Kufunda Baibolo na Bakamonyi ba kwa Yehoba kwimulengela kuyuka bukine. Kwambatu kine, bintu byo mwafunda bimukwasha kwikala na bulunda bwawama ne Lesa, kabiji bimulengela kwikala na luketekelo lwa bumi bwa myaka ne myaka kulutwe ne kuketekela bintu byawama bikekala mu paladisa kimye kikalamanga Bufumu bwa Lesa. Mambo a Lesa akosesha lwitabilo lwenu, kabiji kutanwa ku kupwila kwa bena Kilishitu, kwimulengela kumwenamo byawama bingi. Kabiji mwayuka Yehoba byo abena kwingila na bantu banji lelo jino.—Zeka. 8:23.

Byo mubena kwinengezha kubatizhiwa, musakumwenamo bingi pa kupituluka mu byaitabilamo bena Kilishitu na bakulumpe mu kipwilo. (Hebe. 6:1-3) Yehoba atwajijile kwimukwasha pa kwibikako kwenu kumuyuka bulongo, kabiji akemupe mfweto yo alaya.—Yoa. 17:3.

1. Mambo ka o mubena kukebela kubatizhiwa?

2. Yehoba ye ñanyi?

• “Yehoba ye Lesa wa kine mwiulu ne pano pa ntanda. Kechi kujipo mukwabo ne.”—Mpitu. 4:39.

• “Anweba, yenka wa jizhina ja Yehoba, yenu bunketu Mwine Wakila pano pa ntanda ponse.”—Sala. 83:18.

3. Mambo ka o mwafwainwa kwingijishanga jizhina ja Lesa?

• “Byonkabyo, mwafwainwa kulombanga bino amba: ‘Tata wetu wa mwiulu, jizhina jenu jizhile.’”—Mat. 6:9.

• “Yense wita pa jizhina ja Yehoba ukapuluka.”—Loma 10:13.

4. Ñanyi Byambo bimo byo baingijisha mu Baibolo pa kulumbulula Yehoba?

• “Yehoba, Mulenga walengele ntanda, ye Lesa wa myaka ne myaka.”—Isa. 40:28.

• “Tata wetu wa mwiulu.”—Mat. 6:9.

• “Lesa butemwe.”—1 Yoa. 4:8.

5. Ñanyi bintu byo mwafwainwa kupa Yehoba Lesa?

• “Wafwainwa kutemwa Yehoba Lesa wobe na muchima wobe yense ne na mweo wobe yense ne na maana obe onse ne na bulume bobe bonse.”—Mako 12:30.

• “Wafwainwa kupopwelatu Yehoba Lesa wobe ne kumwingijila aye yenka kwapwa.”—Luka 4:8.

6. Mambo ka o mwafwainwa kwikela ba kishinka kwi Yehoba?

• “Mwanami, wikale wa maana ne kusangajika muchima wami, pa kuba’mba namukumbule awa uñendeleka.”—Maana 27:11.

7. Mulomba kwi ñanyi, kabiji ñanyi jizhina jo mwingijisha pa kulomba?

• “Kinetu nemwambila [Amiwa Yesu] namba, Umvwe mukalombe kintu kwi Batata, abo bakemupakyo mu jizhina jami.”—Yoa. 16:23.

8. Ñanyi bintu bimo byo mwakonsha kulombapo?

• “Byonkabyo, mwafwainwa kulombanga bino amba: ‘Tata wetu wa mwiulu, jizhina jenu jizhile. Bufumu bwenu bwiye. Kyaswa muchima wenu kyubiwe pano panshi, byonka byo kyubiwa mwiulu. Mwitupeko kajo ketu ka lelo. Ne kwitulekelako mambo etu, byonka byo twibalekela betulenga mambo. Kabiji kechi mwitutwale mu lweseko ne, mwitupokolole kwi yewa mubi.’”—Mat. 6:9-13.

• “Luno lo luketekelo lo tuji nalo mwi aye amba kintu kyonse kyo twakonsha kumulomba mwayila kyaswa muchima wanji, aye witumvwa.”—1 Yoa. 5:14.

9. Ñanyi bintu byakonsha kulengela Yehoba kubula kumvwa milombelo ya muntu?

• “Bakamwita Yehoba amba ebakwashe, bino kechi ukebakumbula ne . . . na mambo a byubilo byabo byatama.”—Mika 3:4

• “Meso a Yehoba aji pa baoloka, ne matwi anji omvwa milombelo yabo ya misashijilo, pakuba Yehoba washikwa bantu boba byatama.”—1 Pe. 3:12.

10. Yesu Kilishitu ye ñanyi?

• “Shimona Petelo wamukumbwile’mba: ‘Anweba mwi Kilishitu, Mwana Lesa mumi.’”—Mat. 16:16.

