Lubaji 1: Byaitabilamo Bena Kilishitu

Kufunda Baibolo na Bakamonyi ba kwa Yehoba kwimulengela kuyuka bukine. Kwambatu kine, bintu byo mwafunda bimukwasha kwikala na bulunda bwawama ne Lesa, kabiji bimulengela kwikala na luketekelo lwa bumi bwa myaka ne myaka kulutwe ne kuketekela bintu byawama bikekala mu paladisa kimye kikalamanga Bufumu bwa Lesa. Mambo a Lesa akosesha lwitabilo lwenu, kabiji kutanwa ku kupwila kwa bena Kilishitu, kwimulengela kumwenamo byawama bingi. Kabiji mwayuka Yehoba byo abena kwingila na bantu banji lelo jino.—Zeka. 8:23.

Byo mubena kwinengezha kubatizhiwa, musakumwenamo bingi pa kupituluka mu byaitabilamo bena Kilishitu na bakulumpe mu kipwilo. (Hebe. 6:1-3) Yehoba atwajijile kwimukwasha pa kwibikako kwenu kumuyuka bulongo, kabiji akemupe mfweto yo alaya.—Yoa. 17:3.

1. Mambo ka o mubena kukebela kubatizhiwa?

2. Yehoba ye ñanyi?

• “Yehoba ye Lesa wa kine mwiulu ne pano pa ntanda. Kechi kujipo mukwabo ne.”—Mpitu. 4:39.

• “Anweba, yenka wa jizhina ja Yehoba, yenu bunketu Mwine Wakila pano pa ntanda ponse.”—Sala. 83:18.

3. Mambo ka o mwafwainwa kwingijishanga jizhina ja Lesa?

• “Byonkabyo, mwafwainwa kulombanga bino amba: ‘Tata wetu wa mwiulu, jizhina jenu jizhile.’”—Mat. 6:9.

• “Yense wita pa jizhina ja Yehoba ukapuluka.”—Loma 10:13.

4. Ñanyi Byambo bimo byo baingijisha mu Baibolo pa kulumbulula Yehoba?

• “Yehoba, Mulenga walengele ntanda, ye Lesa wa myaka ne myaka.”—Isa. 40:28.

• “Tata wetu wa mwiulu.”—Mat. 6:9.

• “Lesa butemwe.”—1 Yoa. 4:8.

5. Ñanyi bintu byo mwafwainwa kupa Yehoba Lesa?

• “Wafwainwa kutemwa Yehoba Lesa wobe na muchima wobe yense ne na mweo wobe yense ne na maana obe onse ne na bulume bobe bonse.”—Mako 12:30.

• “Wafwainwa kupopwelatu Yehoba Lesa wobe ne kumwingijila aye yenka kwapwa.”—Luka 4:8.

6. Mambo ka o mwafwainwa kwikela ba kishinka kwi Yehoba?

• “Mwanami, wikale wa maana ne kusangajika muchima wami, pa kuba’mba namukumbule awa uñendeleka.”—Maana 27:11.

7. Mulomba kwi ñanyi, kabiji ñanyi jizhina jo mwingijisha pa kulomba?

• “Kinetu nemwambila [Amiwa Yesu] namba, Umvwe mukalombe kintu kwi Batata, abo bakemupakyo mu jizhina jami.”—Yoa. 16:23.

8. Ñanyi bintu bimo byo mwakonsha kulombapo?

• “Byonkabyo, mwafwainwa kulombanga bino amba: ‘Tata wetu wa mwiulu, jizhina jenu jizhile. Bufumu bwenu bwiye. Kyaswa muchima wenu kyubiwe pano panshi, byonka byo kyubiwa mwiulu. Mwitupeko kajo ketu ka lelo. Ne kwitulekelako mambo etu, byonka byo twibalekela betulenga mambo. Kabiji kechi mwitutwale mu lweseko ne, mwitupokolole kwi yewa mubi.’”—Mat. 6:9-13.

• “Luno lo luketekelo lo tuji nalo mwi aye amba kintu kyonse kyo twakonsha kumulomba mwayila kyaswa muchima wanji, aye witumvwa.”—1 Yoa. 5:14.

9. Ñanyi bintu byakonsha kulengela Yehoba kubula kumvwa milombelo ya muntu?

