“Una Go Mekɔp wan Kiŋdɔm Usay Una Go Bi Kiŋ ɛn Prist”

1, 2. Wetin mek Gɔd bin nid fɔ protɛkt di uman in pikin?

FƆ LƐ wi go no aw Jiova go du ɔl wetin i want, i go rili fayn fɔ lɛ wi ɔndastand di fɔs tin na di Baybul we i bin tɔk se go apin. We Gɔd bin de mek di prɔmis na di gadin we bin de na Idɛn, i tɔk se: “A go mek yu [Setan] ɛn di uman et unasɛf ɛn yu pikin ɛn di uman in pikin go et dɛnsɛf.” Di tin we Jiova tɔk afta dis, sho se dɛn go rili et dɛnsɛf. I se: “I [dat na di uman in pikin] go brus yu [Setan] na yu ed ɛn yu go brus am na in fut.” (Jɛn. 3:15) Di uman ɛn di snek go et dɛnsɛf so bad dat Setan go want fɔ du ɔl wetin i ebul fɔ kil di uman in pikin.

² Na dat mek wan pan di man dɛn we rayt di Sam buk bin pre fɔ Gɔd in pipul dɛn we i dɔn chuz. I pre to Gɔd se: “Yu ɛnimi dɛn vɛks ɛn de mek nɔys; di wan dɛn we et yu de mek prawd. Dɛn de ayd ɛn yuz kɔni kɔni we dɛn fɔ plan bad fɔ yu pipul dɛn; dɛn de ɛŋ ed fɔ du bad to di wan dɛn we yu lɛk. Dɛn de tɔk se: ‘Una kam, lɛ wi kil dɛn ɔl.’” (Sam 83:2-4.) So Gɔd bin nid fɔ protɛkt di famili we di uman in pikin fɔ kɔmɔt, so dat Setan nɔ go kil dɛn ɛn mek dɛn nɔ klin na Gɔd in yay. So fɔ protɛkt di uman in pikin, Jiova bin mek ɔda agrimɛnt dɛn fɔ sho se ɔl wetin i dɔn tɔk go apin.

WAN AGRIMƐNT WE GƆD MEK FƆ PROTƐKT DI PIKIN

3, 4. (a) Ustɛm di Lɔ agrimɛnt bigin? Wetin di Izrɛlayt dɛn bin gri fɔ du? (b) Wetin mek Gɔd bin mek dis Lɔ agrimɛnt wit dɛn?

³ As Ebraam, Ayzak, ɛn Jekɔb in pikin dɛn de bɔku mɔ ɛn mɔ, Jiova bin mek dɛn bi wan neshɔn. Dis neshɔn na di Izrɛlayt dɛn. Jiova bin yuz Mozis fɔ mek wan spɛshal agrimɛnt wit di Izrɛlayt dɛn we i bin gi dɛn di Lɔ. Ɛn di Izrɛlayt dɛn bin gri se dɛn go du ɔl wetin de na di agrimɛnt. Di Baybul tɔk se: “[Mozis] tek di buk we gɛt di agrimɛnt ɛn rid am lawd wan to di pipul dɛn. Ɛn di pipul dɛn tɔk se: ‘Wi rɛdi fɔ du ɔl wetin Jiova dɔn tɔk, ɛn wi go obe am.’ So Mozis tek di blɔd ɛn sɛn sɛn am pan di pipul dɛn ɛn tɛl dɛn se: ‘Dis blɔd de sho se Jiova dɔn mek agrimɛnt wit una fɔ ɔl dɛn wɔd ya we una dɔn tɔk.’”—Ɛks. 24:3-8.

