Monaingamo Byawama Mu Bakwenu
Kilengela Kubula Kumonamo Byawama mu Bakwetu
Bwitoote bwakonsha kulengela muntu kwikala na misalululo. Muntu witoota utatu muchima pa bintu byamuwamina aye mwine. Umona’mba wanema kukila bakwabo. Muntu uji yense wakonsha kwikala na ino ndangulukilo. Buku wa Encyclopædia Britannica waamba’mba: “Mu bisho byavula boba bintu byapusana pusana, nabiji kajo, mvwajilo, byubilo, bintu byo baitabilamo, ne bikwabotu. Banemeka bingi bisho byabo kukila bya bakwabo.” Twakonsha kuchinuzhuka byepi ino ndangulukilo?
Mafunde a mu Baibolo Akonsha Kwitukwasha
“Na muchima wa kwipelula saka mulanguluka’mba bakwenu bemukila.”—FILIPAI 2:3.
Kino kinembelo kibena kulumbulula ka? Twafwainwa kwipelula pa kuba’mba tushinde kyubilo kya bwitoote. Inge twipelula tukamonanga’mba bakwetu betukila mu bintu bimo. Kafwako muntu uji na byubilo byonse byawama nangwa uba bintu byonse bulongo ne.
Akimonai byamwekejile ba Stefan. Bakomejile mu kyalo mo bamonanga bantu bamo amba bapanshi, bino abo kechi byobyo baubanga ne. Baambile’mba: “Kuyuka’mba bakwenu banema kukukila kukwasha kushinda misalululo. Kechi nayuka bintu byonse ne. Onkao mambo, nakonsha kufunjilako bintu bimo ku muntu uji yense.”
Byo Mwafwainwa Kuba
Mwafwainwa kwiyuka bulongo byo muji ne kuyuka’mba ne anweba mulubankanya. Yukai kuba’mba bakwenu bayuka bintu bimo byo mwabula kuyuka. Kechi mwafwainwa kulangulukanga’mba bantu bonse baji na byubilotu bimo ne.
Pa kuba’mba mubulenga kulanguluka byatama pa bantu bamo, mwafwainwa kwiipuzha’mba:
Yukai kuba’mba mumo mo mukankalwa kuba bulongo bakwenu boba bulongo
‘Nanchi uno muntu byubilo byanji byatama nyi, inyi byapusanakotu na bya bakwabo?’
‘Nanchi uno muntu naye umonamo byatama mwi amiwa nyi?’
‘Mwepi mumo uno muntu mo oba bulongo kunkila’
Ano mepuzho akonsha kwimukwasha kushinda misalululo ne kumonanga byawama mu bakwenu.