Kwashainga Boba Bafuma Mu Jitanga Ja Lesa

‘Sekelai ne amiwa, pakuba namona mukooko wami watayikile.’—LUKA 15:6.

1. Yesu wamwesha byepi amba ye kafunga wa butemwe?

MWANA Yehoba, yenkawa umotu, aye Yesu Kilishitu, utelwa’mba, ‘kafunga mukatampe wa mikooko.’ (Hebe. 13:20) Binembelo byaambijile jimo pa mambo a kwiya kwanji ne kumwesha’mba kafwako kafunga mukwabo wakonsheshe kwesakana ne aye ne, mambo aye wajinga Kafunga wakebele ‘mikooko yaelekele’ ya bena Isalela. (Mat. 2:1-6; 15:24) Kabiji byonkatu kafunga byo akonsha kwela mweo wanji na mambotu a kuzhikijila mikooko yanji, Yesu naye wafwile mu kupana kitapisho kya bukuzhi bwanji ku boba ba bumukooko bakonsha kuswa bene kutambwila kino kitapisho.—Yoa. 10:11, 15; 1 Yoa. 2:1, 2.

2. Bi ka byalengela bena Kilishitu bamo kwikala bakoka ku mupashi?

² Kya bulandatu ke kya kuba’mba, bamo bamwekele nobe basanta pa kitapisho kya kwa Yesu ne kwipana kwi Lesa baleka kwikala babambakana mu kipwilo kya bena Kilishitu. Kulefulwa, kubelabela, nangwa bintutu bikwabo kampe byo bibalengela amba mukoyo wabo apwe kabiji bibalengela kwikala bakoka ku mupashi. Nangwa byonkabyo, kanatu baikala mu jitanga ja Lesa po bafwainwa kwiyowa mutende ne lusekelo byaambilepo Davida mu Salamo 23. Kya kumwenako, waimbile’mba: “Yehoba ye kafunga wami; kechi nkakajilwa ne.” (Sala. 23:1) Aba baji mu jitanga ja Lesa kafwako nangwa kimo kyo bakajilwa ku mupashi ne, pano aba bafuma mu jitanga ja Lesa kechi bekala balusekelo ne. Pano bañanyi bakonsha kwibakwasha? Bakonsha kukwashiwa byepi? Ñanyi bintu byafwainwa kubiwa mu kwibakwasha kubwela mu jitanga?

Bañanyi Bakonsha Kwibakwasha?

3. Yesu waambile’mba ki ka kyafwainwa kubiwa pa kukwasha mikooko yalubilamo yo bajisha kwi Lesa?

³ Kikebewa kwibikako pa kukwasha mikooko yalubilamo yo bajisha kwi Lesa. (Sala. 100:3) Yesu wapaine kino kya kumwenako byo aambile’mba: ‘Kana muntu uji na mikooko makumi jikumi, palubapo umo, kechi ashe yoya iji makumi atanu na ana ne itanu na ina, kaye mu mitumba nakukeba yewa umo walubapo nenyi? Kabiji umvwe wamumona, kine nemwambila namba, wamusekelela bingi kukila kusekela kwa yoya ikwabo iji makumi atanu na ana ne itanu na ina yabula kuluba. Mo mwaya ne muchima wa Shenu wa mwiulu, kechi usaka nangwa kamotu ka tutu tucheche konaike ne.’ (Mat. 18:12-14) Bañanyi bakonsha kukwasha boba ba bumukooko bafuma mu jitanga?

4, 5. Bakulumpe mu kipwilo bafwainwa kwikala na muchima ka pa mambo a jitanga ja Lesa?

⁴ Pa kuba’mba bakulumpe mu kipwilo kya bwina Kilishitu bakwashe mikooko yalubilamo, bafwainwa kuyuka’mba jitanga ja Lesa ke kipwilo kya bantu bepana kwi Yehoba, ko kuba’mba, ‘mikooko ya ku kijiilo kya Lesa.’ (Sala. 79:13) Ino mikooko yawama ikebewa kutewa muchima, kabiji kino kilumbulula’mba bakafunga ba butemwe bafwainwa kwiimwesha kifyele. Kuya ku lupempu lwa bukafunga ku ino mikooko kwakonsha kwibakwasha bingi. Umvwe kafunga wibatundaika mu butemwe, bakosa bingi ku mupashi ne kwibalengela kubwela mu jitanga.—1 Ko. 8:1.

