Bansongwalume Bana mu Babilona

MFUMU Nebukaneza wasendele bonse bena Isalela bafunda ku Babilona. Kabiji panyuma, mu bano bantu mfumu wasajilemo banabalume balamba ne ba maana. Pa boba banabalume po pajinga ne bano bansongwalume bana bo wamona papo. Umo wajinga Danyela kabiji bakwabo basatu bena Babilona bebatumbile mazhina amba ba Shadalaka, Meshaka ne Abedenego.

Nebukaneza wanengezhezhe kufunjisha bansongwalume bya kwingila mu kipango kyanji. Panyuma ya kwibafunjisha myaka isatu, wasajilepotu boba bajinga na maana kuba’mba bamukwashengako mwa kupwishisha makatazho. Mfumu wakebelenga bansongwalume kwikala bakosa ne kumwekana bulongo kimye kyo bebafunjishenga. Onkao mambo, wapaine mukambizho wa kuba’mba bakalume banji bafwainwa kupa bansongwalume bonse kajo kawamisha ne binyu byonka byo atomangapo aye ne kisemi kyanji.

Akimona Danyela. Nanchi wayuka byo aambijilenga mukulumpe wa bakalume ba kwa Nebukaneza, aye Ashipenaze nyi? Danyela wamwambijilenga’mba kechi wakebelenga kuja kajo kawamisha kajangapo mfumu ne. Bino Ashipenaze waakaminwe bingi. Waambile’mba: ‘Mfumu wimutongwejile kajo ka kuja ne bya kutoma. Kabiji umvwe mukabule kumweka bulongo byonka biji bansongwalume bakwenu, mukangipaisha kwi mfumu.’

Onkao mambo, Danyela wayile kwi kalama ye atongwele Ashipenaze kuba’mba bamulamenga aye ne balunda nanji basatu. Waambile’mba: ‘Mwane, mwitweseke atweba moba jikumi. Mwitupengatu bishu byonka ne mema a kutoma. Apa bino, muketwesakanye pamo na bakwetu bansongwalume baja kajo kajapo mfumu, mukamone bakamweka bulongo kukila bakwabo.’

Kalama waitabile kuba byonkabyo. Byo papichile moba jikumi, Danyela ne balunda nanji basatu bamwekele bingi bulongo kukila bakwabo bansongwalume bonse. Onkao mambo, kalama wibalekele kutwajijila kuja bishu mu kifulo kya kuja kajo ko bebatongwejile kwi mfumu.

Ku mpelo ya myaka isatu, bansongwalume bonse bebatwajile kwi Nebukaneza. Panyuma ya kwisamba nabo bonse, mfumu wataine’mba Danyela ne balunda nanji basatu bo bajinga bingi na maana. Onkao mambo, wibambijile’mba bekale ba kumukwashako mu kipango kyanji. Kabiji kimye kyonse mfumu kyo aipuzhanga Danyela, Shadalaka, Meshaka ne Abedenego mepuzho nangwa kwibambila kupwisha makatazho akatampe, abo bakijishemotu kuyuka bintu kukila bañanga ne bantu banji bonse ba maana.