11. Mambo ka Yesu o aishijile pano pa ntanda?

• “Mwana muntu byo aishile, kechi waishile’mba bamwingijile ne, poso amba ebengijile ne kupana bumi bwanji kwikala bukuzhi bwa kukuula bavula.”—Mat. 20:28.

• “Nafwainwa [Yesu] kusapwila mambo awama a Bufumu bwa Lesa.”—Luka 4:43.

12. Mwakonsha kumwesha byepi’mba musanta pa kitapisho kya kwa Yesu?

• “Wafwijile bonse kuba’mba aba baji na bumi babule kwikelanga mwayila bikeba michima yabo, kana kwikela mwayila bikeba yewa wibafwijile kabiji ye basangwile.”—2 Ko. 5:15.

13. Ñanyi luusa Yesu lo bamupa?

• “Lesa wampa luusa lonse pa bintu bya mwiulu ne bya pano pa ntanda.”—Mat. 28:18.

• “Lesa wamupele kifulo kikatampe ne jizhina jakila mazhina onse.”—Fili. 2:9.

14. Nanchi mwayuka’mba Jibumba Jitangijila ja Bakamonyi ba kwa Yehoba ye “kalume wa kishinka kabiji wa maana” ye batongola kwi Yesu nyi?

• “Nanchi kalume wa kishinka kabiji wa maana ye ñanyi, nkambo yanji ye atongwele kutalanga pa ba mu nzubo yanji amba ebapenga kajo pa kimye kyafwainwa?”—Mat. 24:45.

15. Nanchi mupashi wazhila muntu nyi?

• “Malaika wamukumbwile’mba: ‘Mupashi wazhila ukekala pe obewa, ne bulume bwa Mwine Wakila bukekala pe obewa. Kabiji na mambo a kino, awa ukasemwa ukatelwa’mba wazhila, Mwana Lesa.’”—Luka 1:35.

• “Onkao mambo, nangwa kya kuba mwi babi, mwayuka kupana byawama ku baana benu, ko kuba’mba Shenu wa mwiulu ukakilapo kupana mupashi wazhila ku boba bamulomba!”—Luka 11:13.

16. Yehoba waingijishe byepi mupashi wazhila?

• “Jiulu jalengelwe na jiwi ja Yehoba, Ne bintu byonse bijimo byalengelwe na muya wa mu kanwa kanji.”—Sala. 33:6.

• “Bino mukatambula bulume kimye mupashi wazhila kyo akemwikijila, kabiji mukekala bakamonyi . . . ne monse mwapela ntanda.”—Byu. 1:8.

• “Kafwako bungauzhi bwa mu Binembelo bwaishileko na maana a muntu ne. Mambo bungauzhi kechi bwaishileko na kyaswa muchima wa muntu ne, bino bantu baambilenga byafumine kwi Lesa byo bebatangijile ku mupashi wazhila.”—2 Pe. 1:20, 21.

17. Bufumu bwa Lesa bo bu ka?

• “Lesa wa mwiulu ukaleta bufumu bo bakabula konauna. Kabiji buno bufumu kechi bakebupana ku bantu bangi ne. Bukavingakanya ne kupwisha buno bufumu bonse kabiji abo bukekala myaka ne myaka.”—Da. 2:44.

18. Mukamwenamo byepi mu Bufumu bwa Lesa?

• “Ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne. Bintu bya kala byapichijila.”— Lum. 21:4.

19. Mwayuka byepi’mba Bufumu bwa Lesa katatakatu bukalete bintu byawama?

• “Baana ba bwanga baishile kwi aye ku mbaji ne kumushikisha’mba: ‘Tubuulai, bino bintu bikamweka ñanyi kimye, kabiji kiyukilo kya kwikalapo kwenu ne kya mpelo ya buno bwikalo kyo kyepi?” Yesu wibakumbwile’mba: ‘. . . Kisaka kikalukuka kisaka kikwabo ne bufumu bukalukuka bufumu bukwabo, kabiji kukekala bipowe bya nzala ne bitentanshi kuku ne kuku. Kabiji ano mambo awama a Bufumu bakeasapwila pano pa ntanda ponse kwikala bukamonyi ku bisaka byonse bya bantu, apa bino mpelo ikafike.’”—Mat. 24:3, 4, 7, 14.

• “Mu moba a kupelako kukeya bimye byakatazha. Mambo bantu bakekala betemwatu abo bene, batemwa mali, bejantula, belundumika, ba mwenga, babula kukookela bansemi, babula kusanta, babula bukishinka, babula butemwe, babula kukeba kumvwañana, ba luntepentepe, babula kwikanya, bashinta, babula kutemwa kyawama, basolola bakwabo, babula kumvwa, betota, batemwa bya kisangajimbwe mu kifulo kya kutemwa Lesa, bamweka nobe baji na munema wa kunemeka Lesa, bino bakana bulume bwa uno munema.”—2 Timo. 3:1-5.

