Julay

Jizɔs bin de falamakata di we aw in Papa de tink ɛn fil pan ɔltin we i bin de se ɛn du pafɛkt wan, ivin di mirekul dɛn we i bin de pafɔm. (Jɔn 14:9) Wetin wi go lan frɔm di mirekul dɛn we Jizɔs bin pafɔm? Jizɔs ɛn in Papa rili lɛk wi. We Jizɔs bin de na di wɔl, i bin sho se i rili lɛk pipul dɛn bay we i bin de yuz in pawa fɔ pafɔm mirekul fɔ ɛp di wan dɛn we bin de sɔfa. Wan tɛm, tu blaynman dɛn bin beg am fɔ ɛp dɛn. (Mat. 20:30-34.) Notis se Jizɔs bin ‘sɔri fɔ dɛn,’ ɛn i bin mɛn dɛn. Di Grik vab we dɛn yuz fɔ translet di wɔd dɛn ‘sɔri fɔ dɛn,’ min di kayn sɔri-at we pɔsin de fil insay insay in bɔdi. Da kayn sɔri-at de, we na wan we aw Jizɔs bin de sho se i lɛk pipul dɛn, bin muv am bak fɔ fid di wan dɛn we bin angri ɛn mɛn wan man we bin gɛt lɛprɔsi. (Mat. 15:32; Mak 1:41) Wi shɔ se Jiova we na di Gɔd we “rili gɛt sɔri-at,” ɛn in Pikin rili lɛk wi, ɛn dɛn de fil am we dɛn de si wi de sɔfa. (Lyuk 1:78; 1 Pit. 5:7) Dɛn rili want fɔ pul ɔl di prɔblɛm dɛn we de mek wi sɔfa! w23.04 3 ¶4-5

Wi kin du wi bɛst fɔ avɔyd fɔ rid ɛn lisin to rɔng tin dɛn we kɔmɔn na Setan in wɔl. Wi go ebul put tin dɛn na wi maynd we fayn bay we wi de rid ɛn stɔdi di Baybul. We wi de atɛnd di mitin dɛn ɛn du di prichin wok, dat bak go gayd di we aw wi de tink. Ɛn Jiova prɔmis se i nɔ go alaw tɛmteshɔn we wi nɔ ebul fɔ bia fɔ mit wi. (1 Kɔr. 10:12, 13) Wi ɔl nid fɔ pre naw pas ɛni ɔda tɛm fɔ kɔntinyu fɔ fetful to Jiova insay dis las dez we tin nɔ rili izi. Prez Jiova ɛn tɛl am tɛnki fɔ ɔl wetin i de du. Aks am fɔ ɛp yu fɔ gɛt maynd fɔ du di prichin wok. Beg am fɔ ɛp yu fɔ bia ɛni prɔblɛm ɛn fɔ mek yu nɔ du bad we sɔntin tɛmt yu. Nɔ alaw ɛnitin ɔ ɛnibɔdi fɔ stɔp yu fɔ mek yu nɔ pre to Jiova ɔltɛm. w23.05 7 ¶17-18

Wetin mek wi kin atɛnd wi mitin dɛn na wi kɔngrigeshɔn? Di men rizin na fɔ prez Jiova. (Sam 26:12; 111:1) Wi kin atɛnd mitin bak fɔ ɛnkɔrej wi kɔmpin dɛn insay dis tɛm we nɔ izi. (1 Tɛs. 5:11) Wi de ɛp fɔ du dɛn tu tin dɛn ya ɛnitɛm we wi es wi an ɛn gi kɔmɛnt. Bɔt sɔm tin dɛn de we kin mek i nɔ izi fɔ lɛ wi gi kɔmɛnt. Sɔntɛm wi de fred fɔ gi kɔmɛnt, ɔ wi go rili want fɔ gi mɔ kɔmɛnt, bɔt sɔntɛnde di brɔda dɛn nɔ kin kɔl wi we wi es wi an. Wetin go ɛp wi if ɛniwan pan dɛn tu tin dɛn ya de apin to wi? Apɔsul Pɔl bin tɔk se wi fɔ pe atɛnshɔn fɔ “ɛnkɔrej wi kɔmpin dɛn.” We wi mɛmba se wi kin ɛnkɔrej ɔda pipul dɛn na di ɔdiɛns bay we wi de gi simpul kɔmɛnt dɛn we de tɔk bɔt wi fet, dat go ɛp wi fɔ lɛ wi nɔ fred fɔ es wi an. Ɛn if dɛn nɔ kɔl wi ɔltɛm, wi go gladi we ɔda pipul dɛn na di kɔngrigeshɔn gɛt chans fɔ gi kɔmɛnt.​—1 Pit. 3:8. w23.04 20 ¶1-3

Di Kiŋ bin dɔn mek di anawnsmɛnt! Di Ju dɛn we dɛn bin ol na Babilɔn fɔ lɛk 70 ia dɔn fri fɔ go bak na dɛn om-tɔŋ we na Izrɛl. (Ɛzra 1:2-4.) Na Jiova nɔmɔ go dɔn ebul fɔ du dis. Di Babilonian dɛn nɔ de fri di wan dɛn we dɛn kech. (Ayz. 14:4, 17) Bɔt dɛn bin dɔn tek ova Babilɔn ɛn di nyu kiŋ bin tɛl di Ju dɛn se dɛn fɔ lɛf. So dat bin mek ɔl di Ju dɛn, mɔ di wan dɛn we de bifo na dɛn famili, bin gɛt fɔ disayd if dɛn go kɔmɔt na Babilɔn ɔ dɛn go kɔntinyu fɔ de de. I go bi se na tin we nɔ bin izi fɔ disayd. I go bi se bɔku pan dɛn bin dɔn ol, so i nɔ go izi fɔ mek dɛn travul fɔ lɔng tɛm. Ɛn bikɔs bɔku pan di Ju dɛn bɔn na Babilɔn, dɛn bin de si de as dɛn om. Na de nɔmɔ dɛn bin sabi. To dɛn, Izrɛl na bin dɛn granpa dɛn land. Sɔm Ju dɛn go dɔn gɛt bɔku jɛntri na Babilɔn, so i nɔ bin izi fɔ mek dɛn lɛf dɛn biznɛs ɔ fayn os dɛn ɛn go sɛtul na say we dɛn nɔ sabi. w23.05 14 ¶1-2