⁵ Bakafunga ba mu jitanga ja Lesa baji na mutembo wa kukebakeba mikooko yalubilamo ne kwiikwasha. Mutumwa Paulo wavulwilemo bakulumpe mu kipwilo kya bena Kilishitu kya ku Efisesa wa kala pa mambo a mitembo yabo ya bukafunga byo aambile’mba: “Iketai anwe bene, ne jitanga jonse, jo bemupejile bukulumpe kwi Mupashi Wazhila, amba mujishe kipwilo kya Lesa, kyo apotele na mashi [a Mwananji].” (Byu. 20:28) Ne mutumwa Petelo naye wafunjile bakulumpe bashingilwe na mupashi amba: ‘Lamai jitanga ja Lesa jiji mwenu, kasa mwijiketa, kechi na mambo a kwimukanjikizha ne, poso na muchima wa kifyele, monka mwayila muchima wa Lesa; nangwa na mambo a mali ne, poso na muchima yense; nangwa kwibobila bunkambo abo bo bemupa kwibalela ne, poso mwialula anwe bene ke bakumwenako jitanga.’—1 Pe. 5:1-3.

6. Mambo ka mikooko ya Lesa kikatakata kyo ikebewa kukwashiwa ku bakafunga lelo jino?

⁶ Bakafunga ba bwina Kilishitu bafwainwa kwikala byonka byajinga “kafunga wawama,” Yesu. (Yoa. 10:11) Watele bingi muchima mikooko ya Lesa ne kwamba pa buneme bwa kulama mikooko byo aambijile Shimona Petelo ‘kulama mikooko yanji.’ (Tangai Yoano 21:15-17.) Kikatakata mikooko ikebewa bingi kutewa muchima lelo jino, mambo Diabola wavwala katabuka na kukeba konauna bulumbuluke bwa boba bepana kwi Lesa. Satana ukeba kwitutola kyangwa na mambotu a bukoke bwetu, kabiji wingijisha ino ntanda yanji mu kongola bantu ba Yehoba kuba bintu byatama. (1 Yoa. 2:15-17; 5:19) Aba bakoka bo bene bene bo ashukilwa, onkao mambo, bakebewa bingi kwibakwasha kwingijisha lujimuno lwa ‘kwenda mu mupashi.’ (Nga. 5:16-21, 25) Pa kuba’mba ino mikooko ikwashiwe kikebewa kulomba ne kuketekela mwi Lesa, mu lutangijilo lwa mupashi wanji, ne kwikala basendwe ba kwingijisha Mambo anji.—Mana. 3:5, 6; Luka 11:13; Hebe. 4:12.

7. Kyanemena ka bakulumpe mu kipwilo kufunga mikooko iji mu maboko abo?

⁷ Kafunga wa mu kimye kya kala mu bena Isalela waingijishanga mukombo nangwa’mba kamama kakonkomana kufungilako mikooko yanji. Mikooko pa kutwela nangwa kulupuka, ‘yapitanga munshi ya kamama,’ ne mu jino jishinda yakonshewanga kwiibala kwi kafunga. (Levi 27:32; Mika 2:12; 7:14) Kafunga wa bwina Kilishitu naye wafwainwa kuyuka bulongo jitanga ja Lesa ne kumona umo umo byo abena kuba. (Esakanyaiko Byambo bya Mana 27:23.) Onkao mambo, bukafunga ke mwingilo umo wanema bingi wisambiwapo na jibumba ja bakulumpe mu kipwilo. Kino kyavwangamo kunengezha bulongo bya kukwasha mikooko yafuma mu jitanga. Yehoba aye mwine waambile’mba ukaya na kukeba mikooko yanji ne kwiita muchima. (Ezi. 34:11) Onkao mambo, Lesa utemwa bingi umvwe bakulumpe mu kipwilo nabo ke bebikeko kukwasha mikooko yalubilamo kuba’mba ibwele mu jitanga.

