Nanchi Kyakonsheka Kwikala mu Ntanda Mwabula Buyanji Nyi?
Mu byalo byavula bantu bejizhañanya pa buyanji. Kimye kya mwalo wa COVID-19 buyanji bwabayile bingi mambo bantu kechi baendelenga ne, bintu byavula byapwile kabiji bantu kechi batambwilanga bukwasho bwafwainwa kufuma ku bipatela ne.
Nanchi buyanji bwakumbanatu ntanda yonse bukapwa nyi? Ee bukapwa. Baibolo walumbulula bintu bikoba Lesa pa kupwisha buyanji.
Lesa ukapwisha buyanji
Lukatazho: Bantu bakankalwa kupa bantu bakwabo bintu byo bakeba.
Bikapwa lukatazho: Lesa ukafumyapo makafulumende a bantu onse ne kubikapo kafulumende wanji utelwa’mba: Bufumu bwa Lesa. Abuno Bufumu bukalama ntanda yonse.—Danyela 2:44; Mateo 6:10.
Bintu bikafumamo: Bufumu bwa Lesa bukapa bantu bonse bintu byo bakeba. Bantu kechi bakayanda jibiji ne. (Salamo 9:7-9, 18) Pakuba bakasangalelanga mu mingilo yabo kabiji bisemi byabo bikekala na lusekelo. Baibolo walaya’mba: “Bakashimika mazubo ne kwikalamo, kabiji bakajimba miñanzañanza ne kuja bipangwa byayo. Kechi bakashimika mazubo ne muntu ungi waikalamo ne, kabiji kechi bakajimba miñanzañanza ne muntu ungi waja bipangwa byayo ne.”—Isaya 65:21, 22.
Lukatazho: Bantu kechi baji na bulume bwa kukanya bintu bileta makatazho mu bwikalo bwabo ne.
Bikapwa lukatazho: Lesa ukengijisha Bufumu bwanji kufumyapo bintu byonse bileta moyo ne buyanji.
Bintu bikafumamo: Mu bukalama bwa Lesa, bantu kechi bakapitapo jibiji mu bintu bibalengela kuyanda ne. Mambo makondo, bipowe bya nzala ne myalo kechi bikekalako jibiji ne. (Salamo 46:9; 72:16; Isaya 33:24) Lesa waamba’mba: “Bantu bami bakekala mu mapunzha a mutende, bakekala mu mapunzha azhikijilwa kabiji bakekalanga ku matwi nzoo.”—Isaya 32:18.
Lukatazho: Bantu betemwatu abo bene bamanyika bakwabo.
Bikapwa lukatazho: Bangikazhi ba mu Bufumu bwa Lesa bakatemwa bakwabo kukila byo betemwa abo bene.—Mateo 22:37-39.
Bintu bikafumamo: Mu bukalama bwa Lesa, bantu bonse bakekala na butemwe bujipo ne Lesa bubula ‘kukeba bintu bibuwamina abo bwine ne.’ (1 Kolinda 13:4, 5) Baibolo waamba’mba: “Kechi bakekozhanga nangwa kwionauna pa mutumba wami yense wazhila ne, mambo pano pa ntanda pakakumbana maana a kuyuka Yehobaa byonkatu mema byo akumbana mu kalunga ka mema.”—Isaya 11:9.
Baibolo waamba’mba tubena kwikala mu moba a kupelako a buno bwikalo ne kuba’mba katatakatu Lesa akafikizhe mulaye wanji wa kufumyapo buyanji.b (Salamo 12:5) Bino pa kino kimye, mafunde a mu Baibolo akonsha kwitukwasha kuyuka bya kuba na makatazho o tubena kupitamo. Monai kibaaba kya mu Kizungu kya kuba’mba: “How to Live on Less” ne kya kuba’mba: “Kwikala na Ndangulukilo Yawama pa Mali.”
a Yehoba jo jizhina ja Lesa jiji mu Baibolo.—Salamo 83:18.
b Pa kuba’mba muyuke ene mambo o mwafwainwa kuketekela byaamba Baibolo, tangai kibaaba kya kuba’mba: “Mu Baibolo Momo Twakonsha Kutaana Bukine.”