Gɔd in Wɔd de ɛnkɔrej wi fɔ kɔntinyu fɔ bia, fɔ sho sɔri-at, ɛn fɔ gɛt lɔv. Lyuk 21:19 se: “We una bia, una go sev una layf.” Koloshians 3:12 se: “Una go de rili sho . . . sɔri-at.” Ɛn 1 Tɛsalonians 4:9, 10 se: “Gɔd bin dɔn tich una fɔ lɛk una kɔmpin dɛn. . . . Bɔt, wi brɔda dɛn, wi de beg una fɔ kɔntinyu fɔ du am mɔ ɛn mɔ.” Dɛn rayt ɔl dɛn wɔd dɛn ya to disaypul dɛn we bin ɔlrɛdi de bia, we bin gɛt sɔri-at, ɛn lɔv. Bɔt dɛn bin nid fɔ kɔntinyu fɔ lan aw fɔ sho dɛn kwaliti dɛn de. Wisɛf fɔ du di sem tin. Fɔ ɛp yu fɔ gɛt dɛn kwaliti dɛn de, wi go tɔk bɔt aw di fɔstɛm Kristian dɛn bin de sho ɔl dɛn kwaliti dɛn de. Dɔn yu go si aw yu go falamakata dɛn disaypul dɛn de ɛn sho se yu rɛdi fɔ da big big trɔbul. Dɔn we da big big trɔbul go bigin, yu go dɔn lan aw fɔ bia, ɛn yu go mekɔp yu maynd fɔ kɔntinyu fɔ bia. w23.07 3 ¶4, 8

Ilɛk wi na anɔyntɛd Kristian ɔ “ɔda ship,” wi nid fɔ kɔntinyu fɔ de na “di Oli Rod” bikɔs i go ɛp wi fɔ kɔntinyu fɔ wɔship Jiova naw ɛn tumara bambay we di Kiŋdɔm go briŋ wɔndaful blɛsin dɛn na di wɔl. (Jɔn 10:16) Frɔm 1919 afta Krays, bɔku bɔku man dɛn, uman dɛn, ɛn pikin dɛn dɔn lɛf Babilɔn di Gret we na di mama fɔ lay lay rilijɔn, ɛn dɛn dɔn bigin fɔ travul na da rod de. Jiova bin mek shɔ se i pul ɛnitin we go ambɔg di Ju dɛn we dɛn bin de kɔmɔt na Bibilɔn. (Ayz. 57:14) Wetin wi go se bɔt di “Oli Rod” insay wi yon tɛm? Lɔng tɛm bifo di ia 1919, Jiova bin dɔn stat fɔ yuz man dɛn we bin gɛt dip rɛspɛkt fɔ am fɔ ɛp ɔda pipul dɛn fɔ kɔmɔt na Babilɔn di Gret. (Luk bak Ayzaya 40:3.) Dɛn bin du impɔtant wok fɔ mek i go pɔsibul leta fɔ lɛ pipul dɛn we want fɔ lan bɔt Jiova kɔmɔt insay lay lay rilijɔn ɛn wɔship Jiova wit in pipul dɛn. w23.05 15-16 ¶8-9

Jiova want wi fɔ gladi we wi de sav am ɛn fɔ du am wit ɔl wi at. (2 Kɔr. 9:7) So fɔ se wi fɔ kɔntinyu fɔ tray tranga wan fɔ rich wan spirichwal gol ilɛksɛf wi nɔ want fɔ du dat? Lɛ wi tɔk bɔt apɔsul Pɔl in ɛgzampul. I bin tɔk se: “A de sɔfa mi bɔdi ɛn trit am lɛk slev.” (1 Kɔr. 9:25-27 futnot.) Pɔl bin fos insɛf fɔ du wetin bin rayt pan ɔl we sɔntɛnde i nɔ bin want fɔ du am. Fɔ se Jiova bin gladi fɔ wetin Pɔl bin du fɔ am? Wan dawt nɔ de se i bin gladi. Jiova bin blɛs am fɔ ɔl wetin i bin du. (2 Tim. 4:7, 8) Semweso, Jiova kin gladi fɔ si we wi de tray tranga wan fɔ rich wi gol pan ɔl we wi nɔ gɛt sɔntin we de muv wi fɔ du am. I kin gladi bikɔs i no se pan ɔl we wi nɔ lɛk di wok we wi de du, wi de du am bikɔs wi lɛk am. Jɔs lɛk aw Jiova bin blɛs Pɔl, na so i go blɛs wi bak fɔ ɔl wetin wi de du fɔ am. (Sam 126:5) As wi de si aw Jiova de blɛs wi, sɔntɛm dat go muv wi fɔ du mɔ. w23.05 29 ¶9-10

Apɔsul Pɔl bin kɔmpia di wan dɛn we nɔ go sev di tɛm fɔ Jiova in de to pipul dɛn we de slip. Dɛn nɔ no wetin de apin arawnd dɛn ɔ di go we tɛm de go. So dɛn nɔ kin no we impɔtant tin dɛn de apin ɛn dɛn nɔ ebul du natin bɔt dɛn. I tan lɛk se bɔku pipul dɛn tide de slip. (Rom. 11:8) Dɛn nɔ biliv se di tin dɛn we de apin de sho se wi de insay “di las dez” ɛn da big big trɔbul go kam jisnɔ. (2 Pit. 3:3, 4) Bɔt ɛvride, wi de si se i rili impɔtant fɔ mek wi nɔ slip. Wetin mek? Na bikɔs dat go ɛp wi fɔ mek wi nɔ put an pan pɔlitiks ɛn di tin dɛn we de apin arawnd wi tide. Di mɔ Jiova in de de kam nia, na di mɔ wi go gɛt prɛzhɔ fɔ put an pan dɛn tin dɛn ya. Bɔt stil, wi nɔ nid fɔ wɔri bɔt wetin wi go du. God in spirit go ɛp wi fɔ mek wi nɔ wɔri, mek wi ebul fɔ tink di rayt we, ɛn disayd fɔ du di rayt tin dɛn.​—Lyuk 12:11, 12. w23.06 10 ¶6-7

