Kusapwila Pa Bisankanyi

MUTUMWA Paulo byo ajinga mu muzhi wa Atene, wayanga ku kisankanyi pa juba pa juba na kusapwila mambo awama pe Yesu. (Byu. 17:17) Paulo wasajilepo kuyanga na kusapwila pa kisankanyi, mambo po paubilanga bena Atene busulu kimye kyabaya.

Pepi nobe myaka 2,000, yapitapo, bantu ba Yehoba batwajijila na kusampanya mambo a Bufumu bwa Lesa pa bisankanyi. Mambo ka? Mambo po patanwa bantu bavula. Lelo jino kisankanyi kyakonsha kwikala mpunzha ya mashitolo. Panyuma ya kutambula lūsa ku mukulumpe nangwa ku mwine wa shitolo, Bakamonyi bamo bengijisha tebulu nangwa kibamba kutanchikilapo mabuku alumbulula Baibolo.

Kya kumwenako, pa mpunzha ya mashitolo imo mu muzhi wa New Jersey, mu kyalo kya United States of America, Bakamonyi batanchikile mabuku akebwile bingi bantu aambilenga pa mutwe wa kuba’mba: “Byo mwakonsha kutwajijila kulama bulongo kisemi.” Bintu ka byafuminemo? Jubatu jimo, mabuku 153 ashajikilwe mu milaka itanu na umo.

Mwanamukazhi umo waishile na kutambula buku pa kibamba, watelekele na mushingi byalumbulwilenga Kamonyi umo. Uno mwanamukazhi waswile’mba kyanema bingi kuba kyaswa muchima wa Lesa mu bwikalo bwetu ne mu kisemi kyetu. Watambwileko ano mabuku: Fundai ku Mufunjishi Wayukisha, Icaba Inkaama Ku Nsansa Sha Lupwa, ne Ifipusho Abacaice Bepusha—Ifyasuko Fibomba.

Byo kyaubile pano ke mute, mwanamulume umo wapichijile kwipi na kwatanchikijilwe mabuku, byo ailenga’mba akatwele mu shitolo yalondejilepo. Byo amwene buku wa Ifipusho Abacaice Bepusha, wamutemenwe bingi. Nyenga umo waimene mu kibamba mo batanchikile mabuku wamwene amba uno mwanamulume wakebelenga uno buku. Wamwipwizhe amba: “Pa ano mabuku pajipo umo ye mubena kukeba nyi?” Waitabile na kwinauna mutwe ne kutongolapo buku wa Ifipusho Abacaice Bepusha. Uno mwanamulume watambikile kuboko amba atole uno buku, pano nyenga yetu watolele uno buku ne kumupa. Uno mwanamulume waambile’mba uji na baana basatu. Byo besambilenga, waambile’mba wisambatu na baana banji jimo mu mulungu. Baana banji babiji bakomenapo ke bakyanyiketu. Byo azhikawilenga uno buku, waambile’mba ukamwingijishanga pa lufunjisho lwa kisemi. Kabiji musapwishi wamumwesheshe ne buku wa Icaba Inkaama Ku Nsansa Sha Lupwa, ne kumubula kuba’mba aye ne mukazhanji bakatanamo mafunde akonsha kwibakwasha bingi pa kufuukula bya kuba mu kisemi. Mwanamulume wasekejile bingi pa kumvwa bino, kabiji wapaineko ne mubingu, ne kuswa kuba’mba Kamonyi akeyenga pa nzubo yanji na kumufwakesha pamo ne ba mu kisemi kyanji.

Nga Bakamonyi beumvwine byepi joja juba jo basapwijile pa mashitolo? Nyenga umo waambile’mba: “Naumvwine bingi bulongo kwingijisha jino jishinda ja kusapwilamo. Kabiji bintu byaubiwe pa joja juba byandetejile bingi lusekelo!” Nyenga mukwabo waambile’mba: “Yehoba waambile’mba mambo awama akasapwilwa monse mwapela ntanda. Lelo jino, pa mpunzha ya mashitolo ya Paramus, mu muzhi wa New Jersey, ano mambo awama afikile pa michima ya bantu bamba milaka yapusana pusana. Naumvwine bingi bulongo kusapwilako pa ino mpunzha ya mashitolo. Yense waingijileko pa joja juba wajinga bingi na lusekelo. Kafwako wakebelenga kukomboka byo kyaubile ke mabanga ne.”

Nanchi ne anweba mwakonsha kwingijisha mashinda apusana pusana kusapwilamo mambo awama nyi? Jishinda jine jikatampe jo twingijisha ke kusapwila ku nzubo ku nzubo. (Byu. 20:20) Nangwa byonkabyo, nanchi mwakonsha kulangulukapo kuya na kusapwila ku kisankanyi nangwa ku mashitolo nyi?