⁴ Di Lɔ agrimɛnt bin bigin na Mawnt Saynay insay di ia 1513 bifo Krays. Na dis agrimɛnt bin mek di Izrɛlayt dɛn kam fɔ bi Gɔd in spɛshal pipul dɛn. So Jiova kam fɔ bi ‘dɛn Jɔj, dɛn Kiŋ, ɛn di Wan we de gi dɛn Lɔ.’ (Ayz. 33:22) Di tin dɛn we di Baybul tɔk bɔt di Izrɛlayt dɛn ɛp wi fɔ no wetin bin de apin to dɛn we dɛn bin de du wetin Gɔd want ɛn we dɛn nɔ bin de du wetin i want. Di Lɔ we Gɔd bi gi dɛn, bin se dɛn nɔ fɔ mared to pipul dɛn we de wɔship lay lay gɔd dɛn, ɛn dɛn nɔ fɔ put an pan lay lay wɔship. Gɔd bin mek dis lɔ fɔ protɛkt Ebraam in pikin dɛn so dat natin nɔ go mek dɛn nɔ klin na in yay.—Ɛks. 20:4-6; 34:12-16.

5. (a) Us chans di Lɔ agrimɛnt bin gi di Izrɛlayt dɛn? (b) Wetin mek Gɔd bin pul an pan di Izrɛlayt dɛn?

⁵ Di Lɔ agrimɛnt bin mek dɛn gɛt prist dɛn we bin de sav na Izrɛl. Dɛn prist ya bin de sho se tumara bambay ɔda prist dɛn go de we go wok fɔ mɔtalman bɛtɛ bɛtɛ wan. (Ibru 7:11; 10:1) Infakt, dis agrimɛnt bin gi di Izrɛlayt dɛn di chans fɔ “mekɔp wan kiŋdɔm usay [dɛn] go bi kiŋ ɛn prist.” Fɔ lɛ dɛn go gɛt dis spɛshal wok, i min se dɛn fɔ obe Jiova in lɔ dɛn. (Rid Ɛksodɔs 19:5, 6.) Bɔt di Izrɛlayt dɛn nɔ bin gri fɔ obe Jiova in lɔ. Bifo dɛn gladi fɔ di Mɛsaya in kam wan, we na di men pikin pan Ebraam in pikin dɛn, dɛn nɔ du am, bifo dat, dɛn nɔ gri fɔ biliv am. So dis bin mek Gɔd pul an pan dɛn.

6. Wetin di Lɔ bin ebul fɔ du?

⁶ Bikɔs di Izrɛlayt dɛn nɔ bin gri fɔ du wetin Jiova want, dat bin mek dɛn nɔ bi kiŋ ɛn prist. Bɔt dis nɔ min se na di Lɔ bin gɛt prɔblɛm. Di Lɔ bin de fɔ protɛkt di pikin ɛn ɛp pipul dɛn fɔ no di Mɛsaya. As Krays kam so ɛn pipul dɛn no am, di wok we di Lɔ bin de du, dɔn. Na dat mek di Baybul se: “Na Krays ɛnd di Lɔ.” (Rom 10:4) Bɔt wan kwɛstyɔn de we stil lɛf fɔ ansa: Udat dɛn go gɛt di chans fɔ bi kiŋ ɛn prist? Jiova Gɔd dɔn mek wan ɔda agrimɛnt fɔ mek wan nyu neshɔn.

GƆD MEK WAN NYU NESHƆN

7. Wetin Jiova bin tɛl Jɛrimaya fɔ tɔk bɔt di nyu agrimɛnt?

⁷ Lɔng lɔng tɛm bifo di Lɔ agrimɛnt wit di Izrɛlayt dɛn dɔn, Jiova bin yuz di prɔfɛt Jɛrimaya fɔ tɛl di Izrɛlayt dɛn se i go mek “wan nyu agrimɛnt” wit dɛn. (Rid Jɛrimaya 31:31-33.) Dis nyu agrimɛnt go difrɛn frɔm di Lɔ agrimɛnt we Gɔd bin mek wit dɛn, bikɔs dis agrimɛnt nɔ go mek mɔtalman sakrifays animal fɔ lɛ Gɔd fɔgiv dɛn sin. Aw di nyu agrimɛnt go du dis?

8, 9. (a) Wetin Jizɔs in blɔd ebul fɔ du? (b) Us chans i bin gi to di wan dɛn we bin de na di nyu agrimɛnt? (Luk di pikchɔ nia dis atikul in taytul.)