Wetin de kam na yu maynd we yu yɛri Samsin in nem? Sɔntɛm yu go tink bɔt wan man we bin rili gɛt trɛnk. Dat na tru. Bɔt Samsin bin mek mistek, ɛn dat bin mek bad tin dɛn apin to am. Pan ɔl dat, Jiova bin pe atɛnshɔn pan ɔl di tin dɛn we Samsin bin du fɔ sav am. Ɛn Gɔd bin mek dɛn rayt na di Baybul bɔt aw Samsin bin fetful fɔ mek wi bɛnifit. Jiova bin yuz Samsin fɔ du wɔndaful tin dɛn fɔ ɛp In pipul dɛn we na di Izrɛlayt dɛn. Lɔng tɛm afta Samsin day, Jiova bin mek apɔsul Pɔl rayt Samsin in nem na wan list we de tɔk bɔt man dɛn we bin rili gɛt fet. (Ibru. 11:32-34) Samsin in ɛgzampul kin ɛnkɔrej wi. I bin abop pan Jiova ivin we tin nɔ bin rili izi fɔ am. Wi go ebul lan frɔm Samsin ɛn in ɛgzampul go ɛnkɔrej wi. w23.09 2 ¶1-2

Wi go ebul fɔ bia bay we wi de pre to Jiova ɔltɛm ɛn tɛl am bɔt ɔl wi prɔblɛm dɛn. (1 Tɛs. 5:17) Sɔntɛm yu nɔ gɛt siriɔs prɔblɛm rayt naw. Bɔt yu kin pre to Jiova ɛn aks am fɔ mek i ɛp yu ɛnitɛm we yu at wam, we yu kɔnfyus, ɔ we yu nɔ no wetin fɔ du? If yu de pre ɔltɛm to wi Gɔd fɔ mek i ɛp yu wit yu smɔl prɔblɛm dɛn naw, tumara bambay we yu gɛt big prɔblɛm, yu nɔ go westɛm fɔ pre to Gɔd. Dat go mek yu gɛt kɔnfidɛns se i no di patikyula tɛm fɔ ɛp yu ɛn wetin i fɔ du fɔ ɛp yu. (Sam 27:1, 3) If wi kɔntinyu fɔ fetful to Jiova we wi gɛt prɔblɛm dɛn naw, wi go ebul fɔ bia da big big trɔbul tumara bambay. (Rom. 5:3) Wetin mek wi se so? Bɔku brɔda dɛn tɔk se ɛnitɛm we dɛn bia prɔblɛm we nɔ izi, dat de ɛp dɛn fɔ bia ɔda prɔblɛm we go mit dɛn. We Jiova ɛp dɛn fɔ bia dɛn prɔblɛm, dat de ɛp dɛn fɔ gɛt mɔ fet se Jiova rili want fɔ ɛp dɛn. Ɛn bikɔs dɛn gɛt fet pan Jiova, dɛn go ebul fɔ bia ɔda prɔblɛm.​—Jems 1:2-4. w23.07 3 ¶7-8

Na bikɔs Jiova ɔmbul ɛn de sho sɔri-at na dat mek i nɔ de pin pan sɔntin. Fɔ ɛgzampul, Jiova bin sho se i ɔmbul we i bin want fɔ dɔnawe wit di wikɛd pipul dɛn na Sɔdɔm. I bin mek in enjɛl dɛn tɛl Lɔt we na man we bin de du wetin rayt fɔ rɔn go na di eria usay mawntin dɛn de. Lɔt bin de fred fɔ go de. So i bin beg fɔ mek in ɛn in famili go na Zoa, we na wan smɔl tɔŋ we Jiova bin dɔn disayd fɔ dɔnawe wit. Jiova bin fɔ dɔn pin se Lɔt fɔ du wetin I tɛl am. Bifo dat, i bin alaw Lɔt fɔ du wetin i want pan ɔl we dat min se i nɔ go dɔnawe wit Zoa. (Jɛn. 19:18-22) Lɔng tɛm afta dat, Jiova bin sho di pipul dɛn na Ninivɛ se i gɛt sɔri-at. I bin tɛl in prɔfɛt we na Jona fɔ go tɛl di pipul dɛn se i go dɔnawe wit di siti ɛn di wikɛd pipul dɛn we de de, ɛn natin nɔ go pwɛl dat. Bɔt we di Ninivayt dɛn ripɛnt, Jiova bin fil sɔri fɔ dɛn ɛn nɔ dɔnawe wit di siti.​—Jona 3:1, 10; 4:10, 11. w23.07 21 ¶5

Wetin wi kin lan frɔm Jɛoash in ɛgzampul? I bin tan lɛk tik we nɔ gɛt strɔng rut dɛn, ɛn we abop pan pol fɔ sɔpɔt am. Afta Jɛoayda we bin de sɔpɔt am day ɛn Jɛoash bigin lisin to pipul dɛn we bin de tɔk lay lay tin dɛn bɔt Jiova, i nɔ bin kɔntinyu fɔ fetful to Jiova. Dis ɛgzampul de sho se wi nɔ fɔ obe Gɔd jɔs bikɔs wi famili ɛn ɔda pipul dɛn na di kɔngrigeshɔn de sɛt fayn ɛgzampul fɔ wi. Fɔ mek wi kɔntinyu fɔ de nia Jiova, wi fɔ lɛk ɛn rɛspɛkt am mɔ ɛn mɔ bay we wi de stɔdi ɔltɛm, tink gud wan bɔt wetin wi de lan, ɛn pre. (Jɛr. 17:7, 8; Kol. 2:6, 7) Jiova nɔ de tɛl wi fɔ du bɔku bɔku tin dɛn. Wetin i want wi fɔ du de na Ɛkliziastis 12:13, we se: “Fred Jiova ɛn du wetin i se fɔ du; bikɔs na dat nɔmɔ mɔtalman gɛt fɔ de du.” We wi de fred Gɔd, wi go ebul fɔ kɔntinyu fɔ de biɛn Jiova ilɛk wetin go apin tumara bambay. Natin nɔ go ebul pwɛl wi padi biznɛs wit Jiova. w23.06 19 ¶17-19

