Kuwamisha Bulunda Bwenu ne Yehoba

PA MWAKA pa mwaka, mikooko yavula beibwezha mu kipwilo kya bwina Kilishitu. Fwanyikizhai “lusekelo lukatampe” lwikala mwiulu inge mukooko wabwela mu kipwilo. (Luka 15:7, 10) Inge kya kuba’mba bemubwezha mu kipwilo, mwakonsha kushiinwa kuba’mba Yesu, bamalaika ne mwine Yehoba baji bingi na lusekelo pa kumona kuba’mba mwabwela mu kipwilo. Pano bino, byo mubena kukosesha bulunda bwenu ne Yehoba jibiji, mwakonsha kupita mu makatazho. Ñanyi makatazho amo o mwakonsha kupitamo, kabiji ki ka kyakonsha kwimukwasha?

ÑANYI MAKATAZHO O MWAKONSHA KUPITAMO?

Balongo ne banyenga bavula inge babwela mu kipwilo kechi bakasuluka ne. Kampe mwayuka byaumvwinenga Mfumu Davida ku muchima. Nangwatu byo papichile kimye kufuma po bamulekejileko mambo o alengele, waambile’mba: “Bubi bwami bwamvujila.” (Sala. 40:12; 65:3) Muntu inge wabwela kwi Yehoba, wakonsha kutwajijila kwizhachisha nangwa kumvwa bumvu pa myaka yavula. Ba Isabelle bapangile mu kipwilo pa myaka kukila pa 20.a Baambile’mba, “Kyankatezhe bingi kuswa kuba’mba Yehoba wakonsha kundekelako mambo.” Inge mwatwajijila kwilengulula, bulunda bwenu ne Yehoba bwakonsha kukooka jibiji. (Maana 24:10) Ibikaingako kumona kuba’mba kino kechi kimumwekela ne.

Bakwabo bakamwa pa bintu byo bafwainwa kuba pa kuba’mba bakoseshe bulunda bwabo ne Yehoba jibiji. Ba Antoine byo bebabwezhezhe mu kipwilo, baambile’mba: “Namwene kuba’mba nalubilemo bintu byavula byo naubanga saka bakyangye kumpanga mu kipwilo.” Na mambo a kino, bamo kechi bebikako kuba bintu byakonsha kwibakwasha kukosesha bulunda bwabo ne Yehoba ne.

Langulukai pa kino. Inge kya kuba kinkunkwila kyaonauna nzubo ya muntu, mwina ino nzubo wakonsha kwakamwa bingi inge walanguluka pa kimye ne ngovu yo akatayapo pa kuba’mba eishimukulule. Kyo kimotu ne anweba, inge bulunda bwenu ne Yehoba bwaonaikile na mambo akatampe o mwalengele, mwakonsha kulanguluka kuba’mba pakakebewanga kwingila na ngovu pa kuba’mba muwamishe bulunda bwenu ne Yehoba. Pano bino, kechi mwafwainwa kuba kino bunke bwenu ne.

Yehoba witwita amba: “Anweba bantu, iyai twisambe kabiji nsakwimukwasha kwikala na bulunda bwawama ne amiwa.” (Isa. 1:18) Mwaingila kala na ngovu “kwikala na bulunda bwawama” na Lesa. Yehoba wimutemwa bingi pa kumona byo mubena kwibikako kuba kino. Akilangulukaipotu: Na mambo a kuba’mba mwabwela kwi Yehoba, wakonsha kwimwingijisha kushiina Satana kuba’mba wa bubela.—Maana 27:11.

Kupichila mu kubwela kwi Yehoba, ko kuba’mba mwafwenya kwipi ne aye, kabiji naye walaya kuba’mba ukafwenya kwipi ne anweba. (Yako. 4:8) Nangwa byonkabyo, kuji bintu byavula byo mwafwainwa kuba kechi kuyukanyikwatu ku bakwenu amba mwabwela mu kipwilo ne. Mwafwainwa kutwajijila kukosesha butemwe bo mwatemwa Shenu kabiji Mulunda nenu, Yehoba. Mwakonsha kuba byepi bino?

IBIKILAI BIKONKWANYI BYO MWAKONSHA KUFIKIZHA

Esekai kwibikila bikonkwanyi byo mwakonsha kufikizha. Mwafwainwa mubena kuvuluka bintu bitanshi byanema byo mwafunjile pe Yehoba ne mulaye wanji wa Paladisa. Bino luno mwafwainwa kwikala jibiji na mutanchi wawama, nabiji kusapwila mambo awama kimye kyonse, kupwila kimye kyonse ne kupwanañana na balongo ne banyenga. Langulukai pa bikonkwanyi byalondelapo.