⁸ Afta lɔng tɛm dɔn pas, Jizɔs bin bigin di Ivintɛm It wit in apɔsul dɛn fɔ lɛ dɛn go de mɛmba am. Dis bin apin Naysan 14, insay di ia 33. We Jizɔs bin de tɔk bɔt di wayn we de insay di kɔp, i bin tɛl in 11 fetful apɔsul dɛn se: “Dis kɔp min di nyu agrimɛnt we a mek wit mi blɔd, we a gɛt fɔ gi fɔ una sek.” (Lyuk 22:20) Di Baybul buk we na Matyu insɛf tɔk wetin Jizɔs bin se bɔt di wayn. I bin se: “Dis min mi ‘blɔd we a tek fɔ mek di agrimɛnt,’ we a gɛt fɔ mek dɛn kil mi so dat Gɔd go fɔgiv bɔku pipul dɛn sin.”—Mat. 26:27, 28.

⁹ Di blɔd we Jizɔs sakrifays na in mek di nyu agrimɛnt ol wata. Na wan tɛm nɔmɔ i bin gi in blɔd ɛn dis dɔn mek Gɔd go fɔgiv bɔku pipul dɛn sin dɛn sote go. Jizɔs nɔ de pan dis nyu agrimɛnt bikɔs i nɔ gɛt wan sin, so nid nɔ de fɔ lɛ Gɔd fɔgiv am. Bɔt Gɔd go yuz Jizɔs in blɔd fɔ fɔgiv Adam in pikin dɛn. Jizɔs in day wan mek we bak fɔ lɛ Gɔd yuz in oli spirit fɔ pik sɔm mɔtalman dɛn fɔ bi in “pikin dɛn.” (Rid Lɛta Fɔ Rom 8:14-17.) Na Gɔd in yay, dɛn nɔ go gɛt wan sin igen, so dɛn fiba Jizɔs we nɔ gɛt wan sin. Dɛn pipul ya we Gɔd dɔn anɔynt go “rul wit Krays” ɛn dɛn go gɛt di chans we di Izrɛlayt dɛn bin gɛt ɔnda di Lɔ. We di apɔsul Pita bin de tɔk bɔt di wan dɛn we go “rul wit Krays,” i bi se dɛn na ‘pipul dɛn we Gɔd dɔn chuz, dɛn na kiŋ ɛn prist dɛn, dɛn na oli neshɔn, dɛn na pipul dɛn we go gɛt spɛshal tin, so dat dɛn go tɔk wɔndaful tin dɛn bɔt di Wan we pul dɛn kɔmɔt na dak ɛn briŋ dɛn kam na in wɔndaful layt.’ (1 Pit. 2:9) Dis de sho se di nyu agrimɛnt rili impɔtant bikɔs i mek Jizɔs in disaypul dɛn kam fɔ bi Ebraam in ɔda pikin dɛn.

DI NYU AGRIMƐNT BIGIN FƆ WOK

10. Ustɛm di nyu agrimɛnt bigin fɔ wok? Wetin mek na da tɛm de i bigin fɔ wok?

¹⁰ Ustɛm di nyu agrimɛnt bigin fɔ wok? I nɔ bigin di tɛm we Jizɔs tɔk bɔt am di las nɛt we i bin de na di wɔl. Fɔ lɛ dis nyu agrimɛnt go bigin wok, Jizɔs bin nid fɔ day ɛn kɛr in pafɛkt layf we i sakrifays go na ɛvin ɛn gi am to Jiova. Pantap dat, di oli spirit bin nid fɔ kam pan di wan dɛn we gɛt fɔ “rul wit Krays.” So di nyu agrimɛnt bigin insay Pɛntikɔst 33 we oli spirit kam pan Jizɔs in disaypul dɛn.

11. Aw di nyu agrimɛnt bin ebul fɔ mek di Ju dɛn ɛn pipul dɛn we nɔto Ju bi Izrɛlayt dɛn na Gɔd in yay? Ɔmɔs pipul dɛn de pan di nyu agrimɛnt?

