“Mek Yu Rul Wi”—Ustɛm Dat Go Apin?

1, 2. (a) Wetin kin mek wi nɔ ebul fɔ si di tin dɛn we de nia wi? (b) Wetin wi no bɔt Gɔd in Kiŋdɔm?

ƐNITƐM we sɔntin apin, we di pipul dɛn we si am de tɛl ɔda pipul dɛn bɔt da tin de, ɔlman kin gɛt in yon we fɔ tɔk bɔt di tin we apin. Semweso, if pɔsin go to dɔktɔ ɛn di dɔktɔ tɛl am wetin du am, nɔto ɔltin di pɔsin kin ebul ɛksplen; i go fɔgɛt af-af tin dɛn. Ɔ pɔsin go de fɛn in ki ɔ in glasis, pan ɔl we dɛn go de nia am. Sɔm pipul dɛn we kin stɔdi bɔt mɔtalman, se pɔsin nɔ kin si usay sɔntin de, ɔ kin fɔgɛt sɔntin, bikɔs in maynd kin de pan ɔda tin. Dɛn se dat na di we aw wi bren de wok.

² Di sem tin de apin to bɔku pipul dɛn tide. I tan lɛk se dɛn nɔ kin si di tin dɛn we de apin na di wɔl. Dɛn go gri se di tin dɛn we de apin na di wɔl dɔn rili chenj frɔm 1914, bɔt dɛn nɔ ebul ɔndastand wetin rili mek dɛn tin ya de apin. Bɔt bikɔs wi de stɔdi di Baybul, wi no se Gɔd in Kiŋdɔm bigin rul insay 1914 ɛn na da tɛm de Jizɔs bi Kiŋ na ɛvin. Wi no bak se difrɛn difrɛn tin dɛn gɛt fɔ apin fɔ mek Gɔd go ansa wi prea fɔ se: “Mek yu rul wi; mek wetin yu want, bi na dis wɔl, lɛkɛ aw i de bi na ɛvin.” (Mat. 6:10) Wan pan dɛn tin ya na we Gɔd go pul ɔl di bad pipul dɛn na di wɔl. Na we dat go dɔn apin fɔs, na in wetin Gɔd want, go bi na di wɔl lɛk aw i de bi na ɛvin.

3. Us bɛnifit wi go gɛt we wi de stɔdi Gɔd in Wɔd?

³ Bikɔs wi de stɔdi Gɔd in Wɔd ɔltɛm, dat go mek wi ebul fɔ ɔndastand se di tin dɛn we di Baybul bin tɔk bɔt, de rili apin tide. Bɔt plɛnti pipul dɛn nɔ no dis! Dɛn jɔs de yagba nɔmɔ fɔ wetin dɛn nid te dɛn nɔ ebul fɔ si di tin dɛn we sho se Krays bigin fɔ rul insay 1914. Dɛn nɔ ebul fɔ si bak se i nɔ go te igen, Gɔd go kam pul ɔl di bad pipul dɛn kɔmɔt na di wɔl. I go fayn mek wi tink bɔt dis kwɛstyɔn: If wi dɔn de sav Gɔd fɔ lɔng tɛm naw, wi stil biliv se i nɔ go te igen di wɔl go dɔn ɛn di tin dɛn we de apin na di wɔl de sho se dat na tru? If i nɔ te yet we wi dɔn de sav Gɔd, wetin na di tin we wi de tink bɔt ɔltɛm? I go bi se wi ɔl ansa nɔ go bi di sem. Bɔt ilɛk wetin go bi wi ansa, i go fayn mek wi tɔk bɔt tri impɔtant rizin dɛn we fɔ mek wi biliv tranga wan se i nɔ go te igen, Gɔd in Kiŋ go du ɔda tin dɛn bak fɔ mek shɔ se ɔl wetin Gɔd want fɔ di wɔl, bi.