• “Bakamwita Yehoba amba ebakwashe, bino kechi ukebakumbula ne . . . na mambo a byubilo byabo byatama.”—Mika 3:4

• “Meso a Yehoba aji pa baoloka, ne matwi anji omvwa milombelo yabo ya misashijilo, pakuba Yehoba washikwa bantu boba byatama.”—1 Pe. 3:12.

10. Yesu Kilishitu ye ñanyi?

• “Shimona Petelo wamukumbwile’mba: ‘Anweba mwi Kilishitu, Mwana Lesa mumi.’”—Mat. 16:16.

11. Mambo ka Yesu o aishijile pano pa ntanda?

• “Mwana muntu byo aishile, kechi waishile’mba bamwingijile ne, poso amba ebengijile ne kupana bumi bwanji kwikala bukuzhi bwa kukuula bavula.”—Mat. 20:28.

• “Nafwainwa [Yesu] kusapwila mambo awama a Bufumu bwa Lesa.”—Luka 4:43.

12. Mwakonsha kumwesha byepi’mba musanta pa kitapisho kya kwa Yesu?

• “Wafwijile bonse kuba’mba aba baji na bumi babule kwikelanga mwayila bikeba michima yabo, kana kwikela mwayila bikeba yewa wibafwijile kabiji ye basangwile.”—2 Ko. 5:15.

13. Ñanyi luusa Yesu lo bamupa?

• “Lesa wampa luusa lonse pa bintu bya mwiulu ne bya pano pa ntanda.”—Mat. 28:18.

• “Lesa wamupele kifulo kikatampe ne jizhina jakila mazhina onse.”—Fili. 2:9.

14. Nanchi mwayuka’mba Jibumba Jitangijila ja Bakamonyi ba kwa Yehoba ye “kalume wa kishinka kabiji wa maana” ye batongola kwi Yesu nyi?

• “Nanchi kalume wa kishinka kabiji wa maana ye ñanyi, nkambo yanji ye atongwele kutalanga pa ba mu nzubo yanji amba ebapenga kajo pa kimye kyafwainwa?”—Mat. 24:45.

15. Nanchi mupashi wazhila muntu nyi?

• “Malaika wamukumbwile’mba: ‘Mupashi wazhila ukekala pe obewa, ne bulume bwa Mwine Wakila bukekala pe obewa. Kabiji na mambo a kino, awa ukasemwa ukatelwa’mba wazhila, Mwana Lesa.’”—Luka 1:35.

• “Onkao mambo, nangwa kya kuba mwi babi, mwayuka kupana byawama ku baana benu, ko kuba’mba Shenu wa mwiulu ukakilapo kupana mupashi wazhila ku boba bamulomba!”—Luka 11:13.

16. Yehoba waingijishe byepi mupashi wazhila?

• “Jiulu jalengelwe na jiwi ja Yehoba, Ne bintu byonse bijimo byalengelwe na muya wa mu kanwa kanji.”—Sala. 33:6.

• “Bino mukatambula bulume kimye mupashi wazhila kyo akemwikijila, kabiji mukekala bakamonyi . . . ne monse mwapela ntanda.”—Byu. 1:8.

• “Kafwako bungauzhi bwa mu Binembelo bwaishileko na maana a muntu ne. Mambo bungauzhi kechi bwaishileko na kyaswa muchima wa muntu ne, bino bantu baambilenga byafumine kwi Lesa byo bebatangijile ku mupashi wazhila.”—2 Pe. 1:20, 21.

17. Bufumu bwa Lesa bo bu ka?

• “Lesa wa mwiulu ukaleta bufumu bo bakabula konauna. Kabiji buno bufumu kechi bakebupana ku bantu bangi ne. Bukavingakanya ne kupwisha buno bufumu bonse kabiji abo bukekala myaka ne myaka.”—Da. 2:44.

18. Mukamwenamo byepi mu Bufumu bwa Lesa?

• “Ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne. Bintu bya kala byapichijila.”— Lum. 21:4.

19. Mwayuka byepi’mba Bufumu bwa Lesa katatakatu bukalete bintu byawama?

• “Baana ba bwanga baishile kwi aye ku mbaji ne kumushikisha’mba: ‘Tubuulai, bino bintu bikamweka ñanyi kimye, kabiji kiyukilo kya kwikalapo kwenu ne kya mpelo ya buno bwikalo kyo kyepi?” Yesu wibakumbwile’mba: ‘. . . Kisaka kikalukuka kisaka kikwabo ne bufumu bukalukuka bufumu bukwabo, kabiji kukekala bipowe bya nzala ne bitentanshi kuku ne kuku. Kabiji ano mambo awama a Bufumu bakeasapwila pano pa ntanda ponse kwikala bukamonyi ku bisaka byonse bya bantu, apa bino mpelo ikafike.’”—Mat. 24:3, 4, 7, 14.

