Nanchi Mwayuka Nyi?

Mambo ka bena Isalela o bapainanga mali a masongola?

MU KIMYE kyenembejilwengamo Baibolo, bapananga mali a masongola ku kisemi kya mwanamukazhi. Bapananga bintu bya buneme nabiji, banyama nangwa mali. Bimye bimo, baingilanga mingilo, byonka byaubile Yakoba, waswile kwingijila bashanji Lechela pa myaka itanu na ibiji pa kuba’mba amusongole. (Nte. 29:17, 18, 20) Mambo ka o balondelanga kino kisho?

Shayuka wa Baibolo aye Carol Meyers wanembele’mba: “Mali a masongola beapananga kuba’mba apingakene pa mingilo yaingilanga mwanabo mu kisemi, kabiji ino mingilo yanemene bingi kikatataka ku bisemi bya banjimi.” Kabiji ano mali akoseshanga bulunda pa bisemi bibiji mwafuma baana batwela mu masongola. Bino bisemi bikwashanga mu bimye bya makatazho. Kabiji, mali a masongola ajinga kishiino kyamweshanga’mba mwanamukazhi bamwipanguzha kabiji ukafuma mu maboko a bashanji ne kuya ku mwatawanji.

Kupana mali a masongola kechi kwalumbululanga’mba mwanamukazhi bamupotesha nangwa kumupota ne. Buku umo waamba’mba: “Kupana mali nangwa bintu bikwabo bya buneme kwakonsheshe kumweka nobe mwanamulume wapota mwanamukazhi kuba’mba amusongole. Bino kyamweka bapananga ano mali ku kisemi kya mwanamukazhi kuba’mba apingakene pa mingilo yo aingilanga mu kisemi, kabiji kechi aikalanga avula uba nobe bapota mwanamukazhi ne.”—Ancient Israel—Its Life and Institutions.

Lelo jino, mu byalo bimo, bantu batwajijila kulondela kino kisho kya kupana mali a masongola. Bansemi bena Kilishitu pa kutongola mali a masongola baleka ‘kukooka muchima kwabo kuyukanyikwa ku bantu bonse’ kupichila mu kubula kutongola mali avula. (Fili. 4:5; 1 Ko. 10:32, 33) Umvwe bauba bino, bamwesha kuba’mba kechi “batemwa mali” ne, nangwa’mba kechi baji na lwiso lwa mali ne. (2 Timo. 3:2) Kikwabo, bansemi bena Kilishitu inge babula kutongola mali avula, mwanamulume kechi ukatwala kulutwe juba ja masongola pa kuba’mba akikebe mali a kupana ne. Nangwa kumulengela kuleka mwingilo ye engila nabiji bupainiya kuba’mba akebe nkito ya kufola mali avula pa kuba’mba akapane mali a masongola ne.

Mu byalo bikwabo, kafulumende wabikako mizhilo yatongwela jimo mali afwainwa kupana muntu a masongola. Mu bino byalo, bansemi bena Kilishitu balondela ino mizhilo. Mambo ka? Mambo a Lesa akambizha bena Kilishitu kukookela “bakulumpe balama kyalo” ne kukookela mizhilo ibula kulwañana na mizhilo ya Lesa.—Loma 13:1; Byu. 5:29.