Vas 5 bigin wit dɛn wɔd dɛn ya: “Di Wan we sidɔm na di tron se.” (Rɛv. 21:5a) Dɛn wɔd dɛn ya rili spɛshal bikɔs dis na wan pan di 3 tɛm dɛn insay di Baybul buk we nem Rɛvɛleshɔn we Jiova insɛf sɛf tɔk. So nɔto enjɛl, ɔ ivin Jizɔs bin gi wi dis garanti, bɔt na Jiova insɛf sɛf! Dɛn wɔd dɛn ya sho se wi kin biliv wit ɔl wi at di tin dɛn we i tɔk afta dat. Wetin mek? Na bikɔs Jiova “nɔ de lay.” (Tay. 1:2) Wan dawt nɔ de se di wɔd dɛn we wi rid na Rɛvɛleshɔn 21:5, 6 go mɔs kam tru. Jiova tɔk se “Luk!” Dɛn yuz di Grik wɔd we dɛn translet “luk” bɔku tɛm insay di Baybul buk we nem Rɛvɛleshɔn. Wetin na di nɛks tin we Gɔd tɔk? Gɔd tɔk se: “A de mek ɔltin nyu.” Jiova go mek dɛn chenj dɛn ya tumara bambay. Bɔt bikɔs i rili biliv se i go mek in prɔmis kam tru, i tɔk lɛk se i dɔn ɔlrɛdi du dɛn tin dɛn de.​—Ayz. 46:10. w23.11 3-4 ¶7-8

Pan ɔl di tin dɛn we apɔsul Pita bin si ɛn yɛri, i bin stil de mek mistek dɛn. Tink bɔt sɔm ɛgzampul dɛn. We Jizɔs bin de ɛksplen bɔt aw i go sɔfa ɛn day fɔ mek wetin di Baybul tɔk kam tru, Pita bin tɛl Jizɔs se dat nɔ go apin to am. (Mak 8:31-33) Bɔku tɛm, Pita ɛn di ɔda apɔsul dɛn bin de agyu bɔt udat impɔtant pas dɛn ɔl. (Mak 9:33, 34) Di nɛt bifo Jizɔs day, Pita bin atak wan man ɛn kɔt in yes. (Jɔn 18:10) Da sem nɛt de, Pita bin fred ɛn tri tɛm i dinay se i nɔ sabi in padi Jizɔs. (Mak 14:66-72) Dat bin mek Pita kray bita bita wan. Jizɔs nɔ bin giv-ɔp pan in apɔsul we bin gɛt pwɛlat. Afta Jizɔs gɛt layf bak, i bin gi Pita di chans fɔ mek Pita sho se i stil lɛk am. Jizɔs bin tɛl Pita fɔ mɛn in ship dɛn. (Jɔn 21:15-17) Pita bin rɛdi fɔ du wetin Jizɔs tɛl am fɔ du. I bin de na Jerusɛlɛm di de fɔ Pɛntikɔst, ɛn in na wan pan di fɔs pipul dɛn we Gɔd bin anɔynt wit oli spirit. w23.09 22 ¶6-7

Apɔsul Pita bin ɛnkɔrej in kɔmpin ɛlda dɛn fɔ “mɛn Gɔd in ship dɛn.” (1 Pit. 5:1-4.) If yu na ɛlda, wi no se yu lɛk yu brɔda ɛn sista dɛn ɛn yu want fɔ kia fɔ dɛn. Bɔt sɔntɛnde, yu go fil se yu rili bizi ɔ yu rili taya ɛn yu nɔ go ebul fɔ du da wok de. Wetin yu go du? Pre to Jiova ɛn tɛl am aw yu de fil. Pita bin rayt se: “If ɛnibɔdi de wok, lɛ i du am lɛk se i abop pan di trɛnk we Gɔd de gi.” (1 Pit. 4:11) Sɔntɛm yu brɔda ɛn sista dɛn gɛt prɔblɛm dɛn we nɔ go sɔlv insay dis wikɛd wɔl. Bɔt mɛmba se “di chif shɛpad,” we na Jizɔs Krays, go ebul ɛp dɛn pas ɛnibɔdi. I go ebul du dat naw ɛn insay di nyu wɔl. Wetin Jiova want di ɛlda dɛn fɔ du na fɔ lɛk dɛn brɔda ɛn sista dɛn, fɔ kia fɔ dɛn, ɛn “bi ɛgzampul to di ship dɛn.” w23.09 29-30 ¶13-14

