Bukine Bwaamba Pa Amagedonyi
‘Bandemona . . . baya ku bamfumu ba pano pa ntanda ponse . . . , ne kwibakonkenya pamo ku mpunzha itelwa mu Kihebelu amba Amagedonyi.’—LUMWEKESHO 16:14, 16.
AMAGEDONYI jizhina ja mpunzha. Bino ino mpunzha kyamweka kechi yajingako ne, ya kifwanyikizhotu.
Pano nga kyambo kya “Amagedonyi” kyatala mwepi? Mambo ka o kyayukanyikilwa ku nkondo?
Kwibakonkenya Pamo ku Mpunzha Itelwa’mba Amagedonyi
Kyambo kya Kihebelu kya Amagedonyi kilumbulula “Mutumba wa Megido.” Nangwa kya kuba kechi kwajinga mutumba watelwanga’mba Megido ne, mpunzha ya Megido yajingako. Yaikejile pasambakena mikwakwa ku muzhika buyeke bwa mpunzha mwaikalanga bena Isalela ba kala. Nkondo yo bafukulanga beilwilanga kwipi na ino mpunzha. Onkao mambo, jizhina ja Megido kyo kyo jayukanyikilwa ku nkondo.a
Bino kyanema pa jizhina ja Megido kechi makondo o balwilangako ne, ke ene mambo o balwilanga. Mpunzha ya Megido yajinga mu Ntanda ya Mulaye, Yehoba Lesa yo apele bena Isalela. (Kulupuka 33:1; Yoshua 12:7, 21) Lesa wachipile ku bano bantu kuba’mba ukebazhikijilanga ku balwanyi babo ne kya kine wibazhikijilanga. (Mpitulukilo ya mu mizhilo 6:18, 19) Kyakumwenako, pa Megido, Yehoba popo azhikijile bena Isalela mu jishinda ja kukumya ku nzhita ya kwa Mfumu Yabina wa bena Kenana yatangijilwenga na mukulumpe wa bashilikale Sisela.—Mitonyi 4:14-16.
Onkao mambo, kyambo kya “Amagedonyi” kyanema bingi. Kimenako makondo a pakachi ka mazhita a bulume bukatampe.
Bungauzhi buji mu buku wa Lumwekesho bwaamba pa kimye kyafwenya kala pepi, Satana ne bandemona banji po bakatundaika makafulumende a bantu kupwizha pamo mazhita abo amba bamanyike bantu ba Lesa ne kukanya mwingilo wanji. Kuno kulukukwa kukalengela bantu bavula kufwa, Lesa byo akakambula bano bansatuki.—Lumwekesho 19:11-18.
Lesa utelwa mu Baibolo amba, “wa lusa, ubanda kuzhingila kabiji wa butemwe bukatampe bubula kwaluka,” wakonsha kwipaya byepi bantu bavula? (Nehemiya 9:17) Pa kuba’mba tumvwishe Lesa kyo akobila bino, twafwainwa kukumbula ano mepuzho asatu alondelapo: (1) Ñanyi ukatatula ino nkondo? (2) Mambo ka Lesa o akevwangilamo? (3) Ñanyi bintu bya myaka ino nkondo byo ikaletela bantu ne ntanda?
1. ÑANYI UKATATULA INO NKONDO?
Bukaji kechi bo bukalengela Lesa kulwa nkondo ya Amagedonyi ne. Lesa ukoba bino pa kuzhikijila bantu banji ku bakakebanga kwibavizha. Bakakebanga kwibavizha ke “bamfumu ba pano pa ntanda ponse,” bantangi ba pano pa ntanda. Pano ki ka kikebalengela kukeba kulukuka bantu ba Lesa? Mambo bakokela nkambo yabo Satana ukalengela makafulumende ne mazhita kwinengezha kulukuka bapopwela Yehoba Lesa.—Lumwekesho 16:13, 14; 19:17, 18.
