Bwikalo bwa Lusekelo—Yesu Wamwesheshe bya Kwikala Bwikalo bwa Lusekelo

“Wafwainwa kwendanga byonka byaendanga Yesu.”—1 Yoano 2:6.

BYONKA byo twisambile mu kibaba kyafumako, Yesu waikalanga bwikalo bwa lusekelo. Ne atweba inge tukeba kwikala bwikalo bwa lusekelo, twafwainwa kulonda kya kumwenako kyanji ne kumvwina byo a bena kwitubula.

Yehoba witukambizha kuba byonka byaamba kinembelo kiji peulu. Kwikala byonka byaikalanga Yesu mwavwangwa kulondela byo aubanga ne byo afunjishanga. Kuba bino kuketulengela kwitabilwa kwi Lesa ne kwikala bwikalo bwa lusekelo.

Pa byo afunjishenga Yesu pajinga ne mafunde akonsha kwitukwasha kulondela byonka byo aubanga. Mafunde amo atanwa mu Jashi janji ja pa Mutumba jaya nkuwa. Twayai twisambeko pa ano mafunde amo ne byo twafwainwa kwialondela mu bwikalo bwetu.

JIFUNDE: “Bo bene balusekelo baji na muchima wa kukeba kuyuka Lesa.”—Mateo 5:3.

JINO JIFUNDE BYO JILENGELA KWIKALA BWIKALO BWA LUSEKELO: Yesu wamwesheshe kuba’mba bantu bakeba kuyuka Lesa. Tutonga bingi kuyuka mikumbu ku ano mepuzho nabiji a kuba’mba: Mambo ka o twaikela pano pa ntanda? Mambo ka buyanji kyo bwavujila? Nanchi Lesa wituta muchima nyi? Nanchi muntu utwajijila kwikalako panyuma ya lufu nyi? Twafwainwa kuyuka mikumbu ku ano mepuzho pa kuba’mba twikale bwikalo bwa lusekelo. Yesu wayukile kuba’mba kujitu nsulo imo kwakonsha kufuma mikumbu ya ano mepuzho, ne ino ke Mambo a Lesa. Kimye kyo alombelenga kwi Shanji, Yesu waambile’mba: “Byambo byenu bo bukine.” (Yoano 17:17) Nanchi Mambo a Lesa akonsha kwitukwasha kuyuka Lesa nyi?

KYA KUMWENAKO KYA MU BWIKALO: Ba Esa batangijilanga jibumba ja banyimbi bakebelenga kuya nkuwa mu bya bunyimbi. Bino nangwa byonkabyo, kechi bajinga na lusekelo ne. Baambile’mba, “Nangwa kya kuba naumvwanga bulongo kwikala mu jibumba ja banyimbi, nakebeshe bingi kwikala na lusekelo mu bwikalo bwami.” Mu kuya kwa moba, ba Esa basambakene na Kamonyi wa kwa Yehoba. Batwajijila kwamba’mba “Namushikishe mepuzho avula bingi.” “Mikumbu ya mu Binembelo yamfikile bingi pa muchima kabiji naswile kufunda Baibolo nanji.” Byo bafunjilenga bibafikile bingi pa muchima kabiji kino kibalengejile kwipana kwi Yehoba. Baamba’mba, “Kala naikalanga na makatazho avula bingi, pano luno nji bingi na lusekelo mu bwikalo bwami.”a

JIFUNDE: “Bo bene balusekelo bamwesha lusa.”—Mateo 5:7.

JINO JIFUNDE BYO JILENGELA KWIKALA BWIKALO BWA LUSEKELO: Kwikala wa lusa ke kumwesha kifyele ne kulangulukilako bakwetu. Yesu wajinga na kifyele ku bantu bakajilwe. Byo ebomvwijile lusa, aye wakebele kwibakwasha. (Mateo 14:14; 20:30-34) Umvwe tumvwina bantu lusa byonka byajinga Yesu, bwikalo bwetu bukekala bwa lusekelo, mambo bobila lusa bakwabo bekala na lusekelo. (Byubilo 20:35) Twakonsha kumwesha lusa ku bakwetu kupichila mu kwamba byambo bya kifyele ne kukwasha boba bakajilwa. Nanchi kwikala na lusa kwakonsha kulengela bwikalo bwetu kwikala bwa lusekelo nyi?

KYA KUMWENAKO KYA MU BWIKALO: Ba Maria ne bena kwabo ba Carlos ke bamo bajinga na lusa. Bashabo ba Maria bafwijilwe kabiji pa kino kimye kechi benda ne. Ba Maria ne ba Carlos bo bebalama ku nzubo kwabo. Javula batoñamangatu bufuku bonse kabiji kimo kimye ne kwibatwala ku kipatela umvwe kikola kya shuka kyavundumuka. Baamba kuba’mba kimo kimye bakoka bingi. Byonka byaambile Yesu, abo baji na lusekelo mambo bayuka kuba’mba babena kukwasha bashabo ba Maria mu byonse byo bakeba.

JIFUNDE: “Bo bene balusekelo bapwanya bantu.”—Mateo 5:9.

JINO JIFUNDE BYO JILENGELA KWIKALA BWIKALO BWA LUSEKELO: Kwikala wa “mutende” kilumbulula “kuleta mutende.” Nga muntu uleta mutende wafwainwa kulengela byepi bwikalo bwanji kwikala bwa lusekelo? Tukomvwañananga na bakwetu bo twikala nabo. Kyafwainwa kuwama kukokela lujimuno lwa mu Baibolo lwa kuba’mba: “Umvwe kyakonsheka, monka mwayila bulume bwenu, ikalainga mu mutende na bantu bonse.” (Loma 12:18) Byambo bya kuba’mba “Bantu bonse” bivwangamo ba mu kisemi ne bantutu bakwabo babula kwitabila. Nanchi kwikala ba mutende ku “bantu bonse” ko kuba’mba tukekala ba lusekelo mu bwikalo bwetu nyi?

KYA KUMWENAKO KYA MU BWIKALO: Akimonai byamwekejile bainetu ba jizhina ja Nair. Pa myaka yavula yapitapo, bapita mu makatazho avula alengela abo kwikala ba mutende na ba mu kisemi kyabo. Papita myaka 15 kufuma po bebashijile ku bamwatawabo, babena kukomeshatu baana bunke bwabo. Mwanabo umo waingijishanga bizhima, byamulengelanga kukatazha bainanji ne banyenga yanji. Ba Nair baketekela kuba’mba byo bafunda mu Baibolo bibalengela kwikala ba mutende, nangwa kya kuba bapita mu makatazho na mwanabo. Kechi beseka kwipachika nangwa kulwa ne. Abo baji na kifyele, lusa, kabiji bomvwañana na bakwabo. (Efisesa 4:31, 32) Bayuka amba kwikala ba mutende kwibalengela kumvwañana na ba mu kisemi ne bantutu bakwabo.

KULANGULUKA PA BYA KULUTWE

Umvwe ke tulondele lujimuno lwa kwa Yesu, tukekala ba lusekelo mu bwikalo bwetu. Pa kuba’mba twikale bwikalo bwa lusekelo twafwainwa kuyuka bintu biji kulutwe. Nangwa kiji byonkabyo, twafwainwa kwikala byepi ba lusekelo mu bwikalo bwetu saka twayuka kuba’mba tukakota, tukakolwa ne kufwa? Bino byo bintu byubiwa mu bwikalo bwa mu ino ntanda.

Nangwa byonkabyo, kuji byawama. Yehoba ukapesha bonse bebikako ‘kwenda byonka bya endanga Yesu.’ Yehoba walaya kuba’mba katatakatu akalete ntanda mukekala bololoke, amo mukekala bantu bakishinka monka mwakebejile Yehoba, ko kuba’mba kwikala bumi bwawama myaka ne myaka. Mambo anji amba’mba: “Tala! Tente wa Lesa ukekala na bantu, ne aye ukekala nabo kabiji ne abo bakekala ke bantu banji. Ne Lesa mwine ukekala nabo. Kabiji ukebashimuna mipolo yonse ku meso abo, ne lufu, mabingo, kujila nangwa misongo kechi bikekalako jibiji ne. Bintu bya kala byapichijila.”—Lumwekesho 21:3, 4.

Ba Maria, baji na myaka ya kusemwa 84 batongolwa mu kibaba kitanshi mu bino byalondankana, batengela kimye kikafika bino byambo. Nga anweba? Nanchi mukeba kuyuka byavula pa “bumi bwa kine kine” bukekala mu Bufumu bwa Lesa nyi? (1 Timoti 6:19) Umvwe byobyo kiji, ipuzhai Bakamonyi ba kwa Yehoba baji kwipi na ko mwikela nangwa nembelai ku banembi ba uno magazini.b

[Tubyambo twa mushi]

[Kipikichala pa peja 7]

Ba Carlos ne ba Maria