Fundainga Mambo a Lesa
Ki ka Kikamweka mu Juba ja Kije?
Mu kino kibaba muji mepuzho kampe o mwakipuzhapo kala kabiji kyamwesha ne po mwakonsha kutana mikumbu mu Baibolo wenu. Bakamonyi ba kwa Yehoba bakatemwa bingi kwisamba nenu mikumbu ya ano mepuzho.
1. Juba ja Kije jo jika?
Byonka byo bamwesha pa kipikichala kiji ku kilujo, bantu bavula balanguluka’mba pa Juba ja Kije, myeo ya bavula bakeileta ku kipona kya Lesa na kwibachibila mambo abo kwesakana na byubilo byabo, bamo bakebapa bumi mwiulu bakwabo bakebasoka mu mujilo wa helo myaka ne myaka. Pakuba Baibolo wamba’mba, Juba ja Kije jikekelako kupokolola bantu ku nshiji. (Salamo 96:13) Lesa watongola Yesu kwikala Mutonyi ukachibila bantu mambo monka mo aolokela.—Tangai Isaya 11:1-5; Byubilo 17:31.
2. Juba ja Kije jikabwezha byepi buchibamambo bwaoloka?
Mwanamulume mutanshi Adama byo asatukijile Lesa kya nshiji waletelejile baana banji bundengamambo, buyanji ne lufu. (Loma 5:12) Pa kuleta buchibamambo bwaoloka Lesa ukasangula bantu bavula bafwa. Buku wa Lumwekesho wamba’mba, bino byonse bikobiwa mu bukalama bwa kwa Kilishitu Yesu bwa myaka kiumbi kimo.—Tangai Lumwekesho 20:4, 11, 12.
Aba bakasangulwa bakebachibila mambo, kechi mambo o baubanga saka bakyangye kufwa ne, bino na mambo a byo bakobanga kimye kyo bakazhikula “mivungilo” yatongolwa mu kitango 20 kya buku wa Lumwekesho. (Loma 6:7) Mutumwa Paulo waambile’mba, “baoloka ne babula koloka” bakasangulwa ne kwikala na kimye kya kufunda pe Lesa.—Tangai Byubilo 24:15.
3. Juba ja Kije jikaleta ka?
Aba bafwile kwakubula kuyuka Yehoba Lesa ne kumwingijila bakekala na kimye kya kupimpula ne kuba byawama. Inge bapimpula ne kuba byawama lusanguko lwabo lukekala ke “lusanguko lwa ku bumi.” Bamo bakasangulwa, kechi bakakeba kufunda pe Yehoba ne. Lusanguko lwabo lukekala lwa “kusangukila ku kije.”—Tangai Yoano 5:28, 29; Isaya 26:10; 65:20.
Pa kupwa kwa myaka kiumbi kimo itelwa’mba Juba ja Kije, Yehoba ukabwezhezha bantu balukokelo bulumbuluke. (1 Kolinda 15:24-28) Luno ke luketekelo lwawama bingi lubena kupembelela bantu balukokelo! Mu lweseko lukapelako, Lesa ukakasulula Satana Diabola kufuma mu kalengwa mo akekala myaka kiumbi kimo. Satana ukeseka jibiji kujimbaika bantu kuba’mba basatukile Yehoba, bino aba bakabula kumukokela Satana bakekala na bumi pano pa ntanda myaka ne myaka.—Tangai Isaya 25:8; Lumwekesho 20:7-9.
4. Ñanyi juba jikwabo ja kije jikaletela bantu byawama?
Baibolo waingijisha byambo bya kuba’mba “juba ja kije” pa kwamba pa bintu bikobiwa ku mpelo ya buno bwikalo. Jino juba ja kije jikekala ja kubazhimukila nobe juba ja muyulo wa Nowa, jaonawine bantu babi. Kyawamakotu ke kya kuba’mba lonaiko lwa bantu “babula kwakamwa Lesa” lukaleta ntanda ipya “mukekala bololoke.”—Tangai 2 Petelo 3:6, 7, 13.
Umvwe mukeba kuyukilapo byavula, monai mapa 213-215 mu uno buku Nanchi Baibolo Kine Ufunjisha’mba ka? wanembwa na Bakamonyi ba kwa Yehoba.
[Kipikichala pa peja 16]
Kipikichala kya “Kije Kikapelako” kya kwa Gustave Doré, 1832-1883
[Byambo bya Muntu Ungi 16]
Engravings by Doré