20. Mwakonsha kumwesha byepi’mba mwanemeka Bufumu bwa Lesa?

• “Twajijilai na kukeba Bufumu patanshi ne bololoke bwanji.”—Mat. 6:33.

• “Yesu waambijile baana banji ba bwanga amba: ‘Umvwe muntu ukeba kundondela, ekane mwine ne kusenda kichi kyanji kya lumanamo kabiji andondelenga.’”—Mat. 16:24.

21. Satana Diabola ye ñanyi? Nga bandemona bo bañanyi?

• “Anweba mwafuma kwi shenu Diabola. . . aye ye wa bubela kabiji ye shanja bubela.”—Yoa. 8:44.

• “Nsuñunyi mukatampe bamutayile panshi, yenka aye muloolo wa kala, utelwa’mba Diabola kabiji Satana, yenka ubena kujimbaika bantu ba pano pa ntanda ponse; bamutayile pa ntanda ne bamalaika banji bebatayile pamo nanji.”—Lum. 12:9.

22. Ñanyi byambo bya bubela Satana byo aambile pe Yehoba ne pa bapopweshi banji?

• “Mwanamukazhi wakumbwile muloolo amba: ‘Twakonsha kuja ku bipangwa bya ku bichi bya mu bujimi. Bino ku kipangwa kya ku kichi kiji pakachi ka bujimi, Lesa waambile’mba, ‘Kechi mwafwainwa kujako ne, nangwa kukwatakotu ne; mambo umvwe mwauba bino, mukafwa.”’ Muloolo wabuujile mwanamukazhi amba: ‘Kine kechi mukafwa ne. Mambo Lesa wayuka’mba mu juba jo mukajako ku kino kichi, meso enu akalaba kabiji mukekala nobe Lesa mu kuyuka byawama ne byatama.’”—Nte. 3:2-5.

• “Satana wakumbwile Yehoba amba: ‘Kikoba pa kikoba kikwabo. Muntu wakonsha kupana kintu kyonse kyo aji nakyo pa kuba’mba apulushe bumi bwanji.’”—Yoba 2:4.

23. Mwakonsha kumwesha byepi amba byaambile Satana bya Bubela?

• “Kumwingijila [Lesa] na muchima yense.”—1 Moba. 28:9

• “Kufikatu ne byo nkafwa, kechi nkasankilapo bulumbuluke bwami ne.”—Yoba 27:5.

24. Mambo ka bantu o bafwila?

• “Bundengamambo byo bwatwelele pano pa ntanda mu muntu umo, ne lufu nalo lwaishijile mu bundengamambo, byonkabyo lufu lwakumbene ku bantu bonse mambo bonse balengele mambo.”—Loma 5:12.

25. Kikala Byepi Inge Muntu Wafwa?

• “Bantu bomi bayuka’mba bakafwa, pakuba bantu bafwa kafwako kintu nangwa kimo kyo bayuka ne.”—Sapwi. 9:5.

26. Ñanyi luketekelo lo tuji nalo pa mambo a bantu bafwa?

• “Kukekala lusanguko lwa baoloka ne babula koloka.”—Byu. 24:15.

27. Bantu banga bakaya mwiulu na kulama pamo ne Yesu?

• “Namwene Mwana Mukooko saka aimana pa Mutumba wa Ziona, na ba 144,000 baji na jizhina janji ne ja Shanji pa bilungi byabo.”—Lum. 14:1.

Kufunda Baibolo kwimukwasha kuyuka bintu Yehoba byo abena kukeba’mba mubenga ne byo mwafwainwa kulondela mizhilo yanji yaoloka mu bwikalo bwenu. Kwingijisha bintu byo mwafunda kwimungela kupimpula byubilo byenu ne mo mumwena bintu. Byo mwafuukulapo kulondela mizhilo yaoloka ya Yehoba, mwafikilamo kwikala musapwishi wa mambo awama.

Kupituluka mu mepuzho aji mu uno mutwe, kusakwimukwasha kuvulukanga mizhilo yaoloka ya Yehoba ne kwimuvululamo bintu bimo byo mwafwainwa kuba pa kuba’mba mufikilemo kwikala kalume wanji. Bino bishinka bisakwimukwasha kuyukisha buneme bwa kuba bintu byonse na jiwi ja mu muchima jatooka kabiji jileta munema kwi Yehoba.—2 Ko. 1:12; 1 Timo. 1:19; 1 Pe. 3:16, 21.

