Mambo ka o Kyatamina Kupopwela Mipashi?

Ba Barbaraa kufumatu ku bwanyike bamonanga binzhimwenzhimwe ne kumvwa mawi, kino kibalengejile kushiinwa’mba besamba na balongo babo bafwile kala. Abo ne bamwatawabo ba Joachim batanganga mabuku pa bingelekezha kya kuba batendekele ne kubuka. Kino kibalengejile kumonanga mali avula bingi. Juba jimo kipongo kibabujile kuba’mba bambanzhi babena kwiya, ne byo bafwainwa kwizhikijila.

NANGWA kya kuba kuketekela mu bingelekezha bavula bekumona kuba’mba kushajilamo, bino bavula ano moba batemwa bingi kupanda bya kupandapanda. Bamo bavwala mikano, baponga, nangwa kwisamba na mipashi kuba’mba ibabule mashuko ne bya kwizhikijila ku byatama. Kibaba kimo kyajinga mu magazini wa mu German kya kuba’mba “Laptop and Lucifer” kyaambile’mba: “Intaneti ibena kulengela bantu kutemwa bingi bulozhi.”

Nanchi mwayuka kuba’mba Baibolo waambapo pa kupopwela mipashi nyi? Mwakonsha kukumya bingi pa kumvwa byo yaambapo.

Byaamba Baibolo pa Kupopwela Mipashi

Lesa mu mizhilo wakambizhe bantu banji amba: “Kechi mukatanwe mukachi kenu nangwa umo ukasoka mwananji wa mulume nangwa wa mukazhi ke mulambo wa kusoka ne, nangwa umo ubuka ne, nangwa ñanga wa kilola ne, nangwa ñanga wa kisoko ne, nangwa upanda bwanga ne, nangwa ñanga wa bima ne, nangwa wisamba na bapashi ne, nangwa wiyuka na bapashi ne, nangwa wipuzha bafu ne. Mambo bonse boba bino bintu bo ba bunya kwi Yehoba.” (Mpitulukilo ya mu mizhilo 18:10-12) Pano mambo ka Yehoba o akainya kupopwela mipashi?

Byonka byo twakumvwa mu jishimikila jiji kuntendekelo ya kino kibaba, bavula baitabila’mba besamba na bafwa kabiji ne kuba’mba bafwa bo bakwashañana pa kuponga. Bino byo baitabilamo kaozhi kamo na byo bafunjisha mu bupopweshi bwavula kuba’mba bafwa baya ku mpunzha ya mipashi. Bino kyapusana bingi na byaamba Baibolo amba: “Bafu kafwako kyo bayuka ne.” (Musapwishi 9:5) Baibolo waamba’mba bafwa baji nobe baji mu tulo twine, kafwako kyo bayuka ne.b (Mateo 9:18, 24; Yoano 11:11-14) Byo kiji bino, mwakonsha kushikisha’mba: Pano kiji byepi, mambo bantu bamo baamba’mba besamba na bya kumashika? Pano bañanyi bo besamba nabo?

Kwisamba na Mipashi

Mashimikila a mu Mambo Awama amwesha’mba Yesu byo ajinga pano pa ntanda wisambanga na mipashi. Pa Mako 1:23, 24 tutangapo’mba, “ndemona” waambijile Yesu amba: “Nemuyukishatu bulongo.” Ne anweba bandemona bemuyuka. Pano nga anweba mwibayuka nyi?

Lesa saka akyangye kulenga bantu, walengele bilengwa bya mupashi nangwa’mba bamalaika bavula. (Yoba 38:4-7) Bamalaika baji na bumi bwakila bwa bantu. (Bahebelu 2:6, 7) Baji na bulume bukatampe ne maana, kabiji bebalengele kuba kyaswa muchima wa Lesa. Nyimbi wa masalamo waimbile’mba: “Mutakaike Yehoba, anweba bamalaika banji, Anweba ba bulume bwine bukatampe, mulama byambo byanji, Anweba mumvwa jiwi ja mambo anji.”—Salamo 103:20.

Baibolo waamba’mba, pa kyo kya kimye bamalaika bamo batendekele kwisamba na bantu kwa kubula kwibatuma. Mambo ka o baubilanga byobyo? Malaika mutanshi kuba bino waingijishe bujimbijimbi pa kongola bantu batanshi, ba Adama ne Evwa, kwibafumya kwi Lesa, Mulenga wabo. Kuba bino ko kwamulengejile kwialula aye mwine ke Satana Diabola, waluntepentepe nangwa’mba wamilengulwila.—Ntendekelo 3:1-6.

Mu kuya kwa kimye bamalaika bakwabo bayile ne “kusha mapunzha abo awama” ne kwialula bumuntu, basongola ne banabakazhi balambile bingi pano pa ntanda. (Yuda 6; Ntendekelo 6:1, 2) Bano bamalaika basatukile ne baana bo basemene bajinga bitonzhi bamanyikile bingi bantu, bobalengejile pano pa ntanda ‘kuyula bukapondo.’ Mwafwainwa mwijiyuka jino jishimikila ja mu Baibolo jaamba pe Lesa byo apwishishe bukapondo ne kuzhiisha banguba bibi na Muyulo mu moba ajingako Nowa.—Ntendekelo 6:3, 4, 11-13.

Uno muyulo walengejile bino bilengwa bya mupashi kuvula mibiji ya bumuntu ne kubwela mwiulu. Bino Mulenga kechi wibaswishishe kutwela mu “mapunzha” mo baikalanga kala ne. Wibalamina mu mpunzha iji nobe “mu bimbo bya mfishi ine ikatampe.” (2 Petelo 2:4, 5) Baibolo utela bano bamalaika basatukile’mba “bandemona.” (Yakoba 2:19) Bo batundaika bulozhi.

