kumwipaya. Izaka ne Libeka kechi bakebelenga’mba Yakoba bamwipaye ne. Onkao mambo, bamubuujile’mba: ‘Yanga ku bamwisho yobe ba Labanyi. Ukekalenga konkakwa kufikatu ne kimye Isao kyo akaleka kukeba kukwipaya.’ Yakoba waumvwine byamubuujile bansemi banji. Wanyemejile ku bamwisho yanji.

Yehoba walayile Yakoba amba ukamuzhikijilanga byonka byo azhikijilanga Abalahama ne Izaka. Yakoba waikele mu mpunzha yo batelanga’mba Halana. Konkakwa, wasongwele ne kwikala na kisemi kikatampe, kabiji waikele na bunonshi bwavula bingi.

Mu kuya kwa moba, Yehoba waambijile Yakoba amba: ‘Bwela ku kyalo kya bashobe ne balongo bobe.’ Ponkapo, Yakoba ne kisemi kyanji batendekele kubwela ku kyalo kyanji. Byo bayilenga, bantu bamo baishile na kubuula Yakoba amba: ‘Kolojobe, Isao ubena kwiya ko uji, kabiji watangizhako banabalume 400 kulutwe yanji.’ Yakoba waumvwine bingi moyo mambo walangulukile’mba Isao usakumuba kyatama pamo ne kisemi kyanji. Walombele kwi Yehoba amba: ‘Mpulushai ku kolojami.’ Juba jalondejilepo, Yakoba watumine mikooko, bambuzhi, bañombe, bangamela ne bambongolo kwi Isao amba bya bupe.

Pa joja juba bufuku Yakoba saka aji bunke, wamwene malaika. Uno malaika watendekele kwisunsa ne Yakoba. Besunshile kufikatu ne ku makya. Nangwa kya kuba Yakoba wikozhezhe, bino kechi walekele kwisunsa na malaika ne. Malaika wamwambijile’mba: ‘Ndeke ngyenga.’ Bino Yakoba waambile’mba: ‘Kechi nsakwimulekako ne, kanatu mumpeshe.’

Kepo malaika apesheshe Yakoba. Yakoba po po ayukile’mba Yehoba kechi ukaswisha Isao kumuba kyatama ne.

Lukelo, Yakoba watajile palepa byobya ne kumona Isao saka eya na banabalume 400. Yakoba watangijileko ne kusha kisemi kyanji kunyuma ne kuya na kufukama kwi kolojanji bimye bitanu na bibiji. Isao wanyemejile Yakoba ne kumupakachilamo. Bonse babiji batendekele kujila, kabiji batendekele kumvwañana jikwabo. Walanguluka’mba Yehoba waumvwine byepi pa byaubile Yakoba kimye kyo amwene kolojanji?

Kufuma popo, Isao wayile ku nzubo yanji, ne Yakoba naye wayile kwanji. Yakoba wajinga na baana ba balume 12. Mazhina abo ke Lubenyi, Shimeona, Levi, Yuda, Danyi, Nafitali, Gadi, Ashela, Isakala, Zebuluna, Yosefwa, ne Benjamina. Pa bano baana, Yehoba waingijishepo Yosefwa pa kupulusha bantu banji. Wayuka byo aubile nyi? Twaya tumone.