Dɛn Nɔ Gri Butu Bifo di Imej

Afta sɔm tɛm we Kiŋ Nɛbyukadnɛza bin gɛt di drim bɔt di imej, i mek wan big imej wit gold. I put di imej na di flat grɔn na Dura, ɛn i kɔl Shedrak, Mishak, Abɛdnigo, ɛn ɔl di impɔtant pipul dɛn na di land fɔ gɛda bifo di imej. Di kiŋ tɛl dɛn se: ‘As una yɛri dɛn blo di trɔmpɛt, di ap, ɛn di bagpayp dɛn, una butu bifo di imej! Wi go trowe ɛnibɔdi we nɔ gri fɔ butu bifo di imej insay big faya.’ Fɔ se di tri Ibru bɔbɔ dɛn go butu bifo di imej, ɔ na Jiova nɔmɔ dɛn go wɔship?

Di kiŋ tɛl di wan dɛn we de ple myuzik fɔ ple di myuzik. Ɔlman butu ɛn wɔship di imej, bɔt Shedrak, Mishak, ɛn Abɛdnigo nɔ gri fɔ du dat. Sɔm pan di pipul dɛn notis dis ɛn dɛn tɛl di kiŋ se: ‘Dɛn tri Ibru bɔbɔ dɛn nɔ gri fɔ wɔship di imej we yu mek.’ Nɛbyukadnɛza sɛn kɔl dɛn ɛn tɛl dɛn se: ‘A de gi una ɔda chans fɔ wɔship di imej. If una nɔ wɔship am, a go trowe una insay di big faya. No Gɔd nɔ de we go ebul fɔ sev una frɔm mi.’ Na de dɛn ansa am se: ‘Yu nɔ nid fɔ gi wi ɔda chans. Wi Gɔd ebul fɔ sev wi. Bɔt ivin if wi Gɔd nɔ sev wi, wi nɔ go wɔship di imej.’

Dis bin mek Nɛbyukadnɛza vɛks bad bad wan. I tɛl in man dɛn se: ‘Una mek di faya wam sɛvin tɛm pas aw i kin wam!’ Dɔn i tɛl in sojaman dɛn se: ‘Una tay dɛn man dɛn ya ɛn trowe dɛn insay di faya!’ Di faya bin rili wam, so we di sojaman dɛn go nia de, dat mek dɛn day wantɛm wantɛm. Di tri Ibru bɔbɔ dɛn fɔdɔm insay di faya. Bɔt we Nɛbyukadnɛza luk insay de, i kam fɔ si se na 4 man dɛn de waka insay di faya we i bi se na tri man dɛn, dɛn put insay de. Dat mek i rili fred ɛn aks in sojaman dɛn se: ‘Nɔto tri man dɛn wi trowe insay di faya? A de si 4, ɛn wan pan dɛn tan lɛk enjɛl!’

Nɛbyukadnɛza go nia di faya ɛn ala se: ‘Una kɔmɔt na do, una we na di Gɔd we De Pantap Ɔlman in savant dɛn!’ Ɔlman rili kɔle we dɛn si Shedrak, Mishak, ɛn Abɛdnigo kɔmɔt insay di faya ɛn natin nɔ du dɛn. Dɛn bɔdi, dɛn ia, ɛn dɛn klos nɔ bin bɔn, ɛn dɛn nɔ ivin smɛl lɛk udat kɔmɔt insay faya.

Nɛbyukadnɛza tɔk se: ‘Di Gɔd we Shedrak, Mishak, ɛn Abɛdnigo de wɔship rili pawaful. I sɛn in enjɛl ɛn sev dɛn. No gɔd nɔ de we tan lɛk dɛn Gɔd.’

Lɛk di tri Ibru bɔbɔ dɛn, yu dɔn mekɔp yu maynd fɔ kɔntinyu fɔ de biɛn Jiova ilɛk wetin apin?