DI MAN DƐN WE DE RAYD ƆS DƆN KAM

4, 5. (a) Wetin Jizɔs dɔn de du frɔm 1914? (Luk di pikchɔ nia dis atikul in taytul.) (b) Wetin di tri man dɛn we de rayd ɔs min? Wetin dɔn apin frɔm we dɛn man ya bigin rayd?

⁴ Na insay 1914 Jizɔs Krays bin bi Kiŋ na ɛvin. Na in na di pɔsin we di Baybul se de rayd wan wayt ɔs. As i bi Kiŋ so, na de i bigin fɛt sɔm wɔ dɛn. Wetin mek i fɛt dɛn wɔ ya? I du am so dat leta i go pul ɔl di bad bad tin dɛn we de apin na di wɔl. (Rid Rɛvɛleshɔn 6:1, 2.) Di tin dɛn we Rɛvɛleshɔn chapta 6 tɔk se go apin, mek wi no se afta Gɔd in Kiŋdɔm bigin fɔ rul, bad bad tin dɛn go de apin na di wɔl. Sɔm pan dɛn tin ya na wɔ, angri, sik, ɛn ɔda tin dɛn we de mek pipul dɛn day. Na dɛn tin ya di Baybul min we i tɔk bɔt tri man dɛn we de rayd ɔs biɛn Jizɔs Krays.—Rɛv. 6:3-8.

⁵ Pan ɔl we di wan dɛn we de rul di wɔl de tray fɔ mek pis de na di wɔl, di Baybul se wan pan dɛn ɔs ya go “briŋ wa kam na [di] wɔl.” Na frɔm Wɔl Wɔ Wan ɔl dɛn bad bad wɔ dɛn we de apin ɔlsay na di wɔl, bigin. Pan ɔl we mɔtalman dɔn de mek ɛn du fayn fayn tin dɛn frɔm 1914, bɔku pipul dɛn stil de day bikɔs dɛn nɔ gɛt bɛtɛ tin fɔ it. Apat frɔm dat, ɔda tin dɛn de bak we kin mek plɛnti plɛnti pipul dɛn kin day ɛvri ia. Sɔm pan dɛn tin ya na bad bad sik dɛn, tin dɛn lɛk atkwek, flɔd, ebi ebi briz, ɛn plɛnti ɔda bad bad tin dɛn. Di we aw dɛn tin ya de apin naw dɔn pas di we aw dɛn bin de apin trade. We dɛn tin ya kin apin, yu kin tink gud wan bɔt wetin mek dɛn de apin?

6. Udat dɛn bin ebul no se di tin dɛn we di Baybul tɔk bɔt, dɔn apin? Wetin dis bin mek dɛn du?

⁶ We Wɔl Wɔ Wan ɛn wan sik we dɛn kɔl Spanish flu bin kam, bɔku pipul dɛn nɔ bin rili no wetin de apin. Bɔt dɛn Kristian we Gɔd dɔn anɔynt fɔ rul na ɛvin bin dɔn de wet fɔ mek 1914 kam. Dɛn pipul ya bin no se na da tɛm de di Baybul min we i se “dɛn pipul we nɔ sabi Gɔd, go . . . kɔmɔt na pawa.” (Lyuk 21:24) Dɛn pipul we Gɔd dɔn anɔynt fɔ rul na ɛvin nɔ bin tu shɔ bɔt wetin rili gɛt fɔ apin da tɛm de. Bɔt dɛn bin no se insay 1914, impɔtant tin dɛn go apin. So as dɛn no se wetin di Baybul tɔk dɔn apin, dɛn bigin fɔ tɛl ɔda pipul dɛn se Gɔd in Kiŋdɔm dɔn bigin fɔ rul na ɛvin. Bɔku pipul dɛn na plɛnti say dɛn na di wɔl nɔ bin gladi we di Kristian dɛn bin de prich to ɔda pipul dɛn bɔt wetin de apin na di wɔl. So dɛn tray fɔ stɔp dɛn. Dat na wan pan di tin dɛn we di Baybul bin se go apin. Frɔm da tɛm de, dɛn bad pipul ya kɔntinyu “fɔ put [di Kristian] dɛn pan nambara.” Dɛn bin de bit di Kristian dɛn, put dɛn na jel, shut dɛn, ɛng dɛn, ɔ kɔt dɛn ed.—Sam 94:20; Rɛv. 12:15.

