2 Kɔrintians

1 Mi, Pɔl, we na Krays Jizɔs in apɔsul bikɔs na dat Gɔd want, a de wit Timoti wi brɔda. A de rayt to Gɔd in kɔngrigeshɔn na Kɔrint ɛn to ɔl di oli wan dɛn ɔlsay na Akeya:

2 Lɛ Gɔd, wi Papa, ɛn Masta Jizɔs Krays dɛn spɛshal gudnɛs* ɛn pis de pan una.

3 Lɛ wi Masta Jizɔs Krays in Gɔd ɛn Papa gɛt di prez, di Papa we rili gɛt sɔri-at ɛn di Gɔd we de kɔrej pɔsin pan ɔltin, 4 we de kɔrej* wi ɔltɛm we wi gɛt prɔblɛm* so dat wi go ebul yuz di kɔrej we Gɔd gi wi fɔ kɔrej ɔda pipul dɛn ilɛk uskayn prɔblɛm* dɛn gɛt. 5 Jɔs lɛk aw wi de sɔfa fɔ Krays bɔku tɛm, na so Krays de mek wi gɛt kɔrej bɔku tɛm. 6 If prɔblɛm* dɛn mit wi, na fɔ mek una gɛt kɔrej ɛn fɔ mek una sev; ɛn if dɛn kɔrej wi, na fɔ mek unasɛf gɛt kɔrej, we go ɛp una fɔ bia di sem prɔblɛm dɛn we de mit wi. 7 Di op we wi de op fɔ una nɔ de chenj; wi no se jɔs lɛk aw una de sɔfa lɛk wi, na so una go gɛt kɔrej lɛk wi.

8 Wi brɔda dɛn, wi want mek una no bɔt di prɔblɛm dɛn we mit wi we wi bin de na Eshia distrikt. I bin so mɔna wi dat wi nɔ bin ebul bia bay wisɛf, ɛn wi nɔ bin ivin shɔ if wi go kɔntinyu fɔ liv. 9 Infakt, wi bin fil se dɛn dɔn sɛntɛns wi fɔ day. Dis apin fɔ mek wi nɔ abop pan wisɛf, bɔt fɔ mek wi abop pan Gɔd we de gi layf bak to di wan dɛn we dɔn day. 10 Pan ɔl we wi layf bin rili de pan denja, i bin sev wi ɛn i go sev wi, ɛn wi abop pan am se i go kɔntinyu fɔ sev wi. 11 Unasɛf kin ɛp wi we una rili beg Gɔd fɔ wi, so dat bɔku pipul dɛn go tɛl Gɔd tɛnki fɔ wi bikɔs i ɛp wi we i ansa bɔku pipul dɛn prea.

12 Na dis wi kin bost bɔt: wi kɔnshɛns klin bikɔs na di wɔl, ɛn mɔ to una, wi dɔn biev oli we ɛn wit di kayn klinat we Gɔd de mek pɔsin gɛt, nɔto wit mɔtalman sɛns, bɔt wit Gɔd in spɛshal gudnɛs.* 13 Wi nɔ de rili rayt to una ɛnitin we una nɔ ebul fɔ rid* ɛn ɔndastand, ɛn a op se una go kɔntinyu fɔ ɔndastand dɛn tin dɛn ya gud gud wan,* 14 jɔs lɛk aw sɔm pan una dɔn ɔndastand se wi na rizin we fɔ mek una bost, jɔs lɛk aw unasɛf go bi rizin fɔ mek wi bost insay wi Masta Jizɔs in de.

15 Na dis kɔnfidɛns we a gɛt bin mek a plan fɔ kam to una fɔs, so dat una go gladi fɔ di sɛkɔn tɛm.* 16 A bin plan fɔ kam fɛn una we a de go Masidonia, ɛn kam bak to una we a de kɔmɔt Masidonia, dɔn una go go lɛf mi na rod we a de go Judia. 17 So we a bin plan fɔ du dat, fɔ se a nɔ bin tek am as sɔntin we siriɔs? Ɔ fɔ se a de plan fɔ du tin dɛn mɔtalman we, so dat a de se “Yɛs, yɛs” ɛn leta “Nɔ, nɔ”? 18 Bɔt una kin abop pan Gɔd se wetin wi de tɛl una nɔto “yɛs” we i bi se na “nɔ.” 19 Gɔd in Pikin, we na Jizɔs Krays, we mi, Silvanɔs,* ɛn Timoti, prich to una bɔt, nɔ bi “yɛs” we i bi se na “nɔ,” bɔt fɔ am “yɛs” na “yɛs.” 20 Ilɛk aw Gɔd in prɔmis dɛn bɔku, dɛn dɔn bi “yɛs” bikɔs ɔf am. Ɛn na dat mek na tru am wi de se “Emɛn” to Gɔd, ɛn dat de mek wi gi am glori. 21 Bɔt na Gɔd de garanti se na Krays gɛt wi ɛn una ɛn na Gɔd anɔynt wi. 22 I dɔn put in stamp pan wi, ɛn i dɔn gi wi garanti* fɔ wetin gɛt fɔ kam, dat na, di spirit we de na wi at.

23 Gɔd na mi* witnɛs se na bikɔs a nɔ want una fɔ fil bad na in mek a nɔ kam na Kɔrint yet. 24 Nɔto fɔ se wi na masta dɛn fɔ una fet, bɔt wi na una kɔmpin wokman dɛn fɔ mek una gɛt gladi-at, bikɔs na una fet mek una kɔntinyu fɔ tinap.