Yesu Wasemekejilwe mu Kipaka

NANCHI wamuyuka uno mwana uji pa kikye kipikichala nyi? Ee, Yesu. Po po asemekelwetu mu kipaka. Mu kipaka ke momwa mwikala banyama. Maliya walajikile Yesu mu kintu kijiilamo banyama, ko kuba’mba mpunzha yo babikilangamo bambili ne banyama bakwabo bya kuja. Pano nga mambo ka ba Maliya ne Yosefwa o baikejilenga muno na banyama? Nanchi ino yajinga mpunzha yawama ya kuba mwana wasemekelwamo nyi?

Ine, kechi yawamine ne. Pano bino kibalengejile kwikala muno ke kya kuba’mba: Ndamakyalo wa bena Loma, aye Kesala Augusatusa wapaine mukambizho wa kuba’mba, muntu yense wafwainwe kubwela ku muzhi kwanji ne kunembwa mu buku. Yosefwa wasemekejilwe muno mu Betelema. Bino, aye ne Maliya byo bafikile, kechi kwajingapo mpunzha ikwabo ya kuba bafikilamo ne. Onkao mambo, baishile monka muno mwajinga banyama. Kabiji pa jonka jino juba, Maliya wasemene Yesu! Bino byonka byo wamona, uno mwana waikeletu bulongo.

Nanchi wibamona bakafunga baishilenga na kumona Yesu nyi? Baikele mungye bufuku na kulama mikooko yabo, kabiji kyeya kikatampe kyasamijile ponse po bajinga. Wajinga malaika! Bakafunga bachiine bingi. Bino malaika wibambijile’mba: ‘Kange muchine ne, nemuletela mambo awama a lusekelo. Mambo ja lelo, mu Betelema mwaji kusemwa Nkambo, aye Kilishitu. Ye ukapulusha bantu! Mukamutana wapombewa mu bisapi kabiji saka alaala mu kijiilamo banyama.’ Ponkapo, bamalaika bavula baishile ne kutendeka kumutota Lesa. Onkao mambo, bukiji bukiji bano bakafunga bayile na kumona Yesu kabiji ne kumutana bamutaine.

Abya wayuka ene mambo Yesu kyo anemekejilwe nyi? Nanchi wamuyuka bulongo nyi? Akivuluka, mu jishimikila jitanshi jiji mu uno buku twaambilepo pa Mwana mutanshi wa kwa Lesa. Uno Mwana waingijile ne Yehoba mu kulenga jiulu ne ntanda ne bintu bikwabo byonsetu. Uno mwana ye Yesu ye tubena kwambapo!

Yehoba washikwile bumi bwa Mwananji kufuma mwiulu ne kwibutuntulwila munda ya kwa Maliya. Ponkapo, mwana watendekele kukoma munda mwanji byonkatu bikoma baana bakwabo munda ya bainabo. Bino uno mwana wajinga Mwana Lesa. Pa kupitapo moba, Yesu wasemekejilwe mu kipaka kyajinga mu Betelema. Nanchi wamona ene mambo bamalaika o basangalejile bingi pa kubula bantu amba Yesu wasemwa nyi?