“Lamai Jitanga ja Lesa Jiji Mwenu”

‘Lamai jitanga ja Lesa jiji mwenu, kasa mwijiketa, kechi na mambo a kwimukanjikizha ne.’—1 PE. 5:2.

1. Ñanyi bintu byapichilengamo bena Kilishitu kimye Petelo kyo anembele nkalata itanshi?

MUTUMWA PETELO wanembele nkalata yanji itanshi Nero saka akyangye kutendeka kumanyika bena Kilishitu mu Loma. Wakebelenga kukosesha bakwabo ba mu lwitabilo. Diabola ‘wapitañenenga’ na kusaka kuja bena Kilishitu. Pa kuba’mba bamwimene kasa bakosa, bafwainwe ‘kutekanya’ ne ‘kwipelula munshi ya kuboko kwa bulume bwa Lesa.’ (1 Pe. 5:6, 8) Kabiji bafwainwe ne kukwatankana. Kechi bafwainwe ‘kwisumauna ne kwija ne,’ mambo kuba bino kwakonsheshe kwibalengela ‘kwionauna bene na bene.’—Nga. 5:15.

2, 3. Ñanyi ye twafwainwa kulwa nanji, kabiji tusakwisamba pa ka?

² Abino bintu byobyo tubena kupitamo ne lelo jino. Diabola ukebakeba mashinda a kwitujilamo. (Lum. 12:12) Kabiji kulutwe yetu kuji ‘malwa akatampe a kuba kala kechi kwajingapo akwabo a byonkabyo ne, kufumatu ne ku ntendekelo ya pano pa ntanda.’ (Mat. 24:21) Byonkatu bena Kilishitu batanshi byo bachinuzhukanga lutobo, ne atweba byo byo twafwainwa kwikalanga. Pa kuba’mba twikalenga bulongo, bimye bimo tukebewa bukwasho bwa bakulumpe mu kipwilo.

³ Twayai tukisambe pa bakulumpe byo bakonsha kutwajijila kunemeka jishuko ja ‘kulama jitanga ja Lesa jiji mwabo.’ (1 Pe. 5:2) Apa bino twisambe pa byo bakonsha kwingila bulongo mwingilo wa bukafunga. Mu mutwe walondelapo tukesamba pa ba mu kipwilo byo bakonsha kushingika ‘aba bengila mwiabo.’ (1 Tesa. 5:12) Kwisamba pa bino bintu kuketukwasha kumwimena Mulwanyi wetu mukatampe saka twakosa ne kuyuka’mba yeye tubena kulwa nanji.—Efi. 6:12.

Lamai Jitanga ja Lesa

4, 5. Bakulumpe mu kipwilo bafwainwa kumonanga byepi jitanga? Ambai kyakumwenako.

⁴ Petelo watundaikile bakulumpe mu bipwilo bya bena Kilishitu batanshi kumonanga jitanga jajinga mwabo byonka Lesa byo ejimona. (Tangai 1 Petelo 5:1, 2.) Nangwa kya kuba wajinga nobe jipanda mu kipwilo, Petelo kechi walengululanga bakulumpe bakwabo ne. Wibafundangako byonka byo kyafwainwa kwamba na bakwabo bakulumpe. (Nga. 2:9) Byonka byaubanga Petelo, ne Jibumba Jitangijila lelo jino najo jitundaika bakulumpe mu bipwilo kwibikako kwingila mwingilo wanema wa kulama jitanga ja Lesa.

⁵ Mutumwa wanembele’mba bakulumpe mu kipwilo bafwainwa ‘kulama bulongo jitanga ja Lesa jiji mwabo.’ Bafwainwe kuyuka’mba jitanga, ja kwa Yehoba ne Yesu Kilishitu. Bakulumpe mu kipwilo betotolwelanga bene pa byo balamanga mikooko ya Lesa. Fwanyikizhai kuba’mba mulunda nenu wimushila’mba mu mumwenengako baana banji kimye kyo afumapo. Nanchi kechi mukebalamanga bulongo ne kwibajisha nenyi? Inge umo wakolwa, nanchi kechi mukamutwala ku kipatela nenyi? Ne bakulumpe mu kipwilo nabo bafwainwa ‘kujisha kipwilo kya Lesa, kyo apotele na mashi a mwananji.’ (Byu. 20:28) Bayuka kuba’mba mukooko yense wapotelwe na mashi anema a kwa Yesu Kilishitu. Byo baketotolwela bene, bakulumpe mu kipwilo bajisha, kuzhikijila ne kulama bulongo mikooko.

