Nanchi Mwatwela Mwakukokolokela Lesa Nyi?

‘Mambo a Lesa o omi kabiji aji bingi na bulume.’—HEBE. 4:12.

1. Ñanyi jishinda jo twakonsha kutwelelamo mwakukokolokela Lesa lelo jino kabiji mambo ka kino o kyakonsha kumwekela kupeela pa kwikyamba kukila kwikyuba?

MU MUTWE wafumako, twafunjile kuba’mba twakonsha kutwelatu mwakukokolokela Lesa kupichila mu kwikala balukokelo mu kwingila mingilo mwayila nkebelo yanji. Kino kyakonsha kumwekana kupeela pa kwikyamba kukila kwikyuba. Umvwe twayuka’mba Yehoba washikwa bintu byo twatemwa, kyakumwenako, javula kintu kitanshi kiya mu milanguluko ke kukeba kumusatukila Lesa. Kino kimwesha’mba twafwainwa kutwajijila kukosako kukeba kwikala ‘ba lukokelo.’ (Yako. 3:17) Mu kino kibaba, tusakwisamba pa bintu bimo byakonsha kwitulengela kukankalwa kuba bintu kwesakana na nkebelo ya Lesa nangwa’mba kukokela Lesa kufuma panshi ya muchima.

2, 3. Bintu ka byo twafwainwa kutwajijila kwibikako kuba pa kuba’mba twikale banema kwi Yehoba?

² Muba byepi umvwe bemufundako pa mambo a lujimuno luji mu Baibolo? Binembelo bitubula’mba Lesa ukeba kuleta kwi aye ‘bya buneme byonse’ bya mu mikoka yonse. (Ha. 2:7) Atweba bavula, kechi twajinga bya buneme kimyetu kitanshi kyo twafunjile bukine ne. Nangwa byonkabyo, kutemwa Lesa ne Mwananji kwitulengejile kupimpula byubilo ne miteeto yetu pa kuba’mba tutokeshenga bulongo Lesa ku muchima. Panyuma ya kulombeshapo ne kuba bintu byo twalombelengapo, kimye kyawama kyafikile kyo twipaine mu lubatizhilo.—Tangai Kolose 1:9, 10.

³ Nangwa byonkabyo, kufuma kimye kyo twabatizhiwe, bumbulwa kulumbuluka bwetu kechi bwapwile ne. Buno bumbulwa kulumbuluka bwetu bwatwajijile kabiji bukatwajijilatu mambo kechi twalumbuluka ne. Pano bino, twaketekela kuba’mba umvwe twakosako kwikala na byubilo byawama kabiji ne kukebesha kwikala banema kwi Lesa, Yehoba uketupesha.

Umvwe Kekikebewe Kwitujimunako

4. Mu ñanyi mashinda asatu mo bakonsha kwitufundako pa mambo a lujimuno luji mu Baibolo?

⁴ Saka tukyangye kutendeka kwamba pa bilubo byetu, twafwainwa kuyuka byo biji. Pa Nzubo ya Bufumu, jashi ja mvula bantu jitufika pa muchima nangwa bishinka bimo byafuma mu mabuku etu, byakonsha kusololapo kilubo kyetu kimo kyatama. Pano bino, umvwe twakankalwa kumvwisha kishinka kyaambiwa mu jashi ja Baibolo nangwa kukankalwa kwingijisha lujimuno luji mu mabuku etu, Yehoba wakonsha kwingijisha bena Kilishitu bakwetu kusolola bilubo byetu.—Tangai Ngalatiya 6:1.

5. Tongolaipo byubilo bimo byatama byakonsha kwitulengela kuzhingila umvwe betujimunako kabiji londololai bakafunga ba bwina Kilishitu byo bakonsha kutwajijila kweseka kwitukwasha.