Isambainga ne Yehoba bimye byavula. Shenu wa mwiulu wayuka kuba’mba inge mwatwajijila kwizhachisha pa bintu byatama byo mwaubile kyakonsha kwimukatazha kulomba kwi aye. (Loma 8:26) Nangwa byonkabyo, “lombainga na mukoyo” kwi Yehoba byo mubena kukebesha kukosesha bulunda bwenu ne aye. (Loma 12:12) Ba Andrej bavuluka kuba’mba: “Nezhachishenga bingi ne kumvwa bumvu. Bino kimye kyonse inge nalomba, ino milanguluko yakepelenga. Kabiji naikele na mutende wa mu milanguluko.” Inge kechi mwayuka bintu byo mwafwainwa kulombapo ne, langulukai pa milombelo yalombele Mfumu Davida byo alapijile yanembwa mu Salamo 51 ne 65.

Fundainga Baibolo kimye kyonse. Kuba bino kukemukwasha kwikala na lwitabilo lwakosa kabiji butemwe bo mwatemwa Yehoba bukabaya. (Sala. 19:7-11) Ba Felipe baambile’mba: “Na mambo a kuba’mba kechi najinga na mutanchi wa kutanga Baibolo kimye kyonse ne kufunda ne, kyo kyandengejile kukooka ne kufichisha Yehoba ku muchima. Kechi nakebelenga kukozha Yehoba ku muchima jibiji ne, onkao mambo, nafuukwilepo kwikalanga na lufunjisho lwa pa bunke kimye kyonse.” Ne anweba byo byo mwafwainwa kubanga. Inge mubena kukeba kuyuka bya kusala mitwe ya kufundapo, mwakonsha kwipuzha mulunda nenu uji na bulunda bwakosa ne Yehoba kwimukwashako.

Koseshai bulunda bwenu na balongo ne banyenga. Bamo bo babwezha mu kipwilo bakamwa’mba bakwabo bakebazhingijila. Ba Larissa baambile’mba: “Naumvwinenga bingi bumvu. Nalangulukilenga’mba nakozhezhe balongo ne banyenga ku muchima. Natwajijile kwikala na ino milanguluko pa kimye kyabaya.” Bino yukai kuba’mba bakulumpe mu kipwilo ne bakwabo baji na lwitabilo lwakosa bakemukwasha kukosesha bulunda bwenu ne Yehoba. (Monai kakitenguluzha ka kuba’mba “Bakulumpe mu Kipwilo Bakonsha Kuba Byepi?”) Basangalele bingi byo mwabwelele mu kipwilo, kabiji bakeba’mba mwikale na lusekelo.—Maana 17:17.

Ki ka kyakonsha kwimukwasha kukosesha bulunda bwenu na balongo ne banyenga? Pwilainga kimye kyonse na balongo ne banyenga ne kwingila nabo mwingilo wa kusapwila kimye kyonse. Kuba bino kukemukwasha byepi? Ba Felix baambile’mba: “Kipwilo kyantambwijile na lusekelo byo nabwelele. Namwene kuba’mba bantemwa. Bankwashishe kuyuka kuba’mba pano naikala ke lubaji lwa kipwilo, ne kuba’mba Yehoba wandekelako mambo, kabiji nakonsha kutwajijila kwingijila Yehoba.”—Monai kakitenguluzha ka kuba’mba “Mwakonsha Kuba Byepi?”

KUBWELA PANYUMA NE!

Satana usakutwajijila kwimuletela makatazho pa kuba’mba emulengele kukankalwa kukosesha bulunda bwenu ne Yehoba. (Luka 4:13) Inengezhai kuchinchika ano makatazho kupichila mu kukosesha lwitabilo lwenu.

Yehoba walaya mikooko yanji amba: “Nkakeba yaeleka, nkabwezha yalubilamo, ikozha nkeipomba bisapi pa bilonda ne yoya yakooka nkeikosesha.” (Ezi. 34:16) Yehoba wakwasha bavula bingi kuwamisha bulunda bwabo ne aye. Yukai kuba’mba ne anweba ukeba kwimukwasha kwikala na bulunda bwakosa ne aye.