6. Bakafunga bakala bajinga na ñanyi mwingilo?

⁶ Akilangulukai pa byaingilanga bakafunga bajingako kala. Pa kufunga mikooko, baendanga mu mute wazonga kabiji ne kushiya na mashika bufuku. (Nte. 31:40) Babikanga bumi bwabo mu kizumba na mambo a kulama mikooko. Davida saka akijitu nsongwalume wapokololanga jitanga ku banyama bakaji bamungye, kimye kimo wijipokolwele ku bokwe ne ku mbeyala. Pa bano banyama umo umo, Davida waambile’mba “namukwachile ku bwevu ne kumwimba, ne kufwa wafwile.” (1 Sam. 17:34, 35) Byo achinchikilepo! Wapulukile ku meno ankese a nyama mukaji. Nangwa byonkabyo, kechi walekele kuzhikijila mikooko ne.

7. Mu bukifwanyikizho, bakulumpe bakonsha kupokolola byepi mukooko ku meno a kwa Satana?

⁷ Lelo jino, bakulumpe mu kipwilo bafwainwa kuzhikijila mikooko ya Lesa kuchina Diabola, uji nobe bokwe kwiilukuka. Mu bukifwanyikizho, kuba bino kwavwangamo kupokolola mukooko ku meno ankese a kwa Diabola. Pa kupulusha mukooko, kiji nobe bakulumpe mu kipwilo bakwata ku bwevu bwa nyama mukaji wa mungye. Bakonsha kukwasha balongo babula kujimuka na tukose twa kwa Satana. (Tangai Yuda 22, 23.) Bino bakulumpe kechi bengila uno mwingilo kwakubula bukwasho bwa Yehoba ne. Bakwasha bulongo mukooko wikozha, kumukasa pa bilonda ne kubikapo manyi a mu Mambo a Lesa apwisha bilonda.

8. Kwepi bakulumpe mu kipwilo ko batangijila jitanga, kabiji bo ba byepi bino?

⁸ Kabiji bakafunga batangijilanga jitanga ku munyevu ne ku mema. Ne lelo jino, bakulumpe batangijila jitanga ku kipwilo, kwijitundaika kutanwa jonse ku kupwila pa kuba’mba jijenga “kajo pa kimye pafwainwa?” (Mat. 24:45) Bakulumpe bakonsha kwikalapo na kimye kya kutundaika aba bakolwa ku mupashi kuba’mba batambule kajo kakoseshañana ka mu Mambo a Lesa. Mukooko walubilamo wakonsha kukeba kubwela jibiji mu jitanga. Mu kifulo kya kuchinya mulongo wabo, bakulumpe bamulumbulwila bulongo mafunde a mu Binembelo ne kumubula byo akonsha kwiengijisha mu bwikalo bwanji.

9, 10. Bakulumpe mu kipwilo bafwainwa kukwasha byepi bakolwa ku mupashi?

⁹ Inge mwakolwa, mukeba ñanga wa mu kipatela wa mutundu ka? Awa ubula kwikala panshi na kwisamba nenu, ufikenatu kwimunembela muchi bukiji bukiji na mambo a kukeba kumona mulwazhi mukwabo nyi? Inyi muya ku yewa utelekesha ne kwimulondolwela kibena kwimukatazha kabiji ne kwimunembela muchi wakonsha kwimukwasha nyi?

¹⁰ Bakulumpe nabo bafwainwa kumvwa bibena kwamba muntu wakolwa ku mupashi ne kumubuka bilonda, ko kuba’mba mu bukifwanyikizho, ‘kumushinga manyi mu jizhina ja Yehoba.’ (Tangai Yakoba 5:14, 15.) Byonka byajinga muchi wa ku Gileada, Mambo a Lesa akonsha kubuka wakolwa ku mupashi. (Yele. 8:22; Ezi. 34:16) Wakolwa ku mupashi inge ke engijishe mafunde a mu Baibolo, akonsha kumulengela kufuukula bintu bikamukwasha kutwajijila kwingijila Yehoba. Kya kine, bakulumpe mu kipwilo boba bingi bulongo umvwe baumvwa lukatazho luji na mukooko kabiji ne kulomba nanji.

Kechi na Mambo a Kwimukanjikizha ne, Poso na Muchima wa Kifyele

11. Ki ka kilengela bakulumpe kwipana kulama jitanga ja Lesa?

¹¹ Petelo wavulwilemo bakulumpe mu kipwilo byo bafwainwa kwingila mwingilo wa bukafunga. Bakulumpe bafwainwa kulama jitanga ja Lesa ‘kechi na mambo a kwibakanjikizha ne, poso na muchima wa kifyele.’ Ki ka kilengela bakulumpe kwipana kwingijila bakwabo? Ki ka kyalengejile Petelo kulama ne kujisha mikooko ya kwa Yesu? Butemwa bo atemenwe Nkambo. (Yoa. 21:15-17) Butemwe bo bulengela bakulumpe mu kipwilo kubula “kwiitokesha michima yabo abo bene ne, poso kutokesha muchima wa yewa wibafwijile.” (2 Ko. 5:14, 15) Buno butemwe bwa kutemwa Lesa ne balongo babo bo bulengela bakulumpe mu kipwilo kwingijila mikooko, kwingijisha bulume, nsabo ne kimye kyabo. (Mat. 22:37-39) Bepana abo bene, kechi kya kwibakanjikizha ne.