Mwafunda bintu byavula bingi. Kabiji mwafuukulapo kunekenena bukalama bwa Yehoba ne kwikala mu jibumba janji. Mepuzho ne Binembelo biji uno mutwe bikemukwasha kuyuka inge kine munekenena Yehoba, mu kipwilo, mu kisemi nangwa kampe mukivwanga mu bya bumulwila ntanda. Kabiji mukatemwa bingi kuyuka Yehoba byoanengezha pa kufunjisha bantu banji ne kwibakwasha kukosesha lwitabilo lwabo. Kino kyavwangamo kutanwanga ku kupwila ne kukumbulangapo.

Luno lubaji lwaamba pa ene mambo o kyawamina kwingilangako mwingilo wa kusapwila pa Bufumu bwa Lesa kimye kyonse. Kabiji lwalumbulula ne bya kukwasha bantu kuyuka Yehoba ne kwibabuula bintu byo abena kubila bantu. (Mat. 24:14; 28:19, 20) Kabiji lwaamba ne pa ene mambo o mwafwainwa kwipaina kwi Yehoba Lesa ne kubatizhiwa. Yukai kuba’mba Yehoba usanta bingi byo mwafuukulapo na mambo a lusa lwanji lukatampe lo emumwesha.

1. Ñanyi jifunde jaamba pa masongola jilondela bena Kilishitu? Kabiji ñanyi mambo o baambapo mu binembelo akonsha kulengela kwikaana?

• “Nanchi kechi mwatangapo kuba’mba, kufumatu ku ntendekelo, awa wibalengele, walengele mwanamulume ne mwanamukazhi ne kwamba’mba: ‘Na mambo a kino, mwanamulume ukasha bashanji ne bainanji ne kulamachila ku mukazhanji ne abo bakekala ke mubiji umo nenyi’? Onkao mambo, kechi bakiji babiji ne, bino ke mubiji umo. Onkao mambo, akya kyasambakanya Lesa, muntu kechi ekyabanye ne. . . Yense ukana mukazhanji pa kubula mambo a bulalelale ne kusongola mukwabo, wauba bukende.”—Mat. 19:4-6, 9.

2. Mambo ka bantu o bafwainwa kwisongwela mwayila mizhilo? Inge mwasongola nangwa mwasongolwa, nanchi kine mwisongwele mwayila mizhilo kabiji mwanembesha ku kafulumende nyi?

• “Saka wibavululamo kunekenena ne kukookela makafulumende ne ba luusa.”—Titu. 3:1.

• “Masongola aneme ku bonse, kabiji kange azhilululwe ne, mambo Lesa ukazhachisha ba bulalelale ne bakende.”—Hebe. 13:4.

3. Ñanyi mwingilo uji na bonse mu kisemi?

• “Mwanami, umvwa mafunde a bashobe, kabiji kange ulengulule bikufunjisha bainobe ne.”—Maana 1:8.

• “Mulume ye mutwe wa mukazhanji byonkatu Kilishitu byo aji mutwe wa kipwilo . . . Anweba banabalume, temwainga bakazhi benu, byonkatu ne Kilishitu byo atemenwe kipwilo.”—Efi. 5:23, 25.

• “Anweba bashetu, kange muzhingijishenga baana benu ne, bino bakomeshainga mu kwibajimuna ne kwibafunjisha maana a Yehoba.”—Efi. 6:4.

• “Anweba baana, saka mukookela bansemi benu mu bintu byonse, mambo kino kitokesha Nkambo ku muchima.”—Kolo. 3:20.

• “Anweba banabakazhi nekenenainga bamwatawenu.”—1 Pe. 3:1.

4. Mambo ka o twafwainwa kunemekela bumi?

• “[Lesa] ye upa bantu bonse bumi, muya ne bintu byonse. . . . aye ye ulengela’mba twikale na bumi ne kwenda.”—Byu. 17:25, 28.

5. Mambo ka o twafwainwa kubujila kwipayañana kuvwangakotu ne kwipaya mwana ukiji munda?

• “Umvwe banabalume babena kulwa kabiji basakula mwanamukazhi uji na jimi kabiji . . . umvwe pamweka lufu, mwafwainwa kupana bumi pa bumi.”—Lupu. 21:22, 23.

• “Meso enu ammwene saka nji munda; binungwa bya mubiji wami byonse byanembelwe mu buku wenu ne moba o byalengejilwengamo, nangwa kya kuba kechi kwakijingapo nangwa kimo kyamwekele ne.”—Sala. 139:16.

• ‘Yehoba washikwa . . . maboko echila mashi a bantu babula mambo.’—Maana 6:16, 17.

6. Mizhilo ya Lesa yaambapo’mba ka pa kwingijisha mashi?

• ‘Kanai . . . mashi ne nyama ya kubula kukingya.’—Byu. 15:29.

7. Mambo ka o twafwainwa kutemenwa balongo ne banyenga mu kipwilo?

• “Mbena kwimupa mukambizho mupya, namba mwitemwe anwe bene na bene; byonka byo nemutemwa amiwa, ne anweba mwitemwe anwe bene na bene. Kino kyo kyo bakayukilako bonse amba mwi baana bami ba bwanga, umvwe mwitemwa anwe bene na bene.”—Yoa. 13:34, 35.

