Mwanamulume Mutanshi ne Mwanamukazhi Mutanshi

BAÑANYI baji pa kino kipikichala? Ee, paji bantu. Bo bajinga mwanamulume mutanshi ne mwanamukazhi mutanshi. Ñanyi wibalengele? Lesa. Nanchi wamuyuka jizhina janji nyi? Yehoba. Kabiji mwanamulume waishile kutelwa’mba Adama ne mwanamukazhi amba Evwa.

Abino Yehoba Lesa byo byo amulengele Adama. Watolele lukungu lwa panshi ne kulenga mubiji wa muntu walumbuluka. Kepo apuyilemo muya mu myona ya muntu, ne Adama waalukile ke mumi.

Yehoba Lesa wapele Adama mwingilo. Waambijile Adama kutumba banyama bonse mazhina. Adama wafwainwa wamwenenga banyama pa kimye kyabaya, onkao mambo kyamupelejile kumona mazhina afwainwe kwibatumba bonse. Adama byo atumbilenga banyama mazhina, wamwenepo kintu kimo. Nanchi wikiyuka kino kintu nyi?

Banyama bonse bajinga na bakazhi babo. Kwajinga banzovu balume ne bakazhi, kabiji kwajinga mabokwe alume ne akazhi. Bino Adama kechi wajingapo na wamukazhi ne. Yehoba wamulengejile Adama kulaala tulo tukatampe, kepo amwangachile lubavu umo. Yehoba waingijishe uno lubavu kulengako mwanamukazhi wa kupa Adama, kabiji waikele ke mukazhanji.

Adama byo atemenwepo! Kabiji akifwanyikizha Evwa byo asangalelepo pa kwikala mu bujimi bwanengela! Onkao mambo, bakonsheshe kwikala na baana ne kwikala bwikalo bwa lusekelo.

Yehoba wakebelenga ba Adama ne Evwa kwikala myaka ne myaka. Wakebelenga’mba balule ntanda yonse kwikala yawama byonka byajinga bujimi bwa Edena. Ba Adama ne Evwa byo baikelepo na lusekelo pa kulanguluka kuba kino! Umvwe wajinga obewa, nanchi inge wakebeshe kuwamisha ntanda ke bujimi bwanengela nyi? Bino lusekelo lwa ba Adama ne Evwa kechi lwakulaijile ne. Twaya tumone kyalengejile.