7. Wetin mek bɔku pipul dɛn nɔ no wetin di tin dɛn we de apin na di wɔl, min?

⁷ Bɔku tin dɛn de apin naw we de sho se Gɔd in Kiŋdɔm dɔn bigin fɔ rul na ɛvin. Bɔt wetin mek bɔku pipul dɛn nɔ ebul no dat? Wetin mek dɛn nɔ ebul fɔ no se di tin dɛn we de apin na di wɔl, na tin dɛn we di Baybul bin dɔn tɔk se go apin, jɔs lɛk aw Gɔd in pipul dɛn dɔn de prich? I go bi se na di tin dɛn we dɛn de si, na in nɔmɔ dɛn biliv pan. (2 Kɔr. 5:7) Ɔ, di tin dɛn we dɛn de yagba fɔ, de mek dɛn nɔ de si wetin Gɔd de du. (Mat. 24:37-39) I kin bi se bak na di lay lay tin dɛn we Setan de du, de pul dɛn maynd kɔmɔt pan Gɔd. (2 Kɔr. 4:4) Fɔ mek pɔsin go rili no di tin dɛn we de apin, i fɔ biliv pan Gɔd. Wi fɔ rili gladi bikɔs wi no wetin mek bɔku tin dɛn de apin na di wɔl!

WIKƐD PIPUL DƐN GO DE WƆS MƆ ƐN MƆ

8-10. (a) Aw wi no se di tin dɛn we de na Sɛkɛn Lɛta To Timoti 3:1-5 de apin? (b) Wetin mek wi se di wɔl dɔn go frɔm bad to wɔs?

⁸ Di sɛkɔn rizin we mek wi no se i nɔ go te igen Gɔd in Kiŋdɔm go du fayn fayn tin dɛn na di wɔl, na bikɔs di wikɛd tin dɛn we de apin na di wɔl, go de wɔs mɔ ɛn mɔ. Fɔ lɛk wan ɔndrɛd ia so naw, di tin dɛn we di Baybul tɔk na Sɛkɛn Lɛta To Timoti 3:1-5, de apin. Ɛn di we aw dɛn tin ya de apin naw, dɔn pas di we aw dɛn bin de apin trade. Yusɛf gri wit dat? Lɛ wi luk sɔm ɛgzampul dɛn we de sho dis.—Rid Sɛkɛn Lɛta To Timoti 3:1, 13.

⁹ Di tin dɛn we pipul dɛn bin de si se i bad fɔ du insay dɛn 1940 ɔ 1950, na in pipul dɛn de du tide na wokples, ɔ fɔ ɛnjɔy dɛnsɛf, ɔ pan spɔt. Fri layf ɛn fɛt fɛt de ɔlsay naw na di wɔl. Pipul dɛn de du bad bad tin dɛn fɔ sho se dɛn bad pas ɔda pipul dɛn. Di tin dɛn we pipul dɛn bin de si se i bad fɔ wach na tɛlivishɔn insay dɛn 1950, na in naw plɛnti famili dɛn de wach. Ɛn bɔku pipul dɛn nɔ tink se i bad we man de mared in kɔmpin man, ɛn we uman de mared in kɔmpin uman. Ɔda pipul dɛn ivin want fɔ falamakata di we aw dɛn pipul ya de liv dɛn layf. Wi rili gladi we Gɔd mek wi no wetin i want wi fɔ du.—Rid Jud In Lɛta 14, 15.