8. Pa kuba’mba muntu abule kusambwisha bakwabo kikola kisambukilañana nangwa kyakonsha kwipayañana: (a) Mambo ka muntu uji na kino kikola o afwainwa kubujila kuba bintu nabiji kwikumbata na bakwabo ne kwifyompa? (b) Mambo ka o afwainwa kubujila kuzhingila inge bamo babula kumwitako ku mazubo abo? (c) Mambo ka muntu ubena kulanguluka’mba kampe uji na kikola kisambukilañana o afwainwa mwine kuya na kupimisha mashi saka akyangye kwipanguzha nangwa saka bakyangye kumwipanguzha? (d) Mambo ka muntu uji na kikola kisambukilañana o afwainwa kubuujila jimo ukwatankanya mingilo ya jibumba ja bakulumpe saka bakyangye kumubatizha?

• “Kechi mwikale na nkongole na muntu nangwa umo ne. . . . ‘Wafwainwa kutemwa mukwenu byonka byo witemwa obe mwine.’ Muntu uji na butemwe kechi uba mukwabo kyatama ne.”—Loma 13:8-10.

• ‘Tai muchima ku bintu bya bakwenu kabiji kange mulangulukengatu pa bintu byenu byonka ne.”—Fili. 2:4.

9. Mambo ka Yehoba o etukambizhizha kulekelako bakwetu mambo?

• “Itekenyainga anwe bene na bene ne kwilekelako mambo umvwe umo uji na mambo na mukwabo. Byonkatu Yehoba byo emulekejileko mambo, ne anweba byo byo mwafwainwa kubanga.”—Kolo. 3:13.

10. Mwakonsha kuba byepi inge mulongo nangwa nyenga wimubepela nangwa wimwibila mali?

• “Umvwe mulongo wobe wakulenga mambo, yanga ukamubuule mambo o akulenga. Umvwe wakumvwa, ko kuba’mba wabwezha mulongo wobe mu jishinda jawama. Bino umvwe wakana kukumvwa, wafwainwa kusendapo muntu umo nangwa babiji, kuba’mba na byambo bya bakamonyi babiji nangwa basatu mambo alumbuluke. Umvwe wabula kwibomvwa, buula kipwilo. Kabiji inge wabula kumvwina kipwilo, ekale kwi obewa nobe wa mu bisaka bikwabo nangwa nobe musonkeshi.”—Mat. 18:15-17.

11. Yehoba umona byepi ano mambo?

▪ Bulalelale

▪ Kupopwela bankishi

▪ Mwanamulume kwilaala na mukwabo mwanamulume nangwa mwanamukazhi kwilaala na mukwabo mwanamukazhi

▪ Kwiba

▪ Kisela kya kuchikapo mali

▪ Kupendwapendwa

• “Kange bemutwale mungi ne. Ba bulalelale, bapopwela bankishi, bankende, banabalume baswisha banabalume bakwabo kwibalaala, banabalume belaala na banabalume bakwabo, bangivi, ba lunkumbwa, bapendwapendwa, batukana, ne baja bya lunkanankana kechi bakaswana Bufumu bwa Lesa ne.”—1 Ko. 6:9, 10.

12. Byo mwayuka Lesa byo amona bulalelale kuvwangakotu ne kwilaala na muntu wabula mwina kwenu, mwafuukulapo kuba ka?

• “Chinai bulalelale!”—1 Ko. 6:18.

13. Mambo ka o twafwainwa kuchinuzhukila bizhima byonse nangwatu michi ikwabo yabula kufwainwa?

• “Mulambule mibiji yenu kwikala kitapisho kyumi, kyazhila, kyaitabilwa kwi Lesa ne kwingila mwingilo wazhila na bulume bwenu bwa kulanguluka. Kabiji kilekai kulondela bintu bya buno bwikalo, bino mwalulukenga kupichila mu kupimpulanga milanguluko yenu kuba’mba muyukenga kyaswa muchima wa Lesa, akya kyawama, kyalumbuluka kabiji kimutokesha ku muchima.”—Loma 12:1, 2.

14. Ñanyi bintu bimo Lesa byo akanya bitundaika byubilo bya bandemona?

• “Mwi anweba kechi mukatanwe muntu nangwa umo ukasoka mwananji wa mulume nangwa mwananji wa mukazhi mu mujilo ne, nangwa uponga, nangwa ñanga wa bisoko nangwa muntu yense uba bya lubuko nangwa mulozhi ne. Kabiji kechi mukatanwe muntu uta bakwabo bwanga nangwa wipuzha muntu wisamba na mipashi nangwa wamba bikamweka kulutwe nangwa wisamba na bafu ne.”—Mpitu. 18:10, 11.

