Mweshai Bukishinka Bwabwina Kilishitu Umvwe Mulongo Wenu Wapangiwa Mukipwilo
1. Kika kyakonsha kuleta lweseko kubukishinka bwabwina Kilishitu?
1 Lumvwañano pakachi kabamukisemi lwakosa bingi. Kino kiletela mwina Kilishitu lweseko umvwe mukwabo wamumasongola, mwana, nsemi, nangwa mulongo mukwabo wapangiwa nangwa wipatula mwine kufuma mukipwilo. (Mat. 10:37) Bena Kilishitu bakishinka bakonsha kuba byepi nauno mulongo wabo? Umvwe muntu mwikala nanji nzubo imo, abya ngikelo yomwikelamo nanji yafwainwa kupusanakonyi? Patanshi twayai tumone Baibolo byoyaamba pauno mutwe, mambo momuji mafunde engila kubapangiwa neboba bepatula bene mukipwilo.
2. Kwesakana nabyaamba Baibolo, bena Kilishitu bafwainwa kuba byepi naboba bapangiwa mukipwilo?
2 Byotwakonsha Kuba Namuntu Wapangiwa Mukipwilo: Byambo bya Lesa byakambizha bena Kilishitu kubula kupwanañana pamo namuntu wapangiwa mukipwilo amba: ‘Kechi mupwanañane na muntu watelwa’mba mulongo, kana waikala ke wa bulalelale, nangwa wa lunkumbwa, nangwa upopwela bankishi, nangwa utukana, nangwa upendwapendwa, nangwa uja bya lunkanankana, ne; na wa byonkabyo kechi muje nanji ne... . Fumyai awa mubi mukachi kenu.’ (1 Ko. 5:11, 13) Byambo byakwa Yesu byanembwa mu Mateo 18:17 nabyo byashimunapo pakino amba: “Muleke [muntu wapangiwa mukipwilo] ekale ku meso obe pamotu na Mugentila ne musonkeshi.” Banteleki bakwa Yesu bayukile’mba Bayudea bamukyokya kimye kechi bapwanañananga pamo na Bagentila ne, kabiji bachinanga nebasonkeshi amba bantu bobachibako kubula kupwañana nabo. Onkao mambo Yesu wafunjishenga batumwa banji kubula kupwañana nabantu bapangiwa mukipwilo.—Monai Kyamba kya Usopa, kya Kibemba kya March 15, 1982, mapeja 16-18.
3, 4. Ñanyi kupwañana namuntu wapangiwa nangwa wipatula mwine mukipwilo kwakanyiwa?
3 Kino kibena kulumbulula’mba bena Kilishitu bakishinka kechi bafwainwa kwisambila pamo bintu byakumupashi namuntu wapangiwa mukipwilone. Bino mwavwangwa byavula. Byambo bya Lesa byamba kuba’mba kechi twafwainwatu ‘nangwa kuja nanjine.’ (1 Ko. 5:11) Onkao mambo, kyokyotubujila nekupwañena pamo namuntu wapangiwa mukipwilo. Kino kilumbulula’mba kechi twafwainwa kuya nanji kumakayo, kubyakuja-jaja nekutoma, kupamina pamo mpila, nangwa kuyila pamo nanji nakupota bintu, kuya nanji mubishimikwa mukaiwa makayo, kujila pamo kajo kikale panzubo nangwa mumalesitilantine.
4 Pano ibyepi pamambo akwisamba namuntu wapangiwa mukipwilo? Nangwa kyakuba Baibolo kechi yaambapo palubaji lonse lwakonsha kubiwane, 2 Yoano 10 witukwasha kuyuka Yehoba byoamona bintu amba: “Umvwe umo waiya ko muji, ne kuleta luno lufunjisho ne, kechi mumutambule mu nzubo yenu ne, nangwa kumwimuna ne.” Kyamba kya Usopa, kya Kibemba kya March 15, 1982, peja 23, kyaamba’mba: “Lwimu lonkatu kokwakonsha kufuma nemisambo nangwa kwisampa bulunda. Nanchi tukeba kutatula kuba kino namuntu wapangiwa mukipwilonyi?”
5. Umvwe muntu wapangiwa mukipwilo ulusaka?
5 Ee kine, kijitu byonka byokyaambiwa papeja 30 muyenka mutwe uji mu Kyamba kya Usopa kintu kimo amba: “Kishinka kekyakuba’mba umvwe mwina Kilishitu walenga mambo wapangiwa nemukipwilo, ulusa bintu byavula bingi: bulumbuluke bwanji kwi Lesa; ... kupwañana pamo kwawama nabalongo, kuvwangakotu nekupwañana pamo koapwañananga nabalongo banji bakumubiji babwina Kilishitu.”
6. Abya mwina Kilishitu wafwainwa kuleka kupwañana konse namulongo wanji wapangiwa mukipwilo mobekela nzubo imonyi? Londololai.
