Aw Wi De Prich di Gud Nyus?

Bifo Jizɔs day, i bin se: “Pipul go tɛl ɔlman na [di] wɔl di Gud Nyuz bɔt wɛn Gɔd go rul di wɔl, so dat ɔlman go gɛt di chans fɔ yɛri ɛn biliv di Gud Nyuz; na da tɛm de di wɔl go dɔn.” (Matyu 24:14) Bɔt aw wi go ebul prich dis gud nyus ɔlsay na di wɔl? Wi go ebul du dis we wi falamakata di we aw Jizɔs bin de du am.—Lyuk 8:1.

Wi kin tɔk to pipul dɛn na dɛn os dɛn. Jizɔs bin sho in disaypul dɛn aw fɔ prich di gud nyus to pipul dɛn na dɛn os dɛn. (Matyu 10:11-13; Di Apɔsul Dɛn Wok [Akt] 5:42; 20:20) Di disaypul dɛn bin gɛt say dɛn we dɛn tɛl dɛn fɔ prich. (Matyu 10:5, 6) Tide, wisɛf de falamakata di we aw Jizɔs in disaypul dɛn bin de prich. Ɔl di kɔngrigeshɔn dɛn gɛt say dɛn we dɛn tɛl dɛn fɔ prich. Dis de ɛp wi fɔ du wetin Jizɔs bin se. I bin se wi “fɔ tɛl ɔlman di Gud Nyuz.”—Di Apɔsul Dɛn Wok [Akt] 10:42.

Wi kin tɔk to pipul dɛn ɛnisay we wi mit dɛn. Jizɔs bin de prich to pipul dɛn ɛnisay we i mit dɛn, lɛk na bich ɔ nia watawɛl. (Mak 4:1; Jɔn 4:5-15) Semweso, wisɛf kin tɔk to pipul dɛn bɔt di Baybul ɛnisay we wi mit dɛn. Wi kin tɔk to dɛn na strit, usay dɛn de du biznɛs, ɔ wi kin yuz fon fɔ tɔk to dɛn. Wi kin tɔk bak to wi fambul dɛn, wi neba dɛn, di wan dɛn we wi ɔl de wok, ɛn di wan dɛn we wi ɔl de go skul. Ɔl dis we wi de du dɔn mek plɛnti pipul na di wɔl dɔn yɛri di gud nyus we go mek dɛn sev.—Sam 96:2.

Udat yu go want fɔ tɛl di gud nyus bɔt Gɔd in Kiŋdɔm ɛn sho am wetin dis Kiŋdɔm go du fɔ am tumara bambay? Na fɔ tɛl ɔda pipul dɛn bɔt di tin dɛn we yu de lan na di Baybul.

• Wetin na di “Gud Nyuz” we wi fɔ tɔk bɔt?

• Aw Jiova Witnɛs dɛn de falamakata di we aw Jizɔs bin de prich?