15. Ñanyi kintu kyafwainwa kuba bukiji bukiji muntu walenga mambo akatampe kabiji ubena kukeba kwikala jikwabo mulunda ne Yehoba?

• “Nasolwele mambo ami kwi anweba; kechi nafile mambo ami ne. Naambile namba: ‘Nsakusolola mizhilulwila yami kwi Yehoba.’”—Sala. 32:5.

• “Nanchi mwi anweba muji wakolwa nyi? Ete bakulumpe mu kipwilo, ne abo bamulombelele, kumushinga manyi mu jizhina ja Yehoba. Kabiji lulombelo lwa lwitabilo lukalengela muntu wakolwa kukosa, ne Yehoba ukamubuka. Kabiji umvwe walenga mambo, Lesa ukamulekelako.”—Yako. 5:14, 15.

16. Mwafwainwa kuba byepi inge mwayuka’mba mulongo nangwa nyenga mu kipwilo walenga mambo akatampe?

• “Umvwe muntu waumvwa kuba’mba babena kukeba’mba ekale kamonyi pa mambo o ashinkilwepo nangwa o amwene nangwa o aumvwine kabiji wabula kwiasolola, ko kuba’mba walenga mambo kabiji ukazhatwa na mambo.”—Levi 5:1.

17. Twafwainwa kuba byepi na muntu ye bapanga mu kipwilo?

• “Mwikileke kupwanañana na muntu yense utelwa’mba mulongo bino saka oba bulalelale, nangwa wa lunkumbwa, nangwa upopwela bankishi, nangwa utukana, nangwa upendwapendwa, nangwa uja bya lunkanankana, muntu wa uno mutundu kechi mwafwainwa ne kuja nanji ne.”—1 Ko. 5:11.

• “Umvwe muntu waiya kwi anweba na lufunjisho lwapusana na luno, kange mumutambwile mu nzubo yenu nangwa kumwimunatu ne.”—2 Yoa. 10.

18. Mambo ka o mwafwainwa kwikela na balunda batemwa Yehoba?

• “Awa wenda na ba maana ukekala na maana, pakuba awa ukaya na bakosama ukamona bya malwa.”—Maana 13:20.

• “Kange mujimbaikwe ne. Kupwanañana na babi konauna byubilo byawama.”—1 Ko. 15:33.

19. Mambo ka Bakamonyi ba kwa Yehoba o babujila kwivwanga mu bya bumulwila ntanda?

• “Abo kechi bo ba pano pa ntanda ne, byonka [amiwa Yesu] byo nabula kwikala wa pano pa ntanda.”—Yoa. 17:16.

20. Mambo ka o mwafwainwa kukookelanga kafulumende?

• “Muntu yense akookelenga bakulumpe balama kyalo, mambo bukulumpe bufuma kwi Lesa; bano Lesa wibaswisha kwikala pa bifulo byabo.”—Loma 13:1.

21. Mwafwainwa kuba byepi inge mizhilo ya bantu yapusenamo na mizhilo ya Lesa?

• “Lesa ye kalama ye twafwainwa kukookela kechi bantu ne.”—Byu. 5:29.

22. Ñanyi binembelo byakonsha kwimukwasha pa kusala nkito ya kutwela pa kuba’mba mubule kwikala ba pano pa ntanda?

• “Kisaka kya bantu kechi kikasuntwila mpoko kisaka kikwabo ne, kabiji kechi bakafunda kulwa nkondo jibiji ne.”—Mika 4:3.

• “Anweba bantu bami, lupukaimo mwi aye, inge kechi mukeba kwivwangamo mu bubi bwanji ne, kabiji inge kechi mukeba kupitamo mu binkunka byanji ne.”—Lum. 18:4.

23. Ñanyi bya kisangajimbwe ne makayo byo mwafwainwa kusala, kabiji byepi byo mwafwainwa kuchinuzhuka?

• “Yehoba . . . washikwa muntu yense watemwa bukapondo.”—Sala. 11:5.

• “Shikwai kintu kyatama; kakachilai ku kintu kyawama.”—Loma 12:9.

• “Langulukainga pa bintu bya kine, bintu byanema, bintu byaoloka, bintu bilengela muntu kwilama bulongo, bintu bileta butemwe, bintu bitelwa bulongo, bintu byawamisha, ne bintu byafwainwa kutotwa ku bantu.”—Fili. 4:8.

24. Mambo ka Bakamonyi ba kwa Yehoba o babujila kupwijila pamo na machechi akwabo?

• “Kechi mwafwainwa kutoma mu katomeno ka Yehoba ne mu katomeno ka bandemona ne.”—1 Ko. 10:21.