8. Mu ñanyi mashinda bakulumpe mu kipwilo mo bakwashisha mikooko?

⁸ Umvwe mukwabo wa mu lwitabilo wabela, bakafunga ba jitanga ja Lesa bafwainwa kumupempula, kabiji kino kyakonsha kumuletela bingi lusekelo ne kumutundaika. Kino kyakonsha ne kubiwa ku mukooko wabela ku mupashi. Bakulumpe mu kipwilo bakonsha kutanga binembelo, kupituluka mu kibaba, kwambapo bishinka byaji kwambiwapo ku kupwila, kulombela pamo na yeo wakoka, ne bikwabotu. Bakonsha kulondolola ku yeo wakoka amba balongo ne banyenga mu kipwilo bakebesha bingi kumumona wabwela jibiji mu kipwilo. (2 Ko. 1:3-7; Yako. 5:13-15) Kumufwakesha, kutumako foni, nangwa kumunembela nkalata kwakonsha kumukosesha bingi! Kukwasha yewa mukooko wafuma mu jitanga kwakonsha ne kuletela lusekelo mukulumpe mu kipwilo ubena kukwashañana.

Bonse Twakonsha Kukwashañana

9, 10. Mambo ka o mwakonsha kwambila’mba kuta muchima mikooko yafuma mu jitanga kechi mwingilotu wa bakulumpe mu kipwilo bonka ne?

⁹ Tubena kwikala mu bimye mwavula bya kutabataba kabiji byakatazha, onkao mambo, kimo kimye kechi twakonsha kuyuka’mba mukwetu wa mu lwitabilo ubena kukumpulwa mu kipwilo ne. (Hebe. 2:1) Pano bino, mikooko ya Yehoba yanema bingi kwi aye. Mukooko umo umo wanema bingi, byonkatu byanema kinungwa kyonse kya ku mubiji wa muntu. Onkao mambo, atweba bonse twafwainwa kuta muchima balongo betu ne kwita muchima kya kine atwe bene na bene. (1 Ko. 12:25) Nanchi muji na uno muchima nyi?

¹⁰ Nangwa kya kuba bakulumpe mu kipwilo bo batangijila mu kukeba ne kukwasha mikooko yafuma mu jitanga, kuta muchima bapopweshi bakwetu bafuma mu jitanga kechi mwingilotu wa bakalama ba bwina Kilishitu bonka ne. Bakwabo nabo bakonsha kwingijila pamo na bano bakafunga. Twakonsha kabiji twafwainwa kutundaika ne kukwasha balongo ne banyenga betu ku mupashi bakebewa bukwasho kuba’mba babwele mu jitanga. Pano bakonsha kukwashiwa byepi?

11, 12. Jishuko ka jo mwakonsha kupewa kuba’mba mukwashe mupopweshi mukwenu wakoka ku mupashi?

¹¹ Kimo kimye bakulumpe mu kipwilo bakonsha kubulapo basapwishi ba Bufumu bakoma ku mupashi kuba’mba bafunjishenga Baibolo boba bakoka bakeba kukwashiwa. Nkebelo ine ya kuno kwibikako ke ya kukwasha bano bantu kwikala na ‘butemwe bwabo butanshi.’ (Lum. 2:1, 4) Bano bapopweshi bakwetu bakonsha kutundaikwa ne kukoseshiwa ku mupashi kupichila mu kupituluka nabo mu byambo byo babujile kumvwako ne, na mambo a kubula kutanwa ku kipwilo.

¹² Umvwe bakulumpe mu kipwilo bemwambila’mba mufundenga na mukwenu wa mu lwitabilo ubena kukebewa bukwasho ku mupashi, lombai kwi Yehoba kuba’mba emutangijile ne kwimupesha pa byo mwibikako. Ee kine, “Fikizha mingilo yobe kwi Yehoba, kabiji ne byo ulanguluka bikalumbuluka.” (Mana. 16:3) Langulukainga pa binembelo bya mu Baibolo ne pa bishinka bikosesha lwitabilo byo mwakonsha kwingijisha mu lufunjisho lwenu lwa kukwasha boba bakeba bukwasho bwa ku mupashi. Langulukainga pe mutumwa Paulo wajinga wa kumwenako wawama. (Tangai Loma 1:11, 12.) Paulo wasakishe bingi kumonañana na bena Kilishitu mu Loma pa kuba’mba ebape kya bupe kya mupashi kuba’mba bakose. Kabiji wakebeshe bingi kuba’mba bekwashe bene na bene. Nanchi ne atweba kechi twafwainwa kwikala na uno yenka muchima wa kukeba kukwasha mikooko yafuma mu jitanga ja Lesa nenyi?