6 Bekala Nzubo Imo: Abya akino kilumbulula’mba bena Kilishitu bekala nzubo imo nawamukisemi wapangiwa mukipwilo bafwainwa kuleka kwisamba nanji, kujiila nanji pamo, nekupwañana nanji mumingilo yabo yajuba nejubanyi? Kyamba kya Usopa, kya Kibemba kya April 15, 1991, patubyambo twapanshi papeja 22, kyaamba’mba: “Umvwe munzubo yabena Kilishitu muji mulongo wabo wakumubiji wapangiwa mukipwilo, awo muntu bafwainwa kwingijilanga nanji pamo mingilo yajuba nejuba byonka byokikala moba onse.” Mujino jishinda, bamukisemi kyanji bakonsha kufuukula kujiila nanji pamo nangwa kwingijilanga pamo nanji mingilo yapanzubo. Pano bino, kechi bafwainwa kulenga bantu kebamone nobe kafwapo nelupusano lujipo nabyokyajinga kala saka akyangye kupangiwa mukipwilone.
7. Kupwañana kwakumupashi kwikala byepi umvwe umo wamukisemi wapangiwa mukipwilo?
7 Pano bino, Kyamba kya Usopa, kya Kibemba kya March 15, 1982, peja 27, kyaambapo pamambo amuntu wapangiwa nangwa wipatula mwine mukipwilo amba: “Kupwañana konse kwakumupashi koapwañananga nabakwabo pano kupwa. Kino byobyo kiji nangwatu nabalongo banji, kuvwangakotu neboba bamukisemi kyanji boekala nabo nzubo imo... . Kino kikaleta lupimpu mumpwañeno yakumupashi yajingapo kala munzubo. Kyakumwenako, umvwe mulume wapangiwa mukipwilo keatangijile lufunjisho lwa Baibolo lwakisemi nangwa kutangila Baibolo pamo nekulomba lulombelo, mukazhanji nebaana banji kechi bakatemwa kwikalapone. Umvwe ukeba kulomba, nabiji kimye kyakuja kajo, uji nalūsa lwakulombela mambo munzubo yanji. Bino abo bafwainwa kulomba milombelo yabo bene yamumuchima kwi Lesa. (Mana. 28:9; Sala. 119:145, 146) Ibyepi umvwe awo muntu wamukisemi wapangiwa mukipwilo ubena kukeba kutanwapo umvwe bamukisemi kebakebe kutangila Baibolo pamo nangwa kebafunde lufunjisho lwa Baibolo? Bakwabo mukisemi bakonsha kumuleka waikala saatelekako umvwe kyakuba kechi usakwibafunjishanga byoaitabilamone.”
8. Ñanyi mwingilo bansemi babwina Kilishitu yebekala nanji pamambo amwanabo wamunzubo wapangiwa mukipwilo?
8 Umvwe mwana wamunzubo wapangiwa mukipwilo, bansemi babwina Kilishitu baji namwingilo wakumusunga. Kyamba kya Usopa, kya Kibemba kya November 15, 1988, peja 20, kyaamba’mba: “Byonkatu bansemi byobamupa kajo, byakuvwala, nepakulaala, bafwainwa nekumufunjishanga Byambo bya Lesa. (Mana. 6:20-22; 29:17) Onkao mambo bansemi babutemwe bakonsha kutanchika kuba’mba bafunjilenga nanji pamo lufunjisho lwakisemi, nangwa kyakuba wapangiwa mukipwilo. Kampepo wakonsha kololwako pakatampe umvwe kebamufunjishishe pabunke bwanji. Nangwa kimo kimye bakonsha kukeba’mba afunjilenga pamo nabakwabo palufunjisho lwakisemi.”—Monai ne Kyamba kya Usopa, kya October 1, 2001, mapeja 16-17.
9. Mwina Kilishitu wafwainwa kupelela pepi mukupwañana namulongo wakumubiji wapangiwa mukipwilo wiikela?
9 Balongo Bekala Kungi: Kyamba kya Usopa, kya Kibemba kya April 15, 1988, peja 28 kyaamba’mba: “Kino kyapusanako umvwe awo muntu wapangiwa nangwa wipatula mwine mukipwilo mulongo wiikela.” Kyafwainwa kuwama kuleka kwisamba nayewo mulongo. Nangwa kyakuba kujipo bintu bimo mukisemi bibena kukebewa kuba’mba ashinkwepo, kino kyafwainwa kubiwa mukwesakanya,” monka mwayila mukambizho wa Lesa wakuleka ‘kupwanañana na muntu’ ulenga mambo kwakubula kulapila. (1 Ko. 5:11) Bena Kilishitu bakishinka bafwainwa kuleka kupwañanatu kipwañane-pwañane nayewo mulongo wabo, nangwatu mubyabusulu namo bafwainwa kukepeshako kechi kuba bechina nekalane.—Monai ne Kyamba kya Usopa, kya Kibemba kya March 15, 1982, mapeja 28-30.