Wi nid fɔ avɔyd di we aw pipul dɛn we nɔ de obe Jiova in lɔ de tink. If wi de tink lɛk pipul dɛn we nɔ de obe Jiova in lɔ, sɔntɛm wisɛf go bigin fɔ lɛf fɔ fala Jiova ɛn in lɔ dɛn. (1 Kɔr. 3:19) Bɔku tɛm, “di sɛns na dis wɔl” de mek pipul dɛn nɔ obe Gɔd. Sɔm Kristian dɛn bin de na Pagamɔm ɛn Tayatayra we bin de falamakata pipul dɛn we bin de arawnd dɛn we bin de du mami ɛn dadi biznɛs di we aw Gɔd nɔ want ɛn we bin de wɔship aydɔl dɛn. Jizɔs bin gi strɔng advays to dɛn tu kɔngrigeshɔn dɛn de bikɔs dɛn bin de alaw mami ɛn dadi biznɛs di we aw Gɔd nɔ want. (Rɛv. 2:14, 20) Tide, pipul dɛn we de arawnd wi de tray fɔ mek wi gri wit di rɔng we aw dɛn de tink. Sɔntɛm wi fambul dɛn ɛn ɔda pipul dɛn we wi sabi go tray fɔ mek wi biliv se wi strikt tumɔs ɛn dɛn go ɛnkɔrej wi fɔ pwɛl Jiova in lɔ. Fɔ ɛgzampul, dɛn go se i nɔ impɔtant fɔ lɛ wi kɔntinyu fɔ bi pipul dɛn we klin na Jiova in yay, ɛn di Baybul in lɔ dɛn bɔt mami ɛn dadi biznɛs dɔn kɔmɔt na stayl. Sɔntɛm, tɛm dɛn kin de we wi go tink se di dayrɛkshɔn we Jiova de gi wi nɔ rili klia. Sɔntɛm dat go ivin tɛmt wi fɔ lɛ wi du pas “di tin dɛn we dɛn dɔn rayt.”​—1 Kɔr. 4:6. w23.07 16 ¶10-11

Jizɔs in mama Meri bin nid fɔ gɛt maynd. I nɔ bin dɔn mared yet bɔt i bin fɔ gɛt bɛlɛ. I nɔ bin dɔn mɛn pikin dɛn yet, bɔt i go gɛt fɔ kia fɔ di pikin we go bi di Mɛsaya. Ɛn bikɔs i nɔ wande du mami ɛn dadi biznɛs, aw Meri go ɛksplen to Josɛf we fɔ mared am se i dɔn gɛt bɛlɛ? (Lyuk 1:26-33) Aw Meri bin ebul fɔ gɛt maynd? I bin alaw ɔda pipul dɛn fɔ ɛp am. Fɔ ɛgzampul, i bin aks Gebrɛl fɔ tɛl am mɔ bɔt dis wok. (Lyuk 1:34) Shɔt tɛm afta dat, i bin travul go na “wan eria usay mawntin dɛn de” na Juda fɔ go fɛn in fambul we na Ilizabɛt. Ilizabɛt bin ɛnkɔrej Meri bay we i tɛl am tɛnki ɛn Jiova bin yuz am fɔ tɔk bɔt wan prɔfɛsi we gɛt fɔ du wit Meri in pikin we i gɛt fɔ kam bɔn. (Lyuk 1:39-45.) Meri tɔk se Jiova “dɔn du pawaful tin dɛn wit in an.” (Lyuk 1:46-51) Jiova bin yuz Gebrɛl ɛn Ilizabɛt fɔ gi Meri di ɛnkɔrejmɛnt we i bin nid. w23.10 14-15 ¶10-12

Jiova dɔn anɔynt sɔm pan Krays in disaypul dɛn wit oli spirit, ɛn dɛn de ɛnjɔy spɛshal padi biznɛs wit Jiova. Dɛn 144,000 disaypul dɛn ya go sav as prist na ɛvin wit Jizɔs. (Rɛv. 14:1) Di Ples we Oli na di tabanakul tinap fɔ di adɔpt we Gɔd dɔn adɔpt dɛn as in spirichwal pikin dɛn we dɛn stil de na di wɔl. (Rom. 8:15-17) Di Ples we Oli Pas Ɔl na di tabanakul tinap fɔ ɛvin, usay Jiova de. “Di kɔtin” we de bitwin di Ples we Oli ɛn di Ples we Oli Pas Ɔl tinap fɔ Jizɔs in pafɛkt mɔtalman bɔdi. As lɔng as i bin gɛt mɔtalman bɔdi, i nɔ go ebul go na ɛvin as di wɔndaful Ay Prist fɔ Jiova in spirichwal tɛmpul. We Jizɔs bin gi in mɔtalman bɔdi as sakrifays fɔ ɔl mɔtalman, i bin mek ɔl anɔyntɛd Kristian dɛn gɛt di chans fɔ go na ɛvin. Dɛnsɛf go nid fɔ giv-ɔp dɛn mɔtalman bɔdi fɔ mek dɛn go ebul fɔ go na ɛvin.​—Ibru. 10:19, 20; 1 Kɔr. 15:50. w23.10 28 ¶13

Gidiɔn nɔ bin vɛks we di Ifremayt dɛn tɔk bad bɔt am. (Jɔj 8:1-3) I nɔ bin vɛks we i bin de ansa dɛn. I bin sho se in na man we ɔmbul bay we i bin lisin to di tin dɛn we bin de mɔna dɛn, ɛn i bin tɔk fayn to dɛn, ɛn dat bin mek dɛn at kol. Ɛlda dɛn we gɛt sɛns de falamakata Gidiɔn bay we dɛn de tek tɛm lisin ɛn tɔk fayn we ɔda pipul dɛn tɔk bad bɔt dɛn. (Jems 3:13.) So dɛn de ɛp fɔ mek pis de na di kɔngrigeshɔn. We pipul dɛn bin prez Gidiɔn fɔ di win we i win di Midianayt dɛn pan fɛt, na Jiova i bin gi di prez. (Jɔj 8:22, 23) Aw ɛlda dɛn go falamakata Gidiɔn? Dɛn fɔ gi Jiova di prez fɔ di tin dɛn we dɛn ebul fɔ du. (1 Kɔr. 4:6, 7) Fɔ ɛgzampul, if dɛn prez wan ɛlda fɔ we i sabi tich fayn fayn wan, i fɔ mek dɛn no se di tin dɛn we i de tich na frɔm Gɔd in Wɔd ɛn wi ɔl de lan frɔm Jiova in ɔganayzeshɔn. Ɛlda dɛn go ebul fɔ tink if di we aw dɛn de tich de ɔnɔ Jiova ɔ dɛn want mek pipul dɛn kɔle dɛn. w23.06 4 ¶7-8