• “‘Lupukaimo mwi abo ne kwabana nabo,’ byo byaamba Yehoba, ‘kabiji kange mukwate ku kintu kya muzhilo ne’; ‘ne amiwa nkemutambulwila.’”—2 Ko. 6:17.

25. Ñanyi mafunde a mu Baibolo akemukwasha kufuukulapo bulongo umvwe mwakonsha kwivwangamo mu bya kusekelela nangwa ne?

• “Abo bakwatankene na bisaka bya bantu ne kufunda mashinda abyo. Batwajijile na kwingijila bankishi babo, kabiji abano baikele ke kitewa kwi abo.”—Sala. 106:35, 36.

• “Bantu bafwa kafwako kintu nangwa kimo kyo bayuka ne.”—Sapwi. 9:5.

• “Abo kechi bo ba pano pa ntanda ne, byonka byo nabula kwikala wa pano pa ntanda.”—Yoa. 17:16.

• “Kimye kyapitapo kyo mwaubijilengamo bintu bikeba bisaka bya bantu kyawana, byo mwaubilenga byubilo bya kwizozola, bya lwiso, kutomatoma binyu, kusangalala kubi, kupendwapendwa ne kupopwela bankishi.”—1 Pe. 4:3.

26. Bintu byo baambapo mu Baibolo pa bantu bavulukile moba a kusemwa, byakonsha kwimukwasha byepi inge mwakonsha kuvuluka moba a kusemwa nangwa ne?

• “Pa juba ja busatu, Felo wavulukilenga juba ja kusemwa kwanji, kabiji watekejile kijiilo bakalume banji bonse kabiji wakasulwile mukulumpe wa bakaseya ne mukulumpe wa bateeka bakalume banji saka batalako. Kabiji mukulumpe wa bakaseya wamubwezhezhe pa kifulo kyanji kya bukaseya . . . Pakuba mukulumpe wa bateeka wamukujikile byonkatu Yosefwa byo ebalumbulwijile.”—Nte. 40:20-22.

• “Byo bavulukilenga juba ja kusemwa kwa kwa Heloda, mwana wa mukazhi wa kwa Helodyasa wazhile ne kusangajika bingi muchima wa kwa Heloda kya kuba wachipile’mba usakumupa kyonse kyo asakukeba. Byo bamubuujile kwi inanji, waambile’mba: ‘Bampe mutwe wa kwa Yoano pa nsanyi ikatampe yaselebala.’ Ponkapo wibatumine, ne Yoano bamuchibile mutwe monka mu kaleya.”—Mat. 14:6-8, 10.

27. Mambo ka o mwafuukwilapo kulondelanga bimubuula bakulumpe mu kipwilo?

• “Kookelainga ne kunekenena babena kwimutangijila, mambo abo babena kwimulama anweba kabiji baketotolwela pa mambo a kino, pa kuba’mba bengilenga na lusekelo kechi na bulanda ne, mambo kyakonsha kwimulengela kubula kumwenamo byawama.”—Hebe. 13:17.

28. Mambo ka o kyawamina anweba ne ba mu kisemi kyenu kwikalangako na kimye kya kutanganga ne kufunda Baibolo kimye kyonse?

• “Aye usekela monka mu mizhilo ya Yehoba, kabiji utanga mizhilo yanji ne kulanguluka langulukapo mute ne bufuku. Aye ukekala nobe kichi kyo bajimba ku tukola twa mema, kichi kipanga bipangwa mu kimye kyakyo, kabiji mabuula akyo kechi aleela ne. Ne bintu byonse byo oba bikalumbuluka.”—Sala. 1:2, 3.

29. Mambo ka o mwatemenwa kuya na kupwila ne kukumbulapo?

• “Nkasapwila jizhina jenu ku balongo bami; nkemutotanga mukachi ka kipwilo.”—Sala. 22:22.

• “Twayai twitenga muchima atwe bene na bene kuba’mba twitundaikenga kwitemwa atwe bene na bene ne kuba mingilo yawama, kabiji kange tuleke kupwila pamo byonka byuba bantu bamo ne, bino twitundaikenga atwe bene na bene, ne kwibikishakotu byo mubena kumona aja juba saka jifwenya pepi.”—Hebe. 10:24, 25.

30. Ñanyi mwingilo wanema witupa Yesu?

• “Yainga na kufunjisha bantu ba mu bisaka byonse bya bantu kwikala ke baana bami ba bwanga, ne kwibabatizha . . . , ne kwibafunjisha kulama bintu byonse byo nemukambizha.”—Mat. 28:19, 20.

31. Ñanyi muchima ye mwafwainwa kwikala nanji pa kuba’mba musangajike Yehoba, inge mwapana mali ku mwingilo wa Bufumu nangwa mwakwasha balongo ne banyenga?

• “Nemeka Yehoba na bintu byawamisha byo uji nabyo.”—Maana 3:9.