13. Mwakonsha kwisambapo ka na yewa wakoka ku mupashi?

¹³ Kimye kya lufunjisho lwenu, mwakonsha kwipuzha’mba: “Mwafunjile byepi bukine?” Bakwashai kuvuluka bimye byawama byo bajinga nabyo byo baingijilanga Yehoba, ne kukwasha bano bakoka kushimikizhapo bya kumwenako bimo byawama byaubiwe ku kipwilo, mu mwingilo wa kusapwila, ne ku kupwila kwa nkambi. Tongolaipo bimye bimo byawamine byo mwajinga nabyo kimye kyo mwaingijijile pamo mu mwingilo wa Yehoba. Ambaipo pa lusekelo lo mwatana mu kufwenya kwipi ne Yehoba. (Yako. 4:8) Ambai pa byo musanchila Lesa byo alama bantu banji, kikatakata pa kwitutekenesha ne kwitupa luketekelo mu bya malwa byetu.—Loma 15:4; 2 Ko. 1:3, 4.

14, 15. Kyakonsha kuwama kuvululamo boba bakoka pa ñanyi mfweto yo beyowanga kala?

¹⁴ Kyakonsha ne kuwama kuvululamo yewa wakoka ku mupashi pa mfweto imo yo eyowele byo aingijilanga pamo na kipwilo. Kya kumwenako, wanungulukijilengako mu maana a kuyuka Mambo a Lesa ne nkebelo yanji. (Mana. 4:18) Byo ‘aendelenga mu mupashi,’ kwa kubula nangwa kuzhinauka ne, kyamukwashishe bingi kubula kuba bintu byakonsheshe kumulengela kulenga mambo. (Nga. 5:22-26) Kyafuminemo, jiwi ja mu muchima jatoka to, jamulengejile kusolomoka Yehoba mu lulombelo ne kwikala na ‘mutende wa Lesa ubula kuyukanyika, ulama michima yetu ne milanguluko yetu.’ (Fili. 4:6, 7) Vulukai bino bishinka, mweshai’mba mwibata muchima, kabiji monai kuba’mba mwatundaika mu butemwe mulongo nangwa nyenga yenu wa ku mupashi kuba’mba abwele mu jitanga.—Tangai Filipai 2:4.

¹⁵ Inge kya kuba mwi bakulumpe mu kipwilo babena kukeba kuya pa lwendo lwa bukafunga, mwakonsha kukosesha bamulume ne mukazhi bakoka kuba’mba balanguluke pa kimye kitanshi kyo bafunjile bukine mu Mambo a Lesa. Byo kyawaminepo kwibakasulula ku bukine ne kwikala baana ba bene! (Yoa. 8:32) Byo bajingapo na lusanchilo lwa bintu byo bafunjilenga pe Yehoba, butemwe bwanji, ne nkebelo yanji yawama! (Esakanyaiko Luka 24:32.) Bavululaimo pa bulunda bwabo na Yehoba ne jishuko ja lulombelo jiyowa bena Kilishitu bepana. Bakwashai na muchima yense aba bakoka kuba’mba batendeke jibiji kusapwila “mambo awama a lukumo lwa Lesa wa [lusekelo],” aye Yehoba.—1 Timo. 1:11.