10, 11. Ñanyi bintu mwina Kilishitu byoafwainwa kulangulukapo saka akyangye kwitabizha mulongo wanji wapangiwa mukipwilo kuba’mba eye ekalenga nanji?
10 Kyamba kya Usopa kyaambapo nekintu kikwabo kyakonsha kubiwa amba: “Ibyepi umvwe mulongo wapangiwa mukipwilo, nabiji mwana nangwa nsemi yemubula kwikala nanji pamo, mukupita kwakimye wakeba amba eye mwikalenga nanji? Kisemi kyafwainwa kusalapo byokyakonsha kuba kwesakana namwayila bintu. Kyakumwenako, nsemi wapangiwa mukipwilo wakonsha kukolwa nangwa kukatazhiwa mwakutaina mali akwisungilamo. Baana babwina Kilishitu bafwainwa kulondela mafunde amu Binembelo neamubwikalo akukwasha bansemi yabo. (1 Timo. 5:8) ... Kyonse kyaubiwa kyakonsha kwimena pabintu nabiji pakukajilwa kwakine kwayewo nsemi, byubilo byanji, nemutwe wakisemi byoalangulukilako bwikalo bwakumupashi bwakisemi kyanji.”—Kyamba kya Usopa, kya Kibemba kya March 15, 1982, mapeja 27-8.
11 Mutwe yenka umo watwajijila kwamba’mba: “Kimo kimye bansemi babwina Kilishitu betabizha mwana wapangiwa mukipwilo wakolwa kumubiji nangwa mumilanguluko kubwela’mba bekalenga nanji. Pano bino, bansemi bafwainwa kumona byavwangwa mubwikalo bwayewo mwana. Abya awo mwana wapangiwa mukipwilo wiikejilengatu saemwena mwine, bino pakino kimye wakankalwa kwijishanyi, inyi ukebatu kubwela namambo akubatu’mba akekalenga bulongo? Nga byubilo byanji biji byepi? Abya ukaleta ‘mbizho’ munzubonyi?—Nga. 5:9.”
12. Mfwetoka iji mulunengezho lwakupanga muntu mukipwilo?
12 Mfweto iji Mukwikala Bakishinka kwi Yehoba: Kumvwina lunengezho lwamu Binembelo lwakupanga muntu mukipwilo nekuleka kupwañana pamo nabangubabibi babula kulapila kyawama bingi mambo muji mfweto. Kilengela kulama butooto mukipwilo kabiji kwituyukisha amba tulondela mafunde aoloka amu Baibolo. (1 Pe. 1:14-16) Kwitulamawizha kububipisho bonse. (Nga. 5:7-9) Kabiji kulengela yewo ngubabibi kufunjilako kulolo lujimuno lobamupa, alo lwakonsha kumukwasha kwikala na “bipangwa bya mutende, bo bololoke.”—Hebe. 12:11.
13. Ñanyi lupimpu lwaubilepo kisemi kimo, kabiji kika kyafuminemo?
13 Panyuma yakumvwa jashi pakupwila kwakijiiji, mulongo umo wakyanyike nenyenga yanji, balangulukile’mba bafwainwa kupimpula jishinda jobalaminamo bainabo bapangiwe mukipwilo pamyaka 6. Aku bapwishatu kupwila kwakijiiji, mulongo wakyanyike waichile bainanji amba akiiyayi, kabiji panyuma yakwibalumbulwila butemwe bobebatemwa, wibalondolwejile kuba’mba kechi bakambapo nabo jibijine, posotu kuji kintu kyobabena kukeba kwibabula bukiji-bukiji kyasombwa. Panyuma yakwibabula byobyo, bainanji batatwile kutanwa kukupwila kabiji mukuya kwamoba bebabwezhezhe mukipwilo. Kabiji, bamwata wabo babujile kwitabila nabo batatwile kufunda bukine nemukupita kwakimye babatizwe.
14. Mamboka otwafwainwa kutundaikila mubukishinka lunengezho lwakupanga muntu mukipwilo?
14 Kumvwina mubukishinka lunengezho lwamu Binembelo lwakupanga muntu mukipwilo kumwesha butemwe bwetu kwi Yehoba kabiji kupana mukumbu kuyewa umwendeleka. (Mana. 27:11) Kifumamo, Yehoba witupesha. Mfumu Davida wanembele kutazha kwi Yehoba amba: “Kabiji ku malamuna anji nako kechi nasendukileko ne. Ku wa lusa [wakishinka, NW] mukemwesha anwe bene ke wa lusa [wakishinka].”—2 Sam. 22:23, 26.