12. Mutumwa Paulo wipaine kufika pi?

¹² Bakulumpe bafwainwa kwipana kufika pi? Pa kulama mikooko, balondela byaubanga Paulo walondelanga Yesu. (1 Ko. 11:1) Na mambo a kuba batemenwe bingi balongo ba mu Tesalonika, Paulo ne bakwabo kechi baswiletu kupana ‘mambo awama a Lesa onka ne, bino ne myeo yabo pamo.’ Pa kuba bino, bajinga na kifyele ‘nobe inetu ubukata baana banji mwine.’ (1 Tesa. 2:7, 8) Paulo wayukile inetu wamisha byo eumvwa pa baana banji. Wibobila byonse byo bakeba, kubikapo ne kubuka pakachi ka bilo na kwamisha.

13. Bakulumpe mu kipwilo bafwainwa kwesakanya byepi kimye?

¹³ Bakulumpe mu kipwilo bafwainwa kwesakanyanga kimye kya kwingijilamo mwingilo wa bukafunga ne wa kulama kisemi. (1 Timo. 5:8) Kimye bakulumpe kyo bengijilamo mingilo ya kipwilo kyo kimye kyanema bingi kyo bafwainwa kwikala pamo na kisemi kyabo. Jishinda jimo jo bafwainwa kwesakenyamo bintu ke kwitako bakwabo ku Kupopwela kwa Kisemi kyabo. Pa myaka yavula, ba Masanao bakulumpe mu kipwilo mu Japan baitangako balongo ne banyenga babula mu masongola, bisemi byabula mutwe uji mu bukine ku lufunjisho lwabo lwa kisemi. Mu kuya kwa moba, bamo baikele ke bakulumpe mu kipwilo kabiji nabo baubanga byonka byaubanga ba Masanao.

Kukeba Kumwenamo Mali ne, Poso Kwipana na Muchima Yense

14, 15. Mambo ka bakulumpe mu kipwilo o bafwainwa kuchinuzhukila ‘kukeba kumwenamo mali,’ kabiji bakonsha kulondela byepi Paulo?

¹⁴ Kabiji Petelo watundaikile bakulumpe kulama jitanga kwakubula ‘kukeba kumwenamo mali, poso kwipana na muchima yense.’ Bakulumpe bengila mingilo ya kipwilo kimye kyabaya bingi, nangwa byonkabyo kechi bakeba kwibapa mali ne. Petelo wajimwineko bakwabo bakulumpe mu kipwilo pa kizumba kiji mu kulama jitanga “na mambo a mali.” Kino kizumba kimwekela mu bwikalo bwa ntentente bwa bantangi babupopweshi bwa mu “Babilona mukatampe” babena kulengela bantu kuyanda. (Lum. 18:2, 3) Bakulumpe mu kipwilo lelo jino bafwainwa kuchinuzhuka bintu byakonsha kuleta kisonso kilengela kutendeka uno muteeto.

¹⁵ Paulo washile kyakumwenako kyawama kyo bafwainwa kulondela bakulumpe bonse mu kipwilo. Nangwa kya kuba wajinga mutumwa kabiji wakonsheshe ‘kukatazha’ bena Kilishitu ba mu Tesalonika, aye kechi wajanga ‘kajo katutu nangwa ka muntu umo ne.’ Mu kifulo kya kuba bino, aye waingilanga “bufuku ne mute.” (2 Tesa. 3:8) Ne bakulumpe mu kipwilo bavula lelo jino, kubikakotu ne bakalama benda kechi bakatazha bantu ne. Nangwa kya kuba baswa kwibajisha ku bakwabo ba mu lwitabilo, bino kechi bakondola ne ‘kukatazha’ nangwa umo ne.—1 Tesa. 2:9.

16. Kulama jitanga “na muchima yense” kulumbulula ka?

¹⁶ Bakulumpe balama jitanga “na muchima yense.” Kwingila kwabo kwa na muchima yense kumwekela mu byo bepana kukwasha jitanga. Pano bino kechi kilumbulula’mba bakanjikizha jitanga kwingijila Yehoba nangwa kutundaika bakwabo kwingijila Lesa na muchima wa lubekyo ne. (Nga. 5:26) Bakulumpe bayuka’mba mukooko yense wapusana na mukwabo. Bakeba kukwasha balongo babo kwingijila Yehoba na lusekelo.

