Bantu Bepuzha’mba . . .

Nanchi Inge Napepa Fwanka, Nalenga Mambo kwi Lesa Nyi?

▪ Bantu bamo bakonsha kwipuzha buno bwipuzho mambo kafwako muzhilo mu Baibolo wakanya kupepa fwanka. Nanchi kino kibena kulumbulula’mba kyakatazha kuyuka bikeba Lesa pa kino nyi? Ine.

Baibolo waamba’mba: “Binembelo byonse byanembelwe na lutangijilo lwa mupashi wa Lesa.” (2 Timoti 3:16) Mu Binembelo muji mafunde ne byambo bimwesha kuba’mba Lesa ukeba’mba tulamenga bumi bwetu bulongo. Patanshi twayai tumone bapesa bya kupesapesa byo batana pa fwanka byo onauna bumi. Bino pa tubwele tumone byaamba Baibolo.

Fwanka onauna mubiji kabiji mufuma lufu lwa kwikebela. Mu United States pa bantu batanu bafwa, umo ufwa ku fwanka. Kipamo kitala pa bizhima kyapaine sawakya wa kuba’mba mu kyokya kyalo, fwanka wipaya bantu bavula kukila bafwa na “maalwa, bizhima, kwikujika, mapuso a pa mukwakwa, ne ku kikola kya AIDS.” (National Institute on Drug Abuse)

Bapepa fwanka baletelela bakwabo. Bwishi bwa fwanka nangwa wakaulapotu bucheche ukolwa. Bantu bavula babula kupepa bakaula bwishi bwa fwanka ubena kupepa bakwabo bwakonsha kwibalengela kwikala na kabe ku mapwapwa nangwa bikola bya muchima. Katataka papo badokotala batana kikwabo kya busatu kileta bikola bifuma ku fwanka. Mula wa bwishi bwa fwanka ushala ku bivwalo, pa mikeka, ne ku bintu bikwabotu. Mula wa bwishi bwa fwanka uleta bikola kikatakata ku baana ba bacheche ne kwibalengela kubula kufunda bintu bukiji.

Fwanka uteka bantu buzha. Upepa fwanka muzha ku uno muteeto onauna mubiji. Bapesa bya kupesapesa bamba’mba mu fwanka muji bulembe bulengela kuleka fwanka kukatazha.

Mafunde a mu Baibolo aambapo’mba ka pa bino bishinka? Akimonai bino bishinka byalondelapo:

Lesa ukeba’mba tunemekenga bumi. Mu Mizhilo Lesa yo apele mukoka wa bena Isalela waambile’mba bonse bakeba kutokesha Lesa ku muchima bafwainwa kunemeka bumi. (Mpitulukilo ya mu mizhilo 5:17) Bena Isalela bebakambizhe kuzhokolosha kalupango pa musemi wa nzubo. Mambo ka? Mambo mazubo abo ajinga na misemi yapapakana kabiji popo bakokolokelanga. Kano kalupango kazhikijilanga kisemi ne bantu bakwabo, kuchina kupona ne kwikozha nangwa kufwa. (Mpitulukilo ya mu mizhilo 22:8) Kabiji bena Isalela batangako muchima ku bilelwa byabo kuchina’mba byakakozha bantu. (Kulupuka 21:28, 29) Upepa fwanka ulala mafunde paimena ino mizhilo. Onauna mubiji wanji mwine, kabiji uletelela ne bakwabo na fwanka ye a pepa.

Lesa ukeba’mba tumutemwe ne kutemwa bakwetu. Yesu Kilishitu waambile’mba baana banji ba bwanga bafwainwa kukokelanga mikambizho ibiji ikatampe. Bafwainwa kutemwa Lesa na muchima yense, na mweo yense, na maana onse, ne na bulume bwabo bonse, ne kutemwa bakwabo byonka byo betemwa abo bene. (Mako 12:28-31) Byo kiji kuba’mba bumi bupe bwafuma kwi Lesa, muntu upepa fwanka kechi wanemeka bumi ne, kabiji kechi watemwa Lesa ne. (Byubilo 17:26-28) Uji na uno muteeto uletela bakwabo bikola byatama bingi, onkao mambo butemwe bwanji bwa kutemwa bakwabo bwatu.

Lesa ukeba’mba tuchinuzhukenga byubilo byatama. Baibolo wakambizha bena Kilishitu bonse amba “twitokeshe ku bubipisho bonse bwa mubiji ne bwa mu muchima.” (2 Kolinda 7:1) Fwanka ubipisha muntu. Bakeba kuleka kupepa fwanka pa kuba’mba batokeshe Lesa ku muchima kibakatazha bingi. Bino Lesa wibakwasha kukasuluka mu buno buzha bubipisha mubiji.