Fwenyai Kwipi ne Lesa
Kafunga Wimuta Muchima
‘NANCHI Lesa wanta muchima nyi?’ Umvwe mwakiipuzhapo kala buno bwipuzho, kechi yenu bonka ne. Atweba bavula twapitapo kala mu makatazho, kabiji bimye bimo tuzhinauka’mba kana Mulenga walengele bintu byonse witutapo ne muchima nyi, nangwa ne. Tukeba kuyuka’mba, nanchi Yehoba Lesa wituta muchima pa muntu pa muntu nyi? Byo ajinga panopantanda, Yesu wamuyukisha bulongo Yehoba, wapaine kya kumwenako kimwesha mukumbu usangajika.
Kupichila mu kwesakanya Yehoba ku byuba kafunga, Yesu waambile’mba: ‘Kana muntu uji na mikooko makumi jikumi, palubapo umo, kechi ashe yoya iji makumi atanu na ana ne itanu na ina, kaye mu mitumba nakukeba yewa umo walubapo nenyi? Kabiji umvwe wamumona, kine nemwambila namba, wamusekelela bingi kukila kusekela kwa yoya ikwabo iji makumi atanu na ana ne itanu na ina yabula kuluba. Mo mwaya ne muchima wa Shenu wa mwiulu, kechi usaka nangwa kamotu ka tutu tucheche konaike ne.’ (Mateo 18:12-14) Pano twayai tumone Yesu byo alondolola muchima wa Yehoba wa kifyele ku bapopweshi banji pa muntu pa muntu.
Kafunga wajinga na kijikila pa mambo a mikooko yanji yonse. Umvwe mukooko waeleka, wayukanga waelekapo. Wayukile mikooko yanji yonse umo umo pa mazhina o eitumbile. (Yoano 10:3) Kafunga wakebanga mukooko waeleka poso wa mumona ne kumubwezha ku jitanga. Umvwe waya na kukeba mukooko waeleka, kechi kyalumbululanga’mba walekelela yoya 99 yo asha ne. Javula bakafunga baikalanga pamo ne kuleka mikooko yabo na kujiila pamo na ikwabo.a Onkao mambo, umvwe kafunga waya na kukeba mukooko walubilamo washanga yoya mikooko ikwabo mu maboko a bakafunga bakwabo sabamumwenako. Umvwe wamutana awa mukooko walubilamo saka ajitu bulongo, wasekelanga bingi. Wamuzemunanga ne kumubika pa kipuzhi wamubwezha ne ku ikwabo.—Luka 15:5, 6.
Pa kulumbulula kino kishimpi, Yesu waambile’mba, Lesa kechi usaka “nangwa kamotu ka tutu tucheche konaika ne.” Patanshi Yesu wajimwine baana banji ba bwanga kubula kutuntwisha ‘kamo ka tonka tuno tucheche twamwitabila’ aye. (Mateo 18:6) Pano nanchi kino kishimpi kyo apaine Yesu kitufunjishapo ka pe Yehoba? Kitufunjisha’mba Yehoba ke Kafunga wata bingi muchima mikooko yanji pa muntu pa muntu, kubikapotu ne ‘totwa tucheche,’ nangwa’mba aba bamweka nobe kechi banemapo ne kunemapotu ku meso a bantu ne. Ee kine, ku meso a Lesa, mupopweshi wanji yense wanema bingi.
Umvwe mukeba kuyuka’mba mwanema bingi kwi Lesa, mambo ka a kubujila kufunda byavula pe uno Kafunga Mukatampe aye Yehoba Lesa, kabiji ne byo mwakonsha kufwenya kwipi ne aye? Umvwe mwauba bino, mukakonsha kwikala na luketekelo lwajingapo na mutumwa Petelo awo kampe wiumvwijile kishimpi kyapaine Yesu kya mukooko walubile. Palutwe kacheche, Petelo wanembele’mba: “Kasa mutaya kijikila kyenu kyonse pe aye, mambo aye wimuta muchima.”—1 Petelo 5:7.
[Tubyambo twa mushi]
a Kechi kyakatazhanga kufumya mikooko imo pa ikwabo ne, mambo mikooko yonse yayukile jiwi ja kafunga wayo.—Yoano 10:4.