Bakulumpe mu Kipwilo Bakonsha Kuba Byepi?

Bakulumpe mu kipwilo bengila mwingilo wanema bingi pa kukwasha basapwishi bo babwezha mu kipwilo kukosesha bulunda bwabo ne Yehoba. Monai bintu bimo byo bakonsha kuba pa kukwasha boba bo babwezha mu kipwilo.

Batekeneshainga. Mutumwa Paulo wayukile kuba’mba ndengamambo walapila wakonsha “kukizhamo kwikala na bulanda.” (2 Ko. 2:7) Bimye byavula wakonsha kwizhachishanga ne kumvwa bumvu. Paulo watundaikile kipwilo amba: “Mwafwainwa kumulekelako mambo ne kumutekenesha.” Aba bo babwezha mu kipwilo bakebewa kwibakwasha kushiinwa kuba’mba Yehoba ne balongo ne banyenga mu kipwilo bebatemwa. Inge bakulumpe mu kipwilo ke bebatakaike ne kwibakwasha, kyakonsha kwibakwasha kubula kubwela panyuma.

Lombelainga pamo ne abo. “Lulombelo lwa misashijilo lwa muntu waoloka luji bingi na bulume.” (Yako. 5:16) Ba Larissa bo twaambapo kala, baambile’mba: “Nabuujile bakulumpe mu kipwilo bintu byo nazhinaukilenga ne byo naakaminwe. Balombejile pamo ne amiwa kabiji bandombejileko. Kepo nayukile kuba’mba bakulumpe mu kipwilo kechi banzhingijile ne. Bakebelenga kunkwasha kuwamisha bulunda bwami ne Yehoba.” Ba Theo baambile’mba: “Milombelo ya bakulumpe mu kipwilo yankwashishe kushiinwa kuba’mba Yehoba kine wantemwa kabiji kechi umonatu byatama mwi amiwa ne, bino umonamo ne byawama.”

Ikalai balunda nabo. Aba bo babwezha mu kipwilo bakebewa kwikala na balunda mu kipwilo. Mukulumpe mu kipwilo wa jizhina ja Justin waambile’mba: “Twafwainwa kwingilanga nabo mu mwingilo wa kusapwila, kabiji ne kyakilapo kunema, kwibafwakesha ku mazubo abo. Kyanema bingi kwikala balunda nabo.” Mukulumpe mu kipwilo mukwabo aye Henry waambile’mba: “Balongo ne banyenga inge bamona bakulumpe mu kipwilo na kulenga bulunda na boba bo babwezha mu kipwilo, nabo bakatundaikwa kuba byonkabyo.”

Bakwashai kufunda Mambo a Lesa. Mulunda wakoma mu lwitabilo wakonsha kukwasha muntu ye babwezha mu kipwilo kwikala na mutanchi wawama wa kufunda. Mukulumpe mu kipwilo wa jizhina ja Darko waambile’mba: “Aba bo babwezha mu kipwilo, natemwa kwibabuulako bishinka byanema byo ntaana pa lufunjisho lwami lwa pa bunke pa kuba’mba nebamweshe byo neyowa kufunda Baibolo. Kabiji nnengezha ne kufunjila pamo nabo bibaaba bimo.” Mukulumpe mu kipwilo mukwabo aye Clayton waambile’mba: “Nebatundaika kukeba mashimikila a mu Baibolo epasha na bintu byo bapitamo ne kumona byo bakonsha kufunjilako.”

Ikalai kafunga wawama. Aba bo babwezha mu kipwilo bamonatu bakulumpe nobe ba mitonyi ba kuchiba mambo. Byo babwela mu kipwilo bafwainwa kumonanga bakulumpe mu kipwilo amba bakafunga. (Yele. 23:4) Mwafwainwa kuteleka inge babena kwamba ne kwibatakaika. Isambainga nabo bimye byavula. Monai byuba mukulumpe mu kipwilo wa jizhina ja Marcus inge waya mu lupempu lwa bukafunga. Waambile’mba: “Twisamba nabo kishinka kya mu Binembelo ne kwibasanchila, ne kwibabuula kuba’mba twatemwa bingi pa kumona byo baingila na ngovu kubwela mu kipwilo kabiji Yehoba naye waumvwa bingi bulongo. Inge twapwisha kwisamba, twibabuula juba jo tukabwelako jikwabo.”

a Mazhina mu kino kibaaba apimpulwa.