MEPUZHO AFUMA KU BATANGA

Nanchi kijitu bulongo bansemi bena Kilishitu kimye kya kupwila kwikala pamo na mwana ye bapanga mu kipwilo nyi?

▪ Kechi kyatama kwikala pamo mu Nzubo ya Bufumu na muntu wapangiwa mu kipwilo ne. Mabuku etu atundaika bingi bansemi bena Kilishitu kukwasha mwanabo wapangiwa mu kipwilo ukikala pa nzubo yabo. Byonka byo kyaambiwapo mu Kyamba kya Usopa kya October 1, 2001, pa mapa 16-18, bansemi bakonsha ne kufunjisha Baibolo mwanabo mwanyike wapangiwa mu kipwilo ye bakikala nanji pa nzubo. Onkao mambo, bansemi bakonsha kumukwasha kupimpula byubilo byanji.

Kyakonsha kwikalatu bulongo mwana wapangiwa mu kipwilo kwikala kishinshi na bansemi banji mu Nzubo ya Bufumu. Byo kiji kuba’mba kafwako muzhilo waamba’mba muntu wapangiwa mu kipwilo wafwainwa kwikela kunyuma ne, ko kuba’mba kijitu bulongo mwana ye bapanga mu kipwilo kwikala pamo na bansemi banji ponse po baikala. Byonkatu bansemi byo bamukwasha kwikala na bulunda bwawama na Lesa, ne kimye kya kupwila bafwainwa kumona kuba’mba ubena kutako muchima pa kuba’mba amwenemo. Onkao mambo, kyakonsha kuwama bingi mwana ye bapanga mu kipwilo kwikala pamo na bansemi banji kimye kya kupwila kukila kwiikela.

Pano kyakonsha kwikala byepi inge mwana wapangiwa kechi wikala pa nzubo ya bansemi banji ne? Nanchi kino kibena kulumbulula kuba’mba uno mwanyike kechi wafwainwa kwikala paikala bansemi banji nenyi? Kala, mabuku etu alumbulwile bena Kilishitu byo bafwainwa kumonanga kupwanañana na mulongo wabo wapangiwa mu kipwilo ye babula kwikala nanji pa nzubo.a Nangwa byonkabyo, muntu wapangiwa mu kipwilo kwikala kishinshi pamo na balongo banji kimye kya kupwila kwapusana na kupwanañana nanji. Inge kya kuba balongo banji bakishinka babena kulondela byo bafwainwa kuba na mulongo wabo wapangiwa mu kipwilo kabiji babena kwibikako kulondela lujimuno lwa mu Binembelo lwakanya kupwanañana nanji, ko kuba’mba kechi bafwainwa kwakamwa na mambo a ngikelo ne.—1 Ko. 5:11, 13; 2 Yoa. 11.

Muntu wapangiwa mu kipwilo inge waikala kwipi na mulongo wanji nangwa na muntutu mukwabo mu kipwilo kechi kyatama ne, kanatu inge wabula kwishingika. Kukanya muntu po abena kukeba kwikala kwakonsha kuletatu makatazho pa bimye bimo. Inge kya kuba bonse mu kipwilo ne balongo banji bakishinka bonse babena kwibikako kulondela mafunde a mu Baibolo akanya kupwanañana na bapangiwa mu kipwilo, kabiji kechi kibena kutuntwishapo bamo mu kipwilo ne, ko kuba’mba kechi mwafwainwa kwakamwa pa ngikelo ya babena kwiya na kupwila ne.b

[Tubyambo twa mushi]