Bikeba Bandemona

Kitanshi, bandemona kyo besambila na bantu ke kukeba kwibalekesha kupopwela Lesa wa kine, Yehoba. Bulume buji na bapopwela mipashi bulabikatu bantu ne kwibalengela kubula kufunda bya kine pe Lesa ne kwikala na bulunda bwawama ne aye.

Kya bubiji, bandemona kyobaimanapo twakonsha kwikiyukila ku byaubile Satana, ntangi wabo kimye kyo asekelenga Yesu. Satana wamwesheshe Yesu “bufumu bonse bwa pano pa ntanda ne lukumo lwabo.” Satana wakebelenga ka? Waambijile Yesu amba: “Umfukamine ne kumpopwela.” Satana ne bandemona bakeba kwibapopwela. Bino Yesu wakainetu nsalansala kusatukila Lesa ne kusha bupopweshi bwa kine.—Mateo 4:8-10.

Lelo jino bandemona kechi javula jo beseka bantu byonka byo kyajinga kwi Yesu ne. Nangwa byonkabyo, bakeba kongola babula kujimuka na bintu bimweka nobe bijitu bulongo nabiji kubukisha, kulotolola biloto, kwingijisha bisoko, ne lubuko. Kange mongolwe na bino bintu ne. Kechi mashinda ajitu bulongo a kuyukilamo byafyamika ne. Bandemona balengela bantu kutako muchima ku bino bintu na mulanguluko wa kwibalekesha kupopwela Yehoba. Inge bakankalwa kwibongola, bandemona bamanyika bonse baji mu kifunda kyabo. Umvwe byo byo mubena kupitamo, mwafwainwa kuba byepi pa kuba’mba mukasuluke ne kufumamo?

Bya Kukasuluka ku Bandemona

Kange mujimbaikwe ne, bandemona besamba na bantu balwanyi ba Lesa babena kupembelela konaunwa. (Yuda 6) Bansatuki babubela bebepekezha kumweka nobe ye iye muntu wafwile. Mwakonsha kuba byepi inge mwayuka’mba mulunda nenu nsatuki ubena kukebatu kwimongola? Mwakonsha kuba byepi inge mwayuka kuba’mba ye mwichina nanji kala wapela bingi ku maulu? Kwipapika na bandemona ke kwitwezha mu kizumba kyatama bingi. Mwafwainwa kwibikako pa kuba’mba mukasuluke ku bandemona. Mwafwainwa kuba byepi?

Byo bafunjile byaamba Binembelo pa kupopwela mipashi, bangikazhi ba mu Efisesa basokele mabuku abo a buñanga nangwa kya kuba ajinga bingi na mutengo. Beasokele “ne bonse saka bamonako.” (Byubilo 19:19, 20) Lelo jino bintu byalamata ku kupopwela mipashi kechi mabuku, mikano, ne buñangatu ne, bino bimo bitanwa ne pa biñambañamba bya malaichi. Chinuzhukainga byonse byakunza ku kupopwela mipashi.

Bamulume ne mukazhi batongolwa kuntendekelo ya kino kibaba, bisoko byabo bibabujile’mba ku nzubo kwabo kubena kwiya bantu bakanama ne kuba’mba kechi bafwainwa kuteleka ku byo basakwambanga ne. Ba Connie ne ba Gudrun, Bakamonyi ba kwa Yehoba byo bafikile pa nzubo ne kwamba’mba babena kukeba kwibabulako mambo awama a Lesa, ba Joachim ne ba Barbara baswile kuteleka. Mwisambo wabo wafikile pa kupopwela mipashi, ba Connie ne ba Gudrun balumbulwile bukine bwa mu Binembelo bwaamba pa uno mutwe. Batendekele kwisamba nabo javula pa Baibolo.

Ba Joachim ne ba Barbara bafuukwilepo kuleka kwipapika na bandemona. Bakamonyi bebalumbulwijile kuba’mba bandemona basa kuzhingila bingi na kyo basalapo. Ne kya kine, ba Joachim ne ba Barbara batendekele kwibakatazha bingi ku bandemona. Pa moba acheche kechi betulalanga ne, bintu byawaminekotu byo bavilukijile mu nzubo yakatataka. Mu byonse byatama byo bapichilemo, bano bamulume ne mukazhi baketekejile mu byambo biji pa Filipai 4:13 bya kuba’mba: “Mambo mu bintu byonse nji na ngovu ya kwibyuba kupichila mwi Lesa umpa bulume.” Yehoba wibapesheshe pa kwibikako kwabo, kabiji bandemona bekilekele kwibakabisha. Lelo jino, ba Joachim ne ba Barbara babena kwingijila Yehoba Lesa wa kine na lusekelo.

Binembelo byatundaika bonse bakeba Yehoba kwibapesha kuba’mba: “Nekenenainga Lesa; pakuba Diabola mukanyai ne aye ukemunyema. Fwenyai kwipi ne Lesa, naye ukafwenya kwipi ne anweba.” (Yakoba 4:7, 8) Yehoba Lesa ukebesha bingi kwimukwasha kukasuluka ku bandemona, inge mukeba. Inge bavuluka kimye kyo basankijilengapo kupopwela mipashi, ba Joachim ne ba Barbara betabizha kufuma panshi ya muchima byambo biji pa Salamo 121:2 bya kuba’mba: “Bukwasho bwami bufuma kwi Yehoba, Yenka walengele jiulu ne ntanda.”

[Tubyambo twa mushi]

[Mabulañano pa peja 11]

Kupopwela mipashi kulengela bantu kubula kwikala na bulunda bwawama ne Lesa

[Mabulañano pa peja 12]

“Fwenyai kwipi ne Lesa, naye ukafwenya kwipi ne anweba.”—YAKOBA 4:8.