Kufuma mu Butala Bwetu
Nayilenga na Bakañenda
“KECHI nakonsha kusapwila ku nzubo ku nzubo ne!” Javula bafunda Baibolo bakatataka balanguluka’mba kechi bakonsha kusapwila bantu bo babula kuyuka ne. Pano bino, abye byambo byaambile ñambi wayuka kwamba bulongo kabiji ufunjisha Baibolo watelwanga’mba kañenda.
Bavula batanganga magazini watelwanga’mba Zion’s Watch Tower bafumine mu machechi abo, bakebelenga kutendeka kupwanañana na bakwabo bajinga na kilaka kya kukeba kuyuka bukine bwa mu Baibolo. Uno magazini watundaikile bantu bamutangilenga kukeba bantu bakwabo bajinga na lwitabilo ne kupwila pamo na kufunda Baibolo. Kutendeka mu 1894, ba Watch Tower Society batumine bakulumpe benda kuya na kumona mabumba akebewenga kwiafwakesha. Bano bakulumpe benda batendekele kutelwa’mba bakañenda. Bano banabalume bayukile kufunjisha kabiji baingilanga na ngovu, bebatongolanga kwikala bakañenda inge baji na ñambilo yawama, bukimote, kuyuka bulongo Baibolo, busendwe bwa kufunjisha, ne kuketekela mu bukuzhi. Umvwe bafwakesha jibumba, baikalangatu najo juba jimo nangwa abiji. Kimye kitanshi Bafunda Baibolo bavula kyo bayanga mu mwingilo wa kusapwila ke kimye kyo basampanyanga tupepala twa kwichilapo bantu ku jashi ja mvula bantu ja kwa kañenda. Byo apwishishe kwamba jashi mabanga mu sukulu, Hugo Riemer, waishile kwikala umo wa mu Jibumba Jitangijila, waikele bufuku bonse na kukumbula mepuzho a mu Baibolo kufikizha ne pakachi ka bilo. Nangwa kya kuba Hugo Riemer wakokele bingi, watemenwe bingi ne kwamba’mba kupwila “kwakuwama bingi.”
Kyamba kya Usopa kyaambile amba, ‘Kine kintu bakañenda kyo bafwakashishanga, ke kukosesha bisemi biji na lwitabilo.’ Bafunda Baibolo baikalanga mu mapunzha a pa bwipi, baiyanga na kuteleka ku majashi ne ku bipungu bya mepuzho ne mikumbu. Bena Kilishitu baitangako ne benyi mu mazubo abo. Saka akijitu nsongwakazhi, Maude Abbott watainwe ku jashi jajingako lukelo kabiji panyuma ya jashi bonse baikele ku tebulu mukatampe pa lubanza na kuja. Uno nsongwakazhi waambile amba: “Kwajinga kajo kawama bingi. Nyama ya nkumba, banzolo ne bashinkwa bapusana pusana. Bonse bajiile ne kwikuta, kabiji mute twapwijile na kuteleka ku jashi jikwabo.” Pano bino, waambile’mba: “Pa kikye kimye bavula bakunukilenga bingi.” Benjamin Barton wabanjile mu mwingilo wa bukañenda waambile’mba: ‘Umvwe kya kuba’mba najanga kajo konse ka mafuta mafuta, inge nafwile kala.’ Nkalata yafumine ku Jibumba Jitangijila yatundaikile banyenga bakishinka kuba’mba kyakonsha kuwama kunengezhezha bakañenda “kajo kabula mafuta” ne “kwibashilako kimye kya kulaala.”
Bano bakañenda bafunjishanga bingi bulongo kabiji baingijishanga bipikichala, byakumwenako, ne bintutu bikwabo byo bajinga nabyo bibakwashanga kufunjisha bulongo. Majashi aambanga mulongo R.H Barber “awamanga bingi mambo wiambanga mu jishinda jawama.” W. J. Thorn wajinga na muchima wa bunsemi, waambangatu “nobe mushakulu mu moba a kala.” Juba jimo saka tuji mu motoka, ponkapotu Shield Toutjian wabijikile amba: “Imanai!” Waikijilemo mu motoka, wayokola maluba, watendeka ne kufunjisha bakwabo pa bilengwa bya Yehoba.
