Yosefwa Wibesekele Bakolojanji

YOSEFWA wakebelenga kuyuka kana bakolojanji jikumi bakitamine michima ne kubula lusa. Onkao mambo waambile’mba: ‘Anweba mwi bamwendela ntanda. Mwaiya amba mumone ntanda yetu po yakokela.’

Kumvwa abo amba: ‘Ine kechi twi bamwendela ntanda ne. Twi bantu bakishinka. Atweba bonse twi bankasa ne kolo. Twajinga 12. Pano bino nkasetu umo kechi tukiji nanji pa kino kimye ne, kabiji mukala washala ku muzhi ne batata.’

Yosefwa wamwesheshe nobe kechi waswa byo baambile ne. Wakwachile kolojanji wa jizhina ja Shimeona ne kumubika mukaleya, ne kuleka bakwabo kusendako kajo ne kubwela ku muzhi. Bino wibambijile’mba: ‘Byo mukabwela kuno, mwafwainwa kukeya na mukala wenu.’

Byo bafikile ku muzhi ku Kenana, bakolojanji babujile shabo Yakoba byonse byamwekele. Yakoba waumvwine bingi bulanda. Watendeka ne kujila’mba, ‘Yosefwa wafwile kala, kabiji ne Shimeona naye kene. Kechi nsakwimuswisha kusenda mwanami mukala Benjamina ne.’ Bino kajo kabo byo katendekele kupwa, Yakoba wibaswishishe kumusenda Benjamina ku Ijipita kuba’mba bakasende kajo kakwabo.

Yosefwa wibamwene bakolojanji kasa beya. Kabiji watemenwe bingi pa kumona nkasanji Benjamina. Bino kafwako nangwa umo pe abo wayukile’mba uno muntu wanema bingi wajinga Yosefwa ne. Pano Yosefwa waubilepo kintu kimo kya kweseka bakolojanji jikumi.

Wakambizhe bakalume banji kuyuzha kajo mu masaka abo. Bino kwa kubula kwibayukisha, wakambizhe’mba katomeno kanji ka siliva bekabike mu jisaka ja kwa Benjamina. Panyuma ya kuba bonse banyamuka kebaye kabiji baendako ne musinso, Yosefwa watumine bakalume banji kwibalondela. Byo bebataine, bakalume baambile’mba: ‘Mambo ka o mwaibila katomeno ka bankambo?’

Bonse batendekele kwikangaizha’mba ‘kechi twaibapo katomeno kanji ne. Umvwe katomeno mwikatane mu umo wa mwi atweba, awo yenka usa kutanwa nako wafwainwa kwipayiwa.’

Bakalume batendekele kupikita mu masaka abo, kabiji bataine katomeno mu jisaka ja kwa Benjamina, byonka byo ubena kumona papo. Bano bakalume baambile’mba: ‘Anweba bonse mwafwainwa kuya, bino Benjamina twafwainwa kuya nanji.’ Pano nga bano balongo jikumi baubilepo ka?

Bonse babwelele pamo ne Benjamina ku nzubo ya kwa Yosefwa. Yosefwa waambijile bakolojanji amba: ‘Anweba bonse mwafwainwa kuya ku muzhi, bino Benjamina usakushala ne kwikala ke muzha wami.’

Yuda waimene ne kwamba’mba: ‘Umvwe mbwele ku muzhi kwa kubula Benjamina, batata basakufikatu kufwa mambo bamutemwa kya kine kine. Onkao mambo, nanchi kushaletu amiwa ngikale muzha wenu, muleke uno mwanyike ayenga ku muzhi.’

Yosefwa pano wamwene’mba nanchi bakolojanji kine baaluka. Pano kechi bakitamine michima ne kubula lusa ne. Pano twaya tumone Yosefwa byo aubilepo.