• “Mu moba a kupelako kukeya bimye byakatazha. Mambo bantu bakekala betemwatu abo bene, batemwa mali, bejantula, belundumika, ba mwenga, babula kukookela bansemi, babula kusanta, babula bukishinka, babula butemwe, babula kukeba kumvwañana, ba luntepentepe, babula kwikanya, bashinta, babula kutemwa kyawama, basolola bakwabo, babula kumvwa, betota, batemwa bya kisangajimbwe mu kifulo kya kutemwa Lesa, bamweka nobe baji na munema wa kunemeka Lesa, bino bakana bulume bwa uno munema.”—2 Timo. 3:1-5.

20. Mwakonsha kumwesha byepi’mba mwanemeka Bufumu bwa Lesa?

• “Twajijilai na kukeba Bufumu patanshi ne bololoke bwanji.”—Mat. 6:33.

• “Yesu waambijile baana banji ba bwanga amba: ‘Umvwe muntu ukeba kundondela, ekane mwine ne kusenda kichi kyanji kya lumanamo kabiji andondelenga.’”—Mat. 16:24.

21. Satana Diabola ye ñanyi? Nga bandemona bo bañanyi?

• “Anweba mwafuma kwi shenu Diabola. . . aye ye wa bubela kabiji ye shanja bubela.”—Yoa. 8:44.

• “Nsuñunyi mukatampe bamutayile panshi, yenka aye muloolo wa kala, utelwa’mba Diabola kabiji Satana, yenka ubena kujimbaika bantu ba pano pa ntanda ponse; bamutayile pa ntanda ne bamalaika banji bebatayile pamo nanji.”—Lum. 12:9.

22. Ñanyi byambo bya bubela Satana byo aambile pe Yehoba ne pa bapopweshi banji?

• “Mwanamukazhi wakumbwile muloolo amba: ‘Twakonsha kuja ku bipangwa bya ku bichi bya mu bujimi. Bino ku kipangwa kya ku kichi kiji pakachi ka bujimi, Lesa waambile’mba, ‘Kechi mwafwainwa kujako ne, nangwa kukwatakotu ne; mambo umvwe mwauba bino, mukafwa.”’ Muloolo wabuujile mwanamukazhi amba: ‘Kine kechi mukafwa ne. Mambo Lesa wayuka’mba mu juba jo mukajako ku kino kichi, meso enu akalaba kabiji mukekala nobe Lesa mu kuyuka byawama ne byatama.’”—Nte. 3:2-5.

• “Satana wakumbwile Yehoba amba: ‘Kikoba pa kikoba kikwabo. Muntu wakonsha kupana kintu kyonse kyo aji nakyo pa kuba’mba apulushe bumi bwanji.’”—Yoba 2:4.

23. Mwakonsha kumwesha byepi amba byaambile Satana bya Bubela?

• “Kumwingijila [Lesa] na muchima yense.”—1 Moba. 28:9

• “Kufikatu ne byo nkafwa, kechi nkasankilapo bulumbuluke bwami ne.”—Yoba 27:5.

24. Mambo ka bantu o bafwila?

• “Bundengamambo byo bwatwelele pano pa ntanda mu muntu umo, ne lufu nalo lwaishijile mu bundengamambo, byonkabyo lufu lwakumbene ku bantu bonse mambo bonse balengele mambo.”—Loma 5:12.

25. Kikala Byepi Inge Muntu Wafwa?

• “Bantu bomi bayuka’mba bakafwa, pakuba bantu bafwa kafwako kintu nangwa kimo kyo bayuka ne.”—Sapwi. 9:5.

26. Ñanyi luketekelo lo tuji nalo pa mambo a bantu bafwa?

• “Kukekala lusanguko lwa baoloka ne babula koloka.”—Byu. 24:15.

27. Bantu banga bakaya mwiulu na kulama pamo ne Yesu?

• “Namwene Mwana Mukooko saka aimana pa Mutumba wa Ziona, na ba 144,000 baji na jizhina janji ne ja Shanji pa bilungi byabo.”—Lum. 14:1.