¹¹ We Jiova bin yuz Jɛrimaya fɔ tɛl di Izrɛlayt dɛn se I go mek wan nyu agrimɛnt wit dɛn, i sho se di Lɔ agrimɛnt we i bin mek wit dɛn “nɔ gɛt yus” igen. Bɔt da Lɔ agrimɛnt de nɔ bin dɔn in wok te di nyu agrimɛnt bigin fɔ wok. (Ibru 8:13) We di nyu agrimɛnt bigin, Gɔd bigin si di Ju pipul dɛn ɛn pipul dɛn we nɔto Ju ɛn we nɔ sakɔmsayz, di sem we, bikɔs na dɛn at dɛn “sakɔmsayz ɛn na Gɔd in spirit de mek dat bi, nɔto lɔ we dɛn rayt.” (Rom 2:29) We Gɔd mek dis nyu agrimɛnt wit dɛn, i put in lɔ dɛn “na dɛn maynd” ɛn “rayt dɛn na dɛn at.” (Ibru 8:10) Di wan dɛn we de pan dis nyu agrimɛnt na 144,000 pipul dɛn. Na dɛn na di nyu neshɔn we di Baybul kɔl “di Izrɛl we na Gɔd in yon.”—Gal. 6:16; Rɛv. 14:1, 4.

12. Aw di Lɔ agrimɛnt ɛn di nyu agrimɛnt fiba?

¹² Aw di Lɔ agrimɛnt ɛn di nyu agrimɛnt fiba? Jɔs lɛk aw di Lɔ agrimɛnt bin de bitwin Jiova ɛn di Izrɛlayt dɛn, na so di nyu agrimɛnt insɛf de bitwin Jiova ɛn di anɔyntɛd Kristian dɛn. Ɛn lɛk aw Mozis na bin di midulman fɔ di Lɔ agrimɛnt, na so Jizɔs insɛf na di Midulman fɔ di nyu agrimɛnt. Dɔn na animal blɔd bin mek di Lɔ agrimɛnt ol wata, semweso na Jizɔs in blɔd mek di nyu agrimɛnt ol wata. Ɛn lɛk aw di Lɔ agrimɛnt we Gɔd bin mek wit di Izrɛlayt dɛn bin mek dɛn ɔganayz ɔnda Mozis, na so di wan dɛn we de insay di nyu agrimɛnt ɔganayz ɔnda Jizɔs we na di Edman na di kɔngrigeshɔn.—Ɛfi. 1:22.

13, 14. (a) Aw di nyu agrimɛnt gɛt sɔntin fɔ du wit di Kiŋdɔm? (b) Wetin di anɔyntɛd Kristian dɛn nid so dat dɛn go ebul fɔ rul wit Krays na ɛvin?

¹³ Di nyu agrimɛnt gɛt sɔntin fɔ du wit di Kiŋdɔm bikɔs i go mek wan oli neshɔn we go gɛt di spɛshal wok fɔ bi kiŋ ɛn prist na ɛvin insay Gɔd in Kiŋdɔm. Na Ebraam in ɔda pikin dɛn go mekɔp dis neshɔn. (Gal. 3:29) So dis nyu agrimɛnt mek wi no se di agrimɛnt we Gɔd bin mek wit Ebraam go mɔs bi.

¹⁴ Wan ɔda tin de we wi fɔ no bɔt di Kiŋdɔm. Na di nyu agrimɛnt mek wi gɛt di anɔyntɛd Kristian dɛn ɛn na in mek dɛn gɛt fɔ “rul wit Krays.” Bɔt wan ɔda agrimɛnt de we dɛn nid we go alaw dɛn fɔ bi kiŋ ɛn prist wit Jizɔs na in Kiŋdɔm.