Mwingilo wa bukañenda waletelenga bingi makatazho, kikatakata ku boba bakomene. Nangwa byonkabyo, ku bamo, lukatazho lo bajinga nalo ke lupimpu lwaubiwe mu mwingilo wabo. Bafwainwe kutendeka kusapwila ku nzubo ku nzubo. Kyamba kya Usopa kya March 15, 1924 kyaambile amba, “mwingilo mukatampe” wa bena Kilishitu ba kine ke wa “kusapwila bufumu. Uno ye mwingilo ye batumina bakañenda.”
Kyamweka bakañenda bavula bazhingijile na mambo a luno lupimpu, mambo balekele mwingilo wa kwenda, bamo batendekele ne kulenga mabumba abo. Robie D. Adkins washimikizhe amba kañenda umo waambanga bulongo majashi wajilakene amba: “Nayukatu kwamba pa mutuntamo, kechi nakonsha kuya na kusapwila ku nzubo ku nzubo ne!” Mulongo Adkins uvuluka’mba: “Uno kañenda namumwene pa kushonkena kwajingako mu 1924 mu muzhi wa Columbus, Ohio. Waimene munshi ya kichi bunke bwanji saka aji na bulanda ne binyenge pa balongo bavula bajinga na lusekelo. Kufumatu kyokya kimye, kechi namumwenepo jibiji ne. Palutwe kacheche, wafumine mu jibumba ja Yehoba.” Pakuba “balongo bavula bajinga na lusekelo, bapichilenga saka basenda mabuku kuya mu myotoka yabo,” kampe bajinga na kizaku kya kusapwila ku nzubo ku nzubo.—Byu. 20:20, 21.
Bakañenda bavula basapwilanga na kizaku nangwa kya kuba kimye kimo baikalanga na moyo wa kusapwila ku nzubo ku nzubo byonka byajinga boba bo bafunjishanga. Pa mambo a kusapwila ku nzubo ku nzubo, kañenda mwina German aye Maxwell G. Friend, wanembele’mba: “Uno mwingilo wa ku nzubo ku nzubo walengelanga mwingilo wa bukañenda kuwama.” Kañenda, aye John A. Bohnet waambile’mba balongo bavula baswile kwingila uno mwingilo wa kusapwila Bufumu. Monka mo aambijile, bavula “baingijilenga uno mwingilo na kizaku kikatampe.”
Pa myaka yavula, bano balongo benda bakwasha bingi balongo ne banyenga. Kamonyi waingila pa myaka yavula aye Norman Larson waambile’mba: “Nangwa kya kuba najinga mwanyike, bino namwene kuba’mba mwingilo wa bakañenda wanemene bingi kabiji wakwashanga balongo. Bankwashishe bingi kwikala na byubilo byawama.” Kufika ne lelo jino, bano bakalama benda bakishinka kabiji baji na muchima wa kwipana, babena kukwasha bakwabo ba mu lwitabilo kwamba’mba: “Twafwainwa kuya na kusapwila ku nzubo ku nzubo!”
[Mabulañano pa peja 32]
Twajinga bingi na lusekelo kimye bakañenda kyo betufwakashijile
[Kipikichala pa peja 31]
Benjamin Barton wajingako mu 1905 wajinga na mutanchi wa kufwakesha mapunzha afika ku 170
[Kipikichala pa peja 32]
Walter J. Thorn wajinga kañenda wayukanyikilwe amba nsemi na mambo a kwikala na muchima wa bunsemi kabiji wajinga na byubilo bya Kilishitu
[Kipikichala pa peja 32]
J. A. Browne bamutumine kwikala kañenda ku Jamaica mu 1902 na kukosesha ne kutundaika mabumba acheche 14
[Kipikichala pa peja 32]
Mwingilo wa bakañenda wakoseshanga lwitabilo, kukosesha buumo bwa bwina Kilishitu ne kukwatankanya balongo mu jibumba ja Lesa