⁵ Kechi kyapeela kutambwila lujimuno kufuma ku muntu mbulwa kulubuluka ne, nangwa kya kuba lolo lujimuno wilupana mu jishinda jawama. Bino, kwesakana na byaamba Ngalatiya 6:1, Yehoba ukambizha boba bakosa ku mupashi ‘kweseka’ kwitolola ‘saka bakoka muchima.’ Umvwe twaumvwina lujimuno lwabo, tukekala banema bingi kwi Lesa. Kabiji inge ketulombe kwi Lesa, tuswa’mba twibambulwa kulumbuluka. Pano bino, umvwe muntu witujimunako mo tubena kubula kuba bulongo, javula muteeto wetu ke wa kukeba kwibingisha, kukepesha kilubo kyetu, kulengulula yewo muntu nangwa jishinda janji jo apanyijilemo lolo lujimuno. (2 Mfu. 5:11) Kabiji inge lujimuno lubena kwaamba pa bintu byatama, kampe nabiji byubilo byatama bibena kuba wa mu kisemi kyetu, mvwajilo ne mwekelo yetu, kubula kwikala ba butooto nangwa kukaya makayo ashikwa Yehoba—twakonsha kuzhingila ne kulefula yewo ubena kwitujimunako. Pano bino, umvwe twaikala panshi ne kulangulukishapo, javula twiya kuswa’mba lujimuno lwajingatu bulongo.

6. Mambo a Lesa asolola byepi ‘milanguluko ya mu muchima ne mo yayila’?

⁶ Kinembelo kine kya uno mutwe kibena kwituvululako’mba Mambo a Lesa ‘aji bingi na bulume.’ Ee kine, Mambo a Lesa aji bingi na bulume bwa kupimpula byubilo bya bantu. Kijitu nobe byonka byo etukwashishe kupimpula byubilo byetu panyuma ya lubatizhilo, ne kimye kyo twabujile kubatizhiwa. Mu nkalata yanji yo anembejile Bahebelu, Paulo naye wanembele’mba Mambo a Lesa ‘atwela mukachi mwine mu muntu ne kusolola byo aji mukachi ne pangye kabiji abanya manungi ne mikolokofwa, akebakeba ne kupima milanguluko ya mu muchima ne mo yayila.’ (Hebe. 4:12) Mu jishinda jikwabo, umvwe twaumvwisha nkebelo ya Lesa pe atweba, jishinda jo tubilamo na yoyo nkebelo, jimwesha bintu biji mu muchima wetu. Nanchi pajipo lupusano pakachi ka byo betumona bantu kabiji ne byo tuji mukachi ka muchima wetu nyi? (Tangai Mateo 23:27, 28.) Akimonai byo mwakonsha kuba na bino bintu byubiwa.

Endelainga Pamo na Jibumba ja Yehoba

7, 8. (a) Ki ka kyalengejile bena Kilishitu Bayudea kukakachila ku kulondela Mizhilo ya Mosesa? (b) Bafwainwe kumwesha byepi amba babena kwingijila mwayila nkebelo ya Yehoba pa kyokyo kimye?

⁷ Atweba bavula twakonsha kwambatu kwa kubula kutanga byambo biji mu Byambo bya Mana 4:18 byaamba’mba: “Pakuba jishinda ja baoloka jauba nobe kyeya kya kumakya, kyenda kisama ne kusamisha, kufika ne pa kushinkimana juba.” Kino kilumbulula’mba byubilo byetu ne kumvwisha nkebelo ya Lesa bikayanga na kuwaminako mu kuya kwa moba.

⁸ Byonka byo twisambile mu kibaba kyafumako, panyuma ya lufu lwa kwa Yesu, kyakatezhe bingi bena Kilishitu Bayudea kuleka kulondela Mizhilo ya Mosesa. (Byu. 21:20) Nangwa kya kuba Paulo wibalumbulwijile bulongo amba bena Kilishitu kechi bafwainwe kulondela Mizhilo ya Mosesa ne, bamo bakaine kumvwina byo ebambijilenga. (Kolo. 2:13-15) Kampe balangulukilenga’mba inge batwajijila kulondela Mizhilo imo ya Mosesa, kechi bakonsheshe kwibamanyika ne. Nangwa byonkabyo, Paulo wanembejile bena Kilishitu Bahebelu ne kwibalumbulwila’mba kechi bakonsheshe kutwela mu kukokoloka kwa Lesa umvwe kya kuba bakaine kwingijila monka mwayila nkebelo ya Lesa ne.a (Hebe. 4:1, 2, 6; tangai Bahebelu 4:11.) Pa kuba’mba betabilwe kwi Yehoba, bakonsheshe kuyuka kishinka kya kuba’mba Yehoba watangijilenga bantu banji mu jishinda japusanako.

9. Ñanyi byubilo byo twafwainwa kwikala nabyo umvwe kwaikala lupimpu pa mambo ñumvwino imo ya Binembelo?