Twajijilai Kwibatemwa

16. Ambaipo kya kumwenako kimo kya kumwesha’mba bukwasho bupewa ku boba bakoka bwingila bingi bulongo.

¹⁶ Nanchi mashinda aambiwapo kala engila kya kine nyi? Ee. Kya kumwenako, nsongwalume umo waikele musapwishi wa Bufumu saka aji na myaka ya kusemwa 12 waikele wakoka ku mupashi byo afikizhe myaka ya kusemwa 15. Pano bino wabwelele wakosa jibiji, kabiji waingila mwingilo wa kimye kyonse myaka kukila 30. Kyalengejile’mba ekale wabambakana jibiji mu kipwilo ke bukwasho bonka bwamukwashishe mukulumpe mu kipwilo kya bwina Kilishitu. Wasanchile bingi pa bukwasho bwa mukulumpe mu kipwilo!

17, 18. Byubilo ka byafwainwa kwimulengela kukwasha muntu wafuma mu jitanga ja Lesa?

¹⁷ Butemwe bo butundaika bena Kilishitu kukwasha boba bakoka kuba’mba babwele mu kipwilo. Yesu waambijile baana banji ba bwanga amba: ‘Mukambizho mupya nemupa anweba, namba mwitemwe anwe bene na bene; byonka byo nemutemwa amiwa, ne anweba mwitemwe anwe bene na bene. Pa kyo kino po po bakayukila bonse amba anweba mwi baana bami ba bwanga, inge mwitemwe anwe bene na bene.’ (Yoa. 13:34, 35) Ee, butemwe bo buyukanyikisha bena Kilishitu ba kine. Nanchi buno butemwe kechi bwafwainwa kumweshiwa ku bena Kilishitu babatizhiwa pano bino bakoka ku mupashi nenyi? Ee, bafwainwa kumweshiwa butemwe. Pano bino kimye kyo tubena kukwasha bano bakoka, twafwainwa kumweshanga ne byubilo bikwabo bya bwina Kilishitu.

¹⁸ Inge mukeba kukwasha yewa wafuma mu jitanga ja Lesa, byubilo ka byo mwafwainwa kwikala nabyo? Kununga pa butemwe, mwafwainwa ne kwikala na bumuchima wanekena, kuba lusa, bukimote ne kukokamuchima. Kwesakanatu na bintu byo biji, mwakonsha ne kulekelañanako mambo. Paulo wanembele’mba: “Vwalai bumuchima wanekena, ne lusa, ne kwipelula, ne bukimote, ne kukokamuchima; kasa mwitekenya anwe bene na bene, ne kwilekela mambo, umvwe umo uji na mambo na mukwabo; monka mo emulekejile mambo Nkambo, mo monka mo mubilanga ne anweba: ne pa bino byonse vwalai butemwe, ye mukwato ulumbulula byonse.”—Kolo. 3:12-14.

19. Mambo ka o kyanemena kwibikako kukwasha ba bumukooko kubwela mu jitanga ja bwina Kilishitu?

¹⁹ Mu mutwe walondelapo, tukesamba bintu bilengela bamo kufuma mu jitanga ja Lesa. Kabiji ukamba ne pa boba babwela mu jitanga byo bakonsha kutambwilwa. Byo mukafunda mutwe walondelapo ne kulangulukanga pa uno, yukai’mba bulume bo mumwesha mu kukwasha boba ba bumukooko kubwela mu jitanga ja bena Kilishitu bwanema bingi. Mu buno bwikalo, bantu bavula bataya kimye kyabaya na kwilumbikila bunonshi, pano bino bumi bumo bwanema kukila mali onse aji mu ntanda. Yesu waambishepo bingi pa kino kishinka mu kishimpi kyanji kya mukooko walubile. (Mat. 18:12-14) Vulukainga kino kishinka byo mwibikako ne kupelawizha kukwasha mikooko ya Yehoba yafuma mu jitanga kuba’mba ibwele mu jitanga.

Musakukumbula’mba Ka?

• Mutembo ka uji na bakafunga ba bwina Kilishitu pa mambo a boba ba bumukooko bafuma mu jitanga?

• Mwakonsha kukwasha byepi boba baleka kutanwa ku kipwilo?

• Byubilo ka byakonsha kwimulengela kukwasha boba bafuma mu jitanga?

[Kipikichala pa peja 10]

Bakafunga ba bwina Kilishitu bakebesha kukwasha mu butemwe boba bafuma mu jitanga ja Lesa