¹⁰ Di tin dɛn we yɔŋ pipul dɛn bin de du insay dɛn 1950 we pipul dɛn go se na bad abit, na in plɛnti yɔŋ pipul dɛn de du tide. Fɔstɛm, mama ɛn papa dɛn bin de fred fɔ mek dɛn pikin dɛn nɔ smok sigrɛt, drink rɔm, ɔ dans dɛn rud dans. Bɔt tide, wi de yɛri se pikin dɛn de du ɔl dɛn tin dɛn de. Fɔ ɛgzampul, wan skulpikin we ol 15 ia, bin shut in kɔmpin dɛn na klas. Tu pan dɛn bin day, ɛn 13 ɔda wan dɛn bin damej. Sɔm yɔŋ pipul dɛn we chak, bit wan titi we ol nayn ia te dɛn kil am; dɔn dɛn bit in papa ɛn in kɔzin. Fɔ lɛk tɛn ia so naw, af pan ɔl di bad bad tin dɛn we kin apin na wan kɔntri na Eshia, na yɔŋ pipul dɛn kin du am. Dɛn nyus ya we wi kin yɛri, kin mek wi no se fɔ tru di wɔl dɔn go frɔm bad to wɔs.

11. Wetin mek bɔku pipul dɛn nɔ ebul fɔ no se di wɔl dɔn go frɔm bad to wɔs?

¹¹ Di apɔsul Pita bin se: “Wɛn di wɔl want dɔn, pipul go kam we go de laf una ɛn mek una ful. Dɛn go de du wetin dɛn at gi dɛn fɔ du. Dɛn go de se, ‘We di pɔsin we dɛn bin se go kam? Frɔm we wi grampapa papa dɛn day te tide natin nɔ chenj na di wɔl; natin nɔ chenj frɔm di tɛm we Gɔd mek di wɔl!’” (2 Pit. 3:3, 4) Wetin mek sɔm pipul dɛn kin biev da we de? I go bi se di mɔ we pipul dɛn de si sɔntin de apin, na di mɔ dɛn de yus to am, ɛn dɛn nɔ de tek am siriɔs igen we i apin. Pipul dɛn nɔ kin sɔprayz we plɛnti pipul dɛn nɔ de drɛs ɛn biev fayn igen, bikɔs i tan lɛk se dɛn dɔn yus to am. Bɔt dɛn kin rili sɔprayz if dɛn fambul we bin de drɛs ɛn biev fayn, bigin drɛs ɛn biev lɛk aw plɛnti pipul dɛn de du tide. Nɔto bikɔs pipul dɛn nɔ kin sɔprayz we dɛn tin ya apin, min se dɛn tin ya nɔ bad. Ilɛk pipul dɛn sɔprayz ɔ dɛn nɔ sɔprayz, dɛn tin ya stil bad.

12, 13. (a) Wetin mek wi at nɔ fɔ pwɛl we wi de si di we aw bad tin dɛn de apin na di wɔl? (b) Wetin go mek wi ebul dil wit ‘di tranga tɛm’ we wi de so naw?

¹² Di apɔsul Pɔl bin se we di wɔl want dɔn, “di tɛm go traŋa.” (2 Tim. 3:1) Bɔt dat nɔ min se wi nɔ go ebul fɔ dil wit di tranga tɛm. So wi nɔ fɔ jɔs mek lɛk se dɛn tin ya nɔ de apin. Wetin go ɛp wi fɔ dil wit di tranga tɛm we wi de so naw? Jiova Gɔd, in oli spirit, ɛn di brɔda ɛn sista dɛn na di kɔngrigeshɔn, go ɛp wi fɔ tinap tranga wan we ɛni bad tin mit wi. Wi go ebul fɔ bi fetful to Jiova. Na in nɔmɔ de gi wi di “pawa we di Spirit de gi.”—2 Kɔr. 4:7-10.