Byo kiji kuba’mba mu byalo byavula mu bantu bakasuluka mu bya bupopweshi, bamo bakonsha kuzhinauka mulanguluko wa kuba’mba makafulumende akakeba kuzhiisha bupopweshi. Nangwa byonkabyo, kulukukwa kwa uno mutundu kwaubiwepo kala kabiji kubena kubiwa ne lelo jino.b Bino kuji bishinka bibiji bilengela kulukukwa kwaubiwe kunyuma kwe kupusana na kukakolomona Amagedonyi. Kishinka kitanshi, kukekala kulukukwa kwa ntanda yonse. Kya bubiji, kikoba Yehoba Lesa pa kwibapokolola kikyangye kumwekapo kala ne. (Yelemiya 25:32, 33) Baibolo wamba’mba ikekala “nkondo ya aja juba jikatampe ja Lesa Wabulume Bonse.”
2. MAMBO KA LESA O AKEVWANGILAMO?
Yehoba wakambizha bonse bamupopwela kwikala ba mutende ne kutemwa balwanyi babo. (Mika 4:1-3; Mateo 5:43, 44; 26:52) Onkao mambo, kechi bakezhikijila na mata kimye kikebalukuka balwanyi babo ne. Inge Lesa wabula kwibapokolola, bakebavizha. Kino kyakonsha kusebanya jizhina ja Yehoba. Kabiji inge balwanyi bavizha bantu ba Lesa, kino kikamwesha kuba’mba Yehoba wakanama, wauba nshiji bantu banji kabiji wakankalwa kwibakwasha. Kino kuba kyaubiwa ne.—Salamo 37:28, 29.
Lesa kechi ukeba konauna muntu nangwa umotu ne, o ene mambo o ebajimwinako pa kyo akoba kulutwe. (2 Petelo 3:9) Mashimikila a mu Baibolo etulengela kuyuka byo akambwile balwanyi balukukile bantu banji kala. (2 Bamfumu 19:35) Kabiji Baibolo witubula kuba’mba kulutwe Satana ne bantu banji byo bakakeba kulukuka bantu ba Lesa, Yehoba ukebavizha. Mambo a Lesa aambijile jimo kala amba Yehoba ukonauna babi. (Byambo bya Mana 2:21, 22; 2 Tesalonika 1:6-9) A kya kimye byo kikafika, bansatuki popo bakayuka’mba bakolomona Wabulume bonse.—Ezikyo 38:21-23.
3. ÑANYI BINTU BYA MYAKA INO NKONDO BYO IKALETA?
Nkondo ya Amagedonyi ikapulusha bantu bavula bingi. Kabiji ikaleta mutende pano pa ntanda ponse.—Lumwekesho 21:3, 4.
Buku wa Lumwekesho waamba’mba, “jibumba jikatampe” ja bantu bakapuluka ino nkondo. (Lumwekesho 7:9, 14) Na lutangijilo lwa Lesa, bakapuluka bakamukwashako kwalula ino ntanda kwikala jibiji Paladisa kwesakana na mwine Yehoba byo akebelenga ku ntendekelo.
Nanchi twayuka juba jikalukukwa bantu ba Lesa nyi?
[Tubyambo twa mushi]
a Mapunzha avula ayukanyikilwa ku nkondo. Kyakumwenako, muzhi wa Hiroshima mu Japan wayukanyikilwa ku konaunwa na bomba, lelo jino, jino jizhina jituvululamo bono bwa mabomba ashinta.
b Kwingijisha mabomba ashinta mu malwañano epaya bantu bavula ke jishinda jimo makafulumende jo engijisha pa kukeba kuzhiisha bupopweshi ne mishobo imo. Kala mu Russia makafulumende atomeshe mema ku mabula ba mu bupopweshi bwapusana pusana. Monai mutwe wa kuba’mba: “Abantu ba Mutende Baisosela Ifyo Basuminamo” mu Kyamba kya Usopa kya Kibemba kya May 1, 2011, kinembwa na Bakamonyi ba kwa Yehoba.
[Kipikichala pa peja 6]
Yehoba Lesa wazhikijile bantu banji ba kala
[Kipikichala pa peja 7]
Pa nkondo ya Amagedonyi, Yehoba ukazhikijila bantu banji jikwabo