WAN AGRIMƐNT WE GO ALAW ƆDA PIPUL DƐN FƆ RUL WIT KRAYS

15. Us agrimɛnt Jizɔs bin mek wit in fetful apɔsul dɛn?

¹⁵ Afta Jizɔs dɔn fɔ it di Ivintɛm It wit in fetful apɔsul dɛn, i bin mek wan agrimɛnt wit dɛn. Dɛn kin kɔl dis agrimɛnt di Kiŋdɔm agrimɛnt. (Rid Lyuk 22:28-30.) Dis agrimɛnt nɔ tan lɛk dɛn ɔda agrimɛnt dɛn we Jiova bin de mek wit ɔda pipul dɛn. Dis agrimɛnt na Jizɔs insɛf sɛf bin mek am wit in anɔyntɛd brɔda dɛn. We Jizɔs bin tɔk se “jɔs lɛk aw mi Papa dɔn mek wan agrimɛnt wit mi,” i bin de tɔk bɔt di agrimɛnt we Jiova dɔn mek wit am fɔ bi “prist sote go jɔs lɛk Mɛlchizidɛk.”—Ibru 5:5, 6.

16. Wetin di Kiŋdɔm agrimɛnt bin du fɔ anɔyntɛd Kristian dɛn?

¹⁶ Jizɔs in 11 apɔsul dɛn bin ‘dɔn de wit am di tɛm we i de sɔfa.’ So dis agrimɛnt we Jizɔs mek wit in apɔsul dɛn bin ɛp dɛn fɔ no se dɛn go de wit am na ɛvin ɛn rul wit am as kiŋ ɛn prist. Bɔt nɔto dɛn 11 fetful apɔsul ya nɔmɔ go gɛt dis spɛshal wok. We di apɔsul Jɔn bin si Jizɔs insay wan vishɔn, Jizɔs bin tɛl am se: “A go mek di wan we tinap tranga wan te ɔltin dɔn, sidɔm wit mi na di say we a sidɔm fɔ rul.” (Rɛv. 3:21) So Jizɔs bin mek di Kiŋdɔm agrimɛnt wit di 144,000 anɔyntɛd Kristian dɛn. (Rɛv. 5:9, 10; 7:4) Dis agrimɛnt go alaw dɛn fɔ rul wit Jizɔs na ɛvin. Dis jɔs tan lɛk we uman mared to kiŋ ɛn jɔyn am fɔ rul. Na dis mek di Baybul se anɔyntɛd Kristian dɛn na Krays in “yawo” ɛn dɛn na “vajin we nɔ wande gɛt biznɛs wit man.” Ɛn dɛn gɛt fɔ mared to Krays.—Rɛv. 19:7, 8; 21:9; 2 Kɔr. 11:2.

BILIV TRANGA WAN PAN GƆD IN KIŊDƆM

17, 18. (a) Ɛksplen smɔl bɔt di siks agrimɛnt dɛn we gɛt fɔ du wit di Kiŋdɔm. (b) Wetin mek wi fɔ biliv tranga wan pan di Kiŋdɔm?

¹⁷ Ɔl di agrimɛnt dɛn we wi dɔn tɔk bɔt na dɛn tu atikul ya gɛt sɔntin fɔ du wit di Kiŋdɔm. (Luk di bɔks we se “Aw Gɔd Go Du Wetin I Want?” insay di atikul we de bifo dis wan) Ɔl di agrimɛnt dɛn we Gɔd mek fɔ di Kiŋdɔm sho wi se di Kiŋdɔm go mɔs du ɔl wetin Gɔd bin dɔn tɔk se i go du. So wi gɛt gud rizin fɔ biliv tranga wan se Gɔd go yuz di Kiŋdɔm we Jizɔs de rul fɔ mek wetin i want fɔ di wɔl ɛn mɔtalman, bi.—Rɛv. 11:15.

¹⁸ Wi nɔ nid fɔ dawt se di Kiŋdɔm nɔ go ebul fɔ sɔlv ɔl wi prɔblɛm dɛn. Wi fɔ biliv tranga wan se Gɔd in Kiŋdɔm go briŋ bɔku bɛnifit dɛn we mɔtalman go ɛnjɔy sote go. So i go fayn lɛ wi prich dis gud nyus wit zil to ɔda pipul dɛn!—Mat. 24:14.