Introdɔkshɔn

Skripchɔ dɛn bɔt Aw Kristian Fɔ Liv go mek i izi fɔ fɛn Baybul vas ɛn ɛgzampul dɛn we go ɛp yu fɔ bia wit di prɔblɛm dɛn we yu de gɛt. I go ɛp yu bak fɔ fɛn Baybul vas dɛn we yu go yuz fɔ ɛnkɔrej ɔda pipul dɛn ɛn ɛp dɛn fɔ disayd fɔ du tin dɛn we go mek Jiova gladi. Pik di tɔpik we yu want fɔ no bɔt, ɛn ɛni tɔpik gɛt kwɛstyɔn dɛn ɛn smɔl tɔk bɔt di Baybul vas dɛn we go ɛp yu. (Luk di bɔks “Aw fɔ Yuz Dis Pɔblikeshɔn?”) Yu go si bɔku fayn advays dɛn na Gɔd in Wɔd we go ɛp, gayd, ɛn ɛnkɔrej yu. Yu go fɛn fayn Baybul advays dɛn bak we yu go yuz fɔ ɛp ɔda pipul dɛn—Baybul vas dɛn we go mek dɛn fil fayn, ɛp dɛn wit dɛn prɔblɛm dɛn ɛn gi dɛn fayn advays ɛn ɛnkɔrej dɛn.

Aw fɔ Yuz Dis Pɔblikeshɔn?

Fɔ fɛn ɛni tɔpik, yuz di sach bɔks ɔ wach di difrɛn sɛkshɔn dɛn. Dɛn sheb di Skripchɔ dɛn bɔt Aw Kristian Fɔ Liv to sɛvin sɛkshɔn dɛn: Prɔblɛm Dɛn, Gud ɛn Bad Abit Dɛn, Kɔngrigeshɔn, Aw fɔ Liv Ɛvride, Famili, Padi Biznɛs wit Jiova, ɛn Kwaliti Dɛn. Sɔntɛm di tɔpik we yu pik go de ɔnda wan pan dɛn sɛkshɔn dɛn ya. Pik di sɛkshɔn we yu want ɛn skrol fɔ pik di tɔpik we yu de luk fɔ. Bɔt, if yu nɔ shɔ us sɛkshɔn fɔ wach fɔ di tɔpik we yu want fɔ no bɔt, klik di say we se Ɔl ɛn skrol dɔŋ di list te yu si di tɔpik we yu de fɛn. Ɔnda ɛni tɔpik, yu go si edin dɛn we bold. Sɔm na sɛntɛns ɛn ɔda wan dɛn na kwɛstyɔn dɛn. As yu de rid di vas dɛn we dɛn nɔ kot we bold we de ɔnda di edin, tray fɔ tink bɔt aw dat ansa di kwɛstyɔn ɔ sɔpɔt di sɛntɛns we de ɔp. Na sɔm say dɛn, dɛn sheb wan tɔpik to smɔl smɔl tɔpik dɛn fɔ ɛp yu fɛn wetin yu want kwik. Ɔdasay dɛn, dɛn put sɔm vas dɛn nia di say we se, “Luk bak”. Dɛn vas dɛn ya tɔk sɔntin bɔt di tɔpik. Na bɔku say dɛn, yu go si bak di say we se “Impɔtant Baybul ɛgzampul (dɛn) we go ɛp yu.” Wan sɛntɛns de tɔk bɔt di men pɔynt ɔ di lɛsin we de na di skripchɔ we dɛn nɔ kot. As yu de rid di skripchɔ, yuz di sɛntɛns we de de fɔ ɛp yu fɔ tink.

Nɔto ɔl di skripchɔ dɛn we de tɔk bɔt ɛni patikyula tɔpik dɛn put insay dis buk. Dis buk go ɛp yu fɔ stat fɔ fɛn skripchɔ dɛn we yu de du risach bɔt ɛni tɔpik we yu go want fɔ no bɔt. (Prɔ 2:1-6) Fɔ mek yu ebul lan mɔ, yuz di majinal rɛfrɛns ɛn di stɔdi not dɛn na di Inglish New World Translation of the Holy Scriptures. Yuz di Risach Gayd fɔ Jiova Witnɛs Dɛn ɔ di Watch Tower Publications Index fɔ stɔdi mɔ bɔt wetin di skripchɔ dɛn min ɛn aw fɔ aplay dɛn. Yuz di rɛfrɛns dɛn we nyu fɔ mek yu go no aw dɛn dɔn ɛksplen di skripchɔ dɛn dis biɛn tɛm.

Wi op se dis buk Skripchɔ dɛn bɔt Aw Kristian Fɔ Liv go ɛp yu fɔ gɛt sɛns ɛn ɔndastand wetin de insay di Oli Skripchɔ dɛn. As yu de yuz dis pɔblikeshɔn, yu go gɛt mɔ kɔnfidɛns se “Gɔd in wɔd de alayv ɛn i gɛt pawa.”—Ibr 4:12.