If wi nɔ gɛt wetin wi pre fɔ, sɔntɛm i go fayn fɔ mek wi aks wisɛf, ‘A de pre fɔ di rayt tin?’ Bɔku tɛm, wi kin tink se wi no wetin gud fɔ wi. Bɔt as tɛm de go, di tin dɛn we wi kin aks fɔ nɔ kin bɛnifit wi. If wi de pre bɔt wan patikyula prɔblɛm, sɔntɛm ɔda we go de fɔ sɔlv di prɔblɛm we bɛtɛ pas di wan we wi de pre fɔ. Ɛn sɔm pan di tin dɛn we wi kin aks fɔ nɔ kin gri wit wetin Jiova want. (1 Jɔn 5:14) Fɔ ɛgzampul, lɛ wi tɔk bɔt di ɛgzampul bɔt mama ɛn papa dɛn we de pre to Jiova fɔ mek dɛn pikin kɔntinyu fɔ de na di trut. Dat luk lɛk fayn prea. Bɔt, Jiova nɔ go fos ɛnibɔdi fɔ wɔship am. I want mek wi ɛn ivin wi pikin dɛn fɔ disayd fɔ wɔship am fɔ wisɛf. (Dyu. 10:12, 13; 30:19, 20) So di mama ɛn papa kin aks Jiova fɔ ɛp dɛn so dat dɛn go ebul fɔ tɔk to dɛn pikin di kayn we we go rich in at, so dat i go lɛk Jiova ɛn bi In padi.​—Prɔv. 22:6; Ɛfi. 6:4. w23.11 21 ¶5; 23 ¶12

Wetin mek fɔ kɔrej pɔsin na impɔtant we fɔ sho se wi lɛk am? Wan buk we de tɔk bɔt di Baybul bin se di wɔd we Pɔl yuz fɔ “kɔrej” min “fɔ tinap nia pɔsin fɔ ɛnkɔrej am we i gɛt siriɔs prɔblɛm.” So we wi de kɔrej wi kɔmpin Kristian we gɛt prɔblɛm, wi de ɛp am fɔ kɔntinyu fɔ sav Jiova fetful wan. Ɛnitɛm wi kɔrej wi brɔda ɔ sista, wi de sho am se wi lɛk am.—(2 Kɔr. 7:6, 7, 13) Fɔ gɛt sɔri-at gɛt sɔntin fɔ du wit fɔ kɔrej pipul dɛn. Aw? We pɔsin gɛt sɔri-at fɔ ɔda pipul dɛn, i de kɔrej dɛn ɛn tray fɔ ɛp dɛn wit dɛn prɔblɛm. So we wi de sɔri fɔ pipul dɛn, dat de ɛp wi fɔ kɔrej dɛn. Notis aw Pɔl ɛksplen se Jiova in sɔri-at de mek I kɔrej pipul dɛn. Pɔl kɔl Jiova “di Papa we rili gɛt sɔri-at ɛn di Gɔd we de kɔrej pɔsin pan ɔltin.”​—2 Kɔr. 1:3. w23.11 9-10 ¶8-10

Ɔlman we na Krays in disaypul fɔ ɛkspɛkt se prɔblɛm go mit am. Tink bɔt apɔsul Pɔl in ɛgzampul. I bin tɛl di Kristian dɛn na Tɛsalonayka se: “We wi bin de wit una, wi bin de tɛl una bifo tɛm se wi go sɔfa, ɛn na dat dɔn apin.” (1 Tɛs. 3:4) Ɛn i bin rayt to di Kristian dɛn na Kɔrint se: “Wi want mek una no bɔt di prɔblɛm dɛn we mit wi . . . Wi nɔ bin ivin shɔ if wi go kɔntinyu fɔ liv.” (2 Kɔr. 1:8; 11:23-27) Kristian dɛn bak tide fɔ ɛkspɛkt se prɔblɛm go mit dɛn. (2 Tim. 3:12) Bikɔs yu put fet pan Jizɔs ɛn bi in disaypul, sɔntɛm yu padi ɛn fambul dɛn detrit yu bad. Prɔblɛm dɔn mit yu na yu wokples bikɔs yu dɔn mekɔp yu maynd fɔ ɔnɛs pan ɔltin? (Ibru. 13:18) Di gɔvmɛnt de agens yu bikɔs yu prich to ɔda pipul dɛn bɔt yu op? Ilɛk uskayn prɔblɛm go mit wi, Pɔl se wi fɔ gladi. w23.12 10-11 ¶9-10

Jekɔb bin bia bɔku prɔblɛm dɛn. Tu pan Jekɔb in bɔypikin dɛn we na Simiɔn ɛn Livay, bin briŋ disgres pan di famili ɛn Jiova in nem. Dɔn bak, Jekɔb in wɛf we i rili lɛk, we na Rechɛl, bin day we i bin de bɔn dɛn sɛkɔn pikin. Ɛn bikɔs tin fɔ it bin rili shɔtin na di land, Jekɔb bin muf go na Ijipt we i bin dɔn ol. (Jɛn. 35:16-19; 37:28; 45:9-11, 28) Pan ɔl di prɔblɛm dɛn we bin mit Jekɔb, i nɔ ɛva lɛf fɔ put fet pan Jiova ɛn In prɔmis dɛn. Ɛn Jiova bin sho Jekɔb se I gladi fɔ am. Fɔ ɛgzampul, Jiova bin blɛs Jekɔb wit bɔku prɔpati. Ɛn jɔs tink bɔt aw Jekɔb bin sho Jiova se i rili gɛt tɛnki we i bin si in bɔypikin Josɛf bak; i bin tink se Josɛf dɔn day fɔ lɔng tɛm. Di tayt padi biznɛs we Jekɔb bin gɛt wit Jiova bin ɛp am fɔ bia in prɔblɛm dɛn. (Jɛn. 30:43; 32:9, 10; 46:28-30) We wi kɔntinyu fɔ gɛt tayt padi biznɛs wit Jiova, wisɛf go ebul fɔ bia prɔblɛm dɛn we wi nɔ de ɛkspɛkt. w23.04 15 ¶6-7

