Wetin Mek Wi Kin Go Dɛn Big Program Dɛn?

Wetin mek dɛn pipul ya gladi so? Na bikɔs dɛn de na wan pan di big program dɛn we wi kin gɛt. Jɔs lɛk aw Gɔd in pipul dɛn trade bin de kam togɛda fɔ wɔship am, na so wisɛf de kam togɛda fɔ wɔship Gɔd. (Ditarɔnɔmi 16:16) Ɛvri ia wi kin gɛt tri program. Wi kin gɛt tu sakit asɛmbli dɛn we na fɔ wan-wan de, ɛn wan kɔnvɛnshɔn we na fɔ tri dez. Aw dɛn program ya kin bɛnifit wi?

Dɛn de mek wi lɛk wi Kristian brɔda ɛn sista dɛn. Jɔs lɛk aw di Izrɛlayt dɛn bin de gladi fɔ prez Jiova “usay bɔku pipul de,” na so wisɛf kin gladi fɔ prez am we wi kin gɛt dɛn program ya. (Sam 26:12; 111:1) Dɛn program ya kin mek wi ebul fɔ si wi brɔda ɛn sista dɛn we kɔmɔt na ɔda kɔngrigeshɔn ɔ ɔda kɔntri. Aftanun tɛm, wi kin it smɔl tin wit wi brɔda dɛn, ɛn dis kin gi wi di chans fɔ mek nyu padi dɛn. (Di Apɔsul Dɛn Wok [Akt] 2:42) Na pan dɛn program ya wi kin si se wi rili lɛk wi “kɔmpin Kristiɛn dɛn.”—Pita In Fɔs Lɛta 2:17.

Dɛn de ɛp wi fɔ no mɔ bɔt Gɔd. Di Izrɛlayt dɛn bin de bɛnifit we dɛn bin de ɛksplen Gɔd in Wɔd to dɛn. (Nɛimaya 8:8, 12) Wisɛf kin gladi fɔ di fayn tin dɛn we wi kin lan frɔm di Baybul na dɛn program ya. Wi kin lisin to difrɛn tɔk dɛn ɛn bɔku ɔda tin dɛn we kin mek wi no aw fɔ du wetin Gɔd want. Wi kin tek kɔrej we wi kin yɛri bɔt ɔda brɔda dɛn we bin gɛt prɔblɛm dɛn ɛn wetin bin ɛp dɛn. Wi kin gɛt drama na di kɔnvɛnshɔn we kin mek wi lan bɔku tin dɛn we de na di Baybul. Dis kin ɛp wi fɔ no aw fɔ liv wi layf. We wi kin gɛt dɛn program ya di wan dɛn we want fɔ sho se dɛn dɔn gi dɛn layf to Gɔd, kin baptayz.

• Wetin mek dɛn program ya kin mek wi gladi?

• Us bɛnifit yu go gɛt we yu go dɛn program ya?