¹³ I fayn fɔ no se bifo Pɔl bigin tɔk bɔt di tin dɛn we go apin we di wɔl want dɔn, i se: “Nɔ fɔgɛt dis.” Dɛn wɔd dɛn de mek wi biliv tranga wan se ɔl di tin dɛn we Pɔl tɔk, go rili apin. Wi no gud gud wan se pipul dɛn we nɔ biliv Gɔd, de kɔntinyu fɔ du bad mɔ ɛn mɔ te di tɛm we Jiova go kam pul dɛn kɔmɔt. Pipul dɛn we de stɔdi bɔt tin dɛn we dɔn apin, dɔn si se ɔlsay na di wɔl pipul dɛn abit nɔ fayn igen, ɛn di we aw dɛn de drɛs, dɔn bad. Pipul dɛn abit ɛn di we aw dɛn de drɛs, nɔ ɛva bad lɛk aw i de tide. Bɔku pipul dɛn nɔ de tink bɔt wetin mek dɛn tin ya de apin. Bɔt di tin dɛn we dɔn de apin frɔm 1914, fɔ mek wi biliv se i nɔ go te igen Gɔd in Kiŋdɔm go kam chenj ɔltin we de bi na di wɔl.

BIFO DƐN PIPUL WE DE YA NAW, DAY

14-16. Wetin na di tɔd rizin we mek wi biliv se i nɔ go te igen Gɔd in Kiŋdɔm go bigin “rul wi”?

¹⁴ Di tɔd rizin we mek wi biliv tranga wan se i nɔ go te igen Gɔd in Kiŋdɔm go rul, gɛt sɔntin fɔ du wit Gɔd in pipul dɛn. Fɔ ɛgzampul, bifo Gɔd in Kiŋdɔm bigin rul na ɛvin, sɔm pipul dɛn we Gɔd dɔn anɔynt fɔ rul na ɛvin, bin rili de du Gɔd in wok. Wetin dɛn pipul ya bin du we sɔm pan di tin dɛn we dɛn bin tink se go apin insay 1914, nɔ apin? Bɔku pan dɛn bin kɔntinyu fɔ sav Jiova fɔ sho se dɛn de fɔ am, pan ɔl we bad bad tin dɛn bin de mit dɛn. As tɛm de go, bɔku pan dɛn wan we Gɔd bin dɔn anɔynt, bin dɔn day ɛn go na ɛvin.

¹⁵ We Jizɔs bin de tɔk bɔt di tin dɛn we go de apin we di wɔl want dɔn, i tɔk se: ”Ɔl dɛn tin ya mɔs bi bifo dɛn pipul we de ya naw, day.” (Rid Matyu 24:33-35.) Wi no se we Jizɔs bin tɔk bɔt “dɛn pipul we de ya naw,” i bin de tɔk bɔt tu grup pan di Kristian dɛn we Gɔd dɔn anɔynt fɔ rul na ɛvin. Di fɔs grup we i bin tɔk bɔt na di wan dɛn we bin de insay 1914, we bin rili ɔndastand se na da ia de di tin we Jizɔs bin se go apin, bigin apin. Dɛn pipul ya bin dɔn bɔn bifo 1914, ɛn Gɔd bin anɔynt dɛn wit in spirit insay 1914 ɔ bifo 1914.—Rom 8:14-17.