Insay Sam 23, Devid bin sho di kayn kɔnfidɛns we i gɛt fɔ se Jiova lɛk am ɛn i bisin bɔt am. I bin tɔk bɔt di tayt padi biznɛs we de bitwin in ɛn Jiova we na in Shɛpad. Devid bin fil sef we i alaw Jiova fɔ dayrɛkt am, ɛn i bin abop pan Am wit ɔl in at. I bin no se Jiova go kɔntinyu fɔ lɛk am te i day. Wetin mek Devid bin gɛt dis kayn kɔnfidɛns? Devid bin fil se i gɛt ɔl wetin i nid bikɔs Jiova bin de gi am wetin i nid ɔltɛm. Devid bin ɛnjɔy tayt padi biznɛs bak wit Jiova, ɛn Jiova bin gladi fɔ am. Na dat mek i bin no se ilɛk wetin go apin to am leta, Jiova go kɔntinyu fɔ gi am ɔl wetin i nid. Bikɔs Devid bin abop se Jiova lɛk am ɛn i go kia fɔ am, dat bin ɛp am fɔ mek i nɔ wɔri. Bifo dat, i bin gɛt tru tru gladi-at ɛn satisfay maynd.​—Sam 16:11. w24.01 29 ¶12-13

Frɔm Wɔl Wɔ II, Jiova in pipul dɛn dɔn gɛt fridɔm fɔ du di prichin wok na bɔku kɔntri dɛn. Infakt, di prichin wok dɔn rili go bifo. Tide, di Gɔvnin Bɔdi mɛmba dɛn de kɔntinyu fɔ abop pan Krays fɔ mek i gayd dɛn. Dɛn want fɔ mek di dayrɛkshɔn dɛn we dɛn de gi di brɔda ɛn sista dɛn gri wit wetin Jiova want. Ɛn dɛn de yuz di sakit ovasia ɛn ɛlda dɛn fɔ dayrɛkt di kɔngrigeshɔn dɛn. Anɔyntɛd ɛlda dɛn de na Krays in “raytan.” (Rɛv. 2:1) As wi ɔl no, dɛn ɛlda dɛn ya nɔ pafɛkt ɛn dɛn kin mek mistek dɛn. Tɛm dɛn bin de we Mozis ɛn Jɔshwa bin de mek mistek dɛn, ɛn di apɔsul dɛnsɛf bin de mek mistek. (Nɔm. 20:12; Jɔsh. 9:14, 15; Rom. 3:23) Bɔt stil, Krays de tek tɛm fɔ gayd di slev we fetful ɛn di ɛlda dɛn, ɛn na dat i go kɔntinyu fɔ du. (Mat. 28:20) So wi gɛt gud rizin fɔ abop pan di wan dɛn we i dɔn pik fɔ de bifo fɔ dayrɛkt wi. w24.02 23-24 ¶13-14

Tide, wi kin mek Jiova gladi we wi de tɔk bɔt am di kayn we we de sho se wi gɛt tɛnki ɛn wi rili lɛk am. We wi de prich, wi fɔ mɛmba se di men rizin we mek wi de du dis wok na fɔ ɛp ɔda pipul dɛn fɔ kam nia Jiova ɛn fɔ fil di sem we aw wi de fil bɔt wi Papa we gɛt lɔv. (Jems 4:8) Wi kin gladi fɔ sho pipul dɛn aw di Baybul tɔk bɔt Jiova. Di Baybul se i gɛt lɔv, i de du tin tret, i gɛt sɛns, pawa, ɛn ɔda fayn fayn kwaliti dɛn. Wi de prez Jiova bak ɛn mek i gladi bay we wi de tray tranga wan fɔ falamakata am. We wi de du dat, wi de sho se wi difrɛn frɔm pipul dɛn na dis wikɛd wɔl. Pipul dɛn go notis se wi difrɛn ɛn dɛn go wɔnda wetin mek. (Mat. 5:14-16) As wi de tɔk wit dɛn ɛvride, wi go ebul fɔ ɛksplen wetin mek wi de biev di we aw wi de biev. Dis kin mek di wan dɛn we want fɔ no di trut kam nia wi Gɔd. We wi de prez Jiova dɛn we dɛn ya, wi de mek i gladi.​—1 Tim. 2:3, 4. w24.02 10 ¶7

Fɔ mek yu go bi machɔ Kristian, yu nid fɔ lan fɔ du tin dɛn we go ɛp yu na layf. Dis go ɛp yu fɔ mek yu go ebul fɔ du wok dɛn na di kɔngrigeshɔn, fɔ ebul gɛt wok fɔ sɔpɔt yusɛf ɔ yu famili, ɛn fɔ gɛt tayt padi biznɛs wit ɔda pipul dɛn. Fɔ ɛgzampul lan fɔ rid ɛn rayt fayn fayn wan. Di Baybul se bɛtɛ de fala man we de fɛn tɛm fɔ rid Gɔd in Wɔd ɛn tink gud gud wan bɔt am, ɛn i de gladi. (Sam 1:1-3.) We i de rid di Baybul ɛvride, i go kam fɔ no aw Jiova de tink ɛn dis go ɛp am fɔ tink di rayt we ɛn lan fɔ aplay di Skripchɔ dɛn. (Prɔv. 1:3, 4) Wi brɔda ɛn sista dɛn nid man dɛn we ebul fɔ yuz di Baybul fɔ tich ɛn gi advays we go ɛp dɛn. If yu sabi rid ɛn rayt fayn fayn wan, yu go ebul fɔ pripia fayn fayn tɔk ɛn kɔmɛnt dɛn we go bɛnifit ɔda pipul dɛn ɛn ɛp dɛn fɔ gɛt mɔ fet. Yu go ebul bak fɔ tek not dɛn we go ɛp yu fɔ gɛt fet mɔ ɛn mɔ ɛn fɔ ɛnkɔrej ɔda pipul dɛn. w23.12 26-27 ¶9-11