• “Muntu yense obe monka mo afuukwila mu muchima wanji, kechi apane na bulanda nangwa na mambo a kumukanjikizha ne, mambo Lesa watemwa muntu upana na lusekelo.”—2 Ko. 9:7.

32. Ñanyi makatazho bena Kilishitu o bafwainwa kuketekela kupitamo?

• “Bo ba lusekelo aba bo bamanyika na mambo a bololoke, mambo Bufumu bwa mwiulu bo bwabo. Mwi ba lusekelo umvwe bantu bemwambila mwenga, kwimumanyika ne kwimubepela mu misango yonse ya bubi na mambo a amiwa. Sekelai ne kusangalala, mambo mfweto yenu ya mwiulu yabaya, mambo byo byo bamanyikilenga ne bangauzhi bajingako anweba saka mukyangye kusemwa.”—Mat. 5:10-12.

33. Mambo ka o kyawamina kwikala Kamonyi wa kwa Yehoba wabatizhiwa?

• “Byambo byenu nebitaaine kabiji nebijiile; kabiji byambo byenu byalengejile muchima wami kusekela ne kusangalala, mambo natelwa pa jizhina jenu, anweba Yehoba Lesa wa mabumba.”—Yele. 15:16.

Kubatizhiwa javula kubiwa pa kubuñana ne pa kushonkena kwa Bakamonyi ba kwa Yehoba. Ku mpelo ya jashi ja lubatizhilo, ñambi wambila boba babena kuya ku lubatizhilo kwimana ne kukumbula na jiwi ja peulu ano mepuzho abiji:

1. Nanchi mwalapila ku bundengamambo bwenu ne kwipana anweba bene kwi Yehoba, ne kwitabila kuba’mba Yesu Kilishitu jo jishinda janengezha Lesa ja kupulushishamo bantu nyi?

2. Nanchi mwayuka’mba lubatizhilo lwenu lusa kumwesha’mba pano mwi Bakamonyi ba kwa Yehoba bakwatankena pamo na jibumba janji nyi?

Kukumbula’mba ee ano mepuzho ke “kusolola patoka” amba babena kuya ku lubatizhilo baji na lwitabilo mu bukuzhi ne kumwesha’mba kine bepana abo bena kwi Yehoba. (Loma 10:9, 10) Onkao mambo, babena kuya ku lubatizhilo bafwainwa kulangulukilapo jimo ne kulombelapo pa ano mepuzho kuba’mba bakakonshe kukumbula kwesakana na mwayila lwitabilo lwabo.

Nanchi mwipana kwi Yehoba mu lulombelo ne kumulaya kuba’mba mukamupopwelangatu aye yenka ne kuba kyaswa muchima wanji mu bwikalo bwenu nyi?

Nanchi kine mwashiinwa’mba mwafwainwa kubatizhiwa pa kino kimye nyi?

Ñanyi mvwajilo yafwainwa kuvwala babena kuya na kubatizhiwa? (1 Timo. 2:9, 10; Yoa. 15:19; Fili. 1:10)

Twafwainwa kuvwala bivwalo na “kwipelula ne kwikala na milanguluko yawama” pa kuba’mba ‘tunemeke Lesa.’ Onkao mambo, aba babena kubatizhiwa kechi bafwainwa kuvwala bivwalo byapulangila nangwa bivwalo byo banembapo byambo nangwa bya kutentemesha busulu ne. Bafwainwa kuvwala bivwalo bya butooto, bibena kumweka bulongo kabiji byailamo na byo mubena kuba.

Ñanyi byubilo byafwainwa kwikala na muntu ubena kubatizhiwa? (Luka 3:21, 22)

Bena Kilishitu lelo jino balondela lubatizhilo lwa kwa Yesu. Wayukile kuba’mba lubatizhilo ke kintu kyanema bingi, kabiji kino kyamwekejile mu byubilo byanji. Onkao mambo, mpunzha ya lubatizhilo kechi yafwainwa kwikala ke kwa kuletela bisela, kwa kukayila, kufwenkelapo, nangwa kubilako bintu byakonsha kulengela bantu kulengulula jino juba ne. Kabiji mwina Kilishitu wa katataka kechi wafwainwa kusapula uba nobe watoola mfuko ne. Nangwa kya kuba lubatizhilo ke kimye kya lusekelo, pano bino musapwishi wafwainwa kusangalala mu jishinda jawama.

Kupwila kimye kyonse ne kupwanañena pamo na kipwilo kukemukwasha byepi kwikela mwayila kwipana kwenu kwi Yehoba?

Panyuma ya kubatizhiwa, mambo ka o mwafwainwa kutwajijila kwikala na mutanchi wawama wa lufunjisho lwa pa bunke ne kwingilako kimye kyonse mu mwingilo wa mu bujimi?