Amagedonyi Bamo Bamba’mba Yo I Ka?

“Kabiji bamfumu bebakonkenye pamo ku mpunzha itelwa mu Kihebelu amba Amagedonyi.”—LUMWEKESHO 16:16.

INGE mwaumvwa kyambo kya “Amagedonyi”, mulanguluka’mba ki ka? Mwafwainwa muvuluka binkunka bikatampe byamwekele kala. Nangwa kya kuba kino kyambo kitanwamotu jimo mu Baibolo, bekingijisha bingi bantangi babupopweshi ne mu mapepala a byambo.

Nanchi byamba bantu pa Amagedonyi biswañana na Baibolo nyi? Kyanema bingi kuyuka mukumbu. Mambo ka? Mambo kuyuka bukine pa Amagedonyi kwakonsha kwimulengela kubula kwikala na moyo wa kuchina bikamweka kulutwe kabiji kwakunza ne byo mulanguluka pe Lesa.

Twayai twisambe pa mepuzho asatu alondelapo ne kwesakanya byamba bantu pa Amagedonyi na bifunjisha Baibolo.

1. NANCHI BANTU BO BAKALETA AMAGEDONYI?

Banemba mapepala a byambo ne bapesapesa javula balumbulula kyambo kya “Amagedonyi” amba bya malwa bileta bantu. Nabiji Nkondo Itanshi ne ya Kibiji ya Ntanda Yonse beitela’mba Amagedonyi. Panyuma ya ano makondo bantu bavula baakaminwe kuba’mba kyalo kya United States ne kya Soviet Union bakalwa nkondo na mabomba ashinta. Banemba mapepala a byambo ne mazubo a mabilabila batelele ino nkondo amba, “Amagedonyi ya mabomba ashinta.” Kabiji lelo jino bapesapesa bya kupesapesa baakamwa kuba’mba kutamisha mwela kukalengela ntanda kutama ne kuleta “kinkunkwila kya Amagedonyi.”

Mwatala byo bamba: Balanguluka’mba bantu bakonsha kuzhikijila ntanda ne abo bene ku byakonsha kumweka kulutwe. Kabiji amba bantangi ba mu makafulumende inge babula kutako maana, ino ntanda ikonaika.

Bifunjisha Baibolo: Lesa kechi ukaleka bantu baonauna ntanda ne. Baibolo itubula’mba Yehobaa kechi walengele ntanda amba ikale “yavulañanatu ne.” Wiilengele yafwainwa “kwikalapo bilengwa byanji.” (Isaya 45:18) Lesa kechi ukaleka bantu baonauna ntanda ne, ukonauna “babena konauna ntanda.”—Lumwekesho 11:18.

2. NANCHI AMAGEDONYI IKEYATU INE NYI?

Banemba mapepala a byambo bengijisha kyambo kya “Amagedonyi” pa kwamba pa binkunka biyakotu bine. Nabiji pa kyamwekele mu kyalo kya Haiti mu 2010 baambilenga’mba, “‘Amagedonyi’ yamweka mu Haiti.” Baambilenga bino mambo kitentanshi kyaipaile bantu bavula bingi kabiji bishimikwa byavula byakundukile. Banemba mapepala a byambo ne bakopa mafilimu bengijisha kino kyambo ku bya malwa byamwekele kala ne ku bintu byo bachina’mba bikamweka kulutwe na lwendo. Kya kumwenako, beingijisha kyambo kya “Amagedonyi” pa kwamba pa bintu bya mwiulu byo balanguluka’mba bikaponena pano pa ntanda.

Mwatala byo bamba: Balanguluka’mba Amagedonyi akekala mapuso akepaya bantu babula mambo. Kechi mwakonsha kwizhikijila ne.

Bifunjisha Baibolo: Amagedonyi kechi mapuso ikazhiya bantu ne. Nkondo ya Amagedonyi ikavizhatu babi kwapwa. Baibolo itulaya kuba’mba katatakatu “babi bakekala ke kafwako: Ee kine, obewa ukatajishanga pantu panji kabiji aye ukekala ke kafwapo.”—Salamo 37:10.

3. NANCHI PA AMAGEDONYI LESA UKONAUNA NTANDA NYI?

Bantu ba mu bupopweshi bavula baitabila kuba’mba kukekala malwañano akapelako pakachi ka bawama ne babi ao akonauna ntanda. Kipamo kimo kya mu United States panyuma ya kwipuzha bantu bavula kyataine kuba’mba pepi na kichika baitabila kuba’mba ntanda ikapwa pa “nkondo ya Amagedonyi.” (Princeton Survey Research Associates).

Mwatala byo bamba: Balanguluka’mba bantu kechi bebalengele kuba’mba bakekalenga myaka ne myaka ne, kabiji ntanda nayo kechi yakonsha kwikala myaka ne myaka ne. Bamba’mba Lesa walengele bantu kuba’mba bakafwenga.

Bifunjisha Baibolo: Baibolo waambatu patoka’mba Lesa “ye waajile kitendekesho kya ntanda, Amba kechi itenkene ne, myaka ne myaka.” (Salamo 104:5) Baibolo waamba pa bantu bakekala pano pa ntanda amba: “Baoloka bakaswana ntanda, Ne kwikalamo myaka ne myaka.”—Salamo 37:29.

Bifunjisha Baibolo kechi biswañana na byamba bantu pa Amagedonyi ne. Pano, nanchi bukine bo bwepi?

[Tubyambo twa mushi]