BUTALA BWA MABUKU BWA PA INTANETI
Kyamba kya Usopa
BUTALA BWA PA INTANETI
Kikaonde
Pa kukebela
  • Bisopelo
  • BAIBOLO
  • MABUKU
  • KUPWILA
  • w13 4/1 pp. 4-5
  • Yesu po Paimena Bwikalo bwa Lusekelo

Vidyo ufwamo.

Yakana kushinkuka.

  • Yesu po Paimena Bwikalo bwa Lusekelo
  • Kyamba kya Usopa—2013
  • Byambo Bipashako
  • “Jishinda ne Bukine ne Bumi”
    ‘Iyai Mundondelenga’
  • “Natemwa Batata.”
    ‘Iyai Mundondelenga’
  • Ñanyi Byubilo Biji ne Yesu?
    Mukekala Myaka ne Myaka!—Fundainga Baibolo
  • ‘Mwana Waswa Kusolola Bashanji’
    Kyamba kya Usopa—2012
Monai Bikwabo
Kyamba kya Usopa—2013
w13 4/1 pp. 4-5

Yesu po Paimena Bwikalo bwa Lusekelo

NANCHI Yesu waikalanga bwikalo bwa lusekelo nyi? Wasemekejilwe mu ntanda mwajinga bantu bayanji kabiji kechi wajinga na bintu byavula mu bwikalo bwanji ne. Kechi wajinga “na pa kushamina mutwe ne.” (Luka 9:57, 58) Kabiji bamushikilwe, kumubepela bubela ne kumwipaya ku balwanyi banji.

Kimo kimye mwakonsha kulanguluka amba, ‘Buno kechi bwajinga bwikalo bwa lusekelo ne.’ Bino kuji bintu byavula byo twakonsha kufunjilako ku bwikalo bwa kwa Yesu. Twayai twisambe pa bino bintu bina byaamba pa bwikalo bwa kwa Yesu.

1. YESU WAJINGA NA BYA KUBA MU BWIKALO—KUBA KYASWA MUCHIMA WA LESA

“Kajo kami ke kuba kyaswa muchima wa yewa wantumine ne kupwisha mwingilo wanji.”—Yoano 4:34.

Kupichila mu ñambilo ne byubilo byanji, Yesu wakebeshe kuba kyaswa muchima wa Shanji wa mwiulu, aye Yehoba.a Yesu wajinga bingi na lusekelo mu kuba kyaswa muchima wa Lesa. Waesakenye uno mwingilo ku kajo byonka byaamba kinembelo kiji peulu. Monai byo kyajinga kimye kyo aambile bino byambo.

Yesu waambile bino byambo juba kasa jiji pepi na kushinkimana pa mutwe. (Yoano 4:6) Waendele museke mu Samaliya kupita mu mitumba lukelo lonse, wafwainwa wa umvwine nzala bingi. Baana banji ba bwanga bamwambijile’mba “Mufunjishi, jai.” (Yoano 4:31) Byo akumbwile byamwesheshe kuba’mba kwingila mwingilo wa Lesa kwa mulengelanga kwikala wakosa ku mupashi. Nanchi kino kechi kimwesha amba wajinga na lusekelo mu bwikalo bwanji nenyi?

2. YESU WATEMENWE BINGI BASHANJI.

“Natemwa Batata.”—Yoano 14:31.

Yesu wajinga na bulunda bwakosa bingi ne Bashanji saka akiji mwiulu. Na mambo a kutemwa Lesa ko kwa mulengejile kuyukisha Bashanji, Jizhina, bintu byo bakeba ne byubilo byabo. Kupichila mu ñambilo ne mu byubilo, Yesu wamwesheshe Bashanji byo baji, kya kuba kimye kyo tutanga pe Yesu tuyuka byubilo biji ne Bashanji. Filipai byo aipwizhe Yesu amba: “Nkambo, tumweshai Bashenu,” Yesu wakumbwile’mba: “Awa wammona, wamona ne Batata.”—Yoano. 14:8, 9.

Yesu watemenwe bingi Bashanji o ene mambo o ajinga na lukokelo kufikatu ne kimye kyo afwile. (Filipai 2:7, 8; 1 Yoano 5:3) Na mambo a kutemwa Lesa, kino kyamulengejile kwikala na lusekelo.

3. YESU WATEMENWE BANTU.

“Kafwako uji na butemwe bwakila buno bwa kuba amba muntu elele balunda nanji mweo wanji ne.”—Yoano 15:13.

Byo tuji bambulwakulumbuluka bwikalo bwetu bwa kulutwe bwatama. Baibolo waamba’mba: “Onkao mambo, bundengamambo bwatwelele pano pa ntanda mu muntu umo [Adama], ne lufu nalo lwaishijile mu bundengamambo, byonkabyo lufu lwakumbene ku bantu bonse mambo bonse balengele mambo.” (Loma 5:12) Kechi twakonsha kuchinuzhuka bifuma mu bundengamambo ne, ko kuba’mba lufu.—Loma 6:23.

Kyawamakotu, Yehoba wanengezhezhe jishinda ja kupwishishamo makatazho abena kupitamo bantu. Waswishishe Mwananji walumbuluka, aye Yesu, kuyanda ne kufwila bantu pa kuba’mba apane bukuzhi bwakebewenga kupulusha bantu ku bu ndengamambo ne lufu. Yesu byo atemenwe Bashanji ne bantu, aye waswile kupana bumi bwanji bwalumbuluka pa kuba’mba tupuluke. (Loma 5:6-8) Butemwe bwa uno mutundu bwa mulengejile kwikala bwikalo bwa lusekelo.b

4. YESU WAYUKILE KUBA’MBA BASHANJI BAMUTEMENWE KABIJI BAMUKETEKEJILE.

“Uno ye Mwanami ye natemwa, mo namwena lusekelo.”—Mateo 3:17.

Yehoba waambile bino byambo kufuma mwiulu kimye Yesu kyo abatizhiwenga. Yehoba waambishetu patoka kuba’mba watemenwe Mwananji aye Yesu kabiji wamuketekejile bingi. Kyo kyalengejile Yesu kwamba’mba: “Batata kyo kyo bantemenwa”! (Yoano 10:17) Yesu wayukile kuba’mba Bashanji bamutemenwe kabiji bamuketekejile kyo kyalengejile kuchinchika meseko ne mwenga byo apichilengamo. Na mambo a bino, wachinchikile kufika ne ku lufu. (Yoano 10:18) Kuyuka amba Bashanji bamutemenwe ne kumuketekela kwamulengejile kwikala bwikalo bwa lusekelo.

Kwa kubula nangwa kuzhinaukatu ne, Yesu wajinga na lusekelo mu bwikalo bwanji. Twakonsha kufunjilako byavula kwi aye byo twafwainwa kwikala bwikalo bwa lusekelo. Kibaba kyalondelapo kyaamba pa lujimuno Yesu lo apele baana banji ba bwanga byo bakonsha kwikala ba lusekelo.

[Tubyambo twa mushi]

a Baibolo itubula’mba Yehoba jo jizhina ja kwa Lesa.

b Umvwe mukeba kuyuka byavula pa buneme bwa bukuzhi bwa lufu lwa Yesu, monai kitango 5 mu buku wa Nanchi Baibolo Kine Ufunjisha’mba Ka?

    Mabuku a mu Kikaonde (1992-2025)
    Shinkai
    Shinkulai
    • Kikaonde
    • Tuminaiko Bakwenu
    • Byo Mukeba
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Shinkulai
    Tuminaiko Bakwenu