⁹ Mu ano moba, kwapimpulwa bintu byavula bya kwitulengela kumvwisha mafunjisho amo a mu Baibolo. Kino kechi kyakonsha kwitulengela kulefulwa ne, kyafwainwa kukosesha luketekelo lwetu mu jibumba ja kalume wakishinka kabiji wa maana. Umvwe ba mu jibumba ja “kalume” bamona’mba bukine bumo bubena kukebewa kupimpulwako nangwa kololwa, kechi bekalatu kwa kubula kuba luno lupimpu ne. Jibumba ja kalume jikebesha bingi kwingijila mwayila nkebelo ya Lesa pa kino kimye kukila kwikalatu kwa kubula kupimpula bintu na mambotu a kuchina bantu. Muba byepi umvwe kwaikala lupimpu pa mambo a ñumvwino imo ya Binembelo?—Tangai Luka 5:39.

10, 11. Ñanyi bintu byo twakonsha kufunjilako ku byaubile bamo kimye kyo bapimpwile mashinda a kusapwilamo mambo awama?

¹⁰ Twayai twisambe pa kyakumwenako kikwabo. Ku mpelo ya myaka ya mu ma 1800 ne ku ntendekelo ya myaka ya mu ma 1900, Bafunda Baibolo bamo bayukile kwamba bulongo majashi a mvula bantu, balangulukanga’mba bakonsheshe kwingila bulongo mwingilo wa kusapwila kupichila mu kwamba bulongo majashi ku bantu bamweshanga lusekelo. Baumvwanga bingi bulongo kwamba majashi kabiji bamo basekelanga bingi pa kwibatakaika ku bantu. Nangwa byonkabyo, panyuma baishile kumona’mba Yehoba ukeba bantu banji kwingila na ngovu mu mwingilo wa kusapwila mu mashinda apusana pusana kubikapotu ne kusapwila ku nzubo ku nzubo. Bamo batemenwe kwamba bingi majashi, bakaine kulondela luno lupimpu. Ku bantu, bamwekelenga nobe banabalume bepana kwi Nkambo, baji na bulunda bwakosa ne Yehoba. Pano bino, byo kwaikele lupimpu lwa kwingila mwingilo wa kusapwila kwesakana na nkebelo ya Lesa, milanguluko ne byubilo byabo byaishile kuyukanyikwa ku bantu bonse. Yehoba waumvwine byepi pa mambo a bano bantu? Kechi wibapesheshe ne. Bashile jibumba janji.—Mat. 10:1-6; Byu. 5:42; 20:20.

¹¹ Kino kechi kibena kulumbulula’mba aba bashajile ne kwikala bakishinka ku jibumba kibapeelejile kusapwila ku bantu ne. Bavula kibakatezhe bingi kikatakata kimye kyo batendekeletu. Pano bino, bakokejile. Mu kuya kwa kimye, bakosele kabiji Yehoba wibapesheshe bingi. Muba byepi umvwe bemwambila kwingilako mbaji imo ya mwingilo wa busapwishi yo mumona’mba imukatazha bingi? Nanchi mwipana kulondela lupimpu nyi?

Umvwe Muntu ye Twatemwa Washa Yehoba

12, 13. (a) Ñanyi nkebelo ya Yehoba pa mambo a kupanga muntu mu kipwilo? (b) Ñanyi lweseko bansemi bamo lo bekala nalo kabiji ki ka kilengela luno lweseko kubaya?

¹² Atweba bonse tuswa byaamba jifunde ja kuba’mba, twafwainwa kwikala batoka ku mubiji, mu byubilo ne ku mupashi pa kuba’mba tutokeshe Lesa ku muchima. (Tangai Titusa 2:14.) Nangwa byonkabyo, kwakonsha kwikala kimye kimo bukishinka bwetu kyo bwakonsha kwesekwa na mambo a kulondela bintu byaambiwa peulupo. Kyakumwenako, mwana wa bamulume ne mukazhi bena Kilishitu boba bulongo ku mupashi, washa bukine. Uno mwana bamupanga mu kipwilo na mambo a kusalapo ‘kusekela mu bundengamambo bwa pa kakimye kacheche’ kukila kwikala na bulunda bwanji bwawama ne Yehoba ne na bansemi banji batemwa Lesa.—Hebe. 11:25.