Kwibobila Bunkambo ne, Mwialule Anwe Bene ke Bakumwenako Jitanga

17, 18. (a) Mambo ka batumwa pa bimye bimo o kibakatezhanga kumvwa mwatala lufunjisho lwa kwa Yesu lwa kwipelula? (b) Nga atweba twakonsha kuba byepi mu bintu bya uno mutundu?

¹⁷ Byonka byo twisambapo kala, bakulumpe mu kipwilo bafwainwa kuvulukanga’mba, jitanga jo babena kulama ja Lesa, kechi jabo ne. Bachinuzhuka ‘kwibobila bunkambo aba Lesa bo ebapa kulama.’ (Tangai 1 Petelo 5:3.) Kimye kimo batumwa ba kwa Yesu bakanaminanga bifulo na ndangulukilo yatama. Byonka byajinga bakalama ba mu mikoka ya bantu, nabo bakebanga kutumbalala.—Tangai Mako 10:42-45.

¹⁸ Lelo jino, balongo babena kukanamina “mwingilo wa bukulumpe bwa kulama kipwilo” bafwainwa kwipesapesa ne kumona ene mambo o babena kukebela uno mwingilo. (1 Timo. 3:1) Aba baji kala pa bukulumpe mu kipwilo bafwainwa kwishikisha abo bene inge baji na muchima wa kukeba bunkambo nangwa kutumbalala byonka byajinga batumwa bamo. Inge batumwa bajinga na luno lukatazho, ko kuba’mba bakulumpe mu kipwilo bafwainwa kwibikako kuchinuzhuka ndangulukilo ya ku kyalo ya kukeba kubila bakwabo bunkambo.

19. Bakulumpe mu kipwilo bafwainwa kuvulukanga ka pa kuzhikijila jitanga?

¹⁹ Kwambatu kine, kuji bimye bimo bakulumpe mu kipwilo byo bafwainwa kukosa, nabiji kimye kyo babena kuzhikijila jitanga ku “misuka ikaji.” (Byu. 20:28-30) Paulo watundaikile Titusa amba “wibafundenga ne kwibalengulula na lūsa lonse.” (Titu. 2:15) Nangwa kimye kyo babena kuba bino, bakulumpe banemeka bo babena kufundako nangwa bo babena kutotolwesha. Bayuka’mba mu kifulo kya kunenauna muntu, kwamba na kifyele kwanema bingi mambo kufika muntu pa muchima ne kumukwasha kulondela jishinda jawama.

20. Nga bakulumpe mu kipwilo balondela byepi byaubanga Yesu?

²⁰ Kyakumwenako kyawama kya kwa Kilishitu kitundaika bakulumpe mu kipwilo kutemwa mikooko. (Yoa. 13:12-15) Kitusangajika bingi pa kutanga mashimikila aamba pa byo afunjishanga baana banji ba bwanga bya kwingila mwingilo wa kusapwila ne kulenga baana ba bwanga. Kwipelula kwanji kwibafikile baana banji ba bwanga pa muchima, kabiji kwibalengejile nabo kwikala na ‘muchima wa kwipelula kasa balanguluka bonse, pa muntu pa muntu, amba mukwetu wankila mu kuwama.’ (Fili. 2:3) Bakulumpe mu kipwilo lelo jino nabo balondela byaubanga Yesu kabiji bekala “bakumwenako jitanga.”

21. Ñanyi mfweto itengela bakulumpe mu kipwilo?

²¹ Petelo byo afunjilengako bakulumpe mu kipwilo, wapezhezheko na mulaye wa bintu bya kulutwe. (Tangai 1 Petelo 5:4.) Bakulumpe mu bipwilo bashingwa bakatambula “munchinya wa lukumo lubula kwaluka” pamo na Kilishitu mwiulu. Kabiji bakulumpe mu bipwilo ba mu ‘mikooko ikwabo’ bakekala na mwingilo wa kulama jitanga ja Lesa pano pa ntanda mu bukalama bwa “kafunga mwine mukatampe.” (Yoa. 10:16) Mutwe walondelapo ukamba pa mashinda akonsha kukwasha ba mu kipwilo kuyuka bya kutundaika babena kwibatangijila.

Kupitulukamo

• Mambo ka Petelo o afunjileko bakwabo bakulumpe mu kipwilo bya kulama jitanga ja Lesa jajinga mwabo?

• Bakulumpe mu kipwilo bakonsha kukwasha byepi bakolwa ku mupashi?

• Ki ka kitundaika bakulumpe mu kipwilo kulama jitanga ja Lesa jiji mwabo?

[Kipikichala pa peja 21]

Byonka byaubanga bakafunga bakala, ne bakulumpe mu kipwilo lelo jino nabo bafwainwa kuzhikijilanga ‘mikooko’ iji mwabo