MUTWE WA PA NKUPIKO: MWAKONSHA KWIKALA BWIKALO BWA LUSEKELO

Nanchi Kyakonsheka Kwikala Bwikalo bwa Lusekelo Nyi?

“Kikonkwanyi kya myaka yetu yo myaka makumi atanu na abiji, Kabiji kana na mambo a kukosa ke myaka makumi atanu na asatu; Nangwa byonkabyo aya yo betotelamo yo ya lumanamo ne bulanda.”—Salamo 90:10

BINO byambo bya kine. Mu bwikalo bwa mu ino ntanda mwavula “lumanamo ne bulanda.” Kampe mulanguluka’mba, ‘Nanchi kine kyakonsheka kwikala bwikalo bwa lusekelo pa kino kimye nyi?’

Akimonai kya kumwenako kya ba Maria. Kimye kyo bakijinga banyike babambakene bingi, pano luno byo bafikizha myaka 84, kechi benda ne. Nangwa kya kuba bakota, maana a kuba bintu baji nao. Na mambo a bino, bakonsha kulanguluka byepi kuba’mba bakekala bwikalo bwa lusekelo?

Nga anweba mulangulukapo’mba ka? Kimo kimye ne anweba mwiipuzha umvwe bwikalo bwenu bwa lusekelo. Mingilo yenu yakonsha kwikala imotu, ikokesha kabiji ilenga ne mukose. Byo mwibikako kwingila ino nkito bantu kechi batako ne muchima ne. Nangwa kya kuba bwikalo bwenu bujitu bulongo, bino mwakamwa pa bintu byakonsha kwimumwekela mu kimye kya kulutwe. Pa kimye kimo mwakonsha kulefulwa ne kwiumvwa kuba’mba kafwako wimuta muchima ne. Mu kisemi kyenu kampe muji bingi makatazho. Kimo kimye mwafwisha mutemwe wenu. Mwanamulume wa jizhina ja André watemenwe bingi bashanji abo bafwile panyuma ya kubelatu pa ka kimye kacheche. André kyamutamijile bingi.

Umvwe twaikala na makatazho, twafwainwa kwishikisha buno bwipuzho bwa kuba’mba: Nanchi kya konsheka kwikala bwikalo bwa lusekelo nyi? Twakonsha kutana mukumbu mu byapichilemo Yesu Kilishitu wajinga pano pa ntanda pa myaka 2000 yapitapo. Nangwa kya kuba Yesu wapichile mu makatazho, wajinga na lusekelo mu bwikalo. Inge twalondela kyakumwenako kyanji twakonsha kwikala na lusekelo.