¹⁶ Di sɛkɔn grup pan di wan dɛn we Jizɔs kɔl “dɛn pipul we de ya naw,” na dɛn pipul we de na di fɔs grup, dɛn kɔmpin. Dɛn bin de liv insay di tɛm we di wan dɛn na di fɔs grup bin stil de na di wɔl, bɔt na afta 1914 Gɔd bin anɔynt dɛn wit oli spirit. So, nɔto ɔl dɛn pipul we Gɔd dɔn anɔynt fɔ rul na ɛvin we de naw, de pan di wan dɛn we Jizɔs kɔl “dɛn pipul we de ya naw.” Tide, di wan dɛn we de na di sɛkɔn grup dɔn ol. Bɔt di tin we Jizɔs tɔk na Matyu 24:34 mek wi biliv tranga wan se sɔm pan “dɛn pipul we de ya naw” nɔ go day, sote wi bigin si ɔl dɛn trɔbul we Jizɔs bin se go apin. Dis fɔ mek wi biliv se na smɔl tɛm nɔmɔ lɛf bifo Gɔd in Kiŋdɔm go kam pul ɔl di bad bad tin dɛn na di wɔl ɛn mek di wɔl bi Paradays.—2 Pit. 3:13.

KRAYS GO DƆN FƆ WIN JISNƆ

17. Wetin di tri rizin dɛn we wi dɔn tɔk bɔt ɛp wi fɔ no?

¹⁷ Wetin di tri rizin dɛn we wi dɔn tɔk bɔt, ɛp wi fɔ no? Jizɔs bin tɔk se wi nɔ go no di rayt tɛm we ɔl dis go bi; ɛn fɔ tru, wi nɔ no. (Mat. 24:36; 25:13) Bɔt wi ebul fɔ no se we Pɔl bin tɔk bɔt “di tɛm,” i bin min di tɛm jɔs bifo di wɔl dɔn. (Rid Lɛta Fɔ Rom 13:11.) Na insay da tɛm de wi de so naw. We wi de tink gud gud wan bɔt di tin dɛn we di Baybul bin tɔk bɔt, ɛn di tin dɛn we Jiova Gɔd ɛn Jizɔs Krays de du, dat go mek wi ebul fɔ si klia wan se i nɔ go te igen di wɔl go dɔn.

18. Wetin gɛt fɔ apin to di wan dɛn we nɔ de gri fɔ si di pawa we Jizɔs gɛt?

¹⁸ Di wan dɛn we nɔ de gri fɔ si di pawa we Jizɔs Krays gɛt, go gɛt fɔ no se nɔto di rayt tin dɛn de du. Dɛn nɔ go no wetin fɔ du we Jizɔs go kam fɔ pul ɔl di bad pipul dɛn kɔmɔt na di wɔl. Da tɛm de, bɔku pan dɛn go de fred ɛn dɛn go de ala se: “Udat go ebul sev insɛf?” (Rɛv. 6:15-17) Di ansa de na Rɛvɛleshɔn chapta 7. I se da tɛm de, Gɔd go rili “sev” di wan dɛn we i anɔynt fɔ rul na ɛvin ɛn di wan dɛn we gɛt fɔ de na di wɔl. I go du dat bikɔs i gladi fɔ dɛn. “Bɔku bɔku pipul” dɛn go sev we da big trɔbul go kam.—Rɛv. 7:9, 13-15.

19. Bikɔs wi ebul fɔ no se i nɔ go te igen di wɔl go dɔn, wetin dat go mek wi ɛnjɔy?

¹⁹ We wi de si di tin dɛn we di Baybul bin se go apin, de apin, wetin wi fɔ du? I rili fayn fɔ mek wi go de tink gud wan bɔt dɛn. Wetin mek? Di rizin na bikɔs dat go mek wi nɔ alaw di lay lay tin dɛn we Setan de mek pipul dɛn tɔk, pul wi maynd kɔmɔt pan di tin dɛn we de apin tide. Apat frɔm dat, i go mek wi ebul fɔ si di tru tru rizin we mek bad bad tin dɛn de apin so na di wɔl. I nɔ go te igen, Krays go dɔn fɔ win di wɔ fɔ pul bad kɔmɔt na di wɔl. (Rɛv. 19:11, 19-21) Na da tɛm de wi go ɛnjɔy ɔl di fayn fayn tin dɛn we Gɔd dɔn prɔmis fɔ du fɔ wi.—Rɛv. 20:1-3, 6; 21:3, 4.