Wan Kiŋdɔm we Go De Sote Go

Wan nɛt, Kiŋ Nɛbyukadnɛza drim wan drim we at fɔ ɔndastand. Dis rili mɔna am ɛn dat mek i nɔ ebul fɔ slip. I kɔl ɔl in majikman dɛn ɛn tɛl dɛn se: ‘Una ɛksplen mi drim to mi.’ Dɛn tɛl am se: ‘Duya wi kiŋ, tɛl wi wetin yu drim.’ Bɔt Nɛbyukadnɛza tɛl dɛn se: ‘Nɔ-o! Una tɛl mi wetin a drim ɔ a go kil una.’ Dɛn tɛl di kiŋ bak se: ‘Tɛl wi wetin yu drim, dɔn wi go ɛksplen am.’ Di kiŋ tɛl dɛn bak se: ‘Una want fɔ ful mi. Una tɛl mi wetin a drim!’ Dɛn tɛl di kiŋ se: ‘Nɔbɔdi nɔ de we go ebul fɔ du dat. Wi nɔ go ebul fɔ tɛl yu wetin yu dɔn aks.’

Nɛbyukadnɛza so vɛks dat i se dɛn fɔ kil ɔl di sɛnsman dɛn. Daniɛl, Shedrak, Mishak, ɛn Abɛdnigo bin de pat pan di sɛnsman dɛn. Daniɛl aks di kiŋ fɔ mek i gi am sɔm tɛm. Dɔn in ɛn in padi dɛn pre to Jiova fɔ beg am fɔ mek i ɛp dɛn. Wetin Jiova bin du?

Insay wan vishɔn, Jiova sho Nɛbyukadnɛza in drim to Daniɛl, ɛn i sho am di minin. Di nɛks de, Daniɛl go to di kiŋ in savant ɛn tɛl am se: ‘Nɔ kil ɛniwan pan di sɛnsman dɛn. A ebul fɔ ɛksplen di kiŋ in drim.’ Di savant go wit Daniɛl to Nɛbyukadnɛza. Daniɛl tɛl di kiŋ se: ‘Gɔd dɔn sho yu wetin gɛt fɔ apin tumara bambay. Dis na wetin yu drim: Yu bin si wan big imej we in ed na gold, i gɛt silva chɛst ɛn an dɛn, in bɛlɛ ɛn lɛg dɛn na kɔpa, in fut dɛn na ayɛn, ɛn di to dɛn gɛt ayɛn we miks wit kle.’ Dɔn wan ston kɔt kɔmɔt frɔm wan mawntin ɛn kam nak di imej in fut. Di ston nyamanyama di imej, i tɔn pawda, ɛn briz blo am. Di ston tɔn to big big mawntin, ɛn i ful-ɔp di wan ol wɔl.’

Daniɛl tɔk se: ‘Dis na wetin yu drim min: Na yu kiŋdɔm na di gold ed. Di silva na wan kiŋdɔm we gɛt fɔ kam afta yu. Dɔn wan kiŋdɔm go de we go tan lɛk kɔpa, ɛn i go rul di wan ol wɔl. Di nɛks kiŋdɔm go strɔng lɛk ayɛn. Dɔn wan kiŋdɔm go de we go sheb, sɔm pat na di kiŋdɔm go strɔng lɛk ayɛn ɛn sɔm pat go wik lɛk kle. Di ston we tɔn to mawntin na Gɔd in Kiŋdɔm. I go nyamanyama ɔl dɛn kiŋdɔm dɛn ya, ɛn in yon kiŋdɔm go de sote go.’

Nɛbyukadnɛza butu wit in fes na grɔn bifo Daniɛl. I tɔk se: ‘Na yu Gɔd sho yu dis drim. No ɔda Gɔd nɔ de we tan lɛk am.’ Bifo Nɛbyukadnɛza kil Daniɛl, i mek Daniɛl de oba ɔl di sɛnsman dɛn, ɛn i mek i rul oba wan prɔvins na Babilɔn. Yu ebul fɔ si aw Jiova bin ansa Daniɛl in prea?