Ɛnitɛm yu bigin fɔ fred, tink gud gud wan bɔt wetin Jiova go du tumara bambay we Setan nɔ go de igen. Wan dɛmɔnstreshɔn na di 2014 kɔnvɛnshɔn program tɔk bɔt wan papa de ɛksplen to in famili aw di wɔd dɛn na 2 Timoti 3:1-5 go bi if dɛn vas dɛn ya bin de tɔk bɔt aw layf go tan lɛk na Paradays. I bin se: “Insay di nyu wɔl, gladi-at go de ɔlsay. Pipul dɛn go lɛk dɛn kɔmpin dɛn, dɛn go lɛk di trut, dɛn nɔ go de du tin pasmak, dɛn go put dɛnsɛf dɔŋ, dɛn go de prez Gɔd, dɛn go de obe dɛn mama ɛn papa dɛn, dɛn go gɛt tɛnki, dɛn nɔ go de kɔmɔt biɛn dɛn kɔmpin dɛn, dɛn go [rili] lɛk dɛn famili, dɛn go de gri wit ɔda pipul dɛn, dɛn nɔ go de pwɛl pɔsin in nem, dɛn go ebul kɔntrol dɛnsɛf, dɛn nɔ go wayl, dɛn go lɛk fɔ du gud, dɛn go bi pipul dɛn we ɔda pipul dɛn kin abop pan, dɛn nɔ go trangayes, dɛn nɔ go prawd, dɛn nɔ go lɛk ɛnjɔymɛnt bɔt dɛn go lɛk Gɔd, dɛn go de sav Gɔd ɛn liv dɛn layf di we aw i want; miks wit dɛn kayn pipul dɛn de.” Yu kin tɔk bɔt aw layf go tan lɛk na di nyu wɔl wit yu famili ɔ kɔmpin Kristian dɛn? w24.01 6 ¶13-14

Wi gladi fɔ no se Jiova gladi fɔ in pipul dɛn! Di Baybul se: “Jiova gladi fɔ in pipul dɛn.” (Sam 149:4) Bɔt sɔntɛnde, sɔm pipul dɛn at kin pwɛl pasmak ɛn dat kin mek dɛn dawt if Jiova gladi fɔ dɛn. Bɔku pan Jiova in fetful savant dɛn we di Baybul tɔk bɔt bin dɔn fil da sem we de. (1 Sam. 1:6-10; Job 29:2, 4; Sam 51:11) Di Baybul sho klia wan se mɔtalman dɛn we nɔ pafɛkt go ebul mek Jiova gladi fɔ dɛn. Aw? Wi fɔ sho se wi gɛt fet pan Jizɔs ɛn baptayz. (Jɔn 3:16) We wi du dɛn tin dɛn ya, wi de sho ɔda pipul dɛn se wi dɔn ripɛnt fɔ wi sin dɛn ɛn wi dɔn prɔmis fɔ du wetin Gɔd want. (Akt 2:38; 3:19) Jiova de gladi we wi du dɛn tin dɛn ya fɔ mek wi go gɛt tayt padi biznɛs wit am. Wans wi du wi bɛst fɔ kip wi prɔmis fɔ se wi go sav am, Jiova go gladi fɔ wi ɛn i go si wi as in tayt padi dɛn.​—Sam 25:14. w24.03 26 ¶1-2

Wi go ebul fɔ falamakata di disaypul dɛn if di gɔvmɛnt tɛl wi se wi fɔ stɔp fɔ prich. Wi go ebul gɛt kɔnfidɛns se Jiova go ɛp wi fɔ du wi prichin wok. Pre fɔ gɛt maynd ɛn sɛns ɛn fɔ mek Jiova ɛp yu fɔ bia prɔblɛm dɛn. Bɔku pan wi de sɔfa bikɔs wi gɛt wɛlbɔdi prɔblɛm ɔ wi at rili pwɛl, pɔsin we wi lɛk dɔn day, wi gɛt famili prɔblɛm we nɔ izi, pipul dɛn de mek wi sɔfa, ɔ wi gɛt ɔda prɔblɛm. Ɛn tin dɛn lɛk pandɛmik ɛn wɔ dɔn mek bɔku pan dɛn prɔblɛm dɛn ya tranga mɔ fɔ bia. Pre to Jiova ɛn tɛl am ɔl wetin de na yu at. Tɛl am bɔt wetin de apin to yu jɔs lɛk aw yu go tɛl yu tayt padi. Biliv tranga wan se Jiova “go mɔs ɛp yu.” (Sam 37:3, 5) We wi nɔ taya fɔ pre, dat go ɛp wi fɔ “bia we [wi] gɛt prɔblɛm.” (Rom. 12:12) Jiova no wetin de apin to in savant dɛn, “i de yɛri we dɛn kray to am.”​—Sam 145:18, 19. w23.05 5-6 ¶12-15

Wi nid fɔ no “wetin Jiova want” we wi de disayd fɔ du impɔtant tin dɛn ɛn du tin dɛn we gri wit wetin i want. (Ɛfi. 5:17) We wi tray fɔ no Baybul prinsipul dɛn we gɛt sɔntin fɔ du wit wetin wi want fɔ disayd, wi de sho se wi want fɔ no aw Gɔd de tink bɔt di tin we wi want fɔ disayd. Dɔn we wi aplay in prinsipul dɛn, dat go mek wi disayd fɔ du di rayt tin dɛn. Setan we na wi ɛnimi ɛn we di Baybul kɔl “di wikɛd wan,” want mek wi bizi de rɔnata tin dɛn na di wɔl te wi nɔ gɛt tɛm fɔ sav Gɔd. (1 Jɔn 5:19) I go izi fɔ mek pɔsin we na Kristian stat fɔ pe atɛnshɔn pan mɔni, buk lanin, ɔ wok ɛn nɔ pe atɛnshɔn pan di tin dɛn we i nid fɔ du fɔ sav Jiova. We dat apin, i de sho se i dɔn alaw di we aw di wɔl de tink fɔ afɛkt am. As wi ɔI no, dɛn tin dɛn de nɔ bad, bɔt dɛn nɔ fɔ ɛva bi di tin dɛn we impɔtant pas ɔl na wi layf. w24.03 24 ¶16-17