Buku wa Kala Ukingila ne mu ano Moba
Bantu bavula banemeka bingi Baibolo, mambo bayuka’mba ke buku wazhila. Nangwa byonkabyo, Baibolo kechi waambatu pa bya bupopweshi ne. Bino waamba ne pa mafunde anema etukwasha mu bwikalo bwetu bonse.
Monai byaambapo bantu bamo pa mafunde a mu Baibolo byo ebakwasha mu bwikalo bwabo.
Ba Fiona baambile’mba: “Bwikalo bwami bwawama bingi. Luno nji na milanguluko yawama kabiji nji bingi na lusekelo.”
Ba Gnitko baambile’mba: “Kufunda Baibolo kwandengela kuyuka bintu byo nafwainwa kuba mu bwikalo bwami.”
Ba Andrew baambile’mba: “Luno bwikalo bwami bwawama. Kechi ñingila kimye kyabaya ku nkito ne, kuba bino kundengela kwikala na kimye kyabaya na kisemi kyami.”
Bantu bo twaambapo peulupo kechi bo bonkatu bamwenamo mu kulondela mafunde a mu Baibolo ne. Bavula mwaya ntanda bataana kuba’mba mafunde a mu Baibolo ebakwasha bingi mu bwikalo bwabo.
Pano twayai tumone Baibolo byo akonsha kukwasha bantu kwikala na . . .
Bumi bwawama
Milanguluko yawama
Balongo ne Balunda
Maana a kuyuka bya kwingijisha mali
Bulunda bwakosa ne Lesa
Mitwe yalondelapo yamwesha kuba’mba Baibolo ke buku wafuma kwi Lesa kabiji mafunde ajimo etukwasha bingi mu bwikalo bwetu bonse.