Sam
To di wan we de dayrɛkt. Devid in siŋ.
109 E Gɔd, di wan we a de prez, nɔ sɛt yu mɔt.
2 Di wikɛd wan dɛn ɛn di wan dɛn we de lay de tɔk agens mi.
Dɛn de tɔk lay lay tin dɛn bɔt mi;
3 Dɛn sɔrawnd mi de tɔk bad bad wɔd dɛn,
Ɛn dɛn de atak mi fɔ no rizin.
4 Dɛn de lay pan mi pan ɔl we a de sho dɛn lɔv;
Bɔt a de kɔntinyu fɔ pre.
5 Dɛn de pe mi wit bad fɔ di gud we a du to dɛn,
Ɛn dɛn de pe mi wit etrɛd fɔ di lɔv we a sho to dɛn.
6 Pik wikɛd pɔsin fɔ de oba am;
Lɛ pɔsin we de agens am tinap na in raytan.
7 We dɛn jɔj am, lɛ dɛn si se i gilti;*
Lɛ dɛn ivin si in prea as sin.
8 Lɛ i nɔ gɛt lɔng layf;
Lɛ ɔda pɔsin tek in wok.
9 Lɛ in pikin* dɛn nɔ gɛt papa,
Ɛn lɛ in wɛf bi uman we in man dɔn day.
10 Lɛ in pikin* dɛn de pas pas de beg;
De luk fɔ tin fɔ it na dɛn yon os dɛn we dɔn pwɛl pwɛl.
11 Lɛ di wan we i lɛnt to siz ɔl wetin i gɛt,
Ɛn lɛ strenja dɛn tek in prɔpati dɛn.
12 Lɛ nɔbɔdi nɔ du gud* to am,
Ɛn lɛ nɔbɔdi nɔ sho sɔri-at to in pikin dɛn we nɔ gɛt papa.
13 Lɛ dɛn dɔnawe wit in pikin dɛn;
Lɛ dɛn wep dɛn nem dɛn so dat di nɛks jɛnɛreshɔn nɔ go no bɔt dɛn.
14 Lɛ Jiova mɛmba in gret gret granpa dɛn mistek,
Ɛn lɛ i nɔ wep in mama in sin.
15 Ɔltɛm, lɛ Jiova mɛmba wetin dɛn bin dɔn du;
Ɛn lɛ i mek nɔbɔdi nɔ mɛmba dɛn na di wɔl.
16 Bikɔs i nɔ mɛmba fɔ du gud,*
Bɔt i bin de rɔnafta pɔsin we po, we in at pwɛl, ɛn we dɛn de sɔprɛs,
Fɔ lɛ i kil am.
17 I bin lɛk fɔ swɛ, so na dat apin to am;
I nɔ bin want fɔ blɛs pɔsin, so insɛf nɔ gɛt no blɛsin.
18 I put swɛ pan insɛf lɛk se na in klos,
Ɛn di swɛ dɛn kam na in bɔdi lɛk wata,
Ɛn insay in bon dɛn lɛk ɔyl.
19 Lɛ in swɛ tan lɛk di klos we i kin rap insɛf insay
Ɛn lɛk in bɛlt we i kin tay ɔltɛm.
20 Dis na di pe we Jiova de gi di wan we de agens mi
Ɛn di wan we de tɔk bad tin bɔt mi.
21 Bɔt yu Jiova, di Masta We De Rul Ɔlman,
Du sɔntin bikɔs ɔf yu nem.
Sev mi bikɔs yu lɔv we nɔ de chenj, gud.
22 Du dis bikɔs a nɔ gɛt pɔsin fɔ ɛp mi ɛn a po,
Ɛn dɛn dɔn chuk mi at.
23 A de day lɛk shado we de lɔs we di san go dɔŋ;
Dɛn dɔn shek mi kɔmɔt lɛk grasɔpa.*
24 Mi ni dɛn dɔn wik bikɔs a de fast;
Mi bɔdi dɔn dɔn, ɛn i lɛf smɔl fɔ mek a day.*
25 A dɔn bi pɔsin we dɛn de provok.
We dɛn si mi, dɛn de shek dɛn ed dɛn.
26 Ɛp mi, E Jiova, mi Gɔd;
Sev mi wit yu lɔv we nɔ de chenj.
27 Lɛ dɛn no se na yu yuz yu an fɔ du am;
Na yu, E Jiova, dɔn du am.
28 We dɛn swɛ, yu de blɛs.
We dɛn kam agens mi, mek lɛ dɛn shem,
Lɛ yu savant gladi.
29 Lɛ di wan dɛn we de agens mi disgres bad bad wan;
Lɛ shem tan lɛk klos* we dɛn de rap rap dɛnsɛf wit.
30 A go prez Jiova wit ɔl mi at;
A go prez am bifo bɔku bɔku pipul dɛn.
31 I go tinap na di po wan in raytan
Fɔ sev am frɔm di wan dɛn we dɔn kɔndɛm am.