Bantu 6 Milyonyi Bafwa na Mwalo wa COVID—Baibolo Waambapo’mba Ka?

Pa 23 May 2022, Sawakya wa kipamo kya World Health Organization (WHO) waambile’mba bantu 6.27 milyonyi bo bafwa ku mwalo wa COVID-19. Nangwa byonkabyo, sawakya ye balupwile pa 5 May 2022, kipamo kya WHO kyashimwine’mba bantu bafwa bavula kukila pa kibelengelo kyo batongwele. Baambile’mba mu mwaka wa 2020 ne 2021, “bantu bonse bafwa ku mwalo wa COVID-19 bafika ku 14.9 milyonyi.” Nanchi Baibolo waambapo pa binkunka bya uno mutundu bileta bulanda nyi?

Baibolo waambijilepo jimo pa myalo

•  Yesu waambile’mba kukekala “myalo” mu kimye kitelwa’mba “moba a kupelako.”—Luka 21:11; 2 Timoti 3:1.

Bungauzhi bwaawile Yesu bubena kufika lelo jino. Pa kuba’mba muyukilepo byavula, tangai kibaaba kya kuba’mba “Kiyukilo kya ‘Moba a Kupelako’Nangwa’mba ‘Bimye bya ku Mpelo’ kyo Kyepi?”

Baibolo witutekenesha

•  “Lesa wa lutekenesho lonse, witutekenesha mu meseko etu onse.”—2 Kolinda 1:3, 4.

Byambo bya mu Baibolo bitekenesha bingi bantu bavula bafwisha batemwe babo. Fundai byavula mu bibaaba bya kuba’mba “Bya Kuba Inge Muji na Bulanda—Byo Mwakonsha Kuba” ne “Baibolo Ukwasha Bantu Baji Na Bulanda.”

Baibolo waamba pa myalo byo bakeifumyapo

•  “Bufumu bwenu bwiye. Kyaswa muchima wenu kyubiwe pano pa ntanda, byonka byo kibena kubiwa mwiulu.”—Mateo 6:10.

“Bufumu bwa Lesa” katatakatu bukamone kuba’mba “Kafwako muntu nangwa umo ukekala mu kyalo ukamba’mba: ‘Nakolwa’ ne.” (Mako 1:14, 15; Isaya 33:24) Tambai vidyo wa kuba’mba Bufumu bwa Lesa bo Buka? pa kuba’mba muyuke biji kafulumende wa mwiulu ne bintu byo akoba.

Tubena kwimutundaika kufunjilapo byavula pa byaamba Baibolo pa kuba’mba anweba ne kisemi kyenu mukamwenemo mu mafunde ne milaye yawama ijimo.