¹³ Bansemi baumvwa kutama ku muchima! Bayuka bulongo byaamba Baibolo pa mambo a muntu wapangiwa kuba’mba: ‘Kechi mupwanañane na muntu yense watelwa’mba mulongo, bino saka oba bulalelale, wa lunkumbwa, upopwela bankishi, utukana, upendwapendwa, uja bya lunkanankana, muntu wa uno mutundu kechi mwafwainwa ne kuja nanji ne.’ (1 Ko. 5:11, 13) Kabiji bamona kuba’mba kyambo kya kuba’mba ‘yense’ mu kino kyepelo kyavwangamo ne bantu bakwabo bakilongo bo babula kwikala nabo pa nzubo. Pano bino, bamutemwa bingi mwanabo! Na mambo a kumvwa kutama bakonsha kulanguluka’mba: ‘Twakonsha kukwasha byepi mwanetu kubwela kwi Yehoba umvwe twaleka kupwanañana nanji? Nanchi kechi twakonsha kumukwasha mu bintu byavula umvwe ketupwanañane nanji kimye kyonse nenyi?’b

14, 15. Ñanyi kintu bansemi ba bwina Kilishitu baji na mwana wapangiwa mu kipwilo kyo bafwainwa kufuukulapo kuba?

¹⁴ Twayuka biumvwa bano bansemi. Mambo mwanabo wajinga na lūsa lwa kwisajila kabiji wasajilepo kulondela byubilo byanji byatama kukila kutwajijila kupwanañana na bansemi banji ne bakwabo ba mu lwitabilo. Bansemi kechi bajingapo na lūsa lwa kumukanya ne. O ene mambo o bekela na binyenge!

¹⁵ Nangwa byonkabyo, ñanyi bintu bano bansemi byo bakonsha kuba? Nanchi bakonsha kukokela mukambizho wa Yehoba nyi? Nangwa abya bakalengulula ne kulanguluka’mba bakonsha kutwajijila kupwanañana na mwanabo wapangiwa kabiji ne kwamba’mba “babena kwisambatu bya kisemi” nyi? Kimye kyo babena kufuukula bya kuba, bafwainwa kulanguluka pe Yehoba byo eumvwa pa byobyo bintu byo babena kuba. Nkebelo yanji ke ya kulama jibumba janji kwikala jatoka kabiji ne kulengela bandengamambo kuyuka’mba bintu byo baubile byatama. Bansemi ba bwina Kilishitu bakonsha kutundaika byepi ino nkebelo?

16, 17. Ki ka kyo twakonsha kufunjilako umvwe ketulanguluke languluke pa kyamwekejile Alona?

¹⁶ Kolojanji Mosesa, aye Alona wajinga na lukatazho lukatampe pa mambo a baana banji babiji. Akilangulukai pa byo eumvwine kimye baana banji, ba Nadaba ne Abihu byo baipaiwe kwi Lesa na mambo a kulambula mujilo kwi Yehoba ye abujile kwibakambizha. Kino kyalengejile kupwanañana kwafwainwe kwikalako pakachi ka bano banabalume ne bansemi babo kupwa. Kechi kupwanañanatu konka ne, kuji ne bintu bikwabo byavwangiwemo. Yehoba wakambizhe Alona ne baana banji bakishinka amba: ‘Kechi muleke nsuki yenu ivwatakane nangwa kutabaula bivwalo byenu [pa kujila] ne, kuchina’mba mwakafwa, ne kuletesha bukaji [bwa Yehoba] pa bantu bonse.’ (Levi 10:1-6) Kishinka kibena kwambiwapo ke kino. Butemwe bwetu pe Yehoba bwafwainwa kukosa kukila bwa pa balongo ba mu kisemi kyetu babula bukishinka.

¹⁷ Lelo jino, Yehoba kechi wipaya ponkapotu bantu balala mizhilo yanji ne. Na mambo a butemwe, wibapa kimye kya kulapila ku byubilo byabo byatama. Nangwa byonkabyo, Yehoba wakonsha kwiumvwa byepi umvwe bansemi kebapwanañane kimye kyonse na mwanabo wamulume nangwa wamukazhi ndengamambo wabula kulapila ye bapanga mu kipwilo?

18, 19. Mapesho ka akonsha kwikala na ba mu kisemi balondela mikambizho ya Yehoba pa mambo a bantu bapangiwa mu kipwilo?

