Di Raytin na di Wɔl

Afta sɔm tɛm, Bɛlshaza bi di kiŋ na Babilɔn. Wan nɛt, i invayt wan tawzin pan di pipul dɛn we impɔtant pas ɔlman na di land na wan pati. I tɛl in savant dɛn fɔ kam wit di gold kɔp dɛn we Nɛbyukadnɛza bin tek na Jiova in tɛmpul. Bɛlshaza ɛn di wan dɛn we i invayt yuz di kɔp dɛn fɔ drink ɛn fɔ prez dɛn gɔd dɛn. Wantɛm wantɛm, wan man in an apia ɛn bigin rayt na di wɔl usay di pati de.

Bɛlshaza bin rili fred. I kɔl in majikman dɛn ɛn prɔmis dɛn se: ‘If ɛnibɔdi ebul fɔ ɛksplen wetin dɛn wɔd dɛn ya min, a go mek i bi di tɔd pawaful man na Babilɔn.’ Dɛn tray, bɔt dɛn nɔn nɔ ebul fɔ ɛksplen wetin di wɔd dɛn min. Di kwin kam insay ɛn tɔk se: ‘Wan man de we nem Daniɛl we bin de ɛksplen tin dɛn to Nɛbyukadnɛza. I go ebul fɔ tɛl yu wetin dɛn wɔd dɛn ya min.’

Daniɛl kam to di kiŋ. Bɛlshaza tɛl am se: ‘If yu ebul fɔ rid ɛn ɛksplen dɛn wɔd dɛn ya, a go gi yu wan gold chen, ɛn a go mek yu bi di tɔd pawaful man na Babilɔn.’ Daniɛl tɔk se: ‘A nɔ want yu gift dɛn, bɔt a go tɛl yu wetin dɛn wɔd dɛn ya min. Yu papa Nɛbyukadnɛza bin prawd, ɛn Jiova bin mek i put insɛf dɔŋ. Yu sabi ɔl wetin apin to yu papa, bɔt yu nɔ rɛspɛkt Jiova bay we yu yuz di gold kɔp dɛn na in tɛmpul fɔ drink wayn. Bɔt Gɔd dɔn rayt dɛn wɔd dɛn ya: Mini, Mini, Tikɛl, ɛn Pasin. Dɛn wɔd dɛn ya min se di pipul dɛn na Midia ɛn Pashia go win Babilɔn pan fɛt, ɛn yu nɔ go bi kiŋ igen.’

I bin tan lɛk se nɔbɔdi nɔ go ebul fɔ dɔnawe wit Babilɔn. Di siti bin gɛt ay wɔl dɛn ɛn riva we dip we bin de protɛkt dɛn. Bɔt da nɛt de, di pipul dɛn na Midia ɛn Pashia atak dɛn. Di Pashian kiŋ we nem Sayrɔs mek ɔda rod fɔ di wata so dat in ɛn in sojaman dɛn go ebul fɔ mach go ɔp na di siti get. We dɛn rich ɔp de, dɛn mit di get dɛn opin! Di sojaman dɛn go insay, dɛn dɔnawe wit di siti, ɛn kil di kiŋ. Dɔn Sayrɔs bi di kiŋ na Babilɔn.

Insay wan ia, Sayrɔs anawns se: ‘Jiova dɔn tɛl mi fɔ bil in tɛmpul bak na Jerusɛlɛm. Ɛniwan pan in pipul dɛn we want fɔ ɛp kin go fɔ go du di wok.’ So jɔs lɛk aw Jiova bin dɔn prɔmis, bɔku pan di Ju pipul dɛn bin go bak afta 70 ia we dɛn dɔnawe wit Jerusɛlɛm. Sayrɔs mek dɛn kɛr di gold ɛn silva kɔp dɛn ɛn ɔda tin dɛn we Nɛbyukadnɛza bin tek na di tɛmpul. Yu si aw Jiova bin yuz Sayrɔs fɔ ɛp in pipul dɛn?