Nanchi Nkondo ya Amagedonyi Ikatendekela mu Isalela Nyi?—Baibolo Waambapo’mba Ka?

Baibolo waamba pa Amagedonyi’mba kechi nkondo yo bakalwilatu ku mpunzha imo ne. Pakuba ikekala nkondo ya ntanda yonse ikalwa makafulumende a bantu onse na Lesa.

• “Byambo bya mipashi bifuma ku bandemona . . . ne kuya ku bamfumu ba pano pa ntanda ponse mu kwibakonkenya pamo ku nkondo ya aja juba jikatampe ja Lesa wa Bulume Bonse. . . . Bebakonkenye pamo ku mpunzha itelwa mu Kihebelu amba Amagedonyi.”—Lumwekesho 16:14, 16.

Kyambo kya Amagedonyi kyafuma ku kyambo kya Kihebelu kya Har Meghiddohnʹ, kilumbulula’mba “Mutumba wa Megido.” Kala Megido wajinga muzhi mu bena Isalela. Akino kyo kilengela bantu bamo kulanguluka’mba Amagedonyi bakeilwilatu mu kibunji kya Isalela. Pano bino, mpunzha ya Megido nangwa mpunzhatu ikwabo iji ku Middle East kechi yabaya ya kuba’mba yapwizha pamo “bamfumu ba pano pa ntanda ponse” ne bashilikale babo ne.

Buku wa Lumwekesho bamunembele “mu bimwesho” nangwa’mba ñambilo ya kifwanyikizho. (Lumwekesho 1:1) Amagedonyi kechi ibena kwimenako mpunzha yonkaye yo tumona na meso ne. Pakuba nkondo ya Amagedonyi ke bintu bikobiwa kimye bisaka bya bantu byonse kyo bakebipwizha pamo japelako kulwa ne Lesa.—Lumwekesho 19:11-16, 19-21.