¹⁸ Bavula bo bapangilepo kala, luno bamba’mba, na mambo a kuba balunda nabo ne ba mu kisemi kyabo balondejile mukambizho wa kubula kupwanañana nabo, kino kibakwashishe kupimpula byubilo byabo. Pa kukeba kubwezha mwanamukazhi wakyanyike umo wapangiwe, bakulumpe mu kipwilo banembele’mba kintu kimo kyamulengejile kupimpulako byubilo byanji ke “na mambo a kuba’mba kolojanji wamulume wanemekele mukambizho wa kubula kupwanañana na muntu wapangiwa.” Uno mwanamukazhi waambile’mba “bukishinka bwa kolojanji bwa kulondela mikambizho ya mu Binembelo bwamukwashishe kukeba kubwela mu kipwilo.”

¹⁹ Kishinka ka kyo twafwainwa kufunjilako? Tufunjilako kuba’mba twafwainwa kuleka muteeto wetu wa kukeba kubula kulondela lujimuno lwa mu Binembelo wiya na mambo a bumbulwa kulumbuluka. Twafwainwa kushiinwa’mba kimye kyonse Lesa wingijisha jishinda jawama kupwishishamo makatazho.

“Mambo a Lesa o Omi”

20. Mu ñanyi mashinda abiji kinembelo kya Bahebelu 4:12 mo twakonsha kwikilumbulwila? (Monai tubyambo twa munshi.)

²⁰ Paulo byo anembele’mba “mambo a Lesa o omi,” kechi waambilenga kikatakata pa Mambo a Lesa, Baibolo ne.c Mulanguluko uji mu bino byambo umwesha’mba Paulo waambilenga pa mambo a Lesa a mulaye. Kishinka kyaambilengapo Paulo kyajinga kya kuba’mba Lesa kechi ulaya kintu kyo abula kufikizha ne. Yehoba walumbulwile bulongo kino kishinka kupichila mwi ngauzhi Isaya amba: ‘Byambo byami . . . kechi bikabwelatu byatu kwi amiwa ne, poso . . . bikalumbulukile mu kyonkakya kintu kyo nebitumijile.’ (Isa. 55:11) Onkao mambo, kechi kikebewa kulefulwa bukiji umvwe twamona’mba bintu bibena kubiwa mu jishinda japusanako na jo tukeba ne. Yehoba ‘watwajijila kwingila’ na mulanguluko wa kukeba kufikizha nkebelo yanji.—Yoa. 5:17.

21. Kinembelo kya Bahebelu 4:12 kyakonsha kutundaika byepi bakikulumpe bakishinka ba mu “jibumba jikatampe”?

²¹ Bakikulumpe bakishinka baji mu “jibumba jikatampe” baingijila Yehoba pa myaka yavula bingi. (Lum. 7:9) Bavula kechi baketekejile’mba bakakota mu buno bwikalo bo tujimo ne. Nangwa byonkabyo, kechi balefulwa ne. (Sala. 92:14) Bayuka’mba mambo a Lesa a mulaye kechi aji nobe kintu kyafwa ne—o omi kabiji Yehoba ubena kwingila kuba’mba afikizhe mambo anji a mulaye. Byo kiji kuba’mba Lesa ubena kukebesha kufikizha nkebelo yanji, tumusangajika umvwe ketulanguluke pa nkebelo yanji kimye kyonse. Mu jino juba ja butanu na bubiji, Yehoba watwajijila kukokoloka, saka ayuka’mba nkebelo yanji ikafikizhiwa kabiji ne kuba’mba mu bujibumba, bantu banji bakengilanga mwayila nkebelo yanji. Nga anweba kiji byepi? Nanchi ne anweba mwatwela mu kukokoloka kwa Lesa nyi?

[Tubyambo twa mushi]

Kange Muvulame Nkebelo ine ya Juba ja Sabado Ne

• Ki ka kikebewa pa kuba’mba tutwele mwakukokolokela Lesa lelo jino?

• Ñanyi lukwatankano lujipo pakachi ka nkebelo ya Lesa ne kwipana kwetu kwa kulondela lujimuno lwa mu Baibolo?

• Ñanyi bintu bimo byakonsha kwitulengela kukankalwa kukokela mukambizho wa mu Binembelo, pano bino mambo ka o kyanemena kukokela?

• Mu ñanyi mashinda abiji kinembelo kya Bahebelu 4:12 mo twakonsha kwikilumbulwila?

[Kipikichala pa peja 31]

Bansemi baumvwa kutama ku muchima!