Kuji Umvwa Milombelo Nyi?

“Nazhinaukanga’mba kana Lesa koaji nyi? Najinga na luketekelo lwa kuba’mba kuji umvwa, pano bino nazhinaukanga. Kechi najinga na lusekelo ne, kabiji kechi nayukile kyo nafwainwe kuba mu bwikalo ne. Kechi najinga na lusekelo ne. Nachinanga kuketekela mwi Lesa mambo nalangulukanga’mba bantu bapelelwa bo baketekela mwi Lesa.”—PATRICIA,a IRELAND.

NANCHI mwakyumvwapo kala biumvwine ba Patricia nyi? Abya mulomba nangwa kya kuba muzhinauka inge Lesa koaji nyi? Inge byobyo kiji, kechi yenu bonka ne. Monai ano masawakya alondelapo.

◼ Kupesapesa kwaubiwe kumwesha’mba pa bena Britain 2,200 bo baipwizhe, nobe 500 bo baitabila’mba Lesa koaji walengele ntanda kabiji umvwa milombelo. Abo bashala kukila pa 1,200 bakaine’mba Lesa ufwako, pano bino saka balomba ja kamo kamo.

◼ Pa bantu 10,000 ba mu byalo byapusana pusana bakana’mba Lesa ufwako, bantu nobe 3000 balomba kwi Lesa.

Mambo ka o Bazhinaukila?

Mwina Britain umo aye Allan, waambile’mba: “Naambanga’mba kechi naitabila mwi Lesa ne, mambo nalangulukanga’mba bupopweshi bwaikelakotu kutangijila bantu ne kulenga mali. Kabiji nalangulukanga’mba, umvwe Lesa koaji inge nshiji ifwako. Kimo kimye naikalangatu nzoo ‘nakwamba mu muchima.’ Neipuzhanga’mba: ‘Naishileko byepi?’”

Muntu ulanguluka bino wikala na bimulengela kuzhinauka inge milombelo ikumbulwa. Javula, luzhinauko lwiya na mambo a mepuzho abula kukumbulwa nabiji a kuba’mba:

◼ Nanchi Mulenga koaji nyi?

◼ Mambo ka bupopweshi kyo butundaikila bubi?

◼ Mambo ka Lesa o aswishisha buyanji?

Inge mwayuka mikumbu ya ano mepuzho, nanchi mwakonsha kusumininwanga pa kulomba nyi?

[Tubyambo twa mushi]