Nanchi Kichi kyo Batema Kyakonsha Kusapuka Jikwabo Nyi?

KICHI kikatampe kya sida kya ku Lebanoni kimweka bulongo kukila kichi kya maolivi kyakoma kabiji kyapikankana. Pano bino, kichi kya maolivi kyakosa bingi, nangwatu inge kyauma na mambo a kyuya, kyakonsha kusapuka jikwabo. Bamo bamba’mba bichi bimo bya maolivi bikala myaka 1,000. Mizhazhi ya kichi kya maolivi yo ilengela kichi kusapuka jikwabo nangwa inge bekitema. Inge mizhazhi kechi yauma ne, kino kichi kisapuka jikwabo.

Mushakulu Yoba wayukile kuba’mba nangwatu akafwe, ukekala na bumi jikwabo. (Yoba 14:13-15) Waambile pa kichi, kampe kya maolivi, pa kulumbulula luketekelo lo ajinga nalo lwa kuba’mba Lesa uji na bulume bwa kumusangula. Yoba waambile’mba: “Nangwatu kichi kikala na luketekelo. Umvwe bekitema, kisapuka jikwabo.” Nangwatu inge kwajinga kyashi kikatampe bino kwanoka mvula, kichi kya maolivi kyakonsha kusapuka ne kwikala na “misampi nobe kichi kya katataka.”—Yoba 14:7-9.

Byonkatu njimi byo akebesha kumona kichi kya maolivi kyo batema kyasapuka jikwabo, Yehoba Lesa naye ukebesha bingi kusangula bakalume banji bafwa kubikapotu ne bantu bonse bafwa ne kwibapa bumi jikwabo. (Mat. 22:31, 32; Yoa. 5:28, 29; Byu. 24:15) Kikaleta bingi lusekelo pa kutambwila bantu bafwa ne